1, 2. (a) Mangisalaysay iti kapadasan a mangipakita a napateg dagiti maitutop a saludsod. (Kitaen ti ladawan iti rugi ti artikulo.) (b) Apay a saantay koma a bumdeng a makisarita maipapan kadagiti narigat a topiko?

NAMINSAN, maysa a Kristiano a kabsat a babai ti makisarsarita iti di manamati nga asawana maipapan iti Biblia. Nadakamat ni lakayna a mamati iti Trinidad. Nadlaw ti kabsat a babai a saan a nalawag ken lakayna no ania a talaga ti doktrina a Trinidad isu a sitataktika nga insaludsodna, “Mamatika kadi a ti Dios ket Dios, a ni Jesus ket Dios, ken ti nasantuan nga espiritu ket Dios; ngem saan a tallo ti Dios no di ket maymaysa laeng?” Imbaga ni lakayna a saan a mamati iti dayta. Nagresulta daytoy iti narayray a diskusion no siasino a talaga ti Dios.

² Ipakita dayta a kapadasan a napateg ti panagaramat iti nataktika ken maitutop a salsaludsod. Kasta met, ditay koma bumdeng a makisarita maipapan kadagiti narigat a topiko, kas iti Trinidad, impierno, wenno ti kaadda ti Namarsua. No agtalektayo ken Jehova ken iti panangsanayna, makaipaaytayo iti makakombinsir a sungbat, a mabalin a mangtukay iti puso dagiti kasarsaritatayo. (Col. 4:6) Ita, ammuentayo no ania ti ar-aramiden dagiti epektibo a ministro no makisarsaritada maipapan iti kakasta a topiko.  Usigentayo no kasano ti (1) agsaludsod tapno mayebkas ti kasarsaritatayo ti rikriknana, (2) makirinnason maibatay iti Kasuratan, ken (3) agaramat kadagiti epektibo nga ilustrasion.

3, 4. Apay a napateg nga agsaludsodtayo iti kasarsaritatayo tapno maammuantayo ti patpatienna? Mangted iti pagarigan.

³ Makatulong dagiti saludsod tapno maammuantayo no ania ti patpatien ti maysa a tao. Apay a napateg dayta? “No ti asinoman sumungbat iti maysa a banag sakbay a mangngegna, kinamaag dayta iti biangna ken maysa a pannakaipababa,” kuna ti Proverbio 18:13. Nasayaat ngarud nga ammuentayo nga umuna no ania a talaga ti patpatien ti kasarsaritatayo sakbay nga ibagatayo ti kunaen ti Biblia maipapan iti maysa a topiko. Ta no saan, mabalin a saysayangentayo laeng ti tiempotayo a mangsupiat iti maysa nga ideya a dina met gayam patien!—1 Cor. 9:26.

⁴ Kas pagarigan, nalabit maipapan iti impierno ti topiko a pakisarsaritaantayo. Saan nga amin ket mamati a ti impierno ket literal nga umap-apuy a lugar a pagtutuokan. Adu ti mamati a kaipapananna laeng ti kaawan ti relasion iti Dios. Gapuna, mabalintay a kunaen: “Nagduduma ti patpatien dagiti tattao maipapan iti impierno, mabalin kadi a maammuan no ania ti makunam iti dayta?” No maammuantay ti sungbatna, nalaklakatayo a tulongan a mangtarus iti kuna ti Biblia maipapan iti daytoy a topiko.

5. Kasano a makatulong ti panagsaludsod tapno maammuantayo ti makagapu iti patpatien ti maysa a tao?

⁵ Dagiti nataktika a saludsod tulongannatayo met a mangammo no apay a kasta ti patpatien ti maysa a tao. Kas pagarigan, kasanon no ibaga ti makasaritatayo a saan a mamati iti Dios? Nalaka laeng nga ipapan a naimpluensiaan dayta a tao iti panangmatmat ti kaaduan, kas iti teoria ti ebolusion. (Sal. 10:4) Nupay kasta, adda dagiti tattao a saanen a mamati iti Dios gapu iti nakaro a panagsagaba a nakita wenno napasaranda. Mabalin a saanda a matarusan no apay a ti naayat a Namarsua ket palpalubosanna ti panagsagaba. No ngarud iyebkas ti maysa a bumalay a pagduaduaanna no adda Dios, mabalintayo a damagen, “Dati kadi a kasta ti panangmatmatyo?” No ti sungbatna ket saan, mabalin nga isaludsodtayo no ania ti makagapu nga agduadua iti kaadda ti Dios. Ti sungbatna matulongannatayo a mangpanunot no ania ti kasayaatan a pamay-an a panangtulong kenkuana.—Basaen ti Proverbio 20:5.

6. Ania ti rumbeng nga aramidentayo kalpasan a nagsaludsodtayo?

⁶ Kalpasan a nagsaludsodtayo, nasken nga imdengantayo a naimbag ti sungbat dayta a tao ken ibagatayo a raementayo ti opinionna. Kas pagarigan, mabalin nga ibagana nga agduadua iti kaadda ti naayat a Namarsua gapu iti napasamak a trahedia. Imbes a paneknekantayo a dagus nga adda Dios, nasaysayaat no makipagriknatay pay nga umuna kenkuana ket ibagatayo a normal laeng a kayattay a maammuan no apay nga agsagsagabatayo. (Hab. 1:2, 3) Babaen ti naanus ken naayat a pannakisaritatayo kenkuana, mabalin a matignay a mangammo iti ad-adu pay. *

7. Ania ti aramidentayo tapno agbalintayo nga epektibo iti ministerio?

⁷ Usigentayo ita no kasano ti makirinnason maibatay iti Kasuratan. Siempre, ti Biblia ti kangrunaan nga us-usarentayo iti ministerio. Daytoy ti tumulong kadatayo nga agbalin a “naan-anay a nakabalan maipaay iti tunggal naimbag nga aramid.” (2 Tim. 3: 16, 17) Tapno agbalintayo nga epektibo iti ministerio, saantay laeng a basta mangibasa kadagiti teksto. Masapul met nga ammotayo ti makirinnason ken mangilawlawag kadagita. (Basaen ti Aramid 17:2, 3.) Usigentayo ti sumaganad a tallo nga eksena.

8, 9. (a) Kasano ti mabalin a pannakirinnasontayo iti maysa a bumalay a mamati a ni Jesus kapadana ti Dios? (b) Ania pay a pannakirinnason maipapan iti daytoy a topiko ti nakitam nga epektibo?

⁸ Eksena 1: Iti ministeriotayo, adda nakasaritatayo a mamati nga agpada ni Jesus ken ti Dios. Ania a teksto ti mabalintayo nga usaren a makirinnason? Mabalintayo nga ipabasa kenkuana ti kinuna ni Jesus iti Juan 6:38: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.” Kalpasanna, mabalintay nga isaludsod: “No ni Jesus ti Dios, asino ngarud ti nangibaon kenkuana ditoy daga? Saan ngata a nangatngato isuna ngem ni Jesus? Siempre, natantan-ok daydiay nangibaon ngem daydiay naibaon.”

⁹ Mabalin met a basaentayo ti Filipos 2:9, nga iti dayta dineskribir ni apostol Pablo ti inaramid ti Dios kalpasan ti ipapatay ken panagungar ni Jesus. Kuna dayta a bersikulo: “Isu [ni Jesus] intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.” Tapno matulongan dayta a tao a mangtarus iti daytoy a teksto, mabalin nga isaludsodtayo: “No ni Jesus kapadana ti Dios sakbay a natay sa intan-ok ti Dios iti nangatngato a saad, saan kadi a nangatngato no kuan ni Jesus ngem iti Dios? Ngem adda kadi pay nangatngato ngem iti Dios?” No raraemen dayta a tao ti Sao ti Dios ken kayatna a maammuan ti agpayso, matignay a mangusig iti dayta a topiko gapu iti kasta a lohika.—Ara. 17:11.

10. (a) Kasano ti mabalin a pannakirinnasontayo iti maysa a mamati iti impierno? (b) Ania a pannakirinnason maipapan iti impierno ti nakitam nga epektibo?

¹⁰ Eksena 2: Ti maysa a relihioso unay a tao narigatna nga awaten a dagiti dakes a tattao ket saandanto a matutuok iti agnanayon idiay impierno. Mabalin a patienna nga adda impierno agsipud ta kayatna a madusa dagiti dakes a tattao. Kasanotay a makirinnason iti kasta a tao? Umuna, ipasiguradotayo kenkuana a madusanto dagiti nadangkes. (2 Tes. 1:9) Kalpasanna, mabalin nga ipabasatayo ti Genesis 2:16, 17, a mangipakita a ti dusa iti basol ket ipapatay. Mabalin nga ilawlawagtayo a nayanak a managbasol ti amin a tattao gapu iti basol a naaramidan ni Adan. (Roma 5:12) Ngem ibagatayo nga awan ti dinakdakamat ti Dios a pannakadusa iti impierno. Sa mabalin a kunaentayo, “No agpegpeggad da Adan ken Eva a madusa iti agnanayon a pannakatutuok, saan kadi a nainkalintegan laeng a naipakdaar  koma dayta kadakuada?” Kalpasanna, mabalintayo a basaen ti Genesis 3:19, nga iti dayta imbaga ti Dios ti dusa iti panagbasolda ngem awan ti nadakamat maipapan iti impierno. Imbes ketdi, naibaga ken Adan nga agsublinto iti tapok. Mabalin nga isaludsodtayo, “Nainkalintegan ngata a maibaga ken Adan nga agsubli iti tapok idinto ta maipan met gayam iti umap-apuy nga impierno?” No silulukat ti panunot dayta a tao, matignay a mangusig iti daytoy a topiko gapu iti kasta a saludsod.

11. (a) Ania ti maysa a pamay-an a pannakirinnason iti maysa a mamati a ti amin a nasingpet a tattao ket mapan idiay langit? (b) Ania a pannakirinnason maipapan iti daytoy a topiko ti nakitam nga epektibo?

¹¹ Eksena 3: Adda makasaritatayo a mamati nga amin a nasingpet a tattao ket mapan idiay langit. No kasta ti pammati ti bumalay, mabalin a maapektaran ti panangtarusna iti kuna ti Biblia. Kas pagarigan, ibasatayo kenkuana ti Apocalipsis 21:4. (Basaen.) Mabalin nga ipapanna a dagiti nadakamat a bendision iti dayta a bersikulo ket maipaayto idiay langit. Kasanotayo a makirinnason kenkuana? Imbes a mangibasatayo iti kanayonan a teksto kas pammaneknek, mabalin nga ipamaysatayo ti saritaan iti maysa a detalye iti dayta a teksto—ti sasao nga “awanton ni patay.” Mabalintayo a damagen kenkuana: ‘Umanamongka kadi a ti maawan ket daydiay dati nga adda?’ Nalabit wen ti sungbatna. Kalpasanna, ibagatayo nga awan a pulos ti ipapatay idiay langit, no di ket ditoy laeng daga. Nalawag ngarud a ti tuktukoyen ti Apocalipsis 21:4 ket dagiti masanguanan a bendision ditoy daga.—Sal. 37:29.

12. Apay a nagaramat ni Jesus kadagiti ilustrasion?

¹² Malaksid iti panagusarna kadagiti saludsod, nagaramat met ni Jesus kadagiti ilustrasion bayat ti panangasabana. (Basaen ti Mateo 13:34, 35.) Nakatulong dagita tapno maipalgak ti motibo dagiti dumdumngeg kenkuana. (Mat. 13:10-15) Dagita met ti makagapu a nagbalin a makapainteres ken saan a malipatan dagiti insurona. Kasano a maaramattayo dagiti ilustrasion iti panangisurotayo?

13. Ania nga ilustrasion ti mabalintayo nga usaren no ilawlawagtayo a natantan-ok ti Dios ngem ni Jesus?

¹³ Masansan a ti kasayaatan nga usaren ket dagiti simple nga ilustrasion. Kas pagarigan, no ilawlawagtayo a natantan-ok ti Dios ngem ni Jesus, mabalin a padasentayo ti sumaganad a pannakisarita. Mabalintayo a dakamaten nga agpada a ti Dios ken ni Jesus inyarigda ti relasionda iti relasion ti agama. Ti Dios inawaganna ni Jesus kas Anakna, ket inawagan met ni Jesus ti Dios kas Amana. (Luc. 3:21, 22; Juan 14:28) Kalpasanna, isaludsodtayo iti bumalay: “No kayatmo nga ilawlawag kaniak a ti dua a tao ket agpada, ania a relasion iti pamilia ti usarem?” Mabalin a dakamatenna ti agkabsat, wenno agsingin pay ketdi. No kasta ti sungbatna, mabalintayo nga ibaga nga umiso dayta a panangidilig. Sa mabalin nga isaludsodtayo: “No dayta nga ilustrasion ti kaalistuan a napanunotta, saan ngata a dayta met laeng koma ti napanunot ni Jesus, ti Naindaklan a Mannursuro? Ngem inawaganna ti Dios iti Ama. Isu a dineskribir ni Jesus ti Dios kas laklakay ken dakdakkel ti autoridadna ngem isuna.”

14. Ania nga ilustrasion ti mangipakita a saan a nainkalintegan a ti Dios usarenna ti Diablo a mangtutuok kadagiti tattao iti impierno?

¹⁴ Daytoy ti sabali pay a pagarigan. Adda dagiti mamati a ni Satanas ti “mangay-aywan” iti impierno. Babaen iti ilustrasion, mabalin a matulongan ti maysa a nagannak a manganalisar a saan a pulos usaren ti Dios ti Diablo a mangtutuok kadagiti tattao iti impierno. Mabalintayo a kunaen: “Ipapanmo a nagbalin a rebelde ti anakmo ket adu ti dakes nga ar-aramidenna.  Ania ti aramidem?” Nalabit ibaga ti nagannak a tubngarenna ti anakna. Mabalin nga ulit-ulitenna a balakadan tapno agbalbaliw. (Prov. 22:15) Kalpasanna, mabalin a damagentayo iti nagannak no ania ti aramidenna no di mangikankano ti anakna. Mabalin nga isungbat ti kaaduan a nagannak a mapilitanda a mangdusa iti anakda. Satay isaludsod: “Kasanon no matakuatam nga adda gayam mangisungsungsong iti anakmo nga agaramid ti dakes?” Sigurado a makapungtot ti nagannak iti dayta a tao. Tapno nalawlawag ti punto ti ilustrasion, mabalin nga isaludsodtayo iti nagannak, “Yantangay ammom nga adda dakes a tao a nangisungsong iti anakmo, ibagam kadi iti dayta a tao a dusaenna ti anakmo?” Siempre, ti sungbatna ket saan. Nalawag ngarud a saan nga usaren ti Dios ni Satanas a mangdusa kadagiti tattao nga insungsongna nga agaramid iti dakes!

15, 16. (a) Apay a ditay koma namnamaen a tunggal makasabaantayo ket umawat iti mensahe ti Pagarian? (b) Nasken kadi nga agbalintayo a nakalalaing tapno epektibo ti panangisurotayo? Ilawlawagmo. (Kitaen ti kahon a “ Maysa a Katulongan a Makirinnason.”)

¹⁵ Bigbigentayo nga uray agaramattayo iti maitutop a saludsod, lohikal a pannakirinnason, ken kasayaatan nga ilustrasion, kaskasdi a saan nga amin a makasabaantayo ket umawat iti mensahe ti Pagarian. (Mat. 10:11-14) Kinapudnona, idi panawen ni Jesus, sumagmamano laeng ti nangipangag iti pannursurona—nupay isu ti katan-okan a Mannursuro a nagbiag ditoy daga!—Juan 6:66; 7:45-48.

¹⁶ Iti sabali a bangir, uray no iti panagriknatayo ket saantay a nalaing a mangisuro, mabalintay latta ti agbalin nga epektibo iti ministerio. (Basaen ti Aramid 4:13.) Ipasigurado kadatayo ti Sao ti Dios nga “amin dagidiay siuumiso nga agannayas iti agnanayon a biag” awatenda ti naimbag a damag. (Ara. 13:48) Isu a maaddaantay koma iti balanse a panangmatmat iti bagitayo ken dagidiay kaskasabaantayo. Sapay koma ta naan-anay a gundawayantayo ti panangsanay ni Jehova, nga agtalektayo a magunggonaantayo iti dayta ken dagidiay dumngeg iti mensahetayo. (1 Tim. 4:16) Matulongannatayo ni Jehova a mangipaay iti ‘sungbat iti tunggal tao.’ Iti sumaruno nga artikulo, maammuantayo no kasano nga agballigitayo iti ministerio babaen ti panangsurottayo iti makunkuna a Nabalitokan a Bilin.