1, 2. (a) Tit kong labol ma nyuto kit ma penyo lapeny ki diro kelo kwede adwogi maber. (Nen cal ma tye i pot karatac man.) (b) Pingo pe myero walwor pwony mogo ma nyamone tek?

 MWAKI mogo mukato angec, laminwa mo acel onongo tye ka nyamo lok me Baibul gin ki cware ma pe obedo Lacaden. Cware onongo tye i dini mo acel pa Lukricitayo ata-ni. I kare ma gitye ka nyamo lok, cware owaco ni eye i kom pwony me Triniti. Ma en oniang ni cware pud pe ngeyo maber gin ma pwony me Triniti kwako, en openyo cware ni, “In iye ni Lubanga obedo Lubanga, Yecu obedo Lubanga, ki bene cwiny maleng obedo Lubanga, kun Lubanga tye acel keken ento pe adek?” Ki ur madit, cware owaco ni, “Pe aye pwony meno!” Macalo adwogine, gin gunyamo lok mamit i kingi me niang anga kikome ma Lubanga obedo.

² Labol meno nyuto kit ma pire tek kwede me yero ki dok penyo lapeny ki diro. Nyuto bene gin mo acel ma pire tek adada: Pe omyero walwor pwony mogo ma nyamone tek calo Triniti, mac me kapiny, ki dong ka Lacwec tye ada. Ka ce wajenge i kom Jehovah ki pwonnye ma en miniwa, ci pol kare wabimiyo lagam ma gudo cwiny luwinywa. (Kol. 4:6) Kong  wanenu gin ma lutit kwena mucwiny gitimo ka gitye ka nyamo pwony magi matego-ni. Wabineno kit me (1) tic ki lapeny ma golo lok ki i cwiny dano, (2) tito te lok me Ginacoya, ki dong (3) tic ki lapor wek lokwa oniange maber.

3, 4. Pingo pire tek ni wati ki lapeny me niang gin ma ngat moni ye iye? Mi lapor.

³ Lapeny twero konyowa me niang gin ma ngat moni ye iye. Pingo man pire tek? Carolok 18:13 waco ni: “Myero kong iwiny lok ma nongo peya igamo lok mo; ka pe, ci inyuto mingngi dok inyayo yet i komi.” Ada, ma peya wacako nyamo lok i kom gin ma Baibul waco ma lubbe ki pwony moni, omyero kong watem niang gin ma ngat moni ye iye. Ka pe, ci wabibalo lwak cawa ka laro lok i kom gin ma en pe ye iye!​—1 Kor. 9:26.

⁴ Ket kong ni itye ka nyamo lok i kom kapiny ki ngati mo. Pe jo ducu gitamo ni kapiny obedo ka ma dano giwang iye. Pi meno, waromo penye ni: “Kit macalo dano mapol tamgi opokke woko i kom lok me kapiny-nyi, in kono itamo ningo?” I nge winyo lagam pa ngat meno, watwero bedo ki kare maber me konye wek oniang gin ma Baibul waco i kom lok meno.

5. Lapeny twero konyowa nining me niang gin mumiyo ngat moni ye gin moni?

⁵ Lapeny ma kipenyo ki diro bene konyowa me niang gin mumiyo ngat moni ye gin moni. Me labolle, ka warwatte ki ngati mo ma waco ni Lubanga pe kono? Waromo cako tamone ni en ye pwony man ni kwo ocakke pire kene. (Jab. 10:4) Ento, jo mogo gurwenyo niyegi i kom Lubanga pienni guwok ki i can nyo guneno jo mukene ka denone can malit adada. Oromo bedo ni ginongo ni tek me ye ni Lacwec ma lamar tye kun dano gitye ka limo can. Pi meno, ka rwod ot owaco ni ekalakala ka Lubanga tye, waromo penye ni, “Tika dong ibedo ki tam man pi kare malac?” Ka ngat meno ogamo ni pe, ci waromo penye ka gwok nyo gin mo omiyo en ocako bedo ki akalakala ka Lubanga tye. Lagamme twero miyo waniang kit ma myero wakonye kwede i yo me cwiny.​—Kwan Carolok 20:5.

6. Gin ango ma myero watim i nge penyo lapeny?

⁶ I nge penyo lapeny, omyero water itwa ka winyo lagam pa ngat meno ki dok wapwoye pi tito kit ma en winyo kwede ki i cwinye. Me lapore, ngat mo twero wacone ni peko mo ma otimme aye oweko ekalalaka ka Lacwec ma lamar tye. Ma peya wawacce ni Lubanga tye, omyero kong wanyut cwiny me kica dok wawek en onge ni pe rac ka wapenye kekenwa gin mumiyo wadeno can. (Kab. 1:2, 3) Ka ce wadiyo cwinywa dok wanyuto cwiny me mar, ci man biweko en bedo ki miti me pwonyo jami mapol. *

7. Ngo ma myero watim wek wanong adwogi maber i ticwa me pwony?

⁷ Kong dong wanenu kit ma watwero tito kwede te lok me Ginacoya. Baibul aye gin tic ma pire tek loyo i ticwa me pwony. Konyowa me bedo jo ‘muteggi, ma bene guyubbe i yo ducu, me tiyo kit tic mo keken maber.’ (2 Tem. 3:16, 17) Wek wanong adwogi maber i ticwa me pwony, pe mitte ni omyero wakwan wang Ginacoya mapol, ento omyero  wanyam ki dok watit te Ginacoya ma wakwanogi-ni maber adada. (Kwan Tic pa Lukwena 17:2, 3.) Me nyutone, kong wanenu lapor adek magi.

8, 9. (a) Yo acel mene ma waromo nyamo kwede lok ki ngat mo ma ye ni Yecu rom ki Lubanga? (b) Yo ango mukene ma inongo ni bene twero tic maber adada me nyamo lok man?

⁸ Lapor me 1: Ket kong ni i ticwa me pwony warwatte ki ngati mo ma ye ni Yecu rom aroma ki Lubanga. Ginacoya mene ma watwero tic kwede me nyamo lok meno? Watwero kwayo ngat meno me kwano Jon 6:38, ka ma Yecu owaco ni: “Alor piny ki i polo, pe ka tiyo gin ma iya mito pira kena, ento ka tiyo gin ma ngat ma yam oora mito.” I nge kwano wang Baibul man, waromo penyo ngat meno ni: “Ka Yecu tye Lubanga, anga ma oore i lobo nia ki i polo? Ngat meno mono pe dit kato Yecu? Ngene kene ni ngat ma oro lawote dit kato ngat ma kioro-ni.”

⁹ Medo i kom meno, waromo kwano Jo Pilipi 2:9, ka ma lakwena Paulo otito gin ma Lubanga otimo i nge cero Yecu. Tyeng meno wacci: “Lubanga omiye dit ma malo twatwal, dok bene omiye nying ma tye malo makato nying mukene ducu.” Me konyo ngat moni wek oniang ginacoya meno, waromo penye ni: “Ka Yecu onongo rom aroma ki Lubanga ma peya en oto dok lacen Lubanga omiye dit mamalo tutwal, meno mono pe weko Yecu bedo dit kato Lubanga? Ento, tika tye ngat mo twero doko dit kato Lubanga?” Ka ngat meno woro Lok pa Lubanga dok tye ki cwiny matir, nyamo lok ma kit man twero weko en bedo ki miti me ngiyone i yo matut.​—Tic 17:11.

10. (a) Watwero nyamo lok nining ki ngat ma ye i kom mac me kapiny? (b) Yo mene ma inongo ni ber me tic kwede me nyamo lok i kom mac me kapiny?

¹⁰ Lapor me 2: Ket kong ni rwod ot mo ma ladini adada nongo ni tek me ye ni pe kibipwodo jo maraco pi naka i mac me kapiny. En twero bedo ki niye i kom mac me kapiny pien mito ni kipwod jo maraco pi balgi. Waromo nyamo lok ki ngat ma tamo kumeno nining? Me acel, waromo wacce ni kibipwodo jo maraco. (2 Tec. 1:9) Ci dong, watwero weko en kwano Acakki 2:16, 17, ma nyuto ni pwod ma kimiyo pi bal aye to. Watwero bene tito ni bal ma Adam otimo-ni oweko dano ducu kinywalogi macalo lubalo. (Rom. 5:12) Ento, Lubanga pe owaco gin mo i kom pwodo dano i mac me kapiny. Watwero penye ni: “Ka Adam gin ki Kawa onongo kibiwangogi i mac me kapiny pi naka,  ci mono onongo pe bedo ber ka kipoyo wigi?” I ngeye, waromo kwano Acakki 3:19, ka ma kitito pi pwod me balgi ento pe kiloko i kom mac me kapiny. Ma ka meno, kiwaco bot Adam ni obidok i apwa. Waromo penyone ni: “Tika onongo pore me waco bot Adam ni bidok i ngom ka onongo bicito ka wang i mac me kapiny?” Ka ngat meno tye atera me jolo tam manyen, lapeny ma kit man twero weko en tamo matut i kom lok man.

11. (a) Yo mene ma waromo nyamo kwede lok ki ngat ma ye ni jo ducu ma kitgi beco gibicito i polo? (b) Yo mene ma dong inongo ni ber me nyamo lok i kom cito i polo?

¹¹ Lapor me 3: Ket kong ni i ticwa me pwony, warwatte ki ngat mo ma ye ni jo ducu ma kitgi beco gibicito i polo. Bedo ki niye ma kit man twero gudo kit ma ngat moni gonyo kwede Baibul. Me labolle, ket kong ni watye ka nyamo kwede Niyabo 21:4. (Kwan.) Ngat meno romo tamone ni mot ma kitito pigi i tyeng meno bibedo i polo. Waromo nyamo kwede lok nining? Ma ka kwano tyeng mukene, watwero tic ki lok mogo ma pigi tego ma tye i tyeng meno. Tyeng man waco ka maleng ni “to bene dong bibedo pe.” Watwero penyo ngat meno ka en ye ni wek gin moni obed pe, nongo myero kong obed tye. Ka pe gin mo, en biye ni myero kong obed tye. Lacen, watwero wacce bene ni ma naka yam to pe i polo, ento dano to i lobo kany. Labongo akalakala, Niyabo 21:4 loko i kom mot ma bibedo i lobo kany i anyim.​—Jab. 37:29.

12. Pingo Yecu otiyo ki lapor?

¹² Medo i kom tic ki lapeny, Yecu bene otiyo ki lapor i ticce me pwony. (Kwan Matayo 13:34, 35.) Lapor ma Yecu otiyo kwedgi-ni okonyo me yaro ka maleng gin ma tye i cwiny jo ma guwinyo lokke. (Mat. 13:10-15) Yecu otiyo ki lapor wek pwonye obed mit dok omok i wi dano. Watwero tic ki lapor i pwonywa nining?

13. Watwero tic ki lapor mene me nyuto ni Lubanga ladit ki Yecu?

¹³ Omyero wati ki lapor ma niang iye yot. Me labolle, ka watye ka tito ni Lubanga dit kato Yecu, waromo tic ki lapor man. Waromo wacone ni Lubanga gin ki Yecu guwacci gitye macalo jo me ot acel me nyuto wat ma tye i kingi. Lubanga owaco ni Yecu Wode, ki bene Yecu owaco ni Lubanga Wonne. (Luka 3:21, 22; Jon 14:28) I ngeye, watwero penyo rwod ot ni: “Ka imito pwonya ni dano aryo me ot moni girom aroma, lapor mene ma ibitiyo kwede? En romo lok i kom lutino me ot moni​—nyo rudi. Ka en oporo kumeno, ci waromo wacce ni meno lapor maber adada. Waromo dok penye ni: “Ka wan kwedi watwero katti ki lapor man oyotoyot adada, ci Yecu​—Lapwony Madit-ti​—onongo pe romo tamo i kom lapor acel-li? Ma ka meno, en owacci Lubanga tye Wonne. Pi meno, Yecu onyuto ni Lubanga dit dok tye ki twero ma kato en.”

14. Lapor mene ma nyuto ni Lubanga pe twero ye ni Larac-ci aye opwod dano i mac me kapiny?

¹⁴ Tam kong i kom lapor mukene. Jo mogo gitamo ni Catan aye “loyo” mac me kapiny. Lapor acel romo konyo lanyodo me niang ni Lubanga pe tiyo ki Larac-ci me uno dano i mac me kapiny. Waromo waco bote ni: “Go kong ni latinni odoko lajemo dok tye ka timo jami maraco mapol adada. Gin ango ma ibitimo?” Lanyodo-ni twero wacone ni ebitiro latinne. En romo tute matek me konyo latinne wek owek timo gin marac.  (Car. 22:15) I ngeye, waromo penyo lanyodo-ni ngo ma en bitimone ka latinne okwero lajwac kony ducu ma en omiye. Pol pa lunyodo giromo gamone ni pe tye gin mo mukene ma giromo timone nikwanyo pwodo latinne. Watwero penye dok ni: “Ento ka iniang ni ngat mo ma kite rac aye obalo wi latinni oweko en timo jami maraco kono?” Labongo akalakala, lanyodo-ni cwinye bicwer adada i kom ngat meno. Wek lanyodo-ni oniang lapor man maber, waromo penye ni, “Kit ma dong iniang ni ngat mo ma kite rac aye obalo latinni-ni, tika ibiye ni en aye opwod latinni?” Lagamme twero bedo ni pe. Ki lok ada, Lubanga pe twero tic ki Catan me pwodo jo ma en Larac-ci aye obalo wigi me timo jami maraco.

15, 16. (a) Pingo pe myero watam ni dano ducu bijolo kwena me Ker-ri ma watito botgi? (b) Tika myero kinywalwa ki diro me pwony wek wanong adwogi maber i ticwa me pwony? Tit kong. (Nen bene bok ma wiye tye ni “ Gin Tic ma Konyowa me Miyo Lagam.”)

¹⁵ Wangeyo ni dano ducu pe gibijolo kwena me ker-ri. (Mat. 10:11-14) Man pud pe twere kadi bed ni wati ki lapeny mupore, nyo wakati ki lapor mabeco adada. Kadiwa Yecu bene jo manok keken aye guwinyo pwonye​—kun en obedo Lapwony ma pud dong dit ma okwo i lobo!​—Jon 6:66; 7:45-48.

¹⁶ Ki tungcel, kadi bed ni watamo ni pe kinywalowa ki diro me pwony, ento pud watwero nongo adwogi mabeco i ticwa me pwony. (Kwan Tic pa Lukwena 4:13.) Lok pa Lubanga miniwa tyen lok mucwiny me ye ni “jo ducu ma myero gunong kwo ma pe tum” gibiye kwena maber. (Tic 13:48) Pi meno, wabedu wunu ki neno mupore i komwa kekenwa ki i kom jo ma watito botgi kwena maber me Ker-ri. Myero dong wajolu pwonnye ducu ma Jehovah miniwa ki gen ni wan kacel ki jo ma giwinyo lokwa binongo adwogi mabeco ki iye. (1 Tem. 4:16) Jehovah twero konyowa wek wange kit ma myero ‘wadok kwede i peny pa ngat acel acel.’ Kit ma wabineno kwede i pwony ma lubo man, yo acel ma twero konyowa me nongo adwogi maber i ticwa me pwony aye me lubo cik ma Yecu omiyo ma lubbe ki kit ma myero water kwede jo mukene.