1, 2. (a) Edena sivarai ta ese ia hahedinaraia henanadai maorodia ita henia be mai anina bada? (Laulau ginigunana itaia.) (b) Dahaka dainai ma haida ida topik aukadia ita herevalaia totona, ita gari lasi be namo?

 LAGANI haida gunanai, taihu ta be ena Witnes lasi adavana ida Baibel ia herevalaia. Guna, taihu ena adavana be Kerisendom dubu ta ia lao. Idia herevahereva lalonai, ena adavana ia gwau ia be Toi Tamona ena hahediba herevana ia abia dae. Taihu ia itaia ena adavana be Toi Tamona ena hahediba herevana ia lalopararalaia namonamo lasi dainai, mai aonega ida ia nanadaia, “Oi abia dae Dirava be Dirava, Iesu be Dirava, bona Lauma Helaga be Dirava; to idia be Dirava toi lasi to Dirava tamona, a?” Iena adavana ia hoa bona ia gwau, “Lasi, unai lau abia dae lasi!” Bena taihu be mai moale ida adavana dekenai Dirava korikorina ia herevalaia.

² Unai sivarai ese ia hahedinaraia, henanadai maorodia ita henia be mai anina bada. Danu, namo lasi ita gari ma haida ida topik aukadia hegeregere, Toi Tamona, hel lahina, o Havaraia Tauna ia noho lasi lalohadaina ita herevalaia totona. Bema Iehova dekenai ita tabekau bona ita ia hadibaia dalana ita badinaia, iseda haere amo kamonai tauna ena kudouna ita hamarerea diba. (Kol. 4:6)  Inai atikol lalonai do ita itaia, haroro gaukara ita karaia namonamo totona, edena dala ai, (1) henanadai namodia amo ruma tauna ena lalohadai ita dibaia, (2) Baibel siri ita gaukaralaia namonamo, bona (3) haheitalai namodia amo ruma tauna ena lalohadai ita dibaia.

3, 4. Ruma tauna ese ia abia dae gaudia ita dibaia totona, dahaka dainai henanadai ita gaukaralaia be mai anina bada? Haheitalai gwauraia.

³ Henanadai gaukaralaia karana ese ita do ia durua, ma ta ese ia abia dae gaudia ita dibaia totona. Dahaka dainai unai be mai anina bada? Aonega Herevadia 18:13 ia gwau: “Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.” Unai dainai, Baibel ena lalohadai ita do herevalaia lasi neganai, kamonai tauna ese ia abia dae gaudia ita diba guna be namo. Bema unai ita karaia lasi, reana nega bada do ita haorea kava ia abia dae lasi gauna ita herevalaia totona!—1 Kor. 9:26.

⁴ Hegeregere, reana ita be ruma tauna ida hel ena hahediba herevana ita herevalaia. Haida idia abia dae hel be lahi amo taunimanima dikadia hahisia gabuna korikorina. Ma haida idia abia dae ta be hel dekenai ia noho, anina be ia be Dirava ena turana lasi. Unai dainai, reana inai bamona do ita hereva: “Hel dekenai taunimanima edia lalohadai be idauidau dainai, mani emu lalohadai oi gwauraia?” Ruma tauna ena haere ita kamonai murinai, unai ese ita do ia durua ia dekenai Baibel ena lalohadai ita hadibaia totona.

5. Edena dala ai henanadai karana ese ita ia durua, ruma tauna ia abia dae gaudia edia badina ita diba totona?

⁵ Mai aonega ida ruma tauna ita nanadaia neganai, iena haere amo do ita diba dahaka dainai ia be unai hahediba herevana ia abia dae. Hegeregere, bema ruma tauna ia gwau ia be Dirava ia abidadama henia lasi, edena bamona do oi haere? Reana do oi laloa unai tauna be evolusen lalohadaina ia abia dae. (Sal. 10:4) To, haida be Dirava idia abidadama henia lasi, badina idia dekenai gau dikana ta ia vara o idia itaia ma haida be hisihisi bada idia davaria. Idia daradara, dahaka dainai lalokau Havaraia Tauna be unai bamona hisihisi ia koua lasi. Unai dainai, bema ruma tauna ia gwau ia be Dirava ia abidadama henia lasi, ita nanadaia diba, “Oi be nega ibounai unai bamona oi laloa, a?” Bema ia gwau “lasi,” vadaeni ita nanadaia diba bema ia dekenai gau ta ia vara dainai unai bamona ia laloa. Iena haere ese ita do ia durua Baibel amo ena lalohadai ita hamaoromaoroa totona.—Aonega Herevadia 20:5 duahia.

6. Henanadai ita henia murinai, dahaka ita karaia be namo?

⁶ Henanadai ta ita henia murinai, namona be ruma tauna ena haere ita kamonai namonamo bona ena lalohadai ita matauraia. Hegeregere, reana do ia gwau ia dekenai dika badana ta ia vara dainai, ia abia dae lalokau Havaraia Tauna ta ia noho lasi. Haere ita do henia lasi neganai, ita hamaoroa ia dekenai ia vara dika dainai ita sori. Bona ita hadibaia hisihisi idia vara ena badina ita tahua be kerere lasi. (Hab. 1:2, 3) Bema ia dekenai haheauka bona lalokau ita hahedinaraia, reana do ia ura diba ma haida ia abia. a

7. Haroro gaukara ita karaia namonamo totona dahaka ita karaia be namo?

⁷ Mani ita tahua, edena dala ai Baibel siridia ita gaukaralaia namonamo diba. Momokani, iseda haroro gaukara lalonai Baibel be mai anina bada. Baibel ese ita ia durua unai amo ita ‘hegeregere momokani bona ita noho  hegaegae gaukara namodia ibounai ita karaia totona.’ (2 Tim. 3:16, 17) Haroro gaukara oi karaia namonamo totona, siri momo oi gaukaralaia be anina lasi. To, namona be siri oi gaukaralaia namonamo bona edia anina oi herevalaia goevagoeva. (Kara 17:2, 3 duahia.) Mani inai haheitalai toi ita herevalaia.

8, 9. (a) Bema ta ia abia dae Iesu be Dirava ida ia hegeregere, edena dala ai iena lalohadai ita hamaoromaoroa diba? (b) Oi ese edena dala ma ta oi gaukaralaia vadaeni?

⁸ Haheitalai 1: Ita davaria ruma tauna ia abia dae Iesu be Dirava ida ia hegeregere. Edena siri do ita gaukaralaia iena lalohadai ita hamaoromaoroa totona? Reana ita noia Ioane 6:38 ia duahia, unai siri ai Iesu ia gwau: “Guba amo lau diho mai ena badina be egu ura karaia totona lasi, to lau ia siaia tauna ena ura lau karaia totona.” Unai murinai, reana do ita nanadaia: “Bema Iesu be Dirava, vadaeni daika ese Iesu be tanobada dekenai ia siaia mai? Tanobada dekenai Iesu ia siaia Tauna ese Iesu ia hereaia, ani? Unai ese ia hamomokania, Dirava ese Iesu ia hereaia.”

⁹ Danu, Filipi 2:9 ita duahia diba. Unai siri ai aposetolo Paulo be Iesu ia mase bona toreisi lou murinai Dirava ese ia karaia gauna ia herevalaia. Ia gwau: “Dirava ese [Iesu] dekenai dagi hereadaena ia henia bona ena hariharibada amo, ia ese ia dekenai ladana ibounai ia hereaia ladana ia henia.” Ruma tauna ita durua unai siri ia lalopararalaia totona, reana do ita nanadaia: “Bema Iesu ia do mase lasi neganai ia be Dirava ida ia hegeregere, bona gabeai Dirava ese ia dekenai dagi hereadaena ia henia, anina be Iesu ese Dirava ia hereaia, a? To, ita diba ta ese Dirava ia hereaia diba lasi, ani?” Bema ruma tauna be kudou maoro tauna bona Baibel ia matauraia, unai bamona dala ai siri ita gaukaralaia ese ena lalona do ia veria diba ma haida ia abia totona.—Kara 17:11.

10. (a) Hel lahina ia abia dae tauna be edena dala ai ita durua diba? (b) Oi ese edena dala ma ta oi gaukaralaia vadaeni?

¹⁰ Haheitalai 2: Tomadiho ia goadalaia ruma tauna ta ia abia dae taunimanima dikadia be hel lahina ai hisihisi do idia abia ela bona hanaihanai. Reana ia be hel lahina ena hahediba herevana ia abia dae, badina ia ura kara dika taudia be edia kara dika dainai panisi idia abia. Edena dala ai Baibel amo unai bamona tauna ita durua diba? Gau ginigunana be, ia ita hadibaia Dirava ese kara dika taudia do ia panisidia. (2 Tes. 1:9) Bena ia ita noia Genese 2:16, 17 ia duahia. Unai siri ese ia hahedinaraia kara dika ena davana be mase. Reana ita gwau diba, Adamu ena kara dika dainai taunimanima ibounai be mai edia kara dika ida idia vara. (Roma 5:12) To, ita hahedinaraia diba Dirava ia gwau lasi taunimanima be hel  lahina dekenai hisihisi do idia abia. Bena ruma tauna ita nanadaia diba, “Bema Adamu bona Heva be hel lahina ai do idia hisihisi ela bona hanaihanai, Dirava ese idia ia hadibaia guna be namo, ani?” Bena Genese 3:19 ita duahia diba. Unai siri lalonai Dirava ese Adamu ia hamaoroa ena kara dika dainai tano dekenai do ia giroa lou, to hel lahina ia herevalaia lasi. Reana ita henanadai diba, “Bema Adamu be hel lahina dekenai do ia lao, oi laloa Dirava ese ia hamaoroa tano dekenai do ia giroa lou be maoro, a?” Bema ia be kudou maoro tauna, unai bamona henanadai ese ena lalona do ia veria ena diba ia habadaia totona.

11. (a) Ia abia dae kara namo taudia ibounai be guba do idia lao tauna be edena dala ai ita durua diba? (b) Oi ese edena dala ma ta oi gaukaralaia vadaeni?

¹¹ Haheitalai 3: Haroro gaukara ai ita davaria tauna ia abia dae kara namo taudia ibounai be guba do idia lao. Unai ia abia dae dainai, ia ese Baibel ena hereva haida do ia lalopararalaia namonamo lasi. Hegeregere, bema ia dekenai Apokalupo 21:4 (duahia) ita herevalaia, unai tauna do ia laloa unai siri be guba maurina ia herevalaia. Edena dala ai ia do ita durua? Reana siri ma haida ita duahia lasi, to Apokalupo 21:4 ena hereva haida edia anina ita hahedinaraia diba. Unai siri ia gwau “mase be do ia ore.” Ruma tauna do ita nanadaia: “Reana inai do oi abia dae, bema gau ta be do ia ore, anina be guna ia noho be namo, ani?” Reana ruma tauna ese unai do ia abia dae. Bena ita gwau diba guba dekenai mase be lasi, to tanobada sibona dekenai taunimanima idia mase. Unai murinai ita gwau diba, Apokalupo 21:4 be vaira negana ai tanobada dekenai do ia vara hahenamo ia herevalaia.—Sal. 37:29.

12. Dahaka dainai Iesu ese haheitalai ia gaukaralaia?

¹² Iesu be ena haroro gaukara lalonai haheitalai ia gaukaralaia danu. (Mataio 13:34, 35 duahia.) Unai ese kamonai taudia ia durua edia lalohadai idia hahedinaraia totona. (Mat. 13:10-15) Danu, Iesu ese haheitalai ia gaukaralaia dalana amo momo edia lalona ia veria bona ia hadibaia gauna idia laloatao. Edena dala ai iseda hadibaia gaukarana lalonai haheitalai ita gaukaralaia diba?

13. Edena haheitalai amo ita hahedinaraia diba Dirava ese Iesu ia hereaia?

¹³ Auka lasi haheitalai ita gaukaralaia be namo. Hegeregere, bema ita ura ta dekenai ita hahedinaraia Dirava ese Iesu ia hereaia, reana inai dala ita badinaia diba. Ita gwau diba, Dirava bona Iesu ese edia hetura karana be Tama bona ena Natuna mero edia hetura karana ida idia hahegeregerea. (Luka 3:21, 22; Ioa. 14:28) Bena ruma tauna do ita nanadaia: “Bema oi ura lau dekenai oi hadibaia famili lalonai taunimanima rua be idia hegeregere, edena hetura karana do oi gaukaralaia?” Reana ruma tauna be hekapa memerodia do ia herevalaia. Bema unai bamona ia hereva, vadaeni ita hamaoroa unai be haheitalai namona. Bena ia do ita nanadaia: “Bema ita ruaosi be unai haheitalai ita laloa, dahaka dainai Hadibaia Tauna Hereadaena, Iesu, ese unai haheitalai ia gaukaralaia lasi? To, Iesu be Dirava ia herevalaia neganai, ia gwau Dirava be ena Tamana. Unai ese ia hahedinaraia Dirava ena mauri lagani be bada bona ena siahu be Iesu ena ia hereaia.”

14. Edena haheitalai ese ia hahedinaraia, Dirava ese Satani ia abia hidi lasi taunimanima ia panisia totona?

¹⁴ Mani haheitalai ma ta ita laloa. Haida idia abia dae Satani ese hel lahina “ia naria.” Haheitalai ta ese tama sina do ia durua, unai amo idia laloparara Dirava ese Satani ia gaukaralaia lasi hel lahina ai taunimanima ia hahisia totona. Reana inai bamona ita hereva diba: “Mani oi laloa, emu natuna be ia gwau-edeede bona kara dikadia momo ia karaia. Dahaka do oi karaia?” Reana unai tama do ia gwau ena natuna do ia matahakani henia. Reana ia ese ena  natuna do ia durua loulou kara dika ia karaia lasi totona. (Aon. 22:15) Reana unai tama do ita nanadaia, dahaka do ia karaia bema ena natuna ese iena heduru ia dadaraia. Tama sina momo do idia gwau dala ta be lasi to, natuna do idia panisia. Unai murinai ita nanadaia, “Dahaka do oi karaia bema oi davaria tau dikana ta ese emu natuna ena lalona ia veria dainai ia gwau-edeede?” Vaia, unai tama be unai tau dekenai do ia badu. Haheitalai ena anina ia lalopararalaia totona, reana ita nanadaia: “Bema oi diba unai tau dikana ese emu natuna ia hakaua kerere, unai tau do oi noia emu natuna ia panisia totona, a?” Vaia, do ia gwau, “lasi.” Unai hegeregerena, Satani be taunimanima ia hakaudia kerere kara dika idia karaia totona. Unai dainai, Dirava ese Satani do ia abia hidi lasi unai taudia ia panisia totona!

15, 16. (a) Dahaka dainai ita diba haida ese Basileia ena sivarai namona do idia abia dae lasi? (b) Ena be ita laloa ita be hadibaia taudia namodia lasi, to haroro gaukara lalonai namo ita havaraia diba, a? Herevalaia. (Maua ladana, “ Tulu Namona Ta Haere Ita Henia Totona” itaia.)

¹⁵ Ita diba ena be haroro gaukara ai henanadai namodia ita henia, siri ita gaukaralaidia namonamo, bona haheitalai namodia ita gaukaralaia, to haida ese Basileia ena sivarai namona do idia abia dae lasi. (Mat. 10:11-14) Laloatao, ena be Iesu be Hadibaia Tauna hereadaena, to haida sibona ese ena hadibaia hereva idia kamonai!—Ioa. 6:66; 7:45-48.

¹⁶ Danu, ena be ita laloa ita be hadibaia taudia namodia lasi, to haroro gaukara ai anina namona ita havaraia diba. (Kara 4:13 duahia.) Baibel ese ita ia hadibaia, “mauri hanaihanai idia ura kudou-maoro taudia ibounai” ese sivarai namona do idia abia dae. (Kara 13:48) Unai dainai, lalohadai maorona ita abia be namo. Iseda haroro dalana ita hanamoa be namo, to namo lasi ita lalomanoka bema ita hereva henia taudia be sivarai namona idia abia dae lasi. Bema Iehova dekenai ita tabekau bona ita ia hadibaia dalana ita badinaia, hadibaia taudia namodia ai do ita lao, bona unai ese ita bona ita idia kamonai henia taudia do ia durua. (1 Tim. 4:16) Iehova ese ita do ia durua taunimanima ‘ta ta do ita haere henia’ totona. Stadi gabena ai do ita itaia, haroro gaukara karaia namonamo dalana ta be Hakaua Herevana Hereadaena do ita badinaia.