E rave rahi te tiaturi nei e o te Atua mau te faatere ra i teie nei ao. Ahiri tera iho â, e itehia anei te mauiui i te fenua nei? (Deuteronomi 32:4, 5) Ia au i te Bibilia, tei raro aˈe te ao i te faatereraa a te Diabolo.—A taio i te Ioane 1, 5:19.

Mea nafea oia i riro ai ei faatere no te huitaata? I te haamataraa, ua patoi te tahi melahi orure hau i te Atua e ua turai i na taata matamua ia na reira atoa. (Genese 3:1-6) Ua faaoti na hoa faaipoipo matamua ia auraro i tera melahi orure hau o Satani e ua farii ïa ia faatere oia ia raua. O te Atua mana hope anaˈe te faatere tia roa ˈˈe, te hinaaro ra râ O ˈna ia maiti te taata i ta ˈna faatereraa no to ratou here ia ˈna. (Deuteronomi 6:6; 30:16, 19) Ma te peapea, ua haavarehia te rahiraa a rave ai ratou i te faaotiraa hape mai na taata matamua.—A taio i te Apokalupo 12:9.

E vaiiho noa anei te Atua ia Satani ia faatere? Eita! E faaohipa te Atua ia Iesu no te faaore i te mau ohipa iino ta ˈna i rave.—A taio i te Ioane 1, 3:8.

E haamou Iesu ia Satani ma te puai no ǒ mai i te Atua. (Roma 16:20) I muri iho, e faatere te Atua i te huitaata ia oaoa e ia hau ratou mai ta ˈna i opua i te haamataraa.—A taio i te Apokalupo 21:3-5.