Ki mannyer nou devret reponn sak dimoun?

“Ki zot parol i touzour agreab . . . pour zot kapab donn bann repons valab tou dimoun.”​—KOL. 4:6.

KI OU POU REPONN?

Akoz i bon pour demann kestyon pour fer bann dimoun eksprim zot lekor?

Kwa ki kapab ed nou pour rezonn dan en fason efikas lo Labib?

Ki mannyer nou kapab byen servi bann legzanp dan nou predikasyon?

1, 2. (a) Rakont en leksperyans ki montre valer pour demann bann kestyon ki’n ganny byen swazir. (Vwar portre anler.) (b) Akoz nou pa devret per pour diskit lo bann topik difisil?

DETRWA lannen pase, en ser Kretyen ti pe koz lo Labib avek son msye ki pa Temwen. Dan lepase, sa msye ti swadizan en manm legliz Kretyen. Pandan zot diskisyon, i ti dir ki i krwar dan Trinite. Vi ki i ti rekonnet ki son msye pa ti konnen ki sa vedir Trinite, avek bon zizman i ti demann li, “Eski ou krwar Bondye i Bondye, Zezi i Bondye e ki lespri sen i Bondye e pourtan i napa trwa Bondye me en sel?” Byen sirprann, son msye ti dir, “Non, mon pa krwar sa!” En konversasyon enteresan konsernan vre natir Bondye ti konmanse.

² Sa leksperyans i demontre ki valer i annan pour demann bann kestyon avek bon zizman e byen swazir kestyon ki nou demande. I osi fer resorti en pwen enportan: Nou pa devret per pour diskit lo bann topik difisil parey Trinite, lanfer dife oubyen legzistans en Kreater. Si nou depan lo Zeova e lo formasyon ki i donnen, souvan nou kapab donn en larepons konvenkan, petet enn ki pou tous leker nou lodyans. (Kol. 4:6) Aprezan annou egzamin ki bann predikater efikas i fer  ler zot pe diskit lo sa bann topik. Nou pou vwar ki mannyer pour (1) demann kestyon pour fer sa dimoun eksprim li, (2) rezonn lo sa ki Labib i dir e (3) servi bann legzanp pour fer resorti sa pwen enportan.

DEMANN KESTYON POUR FER BANN DIMOUN EKSPRIM ZOT

3, 4. Akoz i enportan pour servi kestyon pour konn sa ki en dimoun i krwar ladan? Donn en legzanp.

³ Bann kestyon i kapab ed nou pour konnen ki en dimoun i krwar ladan. Akoz sa i enportan? Parski Proverb 18:13 i dir: “Kan en dimoun i reponn konsernan en size avan ki i tann levidans, sa i bet e i en imilyasyon.” Alor, avan ki nou konmans diskit o profon lo en size baze lo Labib, i ti a byen pour esey konn sa ki sa dimoun ki pe ekout nou i krwar. Si non, nou kapab pas en ta letan pour zis esey prouv en pwen ki sa dimoun pa’n zanmen krwar ladan.​—1 Kor. 9:26.

⁴ Meton nou pe koz lo lanfer avek en dimoun. Pa tou dimoun ki krwar ki lanfer i en vre landrwa kot dimoun i ganny tourmante dan dife. Bokou i krwar ki i en kondisyon kot ou separe avek Bondye. Alor, nou kapab demande: “Vi ki dimoun i annan diferan lopinyon lo lanfer, eski mon kapab konn ou lopinyon lo sa size?” Apre ki nou’n ekout larepons sa dimoun, nou pou dan en pli bon pozisyon pour ed li konpran sa ki Labib i dir lo sa size.

5. Ki mannyer bann kestyon i kapab ed nou konnen akoz en dimoun i annan sa krwayans?

⁵ Kan nou demann kestyon avek bon zizman, sa i osi kapab ed nou pour konnen akoz en dimoun i annan sa krwayans. Par egzanp, si ou zwenn en dimoun dan predikasyon ki dir i pa krwar dan Bondye, i kapab fasil pour prezimen ki sa dimoun in ganny enfliyanse par bann krwayans popiler, tel parey teori lo levolisyon. (Ps. 10:4) Par kont, serten dimoun i nepli annan lafwa dan Bondye akoz sa kantite soufrans ki zot in vwar oubyen pas ladan. Zot kapab vwar li difisil pour krwar ki en Kreater ki kontan nou i egziste kan zot vwar sa kantite soufrans. Pour sa rezon, si en met lakour i eksprim doutans lo legzistans Bondye, nou kapab demann li, “Eski ou’n toultan santi koumsa?” Si sa dimoun i dir non, nou kapab demande si en keksoz spesifik in fer li doute ki Bondye i egziste. Son larepons i kapab ed nou pour konn sa pli bon fason pour ed li spirityelman.​—Lir Proverb 20:5. *

6. Ki nou devret fer apre ki nou’n demann en kestyon?

⁶ Apre ki nou’n demann en kestyon, nou vreman bezwen ekout larepons sa dimoun e pran son santiman aker. Par egzanp, en dimoun i kapab dir ki en maler in fer li doute si i egziste en Kreater ki kontan nou. Avan ki nou donn laprev ki i annan en Bondye, i ti a byen ki nou senpatiz avek sa dimoun e fer li konnen ki i pa mal pour rode akoz nou soufer. (Aba. 1:2, 3) Nou pasyans ek lapros amikal i kapab motiv li pour anvi konn plis. *

REZONN LO SA KI LABIB I DIR

7. Ki nou bezwen fer pour ki nou byen efikas dan predikasyon?

⁷ Aprezan, annou vwar ki mannyer nou kapab rezonn lo sa ki Labib i dir. Byensir, Labib i sa zouti prensipal ki nou servi dan nou minister. I permet nou pour “byen prepare e byen ekipe pour fer tou aksyon ki bon.” (2 Tim. 3:16, 17) Pour  byen efikas dan predikasyon i pa depan lo kantite verse ki nou lir me lo lafason ki nou rezonn e eksplik sa ki nou lir. (Lir Akt 17:2, 3.) Konman legzanp, annou egzamin trwa senaryo.

8, 9. (a) Dan ki fason nou kapab rezonn avek en dimoun ki krwar Zezi i egal avek Bondye? (b) Ki lezot rezonnman lo sa size ki ou’n vwar efikas?

⁸ Premye senaryo: Dan predikasyon nou zwenn en dimoun ki krwar ki Zezi i egal avek Bondye. Ki verse Labib nou kapab servi pour rezonn lo sa topik? Nou kapab demann sa dimoun pour lir Zan 6:38 kot Zezi i dir: “Mon’n sorti dan lesyel pour vin fer, non pa mon prop lavolonte, me lavolonte sa enn ki’n anvoy mwan.” Apre ki nou’n lir sa verse, nou kapab demann sa dimoun: “Si Zezi i Bondye lekel ki ti anvoy li lo later? Eski sa Enn pa i bezwen pli gran ki Zezi? Apre tou, en dimoun ki’n ganny anvoye pa pli siperyer ki sa enn ki’n anvoy li.”

⁹ Dan sa menm laliny, nou kapab lir Filipyen 2:9 kot zapot Pol i dekrir sa ki Bondye ti fer apre ki Zezi ti’n mor e resisite. Sa verse i dir: “Bondye in elev li [Zezi] pli o ki tou, e donn li en non pli enportan ki tou lezot non.” Pour ed sa dimoun rezonn lo sa verse, nou kapab demande: “Si Zezi ti egal avek Bondye avan ki i mor e ki pli tar Bondye ti elev li pli o, eski sa pa ti pou fer Zezi pli siperyer ki Bondye? Me, ki mannyer en dimoun i kapab vin pli siperyer ki Bondye?” Si sa dimoun i respekte Parol Bondye e annan en leker senser sa rezonnman i kapab motiv li pour egzamin sa size dan en fason pli profon.​—Akt 17:11.

10. (a) Ki mannyer nou kapab rezonn avek en dimoun ki krwar dan lanfer dife? (b) Ki rezonnman ou’n vwar efikas ler ou pe koz lo lanfer dife?

¹⁰ Dezyenm senaryo: En met lakour ki vreman relizye i vwar li difisil pour krwar ki bann move dimoun pa pou ganny tourmante dan lanfer dife pour touzour. I kapab krwar dan lanfer dife akoz i anvi vwar bann move dimoun ganny pini pour zot move aksyon. Ki mannyer nou kapab rezonn avek en dimoun ki santi koumsa? Premyerman, nou kapab asir li ki bann move dimoun pou ganny pini. (2 Tesa. 1:9) Apre, nou kapab fer li lir Zenez 2:16, 17, ki montre ki pinisyon pese i lanmor. Nou kapab eksplike ki atraver pese Adan, sa in fer ki limanite antye i ne dan pese. (Rom. 5:12) Me nou kapab fer resorti ki Bondye pa ti dir nanryen konsernan pinisyon dan lanfer dife. Apre nou kapab demande, “Si i ti annan sa risk pour Adan ek Ev  ganny tourmante pour touzour, eski pa i ti pou zis ki zot ganny averti?” Answit nou kapab lir Zenez 3:19. Sa verse i koz lo zot santans apre ki zot ti komet pese me nanryen pa ti ganny dir konsernan lanfer dife. O kontrer, Adan ti ganny dir ki i ti pou retourn an pousyer. Nou kapab demande, “Eski i ti pou zis pour dir Adan ki i ti pou retourn an pousyer si vreman i ti pe al dan lanfer dife?” Si sa dimoun i pare pour pran an konsiderasyon pwennvi lezot, sa kestyon i kapab ed li pour reflesir pli profon lo sa size.

11. (a) Dan ki fason nou kapab rezonn avek en dimoun ki krwar ki tou bon dimoun i al dan lesyel? (b) Ki rezonnman ou’n vwar efikas lo size al dan lesyel?

¹¹ Trwazyenm senaryo: Dan predikasyon nou zwenn en dimoun ki krwar ki tou bann bon dimoun i al dan lesyel. Sa krwayans i kapab annan en lefe lo fason ki sa met lakour i konpran Labib. Par egzanp, meton nou pe egzamin Revelasyon 21:4. (Lir.) Sa dimoun i kapab krwar ki sa bann benediksyon ki ganny dekrir dan sa verse i refer avek lavi dan lesyel. Ki mannyer nou kapab rezonn avek li? Dan plas servi lezot verse pour eksplik sa pwen, nou kapab met lanfaz lo en detay dan sa menm verse. I dir ki “lanmor pou nepli egziste.” Nou kapab demann sa dimoun si i dakor pour ki en keksoz i nepli egziste, i bezwen ki i ti egziste avan. I tre probab, ki i pou dir wi. Apre sa nou kapab fer resorti ki lanmor pa’n zanmen egziste dan lesyel, dimoun i mor zis lo later. Alor i fer sans ki Revelasyon 21:4 pe refer avek bann benediksyon ki pou egziste isi lo later.​—Ps. 37:29.

SERVI BANN LEGZANP POUR FER RESORTI SA PWEN ENPORTAN

12. Akoz Zezi ti servi bann legzanp?

¹² Kan Zezi ti pe prese i pa ti zis servi kestyon, me i ti osi servi bann legzanp. (Lir Matye 13:34, 35.) Bann legzanp ki Zezi ti servi ti ed li konn motivasyon bann ki ti pe ekout li. (Mat. 13:10-15) Bann legzanp ti osi fer bann lansennyman Zezi pli enteresan e pli fasil pour mazinen. Ki mannyer nou kapab servi bann legzanp dan nou lansennyman?

13. Ki mannyer nou kapab donn en legzanp pour montre ki Bondye i pli siperyer ki Zezi?

¹³ Bann legzanp senp i souvan pli efikas. Par egzanp, kan nou pe eksplike ki Bondye i pli siperyer ki Zezi, petet nou kapab sey sa sizesyon. Nou kapab mansyonnen ki tou le de, Bondye ek Zezi ti dekrir zot relasyon konman en relasyon familyal. Bondye ti refer avek Zezi konman son Garson e Zezi ti koz lo Bondye konman son Papa. (Lik 3:21, 22; Zan 14:28) Apre, nou kapab demann sa met lakour: “Si ou ti anvi ansenny mwan ki de dimoun i egal, ki legzanp ou ti pou servi pour dekrir sa relasyon familyal?” Sa dimoun i kapab dir bann frer ek ser, swa menm zimo oubyen zimel. Si i dir sa, nou kapab dir li ki i toutafe normal pour servi sa legzanp. Apre nou kapab demande: “Si nou’n kapab fasilman mazin sa legzanp, pa Zezi sa Gran Ansenyan ti pou’n kapab mazin sa menm legzanp? I ti plito koz lo Bondye konman son Papa. Alor Zezi ti montre ki Bondye i pli vye e annan plis lotorite ki li.”

14. Ki legzanp ki montre ki i pa fer sans pour Bondye demann Dyab pour tourmant dimoun dan lanfer dife?

¹⁴ Annou vwar en lot legzanp. Serten i krwar ki Satan i swadizan ansarz lanfer dife. Nou kapab servi en legzanp pour montre en paran ki i pa lozik pour Bondye servi Dyab pour tourmant dimoun dan lanfer dife. Nou kapab dir: “Mazinen ki ou zanfan in vin rebel e i pe fer bann move keksoz. Ki mannyer ou ti pou reakte?” I tre probab ki sa paran ti pou dir ki i ti pou koriz son zanfan. I kapab  esey ed son zanfan plizyer fwa pour aret fer sa ki mal. (Prov. 22:15) Aprezan, nou kapab demann sa paran ki i ti pou fer si son zanfan ti inyor tou zefor ki i’n fer pour ed li. Laplipar paran ti pou dir ki avek letan zot ti pou napa swa ki pini sa zanfan. Alor nou kapab demande, “Me si ou dekouver ki en move dimoun in enfliyans ou zanfan pour rebele?” San dout, sa paran ti pou ankoler avek sa dimoun. Pour fer resorti sa pwen enportan dan sa legzanp, nou kapab demann sa paran, “Vi ki ou konnen ki en move dimoun in enfliyans ou zanfan, eski ou ti pou demann sa dimoun pour pini ou zanfan dan ou plas?” Definitivman i ti pou dir non. I kler alor ki Bondye pa ti pou servi Satan pour pini en dimoun ki’n ganny enfliyanse pour fer sa ki mal par Satan li menm.

GARD EN PWENNVI EKILIBRE

15, 16. (a) Akoz nou pa devret ekspekte ki tou dimoun pou aksepte mesaz Rwayonm? (b) Eski nou bezwen annan en abilite spesyal pour ansenny dan en fason efikas? Eksplike. (Vwar osi sa bwat “En zouti ki ed nou donn en larepons.”)

¹⁵ Nou realize ki pa tou dimoun ki nou pres avek ki pou aksepte mesaz Rwayonm. (Mat. 10:11-14) Sa ti pou leka menm si nou ti demann sa bann pli bon kestyon, servi sa pli bon rezonnman oubyen servi bann pli bon legzanp. Apre tou, pa bokou dimoun ki ti aksepte lansennyman Zezi menm si i ti sa pli gran Ansenyan ki’n zanmen deza egziste lo later.​—Zan 6:66; 7:45-48.

¹⁶ De lot kote, menm si nou santi ki nou napa en abilite spesyal, nou kapab efikas dan predikasyon. (Lir Akt 4:13.) Parol Bondye i donn nou bon rezon pour krwar ki “tou bann ki . . . annan sa bon kondisyon leker pour lavi eternel” pou aksepte sa bon nouvel. (Akt 13:48, NW) Alor annou devlop e gard en pwennvi ekilibre lo nou lekor e avek bann ki nou partaz sa bon nouvel Rwayonm avek. Annou profit byen sa formasyon ki Zeova i donn nou e annan konfyans ki sa formasyon pou benefisye nou e sa bann ki ekout nou. (1 Tim. 4:16) Zeova i kapab ed nou pour konnen ki mannyer nou devret donn bann “repons valab tou dimoun.” Parey nou pou vwar apre, en fason pour reisi dan nou predikasyon se pour swiv sa ki souvan ganny apele Lareg-d-or.

[Not anba lo paz]

[Kestyon]

[Bwat lo paz 10]

En zouti ki ed nou donn en larepons

Detrwa legzanp ki’n ganny diskite dan sa lartik i sorti dan sa seri lartik “En konversasyon avek en vwazen” e i annan serten azisteman ki’n ganny fer. I ganny pibliye parfwa dan Latour Veyer piblik. *

Konsernan fason ki sa seri in ede dan predikasyon en ser i dir: “Atraver sa bann lartik mon pe aprann ki mannyer pour diriz en konversasyon dan sa bon direksyon, ki mannyer pour demann bann kestyon ki fer dimoun reflesir e ki mannyer pour reponn apre ki in donn son pwennvi. Mon’n toultan aprann pli byen ler mon ganny montre ki mannyer pour fer en keksoz e sanmenm ki sa bann lartik ‘Konversasyon’ i fer.”

Sa seri i zis enn parmi sa plizyer provizyon spirityel ki Zeova i donnen ki ed nou pour akonpli sa travay enportan ki i’n donn nou pour fer. (Ps. 32:8) Pa nou devret apresye ki i donn nou sa ki nou bezwen pour akonpli nou minister!

[Not anba lo paz]

[Portre lo paz 8]

Kwa ki vreman enportan pour nou efikas dan predikasyon? (Vwar paragraf 7)