1, 2. (a) Simwitira sihorokwa esi asi likida mulyo gokuhorowora nawa mapuro. (Tara efano.) (b) Morwasinke natu dilira kutjira kuzogera yirongwa yoyidigu?

NOMVHURA dongandi dina ka pita, munazinyetukadi kwa zogerere Bibeli namugara gwendi gomuhapuli. Nare, mugara gwendi kwa hamenene kongereka zimwe zoyimpempa. Monzogera zawo, mugara gwendi ta uyunga asi age kwa pura mwaKarunga Mutatu gumwe. Pokudimburura asi mugara gwendi kapi ga diva ko yoyinzi kuhamena erongo lyaKarunga Mutatu gumwe, age ta mu pura nonondunge asi: “Ove kwa pura asi Karunga yige Karunga, Jesus nage Karunga, ntani mpepo zokupongoka nazo Karunga, nye wa pura hena asi kapi pwa kara Vakarunga vatatu nye gumwe tupu?” Ga hana kuyindindira, mugara gwendi ta limburura asi, “Hawe, kapisi yiyo na pura oyo!” Makura ta yi twaredesa konzogera zongwa kuhamena Karunga.

² Sihorokwa oso kulikida mulyo gokuhorowora nawa mapuro, nokugapura nonondunge. Aso hena kulikida mulyo kositwa esi asi: Kapi twa hepa kutjira kuzogera yirongwa yoyidigu ngwendi Karunga Mutatu gumwe, mundiro gwanarunye ndi ekaropo lyoMusiti. Nsene tu huguvara mwaJehova ntani nedeuro eli a gava,  ose ngano ngatu limburura nawa, ntani ngatu guma nomutjima dava ava tu purakene. (Koros. 4:6) Ngesi tu konakoneni eyi ava rugana vazuvhisi wovawa nsene kuna kuzogera yirongwa oyo. Tatu ka konakona omu natu (1) pura mapuro aga naga pindura eharo lyomuntu, (2) teda nendi kweyi ga uyunga ko Matjangwa, ntani (3) ruganesa yifanekeso yipo muntu a kwate egano sitwa.

3, 4. Morwasinke ya karera nomulyo mokuruganesa mapuro aga naga tu vatera tu dive eyi ga pura muntu? Gava sihonena.

³ Mapuro kuvhura kutuvatera tu dive eyi ga pura muntu. Morwasinke ya karera nomulyo? Yisewe 18:13 kutanta asi: “O hove tanko kuzuvha ko, ntani ono kulimburura. Nsene o dira kuyirugana, ugova woge neswau lyaamoge.” Yosili, komeho zokugava elimbururo lyomoBibeli kosirongwa songandi, ya wapa mokuhetekera ko kudiva eyi va pura ava vana kutupurakena. Ose ngano ngatu mana tupu siruwo setu mokufaturura yininke eyi va dira kupura!—1 Kol. 9:26.

⁴ Tu tante asi ose kuna kuzogera nomuntu sirongwa somundiro gwanarunye. Kapisi nkenye ogu ga pura asi mundiro gwanarunye evango lyene-lyene lyokuhepekera vantu. Vamwe kwa pura asi ago mukaro tupu gokuligusa ko kwaKarunga. Yipo nye asi kuvhura tu tameke nzogera pokuuyunga ngesi: “Mokumona asi vantu kwa kara nomagano gokulisiga-siga kuhamena mundiro gwanarunye, ove ngapi omu o gazara ko?” Konyima zokuzuvha elimbururo, ose ngatu diva asi ngapi natu mu vatera a kwate egano kweyi za uyunga ko Bibeli kosirongwa oso.

5. Ngapi mapuro naga tu vatera tu dive eyi muntu ga pulira yininke yangoso?

⁵ Mapuro gokupura nonondunge kuvhura kutuvatera tu dive eyi muntu ga pulira yininke yangoso. Pasihonena, ngapi nsene tu gwana gumwe moyirugana yokuzuvhisa ogu ga dira kupura mwaKarunga? Ayo ureru kugazarera asi muntu ogo kwa mu pukisa magano gerongo lyelisinto. (Epis. 10:4) Nampili ngoso, sinzi sovantu va zumbanesa epuro mwaKarunga morwa ruhepo rorunene oru ava ligwanekere naro. Awo kuvhura yi va digopere kuyipura asi pwa kara Musiti geharo. Yipo nye asi nsene ogu tuna kuzuvhisira kapi ga pura asi Karunga yipo ga kara, kuvhura tu mu pure asi: “Yimo wa yi pura ngoso kutunda unona ndi?” Nsene a uyunga asi hawe, ose kuvhura tu mu pure asi yisinke ya ku ninkisa o dire kupura asi Karunga yipo ga kara. Elimbururo lyendi kuvhura li tu vatere tu dive nkedi zongwa zokumuzuvhisira.—Resa Yisewe 20:5.

6. Yisinke natu rugana konyima zokupura epuro?

⁶ Konyima zokupura epuro, twa hepa kupurakena nawa kelimbururo nokukwata egano malizuvho gendi. Pasihonena, vamwe kuvhura va uyunge asi morwa simpagwa songandi yiso sa va ninkisa va dire kupura asi pwa kara Musiti geharo. Komeho zokugava umbangi asi Karunga yipo ga kara, twa hepa kumukwata egano nokumutantera asi ayo kapisi epuko kulipura ngoso. (Hab. 1:2, 3) Nsene tu uyunga novantu monkedi zelididimiko nezi zeharo, ngayi va tumangeda mokulironga ko yoyinzi. *

7. Kosinke lya korera etompoko lyetu moyirugana yokuzuvhisa?

⁷ Ngesi tatu ka konakona omu natu teda kweyi ga uyunga ko Matjangwa. Yosili, Bibeli yiso siruganeso setu sosinene po moyirugana yokuzuvhisa. Azo kutuvatera ‘tu sikilire mo, yipo tu rugane yirugana nayinye yoyiwa.’ (2 Tim. 3:16, 17) Etompoko lyetu moyirugana yokuzuvhisa kapi lya korera tupu mokuresa matjangwa gomanzi, nye omu  atu teda ko nokugafaturura. (Resa Yirugana 17:2, 3.) Tu konakoneni yihorokwa yitatu eyi yina kukwama ko.

8, 9. (a) Nkedi musinke zimwe natu teda nomuntu ogu ga pura asi Jesus ga hetakana naKarunga? (b) Nonkedi musinke hena dimwe wa ruganesa edi da ku tompoka?

⁸ Sihorokwa 1: Moyirugana yokuzuvhisa, tatu gwana muntu ogu ga pura asi Jesus ga hetakana naKarunga. Matjangwa musinke natu ruganesa mokuteda nomuntu ogo? Kuvhura tu mu hundire a resa mwaJohanesa 6:38, omu Jesus ga uyungire asi: “Ame kapi na tundira meguru asi, ni ya rugane eharo lyanyamwange, nye asi ni ya rugane eharo lyogu ga tuma nge.” Konyima zokuresa velise ozo, kuvhura tu mu pure asi: “Nsene asi Jesus yige Karunga, yilye ogu ga mu tumine a tunde meguru? Ogo kapi ta vhuru kukara asi munene unene kupitakana Jesus ndi? Ose twa yi diva asi mutumi ga pitakana ntumi.”

⁹ Mokulifana, ose kuvhura tu rese moVafilipi 2:9, omu mupositoli Paurusa ga fatwilire eyi ga rugene Karunga konyima zonomfa daJesus ntani apa ga mu vhumbwire. Velise kwa tanta asi: “Karunga yiyo ga mu zerura unene, age yiyo ga mu ruka edina lya pitakana madina nagenye.” Mokuvatera muntu a tede ko ketjangwa olyo, kuvhura tu mu pure asi: “Nsene asi Jesus kwa hetakanene naKarunga komeho zokufa ntani konyima Karunga ga ya mu zerwire, eyi kapi nayi tura Jesus a kare munene po kwaKarunga ndi? Nye, ngapi nkenye gumwe na pitakana Karunga?” Nsene asi muntu kwa fumadeka Nonkango daKarunga ntani ga kara nomutjima gomuwa, etedo lyangesi kuvhura li mu tumangede a twikire kukonakona sirongwa esi.—Yirug. 17:11.

10. (a) Ngapi omu natu teda nomuntu ogu ga pura momundiro gwanarunye? (b) Nonkedi musinke wa ruganesa apa wa zogerere kuhamena mundiro gwanarunye?

¹⁰ Sihorokwa 2: Mwenya embo ogu ga litura unene mongereka kapi ana kuyipura asi vantu wovadona kapi ngava ka pya momundiro gwanarunye. Epuliro lyendi lyomundiro gwanarunye nampo kwa li retesa po eharo lyokumona omu vantu wovadona ngava ka va futisa koyirugana yawo yoyidona. Ngapi omu natu teda nomuntu ogu ga kara nomalizuvho gangoso? Pomuhowo, ose kuvhura kumukwatesa ko asi yimo, vantu wovadona ngava ka va zonagura po. (2 Tes. 1:9) Makura, kuvhura tu mu pure a rese Genesis 2:16, 17, ezi azi likida asi efutiso lyononzo nomfa. Ose kuvhura nye tu mu fatwilire omu nzo zaAdamu za ninkisa vantu navenye va kare vananzo. (Rom. 5:12) Nye kuvhura tu mu likide asi Karunga kapi ga uyungire asi nga ka futisa vantu momundiro gwanarunye. Kuvhura tu pure hena asi: “Nsene asi oAdamu naEva kwa kere mosiponga sokukahepa momundiro gwanarunye, Karunga  ngano kapi gava rondwere ndi?” Ano kuvhura tu mu pure hena a rese Genesis 3:19, omu va tumbura etengeko eli ga va pere konyima zapa va zonene, nye age kapi ga uyungire kuhamena mundiro gwanarunye. Nye, age kwa tanterere Adamu asi nga tengura kombundu. Kuvhura tu pure asi: “Ayo ngano ya wepe mokutantera Adamu asi nga tengwira kombundu nsene asi age sili nga za momundiro gwanarunye ndi?” Nsene asi muntu ogo kukwata egano yininke, mapuro gangoso ngaga mu vatera a gazadare ko unene kosirongwa oso.

11. (a) Nkedi musinke zimwe zokuteda nogu ga pura asi vantu navenye wovawa kuza meguru? (b) Nkedi musinke za ku tompoka apa wa zogerere kuhamena sirongwa sokuza meguru?

¹¹ Sihorokwa 3: Moyirugana yokuzuvhisa, tatu gwana muntu ogu ga pura asi vantu navenye wovawa ngava za meguru. Epuliro lyangoso kuvhura li kundame nkedi omu mwenya embo a kwata egano Bibeli. Pasihonena, tu tante asi ose kuna kukonakona kumwe nendi Ehororo 21:4. (Resa.) Muntu kuvhura a gazare asi matungiko aga va singonona movelise ezi kwa tamba keparu lyemeguru. Ngapi omu natu teda nage? Mevango lyokuruganesa matjangwa gapeke, ose kuvhura tu demenene komauzera getjangwa olyo. Azo kutanta asi “nomfa kapi hena ngadi kara ko.” Kuvhura tu mu pure nsene ana yi kwatesa ko asi yininke pokudira kukara po, ntudi kwa hovere kukara po. Nampo, kuvhura a uyunge asi yimo. Makura kuvhura tu mu likide asi meguru kapi mwa horoka rumwe nomfa, nomfa kuhoroka tupu paapa pevhu. Ayo yina zere asi Ehororo 21:4 kwa tamba matungiko gokomeho apa pevhu.—Epis. 37:29.

12. Morwasinke Jesus ga ruganeserere yifanekeso?

¹² Mokugwederera ko komapuro, Jesus kwa ruganesere yifanekeso apa nga zuvhisa. (Resa Mateusa 13:34, 35.) Yifanekeso yaJesus kwa vaterere mokuhorora eyi ngava gazara ava nga rongo. (Mat. 13:10-15) Yifanekeso ya ninkisire hena erongo lyaJesus li kundame vantu ntani nokulidiworoka. Ngapi omu natu ruganesa yifanekeso apa atu rongo?

13. Ngapi omu natu vhura kuyifanekesa asi Karunga nonkondo kupitakana Jesus?

¹³ Yifanekeso youreru yiyo yoyiwa kuruganesa. Pasihonena, nsene kuna kufaturura asi Karunga ga pitakana Jesus, nampo kuvhura tu kwame nkedi ezi. Kuvhura tu tumbure asi pokufaturura elikwatakano lyawo, Karunga naJesus kwa ruganesere ntumbwisiso zekoro. Karunga kwa tumbwire Jesus asi munwendi, ano Jesus kwa tumbwire Karunga asi oguhwe. (Ruk. 3:21, 22; Joh. 14:28) Kuvhura hena tu pure mwenya embo asi: “Nsene asi ove kuna hara kuronga nge asi vantu vavali kwa hetakana, ntumbwisiso musinke zekoro no ruganesa mokuyifanekesa?” Muntu kuvhura a tumbure vamapange. Nsene ayi tumbura ngoso, ngano tu mu pandadeke kehetakano olyo. Makura tu mu pure asi: “Nsene asi ove name kuvhura kuwiza po no sifanekeso sosiwa ngesi, ngano Jesus Murongi goMunene kapi nye ga ruganesere sifanekeso sokulifana ndi? Nye, age kwa uyungire kuhamena Karunga asi oGuhwe. Apa Jesus kwa likidire asi Karunga mukondi ntani ga kara nonkondo kumupita age.”

14. Sifanekeso musinke a si likida asi kapi tayi wapa kwaKarunga mokuruganesa Muzonaguli a hepeke vantu momundiro gwanarunye?

¹⁴ Konakona sihonena nasopeke hena. Vamwe kwa pura asi Satana yige a hwike vantu momundiro gwanarunye. Sifanekeso kuvhura kuvatera vakurona va dimburure omu nayi dira kuwapa kwaKarunga mokuninka Muzonaguli a hepeke vantu momundiro gwanarunye. Kuvhura o uyunge ngwendi ngesi asi: “Gazara asi munoge ta ya kara murwanesi gomunene ntani ta rugana  yininke yoyidona. Yisinke no vhura kurugana ko?” Mukurona kuvhura a tante asi na pukurura munwendi. Age kuvhura a twikire kuhetekera ko kuvatera munona a hageke kurugana yininke yoyidona. (Yis. 22:15) Monkedi zangesi, kuvhura tu pure mukurona eyi ngano na rugana nsene munwendi kapi ana kutambura mapukururo gendi nagenye. Sinzi sovakurona kuvhura va tante asi tava mu tengeke. Makura kuvhura tu pure asi: “Ngapi nsene no dimburura asi muntu gomudona yige ga pukisa munoge a tameke kurwanesa?” Yosili, mukurona nga handukira muntu gwangoso. Mokukwata egano sifanekeso, kuvhura tu pure mukurona asi: “Mokudiva asi muntu gomudona yige ga pukisa munoge, kuvhura o tantere muntu ogo a tengeke munoge ndi?” Elimbururo ngali kara asi hawe. Yosili, kapi tayi wapa kwaKarunga mokuruganesa Satana Muzonaguli a tengeke vantu ava ga pukisa mwene Satana mokurugana yininke yoyidona!

15, 16. (a) Morwasinke natu uyungira asi kapisi navenye ava atu zuvhisire ngava tambura mbudi zoUhompa? (b) Twa hepa kukara noudivi wokuronga yipo yi tu tompoke moyirugana yokuzuvhisa ndi? Faturura. (Tara hena kakende “ Siruganeso sokutuvatera tu gave elimbururo.”)

¹⁵ Ose twa yi dimburura asi kapisi navenye ava atu zuvhisire ngava tambura mbudi zoUhompa. (Mat. 10:11-14) Oyo yiyo ngayi horoka nampili ngapi natu ruganesa mapuro gouhunga nokuteda ko nawo ntani nokuruganesa yifanekeso yoyiwa. Nampili ngomu Jesus ga kere Murongi goMunene po apa pevhu, wovasesu tupu va tambwire erongo lyendi!—Joh. 6:66; 7:45-48.

¹⁶ Mokulisiga, nampili tu lizuvhe asi kapi twa kara noudivi wokuronga, kuvhura yi tu tompoke moyirugana yokuzuvhisa. (Resa Yirugana 4:13.) Nonkango daKarunga kutupa nondunge mokuhuguvara asi “navenye ava gwa tumbukira mwenyo gwanarunye” ngava tambura mbudi zongwa. (Yirug. 13:48) Yipo nye asi tu tungeni po mutaro gouhunga kwanyamwetu ntani nava atu zuvhisire mbudi zongwa zoUhompa. Tu tambureni edeuro lyaJehova eli a gava, nokukara nehuguvaro asi ngatu gwanena mo uwa ntani nava ava tu purakene. (1 Tim. 4:16) Jehova kuvhura kutuvatera tu dive omu natu ‘limburura nkenye ogu ana kutupura.’ Ngomu ngatu ka yi mona mosirongwa sokukwama ko, nkedi zimwe mokututompoka moyirugana yokuzuvhisa kuna kara mokutekura vantu moomu tuna hara va tu tekure.