1, 2. (a) Tanga musoso ulondekesa o valolo ia ku bhanga ibhuidisu iambote? (Tala o foto ia dianga.) (b) Mukonda diahi ki tu tokala ku kala ni uôma ua kuzuela milongi ia bhonzo?

MIVU ku dima, saí phange ua kexile mu zuela maka a lungu ni Bibidia kua muadi uê ki Kidistá. Mu ukulu, muéne ua tokalele mu ngeleja ia Kidistándade. Kioso kia kexile mu zuela, muadi uê uambe kuila, ua xikinine kuma Nzambi Tilindade, mba muthu umoxi mu kitatu kia athu. Kioso kia mono kuila muéne kejidile ihi ilombolola o Tilindade, o muhatu’ê ua mu ebhuidisa: “Eie u xikina kuila Nzambi, Nzambi, Jezú Nzambi, ni kuila o nzumbi ikôla Nzambi ué; maji né kiki ki kuene ji Nzambi jitatu, maji kuene ngó Nzambi imoxi?” Muadi ué ua sasumuka, iu uambe: “Kana, ki ngi xikina!” Mu kithangana kieniókio, a mateka kuzuela maka a lungu ni Nzambi ia kidi.

² O kifika kiki, kilondekesa o unjimu ua ku bhanga ibhuidisu iambote, maji ni ujitu. Kilondekesa kima kia mukuá: Ki tu tokala ku kala ni uôma, se o maka a lungu ni Tilindade, infernu mba se kuene muene Mubhangi ua ima ioso. Se tu dielela kua Jihova, ni mu itendelesu ia tu bhana, tua-nda tena ku tambuijila kiambote o athu, kiki kia-nda sangulukisa o athu. (Kol. 4:6) Tu di longe ihi iene mu bhanga o aboki ambote, kioso kia zuela  o maka a lungu ni milongi íii. Tua-nda di longa (1) ku bhanga ibhuidisu i bhangesa o muthu kuzuela, (2) kuzuela i longa o Mikanda Ikôla, ni (3) ku bhanga kifika phala ku jimbulula kiambote o maka.

3, 4. Mukonda diahi kima kiambote ku bhanga ibhuidisu, phala kuijiia ihi i xikina o muthu? Bhana kifika.

³ O ibhuidisu i tu kuatekesa kuijiia ihi i xikina o muthu. Mukonda diahi kima kiambote ku bhanga kiki? O divulu dia Jisabhu 18:13 di zuela: ‘Ku vutula kua lusolo, kuila ioso kiluua u ivua, ió uôua ni ku di bhekela jisonhi; kota o kudianga kuividila.’ Sé phata, ande dia kuzuela ihi i longa o Bibidia ia lungu ni maka u mua mu zuela, kima kiambote kuijiia ihi i xikina o athu. Se ki tu bhange kiki, tua-nda zanga kithangana mu kuzuela nê maka ka a xikina!—1 Kol. 9:26.

⁴ Xinganeka kuila, tua mu zuela maka a lungu ni infernu. Ko athu oso a xikina kuila o infernu kididi kia túbhia tua muzukuta. Maji avulu a xikina kuila, o infernu, o ku di sondoloka kua Nzambi. Mu kiki, tu tena kuzuela kuila: “Ngejiia kuila o athu ala ni ibanzelu ki i difu ia lungu ni infernu, ihi i u banza ia lungu ni infernu?” Kioso ki tuívua ihi i banza o muthu, tua-nda tena ku mu kuatekesa kuijiia ihi i longa o Bibidia ia lungu ni maka enhá.

5. Kiebhi o ku bhanga ibhuidisu, ku tu kuatekesa kuijiia se mukonda diahi o muthu uala ni kixikanu kieniókio?

⁵ O ibhuidisu iambote, i tena ku tu kuatekesa kuijiia se mukonda diahi o muthu uala ni kixikanu kiki. Mu kifika, abha se tu sanga muthu mu ukunji u zuela kuila ka xikina kua Nzambi? Nange tu banza kuila, o muthu iú a mu nganala ku ilongesu iamba kuila, o ima ia moneka ngó. (Jisá. 10:4) Maji saí athu, ka xikina kuila kuene Nzambi, mukonda ene mu tala hadi iavulu. Nange kia a bhonza ku xikina kuila kuene Mubhangi ua henda mukonda dia hadi. Mu kiki, se tu sanga muthu mu ukunji, uala ni phata kuila kuene Nzambi, tua tokala ku mu ebhuidisa: “O kuila ibanzelu íii iokulu kiá?” Se o muthu u tambuijila kana, tua tokala ku mu ibhula se saí kima ki mu bhangesa ku dituna kuila kuene Nzambi. O itambuijilu iê, i tena ku tu kuatekesa kuijiia kiebhi ki tu tena ku mu kuatekesa mu nzumbi.—Tanga Jisabhu 20:5.

6. Ihi i tua tokala ku bhanga kioso ki tu zubha ku bhanga ibhuidisu?

⁶ Kioso ki tu bhanga o kibhuidisu, tua tokala kuívua o itambuijilu ia muthu ni ku xila o ibanzelu iê. Nange muthu uamba kuila o mavuua ene a mu bhangesa ku dituna kuila kuene Mubhangi mukua henda. Ande dia ku mu londekesa o kidi kuila kuene Nzambi, kima kiambote se tu mu xila, ni ku mu kuatekesa kuijiia kuila, ki kima kia iibha kuibhula se mukonda diahi tuene mu tala hadi. (Haba. 1:2, 3) O muanhu uetu, ni henda ietu, i tena ku bhangesa kuila muéne u mesena ku di longa dingi. *

7. Phala ku di tunda kiambote mu ukunji ku bhinga ihi?

⁷ Tu di longe kiebhi ki tu tena kuzuela ihi i longa o Mikanda Ikôla. Sé phata, o Bibidia iene o falamenda ia beta-o-kota mu ukunji uetu. Iene i tu kuatekesa ‘ku tenena, mu kubhanga madimu moso mambote ni uhete.’ (2 Tim. 3:16, 17) Phala ku di tunda kiambote, ki ku bhingi ngó ku tanga ibatulu iavulu ia Bibidia, maji ku bhinga ku jimbulula kiambote o Bibidia, phala o muthu ku xikina. (Tanga Ikalakalu 17:2, 3.) Phala kulondekesa, tua-nda di longa ifika itatu.

8, 9. (a) Uebhi o ukexilu uambote ua kuzuela ni muthu u xikina kuila Jezú muene Nzambi? (b) Kibatulu kiebhi ki uene mu kuatekesa nakiu o athu ene mu kala ni maka enhá?

⁸  Kifika 1: Mu ukunji uetu tu sanga muthu ua xikina kuila Jezú muéne Nzambi. Kibatulu kiebhi ki tueji mu londekesa phala ku mu kuatekesa ku mona o kidi? Tu tena ku bhinga o muthu ku tanga o divulu dia Nzuá 6:38, mua zuela Jezú kuila: ‘Eme nga tuluka ku diulu, kana mu ku bhanga o vondadi iami, maji ku bhanga vondadi ia ió uoso ua ngi tumu.’ Kioso ki tu zubha ku tanga o kibatulu kiki, tu tena kuibhuidisa o muthu: “Se Jezú muene Nzambi, nanhi ua mu tumikisa mu ixi? O Ua mu tumikisa ka beta-o-kota, Jezú ndenge? Sé phata o muthu u tuma ua beta-o-kota, o muthu a mu tuma, ndenge.”

⁹ Tu tena ué ku tanga o divulu dia Filipe 2:9, mua soneka poxolo Phaulu ia bhange Nzambi kioso kiafu Jezú, ni kioso kia fukunuka. O velusu izuela: “Nzambi ua mu zangeleka kiavulu [Jezú], iú ua mu bhana dijina dia tundu o majina moso.” Phala ku kuatekesa o muthu ku xinganeka mu kibatulu kiki, tua tokala ku mu ebhuidisa: “Se Jezú muene uexile Nzambi ande dia kufua, mu ku bhita kithangana Nzambi anga u mu zangeleka kiavulu, Jezú keji kala kota, Nzambi ndenge? Né kiki, kiebhi o muthu kia tena ku kala kota, Nzambi ndenge?” Se o muthu ua xila o Mak’â Nzambi, muthu ua kidi, o kuzuela né mu ukexilu iú, ku tena ku mu bhangesa ku sota kuijiia dingi o milongi íii.—Ika. 17:11.

10. (a) Kiebhi ki tu tena ku kuatekesa o muthu u xikina kuila kuene infernu? (b) Kiebhi ki uene mu kuatekesa o athu ene mu kala ni maka enhá?

¹⁰ Kifika 2: Muthu mu ukunji u xikina kua Nzambi, nange ki mu bhonza ku xikina kuila o athu a iibha ka-nda ku a kaxtikala mu infernu katé ku hádia. Mukonda dia ku xikina mu infernu, nange ki mu bhangesa ku mesena kuila o athu a iibha a a kaxtikala, mukonda dia ima ia iibha iene mu bhanga. Kiebhi ki tu tena ku kuatekesa o muthu uala ni kibanzelu kiki? Kia dianga, tu tena ku mu kuatekesa ku mona kuila o athu a iibha a-nda ku a buika. (2 Tes. 1:9) Mu kusuka-ku, tu mu bhinga ku tanga o kibatulu kia divulu dia Dimatekenu 2:16, 17, di londekesa kuila o futu ia kituxi, o kalunga. Tu tena ku mu londekesa ué kuila, mukonda dia kituxi kiê, Adá ua bhangesa kuila, o athu oso mu ngongo, a lundula o kituxi kiê. (Loma 5:12) Maji tu tena kulondekesa ku muthu kuila Nzambi, ka tange kima kia lungu ni ku kaxtikala o athu mu infernu. Tu tena ué ku mu ibhuidisa: “Se Adá ni Eva, eji ku a kaxtikala mu infernu, Nzambi keji  ku a dimuna?” Tu tena ué ku tanga o divulu dia Dimatekenu 3:19, mu tu sanga o kizuelu kia Nzambi, kia lungu ni ibhidi ieji kala na-iu kioso kia té o kituxi, maji ki tu tange-mu maka a lungu ni infernu. Maji mu veji dia kiki, Adá a mu kanena kuila, ueji vutuka ku fufuta ia mavu. Tu tena ué kuibhula: “O kuila kima kiambote ku tangela Adá kuila ueji vutuka ku fufuta ia mavu, se muéne ueji kuia mu ifernu?” Se o muthu ka thathamana, o ku xinganeka kiki, ku tena ku mu kuatekesa ku banza mu maka enhá.

11. (a) Uebhi o ukexilu uambote ua ku kuatekesa o muthu u xikina kuila o athu oso ambote aia ku diulu? (b) Kiebhi ki uene mu kuatekesa o athu a xikina kuila o athu oso ambote aia ku diulu?

¹¹ Kifika 3: Mu ukunji uetu tu sanga muthu ua xikina kuila o athu oso ambote aia ku diulu. O ku banza kiki, ku tena ku bhangesa o muthu ku kamba ku tendela kiambote o Bibidia. Mu kifika, se tu tanga né o divulu dia Dijingunuinu 21:4. (Tanga.) Nange o muthu u banza kuila o mabesá, a a tange mu velusu íii, a-nda ku a tambula ku diulu. Kiebhi ki tu tena ku kuatekesa o muthu iú? Mu veji dia ku tanga ibatulu iavulu, tu tena ku mu londekesa kima kimoxi mu kibatulu ki tua mu tanga. O kibatulu ki zuela kuila: “Ki ku kala dingi kùfua.” Tu tena ku ibhuidisa o muthu: “Eie u xikina kuila phala o kima ki ki kale-ku dingi, kiene kia tokala ku dianga ku kala-ku?” Nange muéne ua-nda tambuijila xé. Mu kusuka-ku, tu tena ku mu tangela kuila ku diulu ki kuene kufua; o athu a fuá ngó mu ixi. Mu kiki, o divulu dia Dijingunuinu 21:4, dia mu zuela o mabesá mu ixi.—Jisá. 37:29.

12. Mukonda diahi Jezú ua kexile mu bhanga ifika?

¹² Jezú ka kexile ngó mu bhanga ibhuidisu, maji ua kexile ué mu bhanga ifika. (Tanga Matesu 13:34, 35.) O ifika ia Jezú, ia kuatekesa kuijiia se o jingivuidi jê a mesenene muene ku sidivila Jihova ni kidi kioso. (Mat. 13:10-15) Ifika ia kexile mu bhanga Jezú, ia kuatekesa ué o athu ku lembalala o milongi iê ni ku mesena ku mu ívua. Kiebhi ki tu tena ku bhanga ifika iambote, kioso ki tu longa mu ukunji?

13. Kiebhi ki tu tena kulondekesa kuila Nzambi ua tundu Jezú?

¹³ Kima kiambote ku bhanga ifika ia bhebhuluka. Mu kifika, kioso ki tu mesena ku jimbulula kuila Nzambi muene ua beta-o-kota, Jezú ndenge, nange tu tena ku bhanga o kifika kiki. Kia dianga, tu tena kuzuela kuila, ki kale Nzambi mba Jezú, a sokesa o ukamba uâ kála o ukamba ua Tata ni Mon’ê. (Luka 3:21, 22; Nzuá 14:28) Mu kusuka-ku, tu tena ku mu ebhuidisa: “Se athu kiiadi, a kala muthu umoxi ngó, kiebhi ki ueji jimbulula o undandu ua athu enhá?” O muthu nange u zuela jiphange, mba jingongo. Se muéne u tambuijila kiki, tu tena kuzuela: “Kiki kieji kala kifika kiambote. Se eie n’eme ki ki tu bhonza ku bhanga o kifika kiki, o kuila Jezú, o Mesene ia dikota, ka tenene ku bhanga o kifika kiki? Mu veji dia kiki, muéne uambe kuila Nzambi, Tat’ê. Mu ku bhanga kiki, Jezú ua tu kuatekesa ku mona kuila Nzambi kota, ni kuila Nzambi ua mu tundu mu kutena.”

14. Kifika kiebhi kilondekesa kuila, ki kieji fuama Nzambi ku tumina Diabhu ku kaxtikala o athu mu infernu?

¹⁴ Xinganeka o phangu ia mukuá. Saí athu a xikina kuila Satanaji muene uene mu “tumina” o ifernu. O kifika ki tena ku kuatekesa o tata ku mona, kuila ki kieji fuama se Nzambi u tumina Diabhu ku kaxtikala o an’ê mu ifernu. Tu tena kuibhula: “Ihi i ueji bhanga se mon’ê u bhukumuka, anga u kala mu bhanga ima iavulu ia iibha?” Nange o tata ueji zuela kuila, ueji bazela mon’ê. Muéne u bhanga ioso mu veji javulu phala ku kuatekesa mon’ê,  ku xisa o ima ia iibha. (Jisa. 22:15) Mu kithangana kiki, tu tena kuibhula o tata se ihi ieji bhanga se o mon’ê u dituna o nguzu ioso ia mu bhanga phala mu ku kuatekesa. Jitata javulu eji tambuijila kuila, keji mu bazela dingi, maji eji mu kaxtila kiá. Tu tena kuibhula: “Abha se uejidile kuila saí muthu ua iibha ua mu funhisa mon’ê ku bhukumuka?” Sé phata, o tata ueji kuatela njinda ku muthu iú. Mu ku suka-ku, phala ku jimbulula o pondo, tu tena kuibhula: “Mu kuijiia kuila muthu ua iibha ua longesa mon’ê ku bhanga ima ia iibha, ueji bhinga o muthu iú ku kaxtikala mon’ê, bhu kididi kiê?” Nange ueji tambuijila kana. Diabhu muéne uene mu suínisa o athu ku bhanga ima ia iibha. Mu kiki, Nzambi keji tumina Satanaji ku kaxtikala o athu!

15, 16. (a) Mukonda diahi ki tu tokala ku kingila kuila, o athu oso u tu bokela o njimbu iambote ia Utuminu, a xikina? (b) O kuila tua bhingi ku kala ni uhete ua katunda, phala ku longa kiambote? Jimbulula. (Tala ué o kaxa “ Falamenda Phala ku tu Kuatekesa o ku Vutuila ni Ujitu.”)

¹⁵ Etu tuejiia kuila ki athu oso u tu bokela a-nda xikina o njimbu iambote ia Utuminu. (Mat. 10:11-14) Né muene se tu bhanga ibhuidisu iambote, tu a jimbuluila kiambote o milongi, mba tu bhanga ifika iambote. Mu izuua ia Jezú, ko athu oso a xikinine o milongi iê, sumbala muéne uexile o Mesene ia betele-o-kota mu ixi!—Nzuá 6:66; 7:45-48.

¹⁶ Né muene se tu banza kuila ki tuala ni uhete, maji né kiki, tu tena ku di tunda kiambote mu ukunji uetu. (Tanga Ikalakalu 4:13.) O Mak’â Nzambi, ene mu tu londekesa kuila, “oso-phe . . . a fuamena o muenhu ki uabhua,” a-nda xikina o njimbu iambote. (Ika. 13:48) Mu kiki-phe, tua tokala ku mona o ima mu ukexilu uambote. Tua tokala ku di suínisa phala ku longa kiambote, ki tu tokala ku luuala se o athu u tu bokela o njimbu iambote ia Utuminu, a dituna. Se tu dielela kua Jihova ni itendelesu ia tu bhana, tua-nda kala jimesene jambote, mu kiki, tua-nda katula mbote iavulu, ni ió u tuene mu longa. (1 Tim. 4:16) Jihova u tena ku tu kuatekesa ku ‘vutula kiambote ni ujitu.’ Mu milongi ia-nda kaiela, tua-nda di longa kiebhi ki tu tena ku di tunda kiambote mu ukunji uetu, mu ku belesela o izuelu, Bhanga Kua Mukuenu o Kima ki ua Mesena Kia ku Bhanga.