E talitonu le toʻatele o tagata o le Atua o loo pulea le lalolagi. Peitaʻi, afai e moni lenā manatu, aiseā la ua tele ai mafatiaga o tagata? (Teuteronome 32:4, 5) Ua faailoa mai e le Tusi Paia, o le lalolagi atoa o loo pulea e lē o loo leaga.​—Faitau le 1 Ioane 5:19.

Na faapefea i sē e leaga ona pule i tagata? I le amataga, na fouvale ai se tasi o agelu a le Atua ma faaosoosoina le uluaʻi ulugalii e fouvale foʻi i le Atua. (Kenese 3:1-6) Na filifili lenā ulugalii e usitaʻi i le agelu fouvale o Satani, ma avea ai o ia ma o la pule. Peitaʻi, ua na o le Atua e ona le malosi uma lava e tatau iai le pule, ma e finagalo o ia e filifilia e tagata lana pule ona e latou te alolofa iā te Ia. (Teuteronome 6:6; 30:16, 19) E faanoanoa ona ua faia foʻi e le toʻatele o tagata se filifiliga sesē e pei o le uluaʻi ulugalii.​—Faitau le Faaaliga 12:9.

Po o le a faataga ai pea e le Atua Satani e pulea le lalolagi? E leai! O le a faaaogā e le Atua lona Alo o Iesu e faalēaogāina mea leaga uma ua faia e Satani.​—Faitau le 1 Ioane 3:8.

Ua tuuina atu e le Atua le mana iā Iesu e tuʻimomomoina ai Satani. (Roma 16:20) Pe a māeʻa lenā, ona toe faafoʻisia mai lea e le Atua i tagata o se olaga e fiafia ma filemu e pei ona ia muaʻi finagalo i ai.​—Faitau le Faaaliga 21:3-5.