Askha runakunan ninku: “Diosmi kay pachataqa kamachishan”, nispa. Ichaqa Dios kamachiqtin, ¿kanmanchu ñak’ariykuna? Manapunin riki (Deuteronomio 32:4, 5). Bibliaqa sut’itan willan kay pachapi kamachikuqqa Satanás kasqanta (leey 1 Juan 5:19).

¿Imaynapin Satanás kay pachata kamachiyta qallarirqan? Qallariypin Satanasqa Diospa contranpi hatarirqan, hinaspa Adán Evata tentarqan Diosta mana kasukunankupaq (Génesis 3:1-6). Chaymantapachan paykunaqa Satanasta serviq kapurqanku. Jehová Diosqa derechonpin kashan kay pachata kamachinanpaq, tukuy sonqowan kasukunanchistataqmi munan (Deuteronomio 6:6; 30:16, 19). Kunanpas yaqa llapa runakunan Satanasta kasukushanku, chaymi Satanás kamachiqninku kapun (leey Apocalipsis 12:9).

¿Hinallatachu Jehová Dios qhawanqa Satanaspa kamachikusqanta? Manapunin. Diosqa Jesuspa yanapayninwanmi pisi tiempollamanta Satanaspa mana allinkuna ruwasqanta allichanqa (leey 1 Juan 3:8).

Jesusqa Jehová Diospa atiy qosqanwanmi Satanasta wañuchipunqa (Romanos 16:20). Diospa Gobiernon kay pachata kamachikuyta qallariqtintaq runakuna kusisqa thakpi kawsasunchis, imaynan qallariypi kawsay karqan hinata (leey Apocalipsis 21:3-5).