1, 2. (a) Anega phihlelo yeo e bontšhago bohlokwa bja go botšiša dipotšišo tšeo di kgethilwego gabotse. (Bona seswantšho se se lego ka mo godimo.) (b) Ke ka baka la’ng re sa swanela go ikwa re boifa go boledišana le batho ka ditaba tšeo di lego thata?

NYWAGENG e mentši e fetilego, kgaetšedi yo mongwe wa Mokriste o be a bolela ka Beibele le monna wa gagwe yo e sego Hlatse. Monna yo e be e kile ya ba setho sa e nngwe ya dikereke tša Bojakane. Poledišanong ya bona, monna wa gagwe o ile a bolela gore o dumela go Boraro Botee. Ge mosadi yo a lemoga gore monna wa gagwe a ka ba a sa tsebe gabotse gore thuto ya Boraro Botee e mabapi le eng, ka bohlale o ile a mmotšiša gore: “Na o dumela gore Modimo ke Modimo, gore Jesu ke Modimo le gore moya o mokgethwa ke Modimo? Na o a ikwa gore o bolela ka Modimo o tee e sego Medimo e meraro?” Monna yo o ile a bolela a maketše gore: “Aowa, ga ke dumele seo!” Ba ile ba ba le poledišano e kgahlišago ya gore Modimo ge e le gabotse ke mang.

² Phihlelo yeo e bontšha bohlokwa bja go botšiša dipotšišo ka šedi le tšeo di kgethilwego gabotse. Le gona e gatelela ntlha ye ya bohlokwa: Ga se ra swanela go ikwa re boifa go boledišana le batho ka ditaba tšeo di bonagalago di le thata, tše bjalo ka Boraro Botee, mollo wa dihele goba go ba gona ga Mmopi. Ge e ba re ithekga ka  Jehofa le ka tlwaetšo yeo a re neago yona, gantši re ka kgona go nea karabo yeo e kgodišago, yeo e ka fihlelelago dipelo tša batheetši ba rena. (Bakol. 4:6) Ga bjale anke re ahlaahleng seo badiredi bao ba atlegago ba se dirago ge ba boledišana le batho ka ditaba tše. Re tlo ahlaahla kamoo (1) re ka botšišago dipotšišo tšeo di dirago gore motho a bolele kamoo a ikwago ka gona, (2) kamoo re ka hlalosago seo Mangwalo a se bolelago le (3) kamoo re ka dirišago diswantšho gore motho a kgone go bona ntlha.

3, 4. Ke ka baka la’ng go le bohlokwa go diriša dipotšišo go re thuša go tseba seo motho a se dumelago? Nea mohlala.

³ Dipotšišo di ka re thuša go tseba seo motho a se dumelago. Ke ka baka la’ng seo e le sa bohlokwa? Diema 18:13 e re: “Ge motho a fetola taba pele a ka ekwa, o bontšha bošilo gomme o a inyatšiša.” Ka gona, pele re ka bolela ka pono ya Beibele tabeng e itšego, e tla ba mo gobotse gore re leke go hwetša seo ge e le gabotse motheetši wa rena a se dumelago. Go sego bjalo, re ka senya nako re leka go mmontšha gore thuto e itšego ga se yona mola e le gore le yena o be a sa e dumele!—1 Bakor. 9:26.

⁴ A re re re boledišana le motho yo a itšego ka taba ya dihele. Ga se batho ka moka bao ba dumelago gore dihele ke lefelo la kgonthe moo batho ba tlaišwago gona mollong. Ka baka leo, mohlomongwe re ka re: “Ka ge batho ba na le dipono tše di fapafapanego ka dihele, wena pono ya gago ke efe ka taba ye?” Ka morago ga go kwa karabo ya motho yoo, re tla kgona go mo thuša go kwešiša seo Beibele e se bolelago ka taba ye.

5. Dipotšišo di ka re thuša bjang go tseba lebaka leo motho a dumelago seo a se dumelago?

⁵ Le gona dipotšišo tšeo di botšišwago ka šedi di ka re thuša go tseba lebaka leo motho a dumelago seo a se dumelago. Ka mohlala, go thwe’ng ge e ba motho yo re kopanago le yena bodireding a bolela gore ga a dumele go Modimo? Go ka ba bonolo go nagana gore motho yoo o hueditšwe ke dipono tšeo di lego gona, tše bjalo ka thuto ya tlhagelelo. (Ps. 10:4) Lega go le bjalo, batho ba bangwe ga ba sa na tumelo go Modimo ka ge ba ile ba tlaišega kudu goba ba bone batho ba bangwe ba tlaišega. Ba ka thatafalelwa ke go dumela gore go na le Mmopi yo lerato gare ga tlaišego e kaakaa. Ka baka leo, ge e ba mong wa ntlo a sa dumele gore Modimo o gona, re ka mmotšiša gore: “Na o be o dutše o ikwa ka tsela yeo?” Ge e ba a re aowa, re ka mmotšiša ge e ba go na le selo seo se dirilego gore a se sa dumela gore Modimo o gona. Karabo ya gagwe e ka re thuša go nyaka tsela e kaone yeo re ka mo thušago ka yona.—Bala Diema 20:5.

6. Re swanetše go dira’ng ka morago ga go botšiša motho potšišo?

⁶ Ka morago ga go botšiša motho potšišo, re swanetše go theetša karabo ya gagwe ka kelohloko gomme re mo leboge ge a ntšhitše maikwelo a gagwe. Ka mohlala, motho yo mongwe a ka bolela gore masetlapelo a itšego a mo dirile gore a se sa dumela gore go na le Mmopi yo lerato. Pele ga ge re ka bontšha motho yoo gore Modimo o gona, e tla ba mo gobotse gore re thome ka go lla le yena ke moka re mmotše gore ga se phošo go ipotšiša lebaka leo ka lona re tlaišegago. (Habak. 1:2, 3) Go se mo felele pelo le go mmontšha lerato go ka dira gore a nyake go ithuta ka mo go oketšegilego. *

7. Go atlega ga rena bodireding go ithekgile ka’ng?

⁷ Ga bjale anke re ahlaahleng kamoo re ka neago mabaka ka seo Mangwalo a se bolelago. Beibele ke sedirišwa sa rena se segolo bodireding. E dira gore re “swanelege ka botlalo, [re] hlangwe ka mo go feletšego bakeng sa modiro o mongwe le o mongwe o mobotse.” (2 Tim. 3:16, 17) Go atlega ga rena bodireding  ga se gwa ithekga ka gore re bala mangwalo a makae, eupša go ithekgile ka tsela yeo re neago mabaka ka mangwalo le go hlalosa ao re a balago. (Bala Ditiro 17:2, 3.) Ka mohlala, ela hloko maemo a latelago a mararo.

8, 9. (a) Tsela e nngwe ya go boledišana le motho yo a dumelago gore Jesu o lekana le Modimo ke efe? (b) Ke ditsela dife tše dingwe tša go hlalosa taba ye tšeo o hweditšego di atlega?

⁸ Boemo 1: Bodireding bja rena re kopana le motho yo a dumelago gore Jesu o lekana le Modimo. Re ka diriša mangwalo afe go hlalosa taba ye? Re ka kgopela motho yoo gore a bale Johane 6:38, moo Jesu a tsopotšwego a bolela gore: “Ke theogile legodimong, e sego go tlo dira thato ya ka, eupša go dira thato ya yo a nthomilego.” Ka morago ga go bala temana yeo, re ka mmotšiša gore: “Ge e ba Jesu e le Modimo, gona o romilwe ke mang go tšwa legodimong? Na Yo a mo romilego e ka se be yo mogolo go Jesu? Go ba gona, gantši motho o rongwa ke yo a mo fetago ka matla.”

⁹ Gona mo tabeng ye, re ka bala Bafilipi 2:9, moo moapostola Paulo a hlalosago seo Modimo a se dirilego ka morago ga gore Jesu a hwe le go tsošwa. Temana yeo e re: “Modimo o mo [Jesu] phagamišeditše boemong bja godimo gomme ka botho a mo nea leina leo le lego ka godimo ga leina le ge e le lefe le lengwe.” Gore re thuše motho go naganišiša ka lengwalo leo, re ka mmotšiša gore: “Ge e ba Jesu a be a lekana le Modimo pele a ka hwa gomme ka morago Modimo a mo phagamišetša boemong bja godimo, na seo se ka se re gore Jesu o feta Modimo? Bjale na go a kgonega gore motho yo a itšego a fete Modimo?” Ge e ba motho yoo a hlompha Lentšu la Modimo e bile a na le pelo e botegago, go nea mabaka ka tsela yeo go tla mo tutueletša go hlahloba taba ye ka mo go oketšegilego.—Dit. 17:11.

10. (a) Re ka boledišana bjang le motho yo a dumelago mollong wa dihele? (b) Ke mokgwa ofe wa go nea mabaka wo o hweditšego o šoma ge o ahlaahla taba ya mollo wa dihele?

¹⁰ Boemo 2: Mong wa ntlo yo a nweletšego bodumeding o thatafalelwa ke go dumela gore batho ba babe ba ka se tlaišwe mollong wa dihele. Go dumela ga gagwe mollong wa dihele go ka ba go tutueditšwe kudu ke go kganyoga go bona batho ba kgopo ba otlwa bakeng sa ditiro tša bona tše mpe. Re ka boledišana bjang le motho yo a ikwago ka tsela yeo? Sa pele, re ka mo kgonthišetša gore batho ba kgopo ba tlo otlwa. (2 Bathes. 1:9) Ke moka ra mo kgopela gore a bale Genesi 2:16, 17, yeo e bontšhago gore kotlo ya sebe ke lehu. Re ka hlalosa gore Adama ka go dira sebe, o dirile gore batho ka moka ba belegwe e le badiradibe. (Baroma 5:12) Eupša re ka mmontšha gore Modimo ga se a botša Adama gore ge a ka se kwe o tla otlwa mollong wa dihele. Ke moka re ka mmotšiša gore: “Ge e ba Adama le Efa ba be ba tlo tlaišwa diheleng ka mo go sa felego, na o nagana gore Modimo nkabe a se a ba lemoša ka seo?” Ke moka  re ka bala Genesi 3:19, moo Modimo a ilego a bolela kotlo ya bona ka morago ga go dira sebe eupša a se bolele selo ka mollo wa dihele. Go e na le moo, Adama o ile a botšwa gore o tla boela leroleng. Re ka mmotšiša gore: “Na e be e tla ba mo gobotse gore Modimo a botše Adama gore o tla boela leroleng mola e le gore o be a tlo ya mollong wa dihele?” Ge e ba motho yoo a nagana, potšišo e bjalo e ka mo dira gore a naganišiše gabotse ka taba ye.

11. (a) Ke tsela efe e nngwe yeo re ka boledišanago le motho yo a dumelago gore batho ka moka ba ba lokilego ba ya legodimong? (b) Ke mokgwa ofe wa go nea mabaka wo o hweditšego o šoma ge o boledišana le bao ba dumelago gore batho ba ya legodimong?

¹¹ Boemo 3: Bodireding bja rena re kopana le motho yo a dumelago gore batho ka moka ba ba lokilego ba ya legodimong. Tumelo e bjalo e ka kgoma tsela yeo mong wa ntlo a hlalosago Beibele. Ka mohlala, a re re re ahlaahla le yena Kutollo 21:4. (Bala.) Motho yoo a ka nagana gore ditšhegofatšo tše di hlaloswago temaneng ye di bolela ka bophelo bja legodimong. Re ka boledišana le yena bjang ka taba ye? Go e na le gore re diriše ditemana tše dingwe tše di hlatselago taba ye, re ka ahlaahla ntlha e itšego lona lengwalong le. Lengwalo le le re “lehu le ka se hlwe le sa ba gona.” Re ka botšiša motho yoo ge e ba a dumela taba ya gore e le gore selo se itšego se se sa ba gona, se swanetše go ba se kile sa ba gona. Ga go pelaelo gore o tla re ee. Ke moka re ka mmotša gore ga se gwa ka gwa ba le lehu legodimong; batho ba hwa feela mo lefaseng. Ka gona ke mo go kwagalago go phetha ka gore Kutollo 21:4 e šupa go ditšhegofatšo tša nakong e tlago gona mo lefaseng.—Ps. 37:29.

12. Ke ka baka la’ng Jesu a ile a diriša diswantšho?

¹² Go tlaleletša dipotšišong, Jesu o ile a diriša diswantšho modirong wa gagwe wa boboledi. (Bala Mateo 13:34, 35.) Diswantšho tšeo Jesu a di dirišitšego di mo thušitše go utolla seo se lego ka dipelong tša batheetši ba gagwe. (Mat. 13:10-15) Le gona diswantšho di dirile gore seo Jesu a bego a se ruta e be seo se ipiletšago le seo se sa lebalegego. Re ka diriša diswantšho bjang ge re ruta?

13. Re ka bontšha motho bjang gore Modimo o feta Jesu?

¹³ Gantši go kaone go diriša diswantšho tše bonolo. Ka mohlala, ge re hlalosetša motho gore Modimo o feta Jesu, mohlomongwe re ka leka go bolela se se latelago. Re ka bolela gore bobedi Modimo le Jesu ba dirišitše tswalano ya ditho tša lapa ge ba be ba hlalosa tswalano ya bona. Modimo o be a bitša Jesu gore ke Morwa wa gagwe gomme Jesu a re Modimo ke Tatagwe. (Luka 3:21, 22; Joh. 14:28) Ka morago ga moo, re ka botšiša mong wa ntlo gore: “Ge e ba o nyaka go mpotša gore batho ba babedi ba a lekana, o be o ka mpha mohlala ka ditho dife tša lapa?” Motho yoo a ka re bana ba motho—goba mafahla. Ge a ka bolela bjalo, re ka mmotša kamoo go lego bonolo ka gona go nagana ka tswalano yeo. Ke moka re ka mmotšiša gore: “Ge e ba go le bonolo ka tsela ye gore nna le wena re nagane ka mohlala wo, na Jesu—yena Morutiši yo Mogolo—o be a ka se nagane ka mohlala o swanago? Go e na le moo, o boletše gore Modimo ke Tatagwe. Ka gona Jesu o hlalositše gore Modimo ke yo mogolo e bile o na le matla a taolo go mo feta.”

14. Ke seswantšho sefe seo se bontšhago gore e tla ba mo go sa kwagalego gore Modimo a diriše Diabolo go tlaiša batho mollong wa dihele?

¹⁴ Ela hloko mohlala o mongwe. Batho ba bangwe ba dumela gore Sathane o tšhuma batho mollong wa dihele. Mohlomongwe seswantšho se itšego se ka thuša motswadi go bona kamoo e ka se bego ga tlhaologanyo gore Modimo a dumelele Diabolo go tlaiša batho mollong wa dihele. Mohlomongwe re ka re: “A re re ngwana wa gago o fetogile lerabele le legolo gomme o dira dilo tše dintši tše mpe. O be o tla dira’ng?” Ga go pelaelo gore motswadi yoo o tla re o be a tla  phošolla ngwana wa gagwe. A ka leka leboelela go thuša ngwana yoo go kgaotša go dira dilo tše mpe. (Die. 22:15) Ke moka, re ka botšiša motswadi gore o be a tla dira eng ge e ba ngwana wa gagwe a ka gana maiteko ka moka a go mo thuša. Batswadi ba bantši ba tla bolela gore mafelelong ba tla swanelwa ke go otla ngwana yoo. Ka morago ga moo, re ka botšiša gore: “Go thwe’ng ge e ba o hweditše gore motho yo a itšego yo kgopo o tutueditše ngwana wa gago gore e be lerabele?” Ga go pelaelo gore motswadi o tla befelela motho yoo. E le go thuša motswadi go bona ntlha, re ka mmotšiša gore: “Ka ge o tseba gore motho yo a itšego yo kgopo o tutueditše ngwana wa gago, na o be o ka kgopela yena motho yoo gore a go otlele ngwana wa gago?” Ga go pelaelo gore o tla re aowa. Ka gona go molaleng gore Modimo a ka se diriše Diabolo go otla bona batho bao ba tutueditšwego ke yena gore ba dire dilo tše mpe!

15, 16. (a) Ke ka baka la’ng re sa swanela go letela gore motho yo mongwe le yo mongwe yo re boledišanago le yena o tla amogela molaetša wa Mmušo? (b) Na re swanetše go ba le bokgoni bjo bo kgethegilego gore re atlege ge re ruta? Hlalosa. (Bona le lepokisi le le rego, “ Sedirišwa sa go re Thuša go Araba.”)

¹⁵ Re a tseba gore ga se batho ka moka bao re boledišanago le bona bao ba tlago go amogela molaetša wa Mmušo. (Mat. 10:11-14) Go tla ba bjalo gaešita le ge re ka botšiša dipotšišo tša maleba, ra nea mabaka ka tsela e kwagalago gaešita le go diriša diswantšho tše dibotse. Go ba gona, ke batho ba sego kae feela bao ba ilego ba arabela gabotse dithutong tša Jesu gaešita le ge e be e le Morutiši yo mogologolo yo a kilego a ba gona mo lefaseng!—Joh. 6:66; 7:45-48.

¹⁶ Ka lehlakoreng le lengwe, gaešita le ge re nagana gore ga re na bokgoni bodireding, re ka atlega. (Bala Ditiro 4:13.) Lentšu la Modimo le re nea lebaka le le kwagalago la go dumela gore “bohle bao ba nago le tshekamelo e swanetšego ka bophelo bjo bo sa felego” ba tla amogela ditaba tše dibotse. (Dit. 13:48) Ka gona anke re duleng re na le pono e lekalekanego ka rena le ka bao re nyakago go ba botša ditaba tše dibotse tša Mmušo. Anke re dirišeng ka botlalo tlwaetšo yeo Jehofa a re neago yona, re kgodišegile gore e tla hola rena le bao ba re theetšago. (1 Tim. 4:16) Jehofa o tla re thuša gore re bone kamoo re swanetšego go “araba yo mongwe le yo mongwe ka gona.” Go etša ge re tla bona sehlogong se se latelago, tsela e nngwe ya go atlega bodireding ke ka go diriša seo gantši se bitšwago Molao wa Gauta.