1, 2. (a) Magsaysay sing eksperiensia nga nagapakita nga makabulig ang nagakaigo nga mga pamangkot. (Tan-awa ang piktyur sa umpisa sini nga artikulo.) (b) Ngaa indi kita dapat mangalag-ag sa pagpakig-istorya parte sa mabudlay nga mga topiko?

MGA pila na ka tuig ang nagligad, ang isa ka utod nagapakig-istorya sa iya di-tumuluo nga bana parte sa Biblia. Miembro ang iya bana sang isa sa mga relihion sang Cristiandad. Sa ila pag-istoryahanay, ang iya bana nagsiling nga nagapati sia sa Trinidad. Nahantop niya nga wala mahangpan sang iya bana kon ano gid ang Trinidad, gani mataktikanhon sia nga namangkot, “Nagapati ka bala nga ang Dios, Dios; si Jesus, Dios; kag ang balaan nga espiritu, Dios; pero indi tatlo ka Dios kundi isa ka Dios?” Nakibot ang iya bana, kag nagsiling, “Indi a, wala ko ’ya nagapati sina!” Nagresulta ini sa maayo nga pag-istoryahanay parte sa kon ano gid ang Dios.

² Ina nga eksperiensia nagapakita nga makabulig ang mataktikanhon kag nagakaigo nga mga pamangkot. Nagapadaku man ini sang importante nga punto: Indi kita dapat magpangalag-ag sa pagpakig-istorya parte sa mabudlay nga mga topiko, pareho sang Trinidad, kalayuhon nga impierno, ukon ang pagluntad sang Manunuga. Kon magsalig kita kay Jehova kag sa iya mga paghanas, masami nga mangin makapakumbinsi ang aton sabat kag makalab-ot  sa tagipusuon sang aton mga tagpalamati. (Col. 4:6) Usisaon naton kon ano ang ginahimo sang epektibo nga mga ministro sa pagpakig-istorya parte sini nga mga topiko. Binagbinagon naton kon paano (1) mamangkot para mahibaluan ang pagpati sang isa, (2) mangatarungan base sa Kasulatan, kag (3) maggamit sing mga ilustrasyon para mahangpan ang punto.

3, 4. Ngaa importante nga mamangkot para mahibaluan naton ang pagpati sang isa ka tawo? Maghatag sing halimbawa.

³ Paagi sa mga pamangkot, mabuligan kita nga mahibaluan ang mga pagpati sang isa ka tawo. Ngaa importante ini? “Ang nagasabat sa wala pa sia makabati, kabuangan ini kag kahuluy-an sa iya,” siling sang Hulubaton 18:13. Antes ipaathag ang pagtamod sang Biblia sa isa ka topiko, mas maayo nga hibaluon anay naton kon ano gid ang iya pagpati. Kay kon indi, nagauyang lang kita sing tion sa pagpangatarungan sa isa ka ideya nga wala man niya ginapatihan!—1 Cor. 9:26.

⁴ Halimbawa, nagapakig-istorya kita parte sa impierno. Indi tanan nagapati nga ang impierno isa ka literal nga kalayuhon nga duog diin ginapaantos ang mga tawo. May mga nagapati nga isa ini ka kahimtangan nga nahamulag sa Dios. Gani mahimo kita makasiling, “Bangod lainlain ang pagpati sang mga tawo sa impierno, puede ko bala mahibaluan kon ano ang imo ginapatihan?” Sa tapos mabatian ang iya sabat, mahibaluan na naton kon paano sia buligan nga mahangpan ang ginasiling sang Biblia parte sini.

5. Paano makabulig ang mga pamangkot para mahibaluan naton kon ngaa amo sina ang mga pagpati sang isa?

⁵ Ang mataktikanhon nga mga pamangkot makabulig man sa aton nga mahibaluan kon ngaa amo sina ang mga pagpati sang isa. Halimbawa, paano kon may maistorya kita sa ministeryo nga wala nagapati sa Dios? Mahimo maghinakop kita dayon nga naimpluwensiahan sia sang sekular nga mga pagtamod, pareho sang teoriya sang ebolusyon. (Sal. 10:4) Pero, ang iban nga tawo wala nagatuo sa Dios bangod nakita nila ukon naeksperiensiahan ang grabe nga pag-antos. Nabudlayan sila magbaton nga may mahigugmaon nga Manunuga bangod sang ila mga pag-antos. Gani, kon magduhaduha ang tagbalay nga may Dios, mahimo naton sia pamangkuton, “Amo gid bala sina ang imo pagpati halin sang una?” Kon magsiling sia nga indi, mahimo naton sia pamangkuton sang rason kon ngaa nagaduhaduha sia nga may Dios. Paagi sa iya sabat, mahimo naton mahibaluan ang pinakamaayo nga paagi nga mabuligan sia sa espirituwal.—Basaha ang Hulubaton 20:5.

6. Ano ang dapat naton himuon pagkatapos mamangkot?

⁶ Pagkatapos mamangkot, kinahanglan naton pamatian ang iya sabat kag hangpon ang iya balatyagon. Halimbawa, mahimo isiling sang isa nga bangod sa isa ka trahedya nagaduhaduha sia nga may mahigugmaon nga Manunuga. Antes ipakita ang ebidensia nga nagaluntad ang Dios, hangpon naton ang iya balatyagon kag hambalon sia nga indi sala nga mamangkot kon ngaa nagaantos kita. (Hab. 1:2, 3) Ang aton mapinasensiahon kag mahigugmaon nga pagpakig-istorya mahimo magpahulag sa iya nga magtuon sing dugang. *

7. Sa ano nagadepende ang aton pagkaepektibo sa ministeryo?

⁷ Binagbinagon naman naton kon paano mangatarungan paagi sa Kasulatan. Siempre, ang Biblia ang panguna naton nga ginagamit sa ministeryo. Nagabulig ini sa aton para “may ikasarang gid [kita], kag nasangkapan sing bug-os para sa tagsa ka maayong buhat.” (2 Tim. 3:16, 17) Ang aton pagkaepektibo sa ministeryo nagadepende indi sa kadamuon sang teksto nga aton ginabasa, kundi sa aton pagpangatarungan kag pagpaathag sa  aton ginbasa. (Basaha ang Binuhatan 17:2, 3.) Para iilustrar, binagbinaga ang masunod nga tatlo ka senaryo.

8, 9. (a) Ano ang isa ka paagi sa pagpangatarungan sa isa nga nagapati nga si Jesus tupong sa Dios? (b) Ano pa ang nahibaluan mo nga pagpangatarungan nga epektibo?

⁸ Senaryo 1: Sa aton ministeryo, may maistorya kita nga nagapati nga si Jesus tupong sa Dios. Ano nga mga teksto ang aton gamiton para mangatarungan sa iya? Mahimo naton ipabasa sa iya ang Juan 6:38, diin si Jesus nagsiling: “Nagpanaug ako gikan sa langit agod himuon, indi ang akon kabubut-on, kundi ang kabubut-on sang nagpadala sa akon.” Pagkatapos mabinagbinag ina nga bersikulo, mahimo naton sia pamangkuton: “Kon si Jesus ang Dios, sin-o ang nagpadala sa iya? Indi bala nga mas gamhanan inang Isa sangsa kay Jesus? Kay man, ang nagpadala mas labaw sangsa ginpadala.”

⁹ Mahimo man naton basahon ang Filipos 2:9, diin ginlaragway ni apostol Pablo kon ano ang ginhimo sang Dios sa tapos nabanhaw si Jesus. Ang bersikulo nagasiling: “Ginbayaw [si Jesus] sang Dios sa mataas gid nga posisyon kag mainayuhon nga ginhatagan sia sing ngalan nga labaw sa tanan iban pa nga ngalan.” Para mahangpan niya ini nga teksto, mahimo kita mamangkot: “Kon si Jesus tupong sa Dios antes sia mapatay kag ginbayaw sia sang Dios sa mas mataas nga posisyon, indi bala nagapakita ini nga si Jesus nangin mas mataas na sa Dios? Pero, may mas mataas pa bala sa Dios?” Kon ginatahod sina nga tawo ang Pulong sang Dios kag interesado sia, ina nga pagpangatarungan magapahulag sa iya nga usisaon pa gid ini nga topiko.—Binu. 17:11.

10. (a) Paano kita mahimo mangatarungan sa isa nga nagapati sa kalayuhon nga impierno? (b) Ano nga pangatarungan ang imo nahibaluan nga epektibo kon nagapakig-istorya parte sa kalayuhon nga impierno?

¹⁰ Senaryo 2: Ang isa ka relihioso nga tagbalay indi magpati nga indi pagpaantuson sing dayon sa kalayuhon nga impierno ang malain nga mga tawo. Mahimo nga nagapati sia sa kalayuhon nga impierno bangod gusto niya masilutan ang malain nga mga tawo sa ila kalautan. Paano kita mangatarungan sa sini nga tawo? Una, mahimo naton sia pasaligon nga silutan gid man ang mga malauton. (2 Tes. 1:9) Dayon, ipabasa naton sa iya ang Genesis 2:16, 17, nga nagapakita nga ang silot sa sala amo ang kamatayon. Mahimo naton ipaathag nga bangod sa sala ni Adan, natawo ang tanan nga makasasala. (Roma 5:12) Apang mahimo naton ipatalupangod nga wala nagsiling ang Dios parte sa pagsilot sa kalayuhon nga impierno. Dayon mahimo kita mamangkot, “Kon sanday Adan kag Eva paantuson sing dayon, indi bala makatarunganon nga paandaman sila parte sa sini?” Dayon mahimo naton basahon ang Genesis 3:19, diin ginpahayag ang silot sang ila pagpakasala pero wala sing may ginsambit nga kalayuhon  nga impierno. Sa baylo, ginsilingan si Adan nga magabalik sia sa yab-ok. Mahimo kita mamangkot, “Makatarunganon bala nga hambalan si Adan nga magabalik sia sa yab-ok pero ang matuod makadto sia sa kalayuhon nga impierno?” Kon bukas ang hunahuna sang isa, ini nga pamangkot magapahulag sa iya nga binagbinagon pa gid ini nga topiko.

11. (a) Ano ang isa ka paagi sa pagpangatarungan sa isa nga nagapati nga ang tanan nga mabuot nga tawo makadto sa langit? (b) Ano nga pangatarungan ang imo nahibaluan nga epektibo parte sa sini nga topiko?

¹¹ Senaryo 3: Sa aton ministeryo, may masugilanon kita nga nagapati nga ang tanan nga mabuot nga tawo makadto sa langit. Mahimo nagapati sa sini ang tagbalay bangod sang iya interpretasyon sa ginasiling sang Biblia. Halimbawa, ibutang ta nga ginaistoryahan ninyo ang Bugna 21:4. (Basaha.) Mahimo isiling niya nga ang mga pagpakamaayo nga ginalaragway sa sini nagapatuhoy sa kabuhi sa langit. Paano kita mangatarungan sa iya? Imbes nga maggamit sing dugang nga teksto bilang pamatuod, mahimo kita magkonsentrar sa detalye sina mismo nga teksto. Nagasiling ini nga “wala na sing kamatayon.” Dayon pamangkuton naton sia kon bala magaugyon sia nga para madula ang isa ka butang, dapat nagaluntad anay ini. Mahimo magasiling sia nga husto ina. Dayon, ipatalupangod naton sa iya nga wala sing kamatayon sa langit; ang mga tawo nagakapatay diri lang sa duta. Gani, makatarunganon nga ang ginapatuhuyan sang Bugna 21:4 amo ang palaabuton nga mga pagpakamaayo diri sa duta.—Sal. 37:29.

12. Ngaa naggamit si Jesus sing mga ilustrasyon?

¹² Luwas sa mga pamangkot, naggamit man si Jesus sing mga ilustrasyon sa iya pagbantala. (Basaha ang Mateo 13:34, 35.) Ang mga ilustrasyon ni Jesus nagbulig para mahibaluan ang motibo sang mga nagapamati sa iya. (Mat. 13:10-15) Bangod sa mga ilustrasyon, nangin makagalanyat man ang ginatudlo ni Jesus kag indi gid ini malipatan. Paano kita makagamit sing mga ilustrasyon sa aton pagpanudlo?

13. Ano nga ilustrasyon ang mahimo naton gamiton para ipakita nga ang Dios mas mataas kay Jesus?

¹³ Ang simple nga mga ilustrasyon masami nga epektibo. Halimbawa, sa pagpaathag nga mas mataas ang Dios sangsa kay Jesus, ayhan magamit naton ang masunod nga pamaagi. Mahimo naton masambit nga ang Dios kag si Jesus naggamit sang relasyon sa pamilya sa paglaragway sang ila kaangtanan. Gintawag sang Dios si Jesus nga iya Anak, kag si Jesus nagtawag sa Dios nga iya Amay. (Luc. 3:21, 22; Juan 14:28) Dayon mahimo naton pamangkuton ang tagbalay: “Kon gusto mo itudlo sa akon nga tupong ang duha ka tawo, ano nga kaangtanan sa pamilya ang imo gamiton para iilustrar ina nga punto?” Ang tawo mahimo magsabat sing mag-utod, ukon kapid pa gani. Kon amo sini ang iya sabat, mahimo naton mapatalupangod sa iya nga amo gid ina ang husto nga pagpaanggid. Dayon mamangkot kita: “Kon mapamensaran dayon naton ina nga ilustrasyon, indi bala nga si Jesus—ang Dakung Manunudlo—makahunahuna man sina nga pagpaanggid? Pero gintawag niya nga Amay ang Dios. Gani ginlaragway ni Jesus ang Dios nga mas magulang sa iya kag may mas mataas nga awtoridad.”

14. Ano nga ilustrasyon ang nagapakita nga indi makatarunganon nga gamiton sang Dios ang Yawa para silutan ang mga tawo sa kalayuhon nga impierno?

¹⁴ Binagbinaga ang isa pa ka halimbawa. Ang pila nagapati nga si Satanas “ang nagadumala” sa kalayuhon nga impierno. Ang isa ka ilustrasyon mahimo magbulig sa ginikanan para makita nga indi makatarunganon nga tugutan sang Dios nga paantuson sang Yawa sa kalayuhon nga impierno ang mga tawo. Mahimo kita magsiling sing kaangay sini: “Hunahunaa nga ang imo bata nangin rebelyuso gid kag nagahimo sing malain nga mga butang. Ano ang imo himuon?” Siempre masiling ang ginikanan nga tadlungon niya ang iya bata. Mahimo nga tinguhaan gid niya nga buligan ang bata para untatan ang paghimo sing malain. (Hulu. 22:15)  Sa sini nga punto, mahimo kita mamangkot sa ginikanan kon ano ang iya himuon kon isikway sang bata ang tanan niya nga panikasog sa pagbulig sa iya. Ang kalabanan nga ginikanan magasiling nga wala na sila sing mahimo kundi silutan ini. Dayon mamangkot kita, “Ano abi kon matukiban mo nga may malain nga tawo nga nag-impluwensia sa imo bata nga mangin rebelyuso?” Pat-od gid nga maakig ang ginikanan sa sina nga tawo. Para mahangpan ang punto sang ilustrasyon, mahimo kita mamangkot sa ginikanan, “Bangod nahibaluan naton nga may malaut nga tawo nga nag-impluwensia sa imo bata, pangabayon mo bala ina nga tawo nga silutan ang imo bata?” Siempre ang sabat indi. Gani maathag nga indi paggamiton sang Dios si Satanas para silutan ang mga tawo nga naimpluwensiahan mismo sang Yawa nga maghimo sing malain!

15, 16. (a) Ngaa indi kita dapat magpaabot nga ang tanan magabaton sang mensahe sang Ginharian? (b) Dapat bala may talento gid kita sa pagministeryo para mangin epektibo sa pagpanudlo? Ipaathag. (Tan-awa ang kahon nga “ Ang Makabulig sa Aton sa Pagsabat.”

¹⁵ Nakahibalo kita nga indi tanan magabaton sang mensahe sang Ginharian. (Mat. 10:11-14) Nagakatabo ini bisan pa nagakaigo ang aton mga pamangkot kag pinakamaayo ang aton pagpangatarungan kag mga ilustrasyon. Indi man tanan nagbaton sang mensahe ni Jesus, bisan sia ang pinakamaayo nga Manunudlo nga nagkabuhi sa duta!—Juan 6:66; 7:45-48.

¹⁶ Sa pihak nga bahin, bisan pa nagabatyag kita nga wala kita sing talento sa pagministeryo, mahimo gihapon kita mangin epektibo. (Basaha ang Binuhatan 4:13.) Ginahatagan kita sang Pulong sang Dios sing rason sa pagpati nga “ang tanan nga husto nga nahuyog para sa kabuhi nga walay katapusan” magabaton sang maayong balita. (Binu. 13:48) Gani palambuon naton kag huptan ang positibo nga pagtamod sa aton kaugalingon kag sa aton ginapaambitan sang maayong balita sang Ginharian. Kabay nga gamiton naton ang paghanas ni Jehova, nga nagasalig nga makabenepisyo kita sa sini kag ang mga nagapamati sa aton. (1 Tim. 4:16) Buligan kita ni Jehova kon paano dapat “magsabat sa kada isa.” Subong sang binagbinagon sa masunod, ang isa ka paagi nga magmadinalag-on sa ministeryo amo ang pagsunod sa ginatawag nga Bulawanon nga Pagsulundan.