1, 2. (a) Nemene la ewekë ka amamane la enyipiewekëne la troa atreine hnyinge hnyawa? (Wange ju la pane iatr.) (b) Pine nemene matre tha tro kö sa xou troa ithanatane la itre mekune ka jol?

AME ngöne la ketre drai, kola porotrikë Tusi Hmitrötr hnene la ketre trejine föe memine la föi angeic, ka tha ce hmi kö me angeic. Öni nyidrëti koi angeice ka hape, ka lapaune nyidrë kowe lo ini hna hape, Trinité. Porotrike ju pë hë nyidro, nge atrehmekune ju hi hnene lai trejine me easë, ka hape, thatre pengöne hnyawa kö nyidrë la aliene la ini cili hna hamëne hnene la hmi nyidrë. Angeice pë hë a hnyingëne hnyawane ju koi nyidrëti ka hape, “Ame koi nyipëti ke, Akötresieti kö Akötresie, nge ame Iesu, ke Akötresieti fe, nge ame la uati hmitrötr ke, ketre Akötresieti fe; ngo tha köni Akötresieti kö, ngo ala casi hi?” Sesëkötre ju hi angeice la kola sa hnei trahmanyi ka hape, “Ohea, tha eje kö lai!” Ame hë la pun, tre lolo pi hë la aqane porotrikëne nyidroti la nyipi pengö i Akötresie.

² Nemene la hna ini së hnene la ewekë celë? Kola ini së la enyipiewekëne la troa hnyinge hnyawa kowe la itre atr. Kolo fe a ini së ka hape, tha tro kö sa xou troa ithanatane memine la itre atr la itre ini ka tune lo lai Trinité, me ihueë, maine porotrike me angatr göi troa amamane ka hape, hetre Atre Xupi së. Maine tro sa mejiune koi Iehova, me kowe la aqane ini së hnei Nyidrë, tro ha ketr la hni  ne la itre atr, hnene la aqane hamëne së la ini. (Kol. 4:6) Tro sa ithanatane jëne la tane mekune celë, la aqane tro sa (1) hnyinge kowe la atr, matre tro angeic a hane ketre qeje mekun, me aqane troa (2) ithanatane la aliene la itre xötr, me aqane troa (3) hamëne la itre ceitun, ka troa aijijë angeice troa trotrohnine la ketre mekun.

3, 4. Nemene la enyipiewekëne la troa hnyingëne kowe la ketre atr, la itre ini hnei angeice hna lapaune kow? Hamëne jë la ketre ceitun.

³ Maine tro sa hnyinge kowe la atr, ijije hi tro sa atre la itre ini hnei angeice hna lapaune kow. Nemene la enyipiewekëne la troa hnying? Kola sa hnei Ite Edomë 18:13 ka hape: “Ame la ate sa kowe la ewekë nge tha pane ate, te, angeic’ a hmo me hmahma.” Haawe, loi e tro sa pane atre la itre ini hna lapaune kow hnene lai atr. Aqane tro hi së lai a kuca, wanga tro sa thele troa jelethoine la ketre ini, hna tha kapa pena kö hnene lai atr.—1 Kor. 9:26.

⁴ Ame itre xa ijin, tre porotrikëne ju hi së lo ihueë memine la ketre atr. Ame itre xa atr, tre angatr a mekune ka hape, ame la ihueë, tre e cili hi la hna dreuthe trije la itre atr ka ngazo. Ame itre xan, tre angatr a mekune ka hape, ame lai ihueë, tre kola nyihatrene la pengöne la atr ka trehnyiwa koi Akötresie. Celë hi kepine matre, ma ka loi e tro sa qaja ka hape: “Isapengöne kö la aqane goeëne itre atr la ihueë, ngo eni a pi atre ka hape, nemene koi epuni la ewekë cili?” Thupene jë hi la hne së hna drenge la mekuna ne lai atr, ijije hë tro sa xatua angeice troa trotrohnine la ini hna hamëne hnei Tusi Hmitrötr.

5. Troa xatua së tune kaa hnene la itre hnying, ngöne la easa thele troa atre la kepine matre kola lapaune kowe la ketre ini hnene la ketre atr?

⁵ Maine tro fe sa hnyinge hnyawa kowe la atr, tro hë së lai a atre la kepine matre angeic a lapaune kowe la ketre ini. Pane mekune ju së ka hape, traqa ju hi së ngöne la hna cainöj a öhne la ketre atr ka tha lapaune kö koi Akötresie. Ma tro së lai a canga mekun ka hape, ame koi angeic, tre tha hnei Akötresieti kö hna xupi së. (Sal. 10:4) Ngo ame la itre xa atr, tre, angatre pë hë enehila a tha lapaune koi Akötresie, hnene laka, angatr a goeëne la akötre ne la itre xan, maine tru pena ha la akötr hnei angatre hna sipu melën. Thatreine kö angatre kapa ka hape, ka ihnimi Akötresie, ngo Nyidrëti a nue la itre atr troa akötr. Celë hi kepine matre, maine kola sa koi së hnene la atrene la ketre hnalapa ka hape, “Ame koi ni, ke pëkö Akötresie,” tro sa hnyingëne koi angeice ka hape, “Hnei epuni pala hi hna mekune tune lai?” Maine angeic a sa ka hape, ohea, tro sa hnyingëne koi angeic ka hape, nemene la ka kuca matre angeice ha luelu enehila? Tro hë lai aqane sa i angeic a amamane koi së la aqane tro hë sa xatua angeic.—E jë la Ite Edomë 20:5.

6. Nemene la nyine tro sa kuca, thupene la hne së hna hnying?

⁶ Ame la easa hnyinge kowe la atr, ketre nyipi ewekë fe tro sa drenge la hnei angeice hna hane qaja, matre tro angeic a atre ka hape, easë fe a metrötrëne la mekuna i angeic. Ame la itre xa atr, angatre hë a nyiqaane lueluëne ka hape, hetre Akötresieti ka ihnim, pine laka hna traqa koi angatr la itre akötr. Haawe, loi e tro sa qaja koi angeice ka hape, tha ngazo kö troa thele la kepine la easa akötr. Thupene jë hi lai, easë pë hë a amamane jë koi angeice la kepine matre xeci hnyawa koi së ka hape, hetre Akötresie. (Hab. 1:2, 3) Maine tro sa hnime lai atr, nge maine tha canga thupatëne kö së la angeic a hane qeje mekun, tro hë angeice lai a pi atre la itre xa mekune hne së hna troa qaja. *

7. Nemene la nyine tro sa kuca, matre atreine së aeatrëne hnyawane la huliwa ne cainöj?

⁷ Ame la pane jia ne huliwa së, tre Tusi Hmitrötr. Eje hi lai ka troa xatua së troa  ‘nyipi meköt matre hnëkë thatraqane la nöjei huliwa ka loi asëjëihë.’ (2 Tim. 3:16, 17) Ame la atr ka hnëkë thatraqane la huliwa ne cainöj, tre tha angeice hmekuje kö a e la itre xötr. Nyipi ewekë fe tro angeic a atre la aqane troa ithanatane la hna qaja hnene lai xötr, me qeje pengön. (E jë la Ite Huliwa 17:2, 3.) Tro sa pane ithanatane la köni aqan.

8, 9. (a) Nemene la ketre aqane troa sa kowe la atr ka mekune ka hape, casi hi lae Akötresie me Iesu? (b) Nemene la aqane kuca i nyipunie, ngöne la nyipunieti a ithanatane la mekune celë memine la itre xa atr?

⁸ Pane aqan: Easa cainöje trootro, nge traqa ju hi së a öhne la atr ka mekune ka hape, casi la göhmeku i Iesu me Akötresie. Nemene la itre xötr nyine tro sa xom, matre tro sa ithanatane memine lai atr? Ma tro sa sipone koi angeice troa e la trenge ewekë i Iesu, ka mama ngöne Ioane 6:38: “Tha uti kö ni qa hnengödrai troa kuca la ajang, ngo loi pe la aja i nyidëti ate upi ni.” Thupene jë hi lai, tro sa hnyingëne koi angeice ka hape: “Maine Iesu ju lae Akötresie, nga drei kö la ka upi nyidrëti a tro celë fen? Hapeu, casi hi Iesu memine lai Atre Upi nyidrë? Maine hna up la ketre atr, kolo lai a qaja ka hape, ka draië kö lai ka upi angeic hui angeic.”

⁹ Ijije fe tro sa e la Filipi 2:9, ene lo tus i Paulo aposetolo, atre qeje pengöne la ewekë hna kuca hnei Akötresie, thupene la hna mec, me mele hmaca hnei Iesu. Kola qaja hnene lai xötr ka hape hnei Akötresie hna “nyipi atrunyi [Iesu] jë draië, me hamë nyidëti la atesieti ka sisitia hune la nöjei ëjen’ asëjëihë.” Maine easa ajane troa ithanatane la xötr memine lai atr, tro sa hnyinge ka hape: “Maine Iesu ju hi lae Akötresie qëmekene tro nyidrëti a mec, ame hë la kola atrunyi nyidrëti e thupen, tre maine ju, draië hë Iesu hui Akötresie. Ngo hapeu, hetre atr kö ka draië hui Akötresie?” Tro la aqane ithanata celë a xatuane la itre atr ka pi porotrikë Tusi Hmitrötr troa atre la itre ini hne së hna kapa qa hnine ej.—Ite hu. 17:11.

10. (a) Nemene la ketre aqane troa sa kowe la atr ka mekune ka hape, hetrenyi lo ihueë? (b) Nemene la aqane kuca i nyipunie, ngöne la nyipunieti a ithanatane la mekune celë memine la itre xa atr?

¹⁰ Aqan hnaaluen: Tha madrine kö la atr la angeic a atre ka hape, tha kolo kö a troa dreuth epine palua la itre atr ka ngazo e hnine lo ihueë. Angeic a lapaune kowe la ini celë, ke ma aja i angeice jë la troa nyithupene tune lai kowe la itre atr ka kuca la itre ewekë ka ngazo. Nemene la aqane troa sa kowe la atr cili? Tro sa pane qaja koi angeic, ka hape, tro ha nyithupene kowe la itre atr ka ngazo la itre huliwa i angatr. (2 Thes. 1:9) Thupene jë hi lai, tro sa sipone koi angeic troa e la Genese 2:16, 17, me amamane ka hape, ame la thupene la ngazo, tre mec. Ase jë hi lai, tro sa qaja koi angeic ka hape, ngazo asë hë la nöjei atr, hnene la ewekë ka ngazo hna kuca hnei Adamu. (Rom. 5:12) Tro fe sa qaja ka hape, tha hane pë hë Akötresieti qaja ka hape,  troa kuiëne trij la itre atr ka ngazo kowe la ihueë. Thupene jë hi lai, tro sa e la Genese 3:19. Ame ngöne la xötre celë, Akötresieti a qaja koi Adamu ka hape, ame la pune la hnei angeice hna ngazo, tre tro hmaca kö angeic a bëeke kowe la xaxau. Easë pë hë a hnyingëne ju koi angeice ka hape: “Maine kuië Adamu ju kowe la ihueë, nge ase pe qaja koi angeice ka hape, tro angeic a bëeke kowe la ihnadro, tre hapeu, meköti kö?” Maine ka nyipi ajane lai atr troa porotrik, tre ma tro hë la aqane hnyinge celë a upi angeic troa thel ajuine la mekune celë.

11. (a) Nemene la ketre aqane troa sa kowe la atr ka mejiune ka hape tro la nöjei atr ka loi a tro hnengödrai eë? (b) Nemene la aqane kuca i nyipunie, ngöne la nyipunieti a ithanatane la mekune celë memine la itre xa atr?

¹¹ Aqan hnaakönin: Easa cainöje trootro, nge traqa pi hi së kowe la atr ka mejiune laka, tro ha tro asë la nöjei atr ka loi e hnengödrai. Mejiune lai ka hetre thangane kowe la aqane trotrohnine hnei ketre atr la Tusi Hmitrötr. Maine tro sa fe kowe lai atr la tusi Hna Amamane 21:4, tro hë angeice lai a mekune ka hape, mel e hnengödrai la hna qaja e celë. (Troa e.) Nemene la nyine troa sa koi angeic? Tha tro kö sa xome la itre xa xötr, ngo tro sa ithanatane lai hna qaja ngöne Hna Amamane 21:4. Kola qaja ka hape “pa hmaca kö mec.” Easë pë hë a hnyinge ju ka hape: “Ame la easa qaja göne la ketre ewekë ka hape, pë hmaca kö, kolo kö lai a qaja ka hape, hetrenyi ekö la ewekë cili; tune kaa la mekuna i epun?” Maine kapa hi hnene lai atr la mekune celë, haawe, easë pë hë a qaja ju ka hape, nga pëkö mec e koho hnengödrai. Ame la itre atr ka mec, ke kola mec e celë fen. Celë hi kepine matre ame la itre manathithi hna qaja e hnine la tusi Hna Amamane 21:4, tre itre manathithi lai e celë fen.—Sal. 37:29.

12. Pine nemene matre Iesu a hamën ekö la itre ceitun?

¹² Ame ekö la Iesu a cainöj, tre hnei nyidrëti pala hi hna xome la itre ceitun. (E jë la Mataio 13:34, 35.) Itre ceitune lai hna xom nyine xatua nyidrë troa atre ka hape, pi tro kö la itre atr a nyipi nyihlue i Iehova? (Mat. 13:10-15) Hnei Iesu fe hna hamëne la itre ceitun, matre hmaloi kowe la itre atr troa mekune hmaca la itre ini hnei nyidrëti hna hamën, nge matre hetre aja i angatr troa drei nyidrë. Tro sa huliwane tune kaa la itre ceitun, ngöne la easa cainöj?

13. Nemene la ketre ceitune ka loi nyine tro sa xom, matre amamane ka hape, ka draië kö Akötresie hui Iesu?

¹³ Ka loi la itre ceitune ka hmaloi troa trotrohnin. Maine easa pi amamane ka hape, ka draië kö Akötresie hui Iesu, ijije troa qaja ka hape: Ame e hnine la Tusi Hmitrötr, hnei Iesu pala hi me Akötresie hna qeje nyidroti kö, ka hape lue trenekön. (Luka 3:21, 22; Ioane 14:28) Thupene jë hi lai, tro sa hnyinge ka hape: “Drei e hnine la hnepe lapa, hnei epuni hna mekune ka hape, casi hi la göhmeku i nyidro, maine ceitui nyidroti hi?” Maine jë tro lai atr a sa ka hape, lue trejin, maine lue fini pena. Easë pë hë a qaja jë ka hape: “Nyipici epun. Haawe, nga hnauëne kö laka, tha qaja kö hnene la Atre Hamë Ini Ka Tru, ene Iesu, ka hape, ceitui nyidrë me Akötresie me lue trejin, maine lue fini pena? Öni nyidrëti ka hape, Keme i nyidrëti lae Akötresie. Celë hi aqane xatua së hnei nyidrë troa atrehmekune ka hape, ka tru catre kö Akötresieti hui Iesu, nge draië kö la musi Nyidrë hune la mus i Iesu.”

14. Nemene la ceitun ka amamane ka hape, thatreine kö troa qaja ka hape, Akötresieti la ka upi Satana troa dreuthe trije la itre atr hnine lo ihueë?

¹⁴ Hane fe hi la ketre ceitun. Hetre itre atr ka mekune ka hape, hna nue Satana hnei Akötresie troa musinëne lo ihueë. Tro sa xatuane tune kaa la ketre kem maine thine pena troa atrehmekune ka hape, thatreine kö tro sa jelenyipicine la mekune cili? Tro sa hnyinge ka hape, “Maine ngazo jë hi la thiina ne la nekö i epun, nge tru la itre huliwa ka ngazo hnei angeice hna kuca, tro epuni lai  a u?” Ma tro hë lai kem, maine thin a qaja ka hape, tro angeic a hajine la nekö i angeic. Nge tro angeic a anyimua thele troa xatuane la nekö i angeic troa trije la itre huliwa ka ngazo. (Ite edomë 22:15) Ijije troa hnyinge ka hape, “Ngo ue e xele ju nyëne ma saze?” Tro hë lai kem, maine thin a qaja ka hape, tro hë angeice lai a nyithupene kowe la nekönatr la huliwa i angeice ka ngazo. Thupene jë hi lai, hnyinge jë ka hape, “Nge nemene ju hë la hnei epuni hna troa kuca e atre jë epuni ka hape, hnene la ketre atr ka ngazo thiina hna up la nekö i epun troa hane ngazo thiina?” Ma tro hë lai kem, maine thin a elëhni kowe lai atr ka ajojezine la nekö i angeic. Ase jë hi lai, easë pë hë a hnyinge ju ka hape, “Maine atre hi epun ka hape, ca atr ka ngazo thiina ka lapaa ajojezine la nekö i epun, tro kö epuni a up la atr cili troa hajine la nekö i epun?” Tro hë angeice lai a sa ka hape, ohea. Satana la ka up la itre atr troa kuca la nöjei pengöne ewekë ka ngazo. Ngo tha hnei Akötresieti kö hna mekune troa upi Satana troa hajin, maine amekötine la itre atr cili.

15, 16. (a) Pine nemene matre tha tro kö sa sesëkötr e tha kapa kö hnene la itre xa atr, la maca ne Baselaia? (b) Hapeu, tro hmekuje hi la itre ka atrein, a hamë ini hnyawa? Qaja jë la kepin. (Wange ju lo “ Itre Xa Aqane Sa” hna eköhagen)

¹⁵ Ngacama lolo ju hë la aqane hnyinge së, me aqane ithanatane së la itre xötr, me lolo fe la itre ceitune hna hamën, ngo tro pala hi a hetre itre atr ka tha tro kö a kapa la maca ne la Baselaia. (Mat. 10:11-14) Tha ala nyimu kö la itre atr ka kapa la itre ini hna hamëne hnei Iesu, ngacama pë pi kö ketre atr ka atreine hamë ini tui nyidrë!—Ioane 6:66; 7: 45-48.

¹⁶ Nge nemene fe la nyine tro sa kuca, e mekune ju së ka hape, thatreine kö së hamë ini hnyawa? Ijije pala hi tro sa hamëne la ini ngöne la easa cainöj. (E jë la Ite Huliwa 4:13.) Kola qaja hnene la Tusi Hmitrötr ka hape tro ha kapa la maca ka loi “hnei angat’ asë lo hna hnëkëne kowe la mele ka tha ase palua kö.” (Ite hu. 13:48) Haawe, catre pi së. Tro sa catre thele jëne troa maca trootro ngöne la aqane tro fë la ini; ngo maine tha drei së ju hë hnene la itre atr, tre tha tro kö sa nanazij. Maine tro sa mejiune koi Iehova, memine la aqane ini së hnei Nyidrë, tro hë së lai a atreine hamë ini hnyawa, nge tro hë së, me itre ka drei së a kepe thangane ka loi. (1 Tim. 4:16) Iehova la ka xatua së matre atre jë së la aqane troa “isa sa kowe la nöjei at.” Ame hë ngöne la hnaaluene tane mekun, tro pë hë sa wange la eloine la troa trongëne lo ketre wathebo ka sisitria ngöne la hna cainöje trootro.