Miakej taltikpakneminij kinemiliaj ke Dios taixyekantok nikan taltikpak. Sayoj ke komo nejon melauak yeskia, ¿onkaskia miak tajyouilis? (Deuteronomio 32:4, 5.) Tein melauj, Biblia tamachtia ke itech taltikpak taixyekantok se tekiuaj akin tel amo yolkuali. (Xikonixtajtolti 1 Juan 5:19.)

¿Uan keniuj nejon taixyekankej uelik moaxkatilij taixyekanalis nikan taltikpak? Keman peuak ininnemilis taltikpakneminij, se ángel, Satanás, kiixnamikik Dios uan kinolinij yekinika takat uan yekinika siuat maj no ijkon kichiuanij (Génesis 3:1-6). Takat uan siuat kiixpejpenkej kitajtolkakiskej, uan ijkon kikaujkej maj yejua kinixyekanaskia. Sayoj Dios akin nochi ueli kichiua kinamiki kinixyekanas taltikpakneminij, sayoj ke yejuatsin kineki maj yejuan kitakamatikan porin kitasojtaj (Deuteronomio 6:6; 30:16, 19). Tetayokoltij tikijtoskej ke tel miakej taltikpakneminij no ijkon kichiuanij kemej Adán uan Eva. (Xikonixtajtolti Apocalipsis [Revelación] 12:9.)

¿Kikauas Dios maj Satanás nochipaya taixyekana nikan taltikpak? Amo. Ta Dios kichiuas maj Jesucristo kiyektali nochi tein kijtakouani Satanás. (Xikonixtajtolti 1 Juan 3:8.)

Dios kimakani tanauatil Jesús maj kiixpolo Satanás (Romanos 16:20). Ompa, Dios kinixyekanas taltikpakneminij uan kichiuas maj nemikan ika yolpakilis uan yolseuilis kemej ipa kinekia. (Xikonixtajtolti Apocalipsis 21:3-5.)