A rebetok el chad a oumerang el kmo ngike el mera el Dios a mengedereder er tia el beluulechad. Engdi omko tiang a klemerang el tekoi, e ngera uchul me ngkmal klou a ringel er tia el chutem? (Duteronomi 32:4, 5) A doltirakl er a Biblia, e tia el beluulechad a ngar cheungel a klisichel a mekngit el chad.​—Monguiu er a 1 Johanes 5:19.

Ngmilekerang a mekngit el chad e nguu a klisiich el mo mengedereder er a klechad? Sera uchelel a reksi er a klechad, e a ta el anghel a mlo omtok er a Dios e dirrek el rirelleterir tirke el kot el obekel el mo omtok. (Genesis 3:1-6) Tirka el obekel a millilt el mo olengesenges er ngika el mlo omtok el anghel el Satan, e rirellii el mo mengedereder er tir. Ngike el Kot el Ngarbab el Dios a di ngii el tang a melemalt el mengedereder, engdi ngsoal a rechad a lolilt er a omengederederel e le ngbetik a rengrir er ngii. (Duteronomi 6:6; 30:16, 19) Engdi ngklengiterreng e le a ruumesingd el chad a mla mechetikaik el mo meruul er a osisiu el mekngit el omelilt el uai tirke el kot el obekel.​—Monguiu er a Ocholt 12:9.

A Dios ngmo mecherei a Satan me ngmelemolem er a mekngit el omengederederel? Ngdiak! Ngbai mo ousbech er a Jesus el mo mesmechokl aike el mekngit el bla leruul a Satan.​—Monguiu er a 1 Johanes 3:8.

A Dios a mo msang a klisichel a Jesus el mo okngemedii a Satan. (Rom 16:20) E a uriul, e a Dios a mo mengedereder er a klechad e dirrek el mo olutii a klechad el mo er a klengar el ngar er ngii a deurreng me a budech er ngii el di ua mle moktek er ngii er a uchei.​—Monguiu er a Ocholt 21:3-5.