Stale binni riníʼ ique Dios nga cayuni mandar guidxilayú riʼ. Pa ñaca dxandíʼ nga, ñee ñuu stale yuubaʼ la? (Deuteronomio 32:4, 5.) Biblia rusiidiʼ lu naʼ ti binni malu nga nuu Guidxilayú riʼ. (Biindaʼ 1 Juan 5:19.)

Xi biʼniʼ binni riʼ para gucuaa derechu de guni mandar lu Guidxilayú riʼ yaʼ. Dxi deruʼ cadale binni lu Guidxilayú, tobi de ca ángel ni guyuu guibáʼ ni láʼ Binidxabaʼ bicaalú Dios ne gúdxibe primé hombre ne primé gunaa gúnicaʼ cásica cayúnibe (Génesis 3:1-6). Biʼniʼ ca binni que ni nabe ne bidiicaʼ lugar guni mandarbe laacaʼ. Dios ni nandxóʼ si nga napa derechu de guni mandar binni, peru laabe racaláʼdxibe guzuuba binni stiidxabe purtiʼ dxandíʼ nadxiicaʼ laabe (Deuteronomio 6:6; 30:16, 19). Triste guininu ni, peru stale binni riguixhe ique guni cásica biʼniʼ Adán ne Eva que. (Biindaʼ Apocalipsis 12:9.)

Ñee zudiiruʼ Dios lugar guni mandar Binidxabaʼ la? Coʼ. Zaquiiñebe Jesucristu para guni chaahuiʼ guiráʼ guendanagana napa binni pur Binidxabaʼ. (Biindaʼ 1 Juan 3:8.)

Maʼ bidii Dios poder Jesús para gunitilú Binidxabaʼ (Romanos 16:20). Dxi ca nga zuni mandar Dios binni guidxilayú ne zuuyabe guibánicaʼ nayecheʼ ne sin chuʼ tu guniná laacaʼ casi gucaláʼdxibe nibánicaʼ dede primé que. (Biindaʼ Apocalipsis 21:3-5.)