Yaʼab máax tuklikeʼ Dios gobernartik le yóokʼol kaabaʼ. Baʼaleʼ wa beyoʼ, ¿baʼaxten túun jach yaan muʼyajil? (Deuteronomio 32:4, 5.) Le Bibliaoʼ ku yaʼalikeʼ le yóokʼol kaabaʼ tiʼ yaan yáanal u páajtalil le j-Kʼasaʼanoʼ. (Xok 1 Juan 5:19.)

¿Bix úuchik u káajal u gobernartaʼal wíinik tumen le j-Kʼasaʼan, wa Kʼaasilbaʼaloʼ? Le maʼ úuch yanak máak way Luʼumeʼ, líikʼ juntúul ángel tu contra Dioseʼ ka tu túulchʼintaj le yáax máakoʼob ka u beetoʼob xan beyoʼ (Génesis 3:1-6). Adán yéetel Evaeʼ tu yuʼuboʼob u tʼaan le kʼasaʼan angelaʼ; bey úuchik u káajal u gobernartaʼaloʼob tumen Satanás le Kʼaasilbaʼaloʼ. U jaajileʼ chéen Dios, le Máax yaan tuláakal páajtalil tiʼoʼ, jeʼel u gobernartikoʼon maʼalobeʼ; letiʼeʼ u kʼáat ka k-chaʼa u gobernartikoʼon yoʼolal le yaabilaj k-uʼuyik tu yoʼolaloʼ (Deuteronomio 6:6; 30:16, 19). Baʼaleʼ óoliʼ tuláakal máak tsʼoʼok u tuʼusul yéetel tsʼoʼok u beetik jeʼex Adán yéetel Evaeʼ. (Xok Apocalipsis 12:9.)

¿Yaan wa u chaʼik Dios ka gobernarnak mantatsʼ Satanás? Maʼ. Jéeoba Dios yéetel u yáantaj Jesuseʼ yaan u kʼaskúuntik u meyaj Satanás. (Xok 1 Juan 3:8.)

Yéetel le páajtalil tsʼaʼantiʼ tumen Diosoʼ, Jesuseʼ yaan u xuʼulsik Satanás (Romailoʼob 16:20). Ken tsʼoʼokkeʼ Dioseʼ yaan u u gobernartik le yóokʼol kaabaʼ yéetel yaan u taasik kiʼimak óolal yéetel jeetsʼelil jeʼex u tukultmil tu káajbaleʼ. (Xok Apocalipsis 21:3-5.)