1, 2. a) Ka sügǘ arufudubalin lisudinin hasaminaruni gürigia buidu ida luba lan hálügüdahan? (Ariha huméi dibuhu le lídanbei lagumeseha arütíkulu.) b) Ka uagu moun lumuti lubéi wanufudedun wayanuhan luagu tema burí le hénrenguti?

 FIÚ irumu lubaragiñe le, tayanuhaña meha aban kristiána tuagu Bíbülia luma tani weiriei, le mama gefenti luagu Heowá. Fiú dan lubaragiñe dan ligía, abasiihati meha tidoun aban ligilisi hani ha ariñagubaña heseriwiduña lan lun Kristu. Ani luagu aban weyu, ariñagati afiñe lan luagu Trinidad. Kei le tíchugun íbiri to fe luagu háfuga lan ibidiñe lan lun tani weiriei ka lan mini lubéi arufudahani ligía, aba tálügüdüni lau inebesei: “Afiñetibu lubeiti luagu Bungiu lan Bungiu, Bungiu lan Hesusu ani Bungiu lan giñe sífiri sandu, ani mámañanu lan ǘrüwa búngiugu ha, ábanrügüñein lan?”. Aba taweiridun lanigi, ani aba lariñagun: “Uá, mafiñen numuti le!”. Ítara liña lagumeserun aban lubuidun yanu luagu káteitima lan Búngiubei.

² Arufuda lumuti sügǘ le súdini lan wasaminarun furumiñe kaba lan álügüdahani wadüga ani ida luba lan wadügüni. Arufudahati giñe aban lubuidun leksióun woun: moun lumuti wanufudedun lun wayanuhan luagu tema burí le hénrenguti, kéiburi luagu Trinidad, luagu máfiougati o luagu anihein lan aban Bungiu le adügübalin sun katei. Ánhawa afiñera luagu Heowá luma luagu arufudahani le wibihibei lúmagiñe, libe-agei dan gayarabei wíchugun aban óunabagülei le buiti le gayarati lachülürün tidoun hanigi gürigia (Kol. 4:6). Ka wafurendeirubei luagu ligaburi hayanuhan íbirigu ha subudiwabaña  kei mínisi buítiña luagu tema burí le? Ariha waméi ida liña lan 1) hadügün álügüdahani le adügübei lun hariñaguni gürigia ka lan hasaminanbei, 2) ida liña híderaguniña gürigia lun hasaminarun luagun le tariñagubei Bíbülia ani 3) ida liña lan hayusurun hénpulu burí lun hafuranguagüdüni puntu ligía.

3, 4. Ka uagu súdini lubéi wadügün álügüdahani le lunti líderaguniwa asubudirei ka lan hafiñenbei gürigia? Ru humá aban hénpulu.

³ Íderagua lumutiwa álügüdahani lun wasubudiruni ka lan hafiñenbei gürigia. Ka uagu súdini lubéi le? Lugundun ariñagati Ariñawagúni 18:13 luagu “libidiounigan [lan] aau ani nibusigarídünati giñe hóunabun gürigia lubaragiñe haganbun”. Ligíati, houcha wamá wasubudiruni furumiñe ka lan lisaminanbei gürigia le úmabei wayanuha. Anhein madügün wamá ítara, gayarabei wásügürün saragu dan arufudaha luagu aban katei le mafiñen hamuti gürigia (1 Ko. 9:26).

⁴ Samina wamá wayanuhaña lan luma somu gürigia luagu máfiougati. Mama sun gürigia saminatiña aban lan fulasu le ñein lubéi hasufuriragüdawa gürigia lau watu. Gíbetiña saminatiña aban lan fulasu le ídanbei heredera gürigia díseñu luéi Bungiu. Ligíati, gayarati wariñagun lun: “Kei le ámuñegueinarügü lubéi hasaminan gürigia, gayarati san nálügüdünün ka lan máfiougatibei hun?”. Lárigiñe waganbuni lóunabagüle, ménrenguntimabei woun wíderaguni lun gunfuranda lani le tariñagubei Bíbülia luagu katei le.

5. Ida liña gayara lan líderaguniwa álügüdahani lun wasubudiruni ka lan uagu hafiñerei gürigia le hafiñerubei?

⁵ Wálügüdahan lau duari líderagubadiwa giñe lun wasubudiruni ka lan uagu hafiñerei gürigia le hafiñerubei. Kei hénpulu, lun hamuga lariñagun somu gürigia woun lidan wapurichihan luagu mafiñen lan luagu Bungiu, ka gayarabei wasaminaruni? Gayarati wasaminarun lau lóufudagun luagu ladüga lan arufudahani burí le lídanbei ubóu, kéiburi arufudahani le lánina ewolusión (Sal. 10:4). Gama lumoun, añahein gürigia féridirügü hamuti hafiñen luagu Bungiu ladüga libe hasufurirun o ladüga harihin hasufurirun amu. Hénrenguti houn hánharun luagu ígira lan aban Bungiu hínsiñehabuti lun ñein lan saragu asufuriruni. Ligíati, dan le lariñagun aban gürigia woun mafiñen lan luagu Bungiu, gayarati wóunabun: “Súnwandan san hasaminarun ítara?”. Anhein ariñaga woun uá, gayarati wálügüdüni anhein anihein lubéi somu katei adügüti lun lasaminarun ua lan Bungiu. Óunabagülei le lunbei líchuguni woun líderagubadiwa lun wasubudiruni ida luba lan wíderaguni lun lafiñerun luagu Heowá (aliiha huméi Ariñawagúni 20:5).

6. Ka lunbei wadügüni lárigiñe wálügüdahan?

⁶ Lárigiñe wálügüdahan, mosu waganbuniña gürigia buidu ani teni wagíame lun ida liña lan hasandiragun houngua. Kei hénpulu, gayarati labahüdagun somu gürigia woun susereti lan aban óunwenbu lamiselu lun ani ligía lan mafiñenhali lubéi luagu anihein lan Bungiu. Kaba wariñaga? Lubaragiñe wafuranguagüdüni lun anihein lan aban Bungiu, buítimati wariñagun lun sarí wamani le asuseredubei ani maribanti lan wálügüdahan ka lan uagu wasufurira (Abak. 1:2, 3). Ánhawa gaguraasun ani houcha wagíame gunfuranda wamaniña gürigia, gayarabei wadügün lun habusenrun haganwoundagüdüni hasubudin. a

7. Ka lunbei wadügüni lun aban wamá máisturu buiti lidan wani ministeriu?

⁷ Ariha waméi guentó ida luba lan wíderaguniña gürigia lun hasaminarun luagun le tarufudahabei Bíbülia. Chóuruti Bíbülia lan garüdia to súdinitimaboun lidan wani ministeriu. Gayarati tadügün lun aranseñu  wamá lun wadügün “sun luwuyeri wadagimanu buiti” (2 Tim. 3:16, 17). Lun buidu lan warufudahan lidan wani ministeriu, mama mosu waliihan saragu bérusu tídangiñeti Bíbülia. Súdinitimati wafuranguagüdüni bérusu burí le waliihabei houn buidu ani yusu wameime lun wíderaguniña asaminara (aliiha huméi Adügaü 17:2, 3). Kei hénpulu, samina wamá luagu ǘrüwa sügǘ.

8, 9. a) Ida luba wíderagun aban gürigia le saminabei aban lan labu Hesusu luma Bungiu? b) Ka burí amu ariñahani íchugubei resultóu buiti hun dan le hayanuhan luma aban gürigia luagu tema le?

⁸ Furumiñeti sügǘ. Aba wadarirun aban gürigia le afiñeti luagu aban lan labu Hesusu luma Bungiu. Ka burí bérusu tídangiñeti Bíbülia gayarabei wayusuruni lun wíderaguni asaminara? Gayarati wamisurahani lun laliihani Huan 6:38, ñein lubéi lariñaga Hesusu: “Mama niábiña siélugiñe lun nadügüni nugundan; niábiña lun nadügüni lugundan le óunahabalina”. Lárigiñe wafuranguagüdüni bérusu le, gayarabei wariñagun: “Anhein Hesusu lubéi Búngiubei, kati óunahabalin siélugiñe? Mama san aban íñutimaati luéi? Le linarün katei, íñutimaati le óunahabei sügǘ lau le ounahóubei, adián?”.

⁹ Lárigiñe, gayarati waliihani Filipuna 2:9 le ñein lubéi lafuranguagüdei apostolu Pábulu le ladügübei Heowá lárigiñebei lounwen Hesusu ani águyugua ligía. Ariñagati ñein: “Ligía líchugunbalin Bungiu liñun-agei uéiriguni lun [Hesusu] luma iri le wéirigutimabei lídangiñe súngubei”. Lun wíderaguni gürigia asaminara luagu bérusu le, gayarabei wariñagun: “Anhein aban lubéi meha lubara Hesusu luma Bungiu lubaragiñebei lounwen ani lárigiñe, aba líchugun Bungiu aban ubaraü íñutimati lun, ma adügati hamuga le lun íñutima lan luéi Bungiu? Gayarati san ñein lan aban gürigia íñutimati lubara luéi Bungiu”. Anhein inebe tubéi Lererun Bungiu lun gürigia ligía ani harumatu lanigi, háfuga ladügüba ariñahani le lun labusenrun lakutihani tema le buidu buidu (Adü. 17:11).

10. a) Ida luba wíderaguni aban gürigia le afiñebei luagu máfiougati? b) Ka burí amu ariñahani íchugubei resultóu buiti hun dan le hayanuhan luma aban gürigia luagu máfiougati?

¹⁰ Libiaman sügǘ. Aban gürigia wéiriti labadülerun luagu relihión ariñagati mafiñen lan luagu masufurirunbaña lan wuribatiña máfiougati lun súnwandan. Háfuga saminati ítara ladüga busén lan lun hafayeiruni wuribatiña wuribani le hadügübei. Ida luba san wíderaguni? Furumiñe, lunti wachoururuni lun hafayeihaba lan wuribatiña luagu le hadügübei (2 Tesa. 1:9). Lárigiñe, gayarabei wamisurahani lun laliihani Agumesehani 2:16, 17, le arufudubalin luagu ariñaga lan Heowá lun Adán anhein lan afigouha lafayeirubei lan lau leferidiruni libagari. Ábameti warufuduni lun mayanuhan lan Bungiu luagu asufuriruni máfiougati, ani ábame wálügüdüni: “Lun hamuga meha hóudinba lan  Adán tuma Ewa asufurira máfigougati lun súnwandan, ka uagu mariñagun lubalin Bungiu houn? Mosu hamuga meha lariñaguni houn, adián?”. Gayarati waliihani Agumesehani 3:19 le ñein lubéi lasiadiraña Bungiu lárigiñebei hafigouhan ani arufuda wameime lun luagu mariñagun lan Bungiu ni kata luagu máfiougati. Ariñagarügüti lun Adán lagiribuduba lan lidoun múa. Ani gayarati wagumuchuni yanu ítara: “Richati hamuga san lariñawagún lun lagiribuduba lan lidoun múa anhein léibuga lubéi asufurira máfiougati?”. Anhein samina lubéi gürigia ligía buidu, aban álügüdahani libe le gayarati ladügün lun lasaminarun.

11. a) Ka ariñahani gayarabei wayusuruni lun wíderagun aban gürigia le afiñebei luagu hóudinba lan sun gürigia ha buídubaña sielun? b) Ka burí amu ariñahani íchugubei resultóu buiti hun dan le hayanuhan luma aban gürigia luagu tema le?

¹¹ Lǘrüwan sügǘ. Aba wadarirun aban gürigia le saminati luagu sun lan gürigia ha buídubaña hóudinba lan sielun. Chóuruti adüga lan afiñeni le lun lasansirun ligaburi gunfuranda lanu Bíbülia. Samina wamá sun liña lan waliihani Arufudúni 21:4 (aliiha huméi). Gayarati lasaminarun gürigia layanuhaña lan bérusu le luagu abinirúni le lunbei weresibiruni sielu. Ida liña gayara lan wíderaguni? Lubaragiñe waliihan amu burí bérusu lun, gayarati wadügün lun lasaminarun luagun fiú dimurei le lídanbei bérusu le aliiha wamaalibei, ñein lubéi lariñaga: “Úaalime óunweni”, ani ábame wálügüdüni: “Dan le wariñagun úaalime, ma ladüga anihein lan meha furumiñe?”. Háfuga lariñaguba lan anha. Gayarabeiti wariñagun lun luagu úañahagili lan óunweni sielu; yárügüñein ubouagu hóunwegua gürigia. Le linarün aban katei, layanuhaña Arufudúni 21:4 luagu abinirúni le lunbei wibihini ya ubouagu (Sal. 37:29).

12. Ka meha uagu layusura Hesusu hénpulu?

¹² Mámarügüñein meha álügüdahani layusura Hesusu lidan lapurichihan, yúsuti giñe hénpulu (aliiha huméi Matéu 13:34, 35). Ítara liña meha ladügün lun hariñaguni gürigia le hasaminarubei (Mat. 13:10-15). Adügati meha giñe hénpulu lun buidu lan laganbún larufudahan ani ménrengun ligía laritawagún. Ida luba san wayusurun hénpulu lidan warufudahan?

13. Ka hénpulu gayarabei wayusuruni lun warufuduni íñutimati lan Bungiu luéi Hesusu?

¹³ Buítimati dan le sensiyu lan hénpulu le wayusurubei. Kéiburi lun wafuranguagüdüni iñu lan Bungiu luéi Hesusu, lidan furumiñeti lúgaaru, gayarati wariñagun dandu lan Bungiu kei Hesusu konparárü hamuti haduhegua kei aban úguchili luma lisaani: ariñagati meha Bungiu Lisaani lan Hesusu, ani ariñagati Hesusu Bungiu lan Lúguchibei (Luk. 3:21, 22; Huan 14:28). Lárigiñe, gayarati wálügüdühan: “Lun hamuga busén humá hafuranguagüdüni nun luagu aban lan habu bián gürigia, kaba hamuga hénpulu hayusura? Lani aban úguchili luma lisaani, o hani biama íbirigu, háfuga aban feru mádounu? Háfuga lariñagun gürigia ligía layusuruñein lan hamuga hénpulu hani mádounu. Gayarati wariñagun: “Anhein anihán lubéi hénpulu le ñǘbuinbei lidoun wasaminan biángubei wagía lau lóufudagun, ma gayarati hamuga giñe ligía lan meha layusura Hesusu, Máisturu le Wéirigutimabei? Gama lumoun aba lariñagun Lúguchi lan Bungiu, mini lan le, aban wéiriaali ani gabafutimati luéi”.

14. Ka hénpulu arufudubalin luagu maricha lan saminaü luagu Bungiu lan íchugubalin Mafia lun lasufuriragüdüniña gürigia máfiougati?

¹⁴ Añahein gürigia saminatiña ru laali lan Bungiu Mafia lun ligía lan ariha lau máfiougati lun lasufuriragüdüniña gürigia ñein. Gayarati lídehan aban hénpulu lun larihini aban úguchili luagu mani lan saminaü le sentidu. “Samina humá lun hamuga sódini lan aba maganbadi lan hisaani hun ani aba lagumeserun adüga saragu katei wuribati. Kaba hamuga san hadüga?”. Háfuga lariñagun úguchili ligía lóuchuña lan hamuga lun  leweridiruni saragu wéiyaasu (Ari. 22:15). Lárigiñe, gayarati wálügüdüni kaba lan hamuga ladüga anhein mabusenrun lan lisaani laganbuni ladundehan. Chóuruti lariñaguba lan luagu mosu lan hamuga labeichuni. Lárigiñe, gayarati wálügüdüni: “Lun hamuga hasubudiruni aban lan gürigia wuribati ínchahabalin lun maganbadi lan hun?”. Chóuruti, lariñaguba lan úguchili lasafaraguña lan hamuga saragu luma gürigia ligía. Lun wafuranguagüdüni le wafurendeirubei lídangiñe hénpulu le, gayarati wariñagun: “Subudiñu hun ligía lan adügübei lun maganbadi lan hisaani hun, hamuriahaña hamuga san luma lun ligía lan abeichei hisaani?”. Chóuruti madügün lubéi lan. Furanguti lubeiti mayusurun lubéi lan Bungiu Satanási lun lasufuriragüdüniña gürigia ha leferidiraguagüdübaña Satanási guánarügü!

15, 16. a) Ka uagu moun lumuti lubéi wagurabahan hánharuba lan sun gürigia lun uganu buiti? b) Lunti san máisturugu wamá ha buítiña lubá wadügün aban wadagimanu buiti lidan ministeriu? Ka uagu hóunaba ítara? (Ariha huméi rekuáduru “ Aban tulu huutu lun wíchugun óunabagülei”.)

¹⁵ Íbini anhein wayusura álügüdahani buidu, ariñahani le buídutimabei luma hénpulu burí le buiti, mama sun gürigia lun hánharuba lan lun uganu buiti (Mat. 10:11-14). Lau sun luwuyeri, gíbetiña giñe meresibirun hamuti larufudahan Hesusu, lau sun ligía lan Máisturu buítimati le aniheinhalibei Ubouagu! (Huan 6:66; 7:45-48.)

¹⁶ Ánheinti genege lubéi woun mama wamá máisturugu buítiña? Íbini ítara, gayarati buidu lan lidin woun lidan wani ministeriu (aliiha huméi Adügaü 4:13). Rutu Lererun Bungiu buiti resun woun lun wafiñerun sun lan ha aransebaña lun hibihini ibagari magumuchaditi hánharuba lan lun uganu buiti (Adü. 13:48, TNM). Ligíati, úaraguala wasaminan wawouguoun luma hawagun gürigia ha únbaña wapurichihei uganu buiti. Sagá wamá buiti lídangiñe arufudahani le líchugubei Heowá woun. Ítara luba máisturugu wamá ha buítiña, ani lahuuduba le woun luma houn ha aganbubalin (1 Tim. 4:16). Arufuda lumuti Heowá woun ‘ida luba lan wóunabuniña gürigia’. Lidan leweñegua arütíkulu warihibei ida luba lan buidu lan lidin woun lidan wani ministeriu: lau wasigiruni lugumadin Hesusu lun wóuseruniña amu kei wabusenrun lun wouserúniwa.