Maata te tangata tei irinaki e ko te Atua te tutara o teianei ao. Inara, naringa e e tika te reira, ka ki ainei te enua i te kino? (Deuteronomi 32:4, 5) Kia tau ki te Pipiria, tei raro ake teia ao i te akaaerenga a tetai vaerua kino.—E tatau ia 1 Ioane 5:19.

Akapeea tetai vaerua kino i riro ei ei tutara i rungao i te tangata? I te akamataanga o te tuatua enua o te tangata, kua meameaau tetai angera i te Atua e kua akanauru i nga tangata mua kia aru iaia. (Genese 3:1-6) Kua iki teia nga tokorua i te akarongo ki taua angera kino ra, ko Satani, e kua riro aia ei tutara no raua. Ko te Atua Mana Katoatoa anake te Tutara mou, inara te inangaro ra aia i te tangata kia iki i tana tutaraanga no to ratou inangaro iaia. (Deuteronomi 6:6; 30:16, 19) Te mea mii ra, kua akavareia te maataanga o te tangata kia rave i te ikianga tarevake mei ta te nga tangata mua rai i rave.—E tatau ia Apokalupo 12:9.

Ka akatika ua ainei a Iehova ia Satani kia tutara ua atu rai? Kare! Ka taangaanga te Atua ia Iesu ei akakore i te au kino tei raveia e Satani.—E tatau ia 1 Ioane 3:8.

Kua akamana te Atua ia Iesu kia takore ia Satani. (Roma 16:20) E oti, ka tutara te Atua ki rungao i te tangata e ka akaoki i te tangata ki te turanga mataora e te tinamou tana i akakoro mei muatangana mai.—E tatau ia Apokalupo 21:3-5.