Aw Wi Go “Ansa Ɔlman”?
“Wɛn una de tɔk wit pipul, una fɔ tɛl dɛn tin we go mek dɛn gladi fɔ yɛri wetin una de tɔk . . . , ɛn una fɔ no aw fɔ ansa ɔlman.”—KƆL. 4:6.
1, 2. (a) Gi wan ɛgzampul we de sho se i impɔtant fɔ aks di rayt kwɛstyɔn. (Luk di pikchɔ nia dis atikul in taytul.) (b) Wetin mek wi nɔ fɔ fred se sɔm tɔpik dɛn go tranga fɔ ɛksplen?
WAN tɛm, wan sista bin de tɔk bɔt di Baybul to in man we nɔto Jiova Witnɛs. We in ɛn in man bin de tɔk, in man bin tɛl am se i biliv pan di Triniti. Di sista si se in man nɔ rili no wetin di Triniti de tɔk bɔt, so i tek tɛm aks in man se, “Yu biliv se Gɔd na Gɔd, Jizɔs na Gɔd, ɛn di oli spirit na Gɔd; bɔt dɛn nɔto tri Gɔd, dɛn ɔl na jɔs wangren Gɔd?” Di man bin sɔprayz ɛn tɔk se, “Nɔ, a nɔ biliv dat!” So dis bin mek di sista bin ebul fɔ ɛp in man fɔ no udat Gɔd rili bi.
2 Dis ɛgzampul de sho se i rili fayn fɔ lɛ wi tek tɛm fɔ aks di rayt kwɛstyɔn. I de tɛl wi bak wan impɔtant tin: Wi nɔ nid fɔ fred se sɔm tɔpik dɛn go tranga fɔ ɛksplen. Tɔpik dɛn lɛk, Triniti, ɛl faya, ɔ if Gɔd rili de. If wi abop pan Jiova ɛn di trenin we i de gi wi, dat go ɛp wi fɔ gi ansa we go mek pipul dɛn biliv Gɔd gud gud wan. (Kɔl. 4:6) Insay dis atikul, wi go lan bɔt wetin go ɛp wi fɔ tich gud gud wan. Wi go tɔk bɔt (1) aw fɔ aks kwɛstyɔn dɛn we go ɛp yu fɔ no wetin di pɔsin biliv, (2) aw fɔ ɛp pɔsin fɔ ɔndastand wetin di Baybul se, ɛn (3) aw fɔ yuz ɛgzampul dɛn fɔ ɛp pɔsin fɔ ɔndastand klia wan.
AKS KWƐSTYƆN DƐN WE GO ƐP YU FƆ NO WETIN DI PƆSIN BILIV
3, 4. Wetin mek i impɔtant fɔ aks kwɛstyɔn dɛn we go ɛp wi fɔ no wetin di pɔsin biliv? Gi wan ɛgzampul.
3 I fayn fɔ yuz kwɛstyɔn dɛn we wi de prich bikɔs dat go ɛp wi fɔ no wetin pɔsin biliv. Wetin mek i impɔtant fɔ no wetin pɔsin biliv? Prɔvabs 18:13 tɔk se: “If yu ansa bifo yu yɛri wetin dɛn de tɔk, yu jɛs de sho se yu na fulman.” Fɔ tru, bifo wi bigin fɔ tɔk to pɔsin bɔt wetin di Baybul se bɔt wan tɔpik, i go fayn mek wi tray fɔ no fɔs wetin rili di pɔsin biliv. If wi nɔ du dat, wi go west bɔku bɔku tɛm fɔ tray fɔ ɛksplen to am di tin dɛn we i nɔ bin ɛva biliv!—1 Kɔr. 9:26.
4 Lɛ wi se wi de tɔk to sɔmbɔdi bɔt ɛl faya. Nɔto ɔlman biliv se ɛl na ples usay dɛn de bɔn bad pipul dɛn na faya. So fɔ no wetin di pɔsin biliv, wi kin aks am se: “Tide, pipul dɛn biliv difrɛn difrɛn tin dɛn bɔt ɛl, bɔt mek a aks yu, wetin yu tink bɔt ɛl?” Afta wi dɔn yɛri di ansa we di pɔsin go gi, dat go mek wi ebul fɔ ɛp di pɔsin fɔ ɔndastand wetin di Baybul se bɔt dis tɔpik.
5. Aw kwɛstyɔn dɛn go ɛp wi fɔ no wetin mek pɔsin biliv wan patikyula tin?
5 We wi tek tɛm aks di rayt kwɛstyɔn, dat go ɛp wi fɔ no wetin mek di pɔsin biliv wan patikyula tɔpik. Fɔ ɛgzampul, lɛ wi se wi mitɔp sɔmbɔdi we wi de prich, we tɛl wi se i nɔ biliv Gɔd. Sɔntɛm wi go bigin de tink se dis pɔsin nɔ biliv se na Gɔd mek wi; wi jɔs kam bay chans. (Sam 10:4) Bɔt sɔm pipul dɛn nɔ biliv pan Gɔd igen bikɔs dɛn de si plɛnti pipul dɛn de sɔfa ɔ dɛnsɛf go dɔn de sɔfa pasmak. Dɛn biliv se if Gɔd de we lɛk mɔtalman, i nɔ go alaw dɛn fɔ sɔfa. So if di pɔsin we wi de prich to, dawt if Gɔd de, wi kin aks am se, “Na so yu dɔn de fil ɔltɛm?” If di pɔsin se nɔ, wi go aks am bak if na sɔntin dɔn mek i dawt se Gɔd de. Di ansa we i go gi, go ɛp wi fɔ no di bɛst we aw wi go ɛp am fɔ lan bɔt Gɔd.—Rid Prɔvabs 20:5.
6. Wetin wi fɔ du afta wi dɔn aks kwɛstyɔn?
6 Afta wi dɔn aks kwɛstyɔn, i go fayn mek wi lisin to di pɔsin in ansa gud wan, ɛn wi fɔ mek di pɔsin no se wi rɛspɛkt di we aw i de fil. Fɔ ɛgzampul, sɔntɛm di pɔsin go tɛl wi se na di bad tin dɛn we dɔn apin to am mek i dawt se Gɔd de we lɛk wi. Bifo wi sho di pɔsin se Gɔd de, i go fayn lɛ wi tɛl di pɔsin se wi rili sɔri fɔ wetin dɔn apin to am ɛn ɛp am fɔ mek i no se i nɔ bad fɔ tink bɔt wetin mek wi de sɔfa. (Abak. 1:2, 3) If wi peshɛnt ɛn tɔk to di pɔsin fayn wan, dat go mek di pɔsin want fɔ lan mɔ. *
ƐP DI PƆSIN FƆ ƆNDASTAND WETIN DI BAYBUL SE
Wetin mɔ go ɛp wi fɔ prich fayn fayn wan? (Luk na paregraf 7)
7. Wetin wi go du fɔ mek wi go ebul fɔ prich to pipul dɛn fayn fayn wan?
7 Naw, lɛ wi tɔk bɔt aw wi go ebul fɔ ɛp pɔsin fɔ ɔndastand wetin di Baybul se. Di Baybul na di men tin we wi kin yuz we wi de prich. I de ɛp wi fɔ ‘gɛt ɔl wetin wi fɔ gɛt ɛn bi wetin wi fɔ bi so dat wi go ebul du ɔl kayn gud wok lɛkɛ aw wi fɔ du am.’ (2 Tim. 3:16, 17) Fɔ prich fayn fayn wan, nɔ min se wi fɔ rid bɔku bɔku skripchɔ, bɔt na di we aw wi de ɛksplen ɛn ɛp di pɔsin fɔ ɔndastand di skripchɔ dɛn we wi rid to am, go sho se wi sabi prich. (Rid Di Apɔsul Dɛn Wok [Akt] 17:2, 3.) Lɛ wi tɔk bɔt tri ɛgzampul dɛn.
8, 9. (a) Aw wi go ɛp pɔsin we biliv se Jizɔs ɛn Gɔd ikwal? (b) Us ɔda we dɛn yu dɔn yuz fɔ ɛp pɔsin we biliv se Jizɔs ɛn Gɔd ikwal?
8 Ɛgzampul 1: We wi de prich, wi mit pɔsin we biliv se Jizɔs ɛn Gɔd ikwal. Us skripchɔ dɛn wi go yuz fɔ ɛp di pɔsin? Wi go mek lɛ di pɔsin rid Jɔn 6:38, usay Jizɔs se: “A nɔ kɔmɔt na ɛvin kam fɔ du wetin a want, a kam fɔ du wetin di wan we sɛn mi want mi fɔ du.” We di pɔsin dɔn rid am dɔn, wi go aks am se: “If Jizɔs na Gɔd, udat bin sɛn am fɔ kam na di wɔl? Yu nɔ tink se di Pɔsin we sɛn Jizɔs go big pas am? Yu go mɔs gri se di wan we kin sɛn pɔsin, kin big pas di pɔsin we i sɛn.”
9 Wi kin rid bak Lɛta Fɔ Filipay 2:9, usay di apɔsul Pɔl tɔk wetin Gɔd du afta Jizɔs day ɛn gɛt layf bak. Da vas de se: “Gɔd mek i sidɔm na ples we sho se nain impɔtant pas ɔl ɛn i gi am nem we sho se i impɔtant pas ɔl.” Fɔ ɛp di pɔsin fɔ ɔndastand wetin di skripchɔ se, wi kin aks am se: “If Jizɔs bin ikwal to Gɔd bifo i day ɛn leta Gɔd gi am pozishɔn we ay pas di wan we i bin gɛt, yu nɔ tink se dat bin fɔ dɔn mek Jizɔs big pas Gɔd? Bɔt wet o, lɛ a aks yu, Yu tink se ɛnibɔdi de we go big pas Gɔd?” If di pɔsin rɛspɛkt Gɔd in Wɔd ɛn na pɔsin we de tɔk tru, dɛn kwɛstyɔn ya go mek i want fɔ no mɔ.—Akt 17:11.
10. (a) Aw wi go ebul fɔ ɛp pɔsin we biliv se ɛl faya de? (b) Us ɔda we dɛn yu dɔn yuz fɔ ɛp pɔsin we biliv se ɛl faya de?
10 Ɛgzampul 2: We wi de prich, wi mit pɔsin we biliv tranga wan se bad pipul dɛn gɛt fɔ sɔfa na ɛl faya sote go. Sɔntɛm di rizin we mek i biliv se ɛl faya de na bikɔs i want fɔ mek di wikɛd wan dɛn pe fɔ di bad tin dɛn we dɛn de du. Aw wi go ebul fɔ ɛp pɔsin we de tink dis kayn we? Fɔs, wi go mek lɛ i no se Gɔd gɛt fɔ pɔnish di wan dɛn we de du bad. (2 Tɛs. 1:9) Afta dat, wi go mek lɛ i rid Jɛnɛsis 2:16, 17, we sho se sin in pe na day. Wi go ɛksplen to am se na di sin we Adam sin na in mek wi ɔl dɔn gɛt sin. (Rom 5:12) Bɔt wi go tɛl di pɔsin se Gɔd nɔ tɔk natin we sho se na ɛl faya i go pɔnish di bad wan dɛn. Dɔn wi kin aks am se, “If Adam ɛn Iv bin fɔ go sɔfa na ɛl faya sote go, yu nɔ tink se i fɔ dɔn fayn mek Gɔd wɔn dɛn bɔt dat?” Afta dat, wi go rid Jɛnɛsis 3:19, usay Gɔd tɛl Adam ɛn Iv aw i go pɔnish dɛn fɔ dɛn sin. We wi dɔn rid am dɔn, wi go sho di pɔsin se da skripchɔ de nɔ tɔk natin bɔt ɛl faya, bɔt Gɔd bin tɛl Adam se na dɔti i de go bak. Wi kin aks di pɔsin se, “If na ɛl faya Adam bin fɔ go, yu tink se i fayn we Gɔd tɛl am se na dɔti i de go bak we i day?” If na pɔsin we de tɔk tru, dis kwɛstyɔn go ɛp am fɔ tink siriɔs wan bɔt wetin wi dɔn tɛl am.
11. (a) Aw wi go ebul fɔ ɛp pɔsin we biliv se ɔl gud pipul dɛn de go na ɛvin? (b) Us ɔda we dɛn yu dɔn yuz fɔ ɛp pɔsin we biliv se ɔl gud pipul dɛn de go na ɛvin?
11 Ɛgzampul 3: We wi de prich, wi mit pɔsin we biliv se ɔl gud pipul dɛn de go na ɛvin. Dis tin we di pɔsin biliv go afɛkt di we aw i ɔndastand di Baybul. Fɔ ɛgzampul, if wi rid Rɛvɛleshɔn 21:4 to di pɔsin, i go de tink se dis vas de tɔk bɔt aw layf go tan lɛk na ɛvin. (Rid.) Aw wi go ɛp dis pɔsin fɔ ɔndastand? Bifo wi rid ɔda skripchɔ dɛn, i go fayn lɛ wi tek tɛm ɛksplen di tin dɛn we de insay di vas. I se nɔbɔdi “nɔ go day igen.” Wi go aks di pɔsin if i gri se fɔ lɛ sɔntin nɔ de igen, min se da tin de bin dɔn de. Di pɔsin go mɔs se yɛs. Dɔn wi go tɛl am se day nɔ wan de bi na ɛvin; na dis wɔl nɔmɔ pipul dɛn de day. So dis dɔn sho wi klia wan se Rɛvɛleshɔn 21:4 de tɔk bɔt di blɛsin dɛn we gɛt fɔ bi na dis wɔl tumara bambay.—Sam 37:29.
YUZ ƐGZAMPUL DƐN WE GO ƐP DI PƆSIN FƆ ƆNDASTAND
12. Wetin mek Jizɔs bin de yuz ɛgzampul dɛn?
12 Nɔto kwɛstyɔn dɛn nɔmɔ Jizɔs bin de yuz we i bin de prich, i bin de yuz ɛgzampul dɛn bak. (Rid Matyu 13:34, 35.) Di ɛgzampul dɛn we Jizɔs bin de yuz ɛp am fɔ no if di pipul dɛn rili want fɔ sav Jiova wit ɔl dɛn at. (Mat. 13:10-15) Jizɔs bin de yuz ɛgzampul dɛn fɔ ɛp pipul dɛn fɔ mɛmba di tin dɛn we i bin de tich ɛn fɔ mek pipul dɛn ɛnjɔy fɔ lisin to am. Aw wisɛf go ebul yuz ɛgzampul dɛn we wi de tich?
13. Us ɛgzampul we wi go gi fɔ sho se Gɔd big pas Jizɔs?
13 I go fayn lɛ wi yuz ɛgzampul dɛn we nɔ at fɔ ɔndastand. Fɔ ɛgzampul, we wi de ɛksplen to pɔsin fɔ se Gɔd big pas Jizɔs, wi kin yuz dɛn ɛgzampul ya. Wi kin tɛl di pɔsin se we Gɔd ɛn Jizɔs kin tɔk bɔt dɛnsɛf, dɛn kin kɔmpia dɛnsɛf to Papa ɛn Pikin. Gɔd bin de kɔl Jizɔs in Pikin ɛn Jizɔs bin de kɔl Gɔd in Papa. (Lyuk 3:21, 22; Jɔn 14:28) Dɔn, wi kin aks di pɔsin se: “If yu want fɔ sho mi se tu pipul dɛn ikwal na di famili, us ɛgzampul yu go gi mi?” Sɔntɛm di pɔsin go gi yu ɛgzampul bɔt brɔda ɛn sista ɔ ivin twin dɛn. If i du dat, wi go se dat na fayn ɛgzampul. Afta dat, wi go aks am se: “If mi ɛn yu ebul fɔ gi dis fayn ɛgzampul, yu nɔ tink se Jizɔs we bin sabi tich pas ɔlman bin fɔ dɔn yuz dis sem ɛgzampul? Bifo dat, Jizɔs bin tɔk se Gɔd na in Papa. Jizɔs sho se Gɔd big pas am ɛn gɛt mɔ pawa pas am.”
14. Us ɛgzampul ɛp wi fɔ no se i nɔ mek sɛns fɔ lɛ Gɔd yuz Setan fɔ sɔfa pipul dɛn na ɛl faya?
14 Lɛ wi tɔk bɔt wan ɔda ɛgzampul. Sɔm pipul dɛn biliv se na Setan na di “edman” na ɛl faya. Aw wi go ebul fɔ ɛp mama ɛn papa dɛn fɔ si aw i nɔ mek sɛns fɔ lɛ Gɔd yuz Setan fɔ pɔnish pipul dɛn na ɛl faya. Wi go se sɔntin lɛk dis: “Lɛ wi se una pikin dɔn trangayes bad bad wan, ɛn i de du ɔlkayn bad tin. Wetin una go du?” Sɔntɛm, di mama ɛn papa go tɛl yu se dɛn go advays am fɔ lɛf. Dɛn go de tray tranga wan fɔ ɛp dɛn pikin fɔ lɛf fɔ du di bad tin dɛn we i de du. (Prɔv. 22:15) Naw, wi go aks di mama ɛn papa wetin dɛn go du if dɛn pikin nɔ gri fɔ lisin to ɔl di advays dɛn we dɛn dɔn gi am. Bɔku mama ɛn papa go se dɛn nɔ gɛt natin we dɛn go du pas dɛn pɔnish di pikin. Wi kin aks dɛn bak se, “Wetin una go du if una kam fɔ no se na bad pɔsin de tɛl una pikin fɔ go du bad?” Di mama ɛn papa go mɔs se dɛn go vɛks bad bad wan pan di pɔsin. Fɔ ɛp di mama ɛn papa fɔ ɔndastand dis ɛgzampul klia wan, wi kin aks dɛn se, “We una dɔn kam fɔ no se na bad pɔsin de tɛl una pikin fɔ du bad, una go tɛl da sem bad pɔsin de fɔ mek i pɔnish una pikin fɔ una?” Di mama ɛn papa go ansa yu se dɛn nɔ go du dat. Semweso, na Setan de mek pipul dɛn du bad tin, so dis fɔ ɛp wi fɔ no klia wan se Gɔd nɔ go yuz Setan fɔ pɔnish dɛn sem pipul ya bak!
NƆTO ƆLMAN GO BILIV WETIN WI GO TƐL DƐN
15, 16. (a) Wetin mek wi nɔ fɔ fil se na ɔlman we wi prich to, go lisin to di gud nyus bɔt Gɔd in Kiŋdɔm? (b) Yu tink se wi fɔ sabi fɔ prich bɛtɛ bɛtɛ wan bifo wi ebul fɔ prich fayn wan? Ɛksplen. (Rid di bɔks we se “ Sɔntin we Go Ɛp Wi fɔ Ansa Pipul dɛn Kwɛstyɔn.”)
15 Wi no se nɔto ɔlman we wi de prich to go lisin to di gud nyus bɔt Gɔd in Kiŋdɔm. (Mat. 10:11-14) Ilɛksɛf wi aks di rayt kwɛstyɔn, ɛksplen fayn fayn wan, ɛn yuz di bɛst ɛgzampul dɛn, sɔm pipul dɛn stil nɔ go biliv wetin wi de tɛl dɛn. Na di sem tin bin de apin na Jizɔs in tɛm, pan ɔl we in na bin di bɛst Ticha, na wan wan pipul dɛn bin biliv wetin i bin de tich!—Jɔn 6:66; 7:45-48.
16 Ivin if wi de tink se wi nɔ sabi fɔ prich bɛtɛ bɛtɛ wan, wi go stil ebul fɔ prich di gud nyus fayn wan. (Rid Di Apɔsul Dɛn Wok [Akt] 4:13.) Gɔd in Wɔd gi gud rizin fɔ biliv se ɔl di pipul dɛn we rili want fɔ du wetin Gɔd want ɛn gɛt layf we go de sote go, go lisin to di gud nyus. (Akt 13:48, NW) So lɛ wi kɔntinyu fɔ tink bɔt wetin wi ebul fɔ du, ɛn wi nɔ fɔ fil bad bikɔs pipul dɛn nɔ gri fɔ lisin to di gud nyus bɔt Gɔd in Kiŋdɔm. I go fayn lɛ wi fala ɔl di trenin we Jiova de gi wi, ɛn biliv se dis go bɛnifit wi ɛn di wan dɛn we go lisin to wi. (1 Tim. 4:16) Jiova go ɛp wi fɔ no aw fɔ “ansa ɔlman.” Insay di nɛks atikul, wi go lan bɔt aw fɔ trit ɔda pipul dɛn fayn we wi de prich. Ɛn dis go ɛp wi fɔ du wi prichin wok fayn fayn wan.
^ par. 6 Rid di atikul we de na di Ɔktoba 1, 2009, Wachtawa we tɔk bɔt “Is It Possible to Build Faith in a Creator?”
