1, 2. а) Цавӕр хабарӕй у бӕрӕг, хъусын кӕнгӕйӕ фарстатӕ дӕттынмӕ кӕй хъуамӕ арӕхсӕм? (Кӕс нывмӕ ацы фарсыл.) ӕ) Зын фарстатыл ныхас кӕнын цӕуылнӕ хъуамӕ тӕрсӕм?

ЦАЛДӔР азы размӕ иу хо йе ’нӕуырнӕг цардӕмбалимӕ Библийы тыххӕй ныхас кодта. Йӕ лӕг загъта, Троицӕйыл кӕй ӕууӕнды. Фӕлӕ нӕ хо йӕхинымӕр ахъуыды кодта, зӕгъгӕ, ӕвӕццӕгӕн, ацы ахуырады тыххӕй йӕ аргъуан цы дзуры, уый хорз нӕ зоны. Ӕмӕ йӕ уӕзданӕй бафарста: «Уырны дӕ, Хуыцау дӕр кӕй у Хуыцау, Чырысти дӕр кӕй у Хуыцау ӕмӕ сыгъдӕг уд дӕр кӕй у Хуыцау, фӕлӕ уӕддӕр ӕртӕ Хуыцауы кӕй не сты, фӕлӕ иу Хуыцау?» Лӕг ныхъхъуыды кодта ӕмӕ загъта: «Нӕ, уый мӕ нӕ уырны!» Ӕмӕ нӕ хойӕн йӕ цардӕмбалимӕ хорз ныхас рауад, Хуыцау ӕцӕгӕй чи у, уый тыххӕй.

² Ацы хабарӕй цӕуыл ахуыр кӕнӕм? Иу уый, ӕмӕ-иу хъуамӕ ахъуыды кӕнӕм, адӕймагмӕ хуыздӕр цавӕр фарста уыдзӕн раттын ӕмӕ-иу хъуамӕ йемӕ уӕзданӕй ныхас кӕнӕм. Дыккаг та уый, ӕмӕ хъуамӕ ма тӕрсӕм зын фарстатыл ныхас кӕнын, зӕгъӕм, Троицӕ кӕнӕ зындоны тыххӕй йе та, Хуыцау ис ӕви нӕ, уый тыххӕй. Нӕ зӕрдӕ Йегъовӕйыл куы дарӕм ӕмӕ нын уый куыд амоны, афтӕ куы хъусын кӕнӕм, уӕд нын ӕнцондӕр уыдзӕн адӕмы зӕрдӕтӕм фӕндаг арын (Кол. 4:6). Цӕй уӕдӕ ӕркӕсӕм, арӕхстджын хъусынгӕнджытӕ ахӕм фарстатыл куыд фӕныхас  кӕнынц, уымӕ. Мах базондзыстӕм, нӕ бон куыд у: 1) адӕймаджы хъуыды кӕй фӕрцы базондзыстӕм, ахӕм фарстатӕ дӕттын; 2) Библийы стихтыл арӕхстджынӕй ныхас кӕнын; 3) адӕймагӕн цавӕрдӕр хъуыддаг бамбарынӕн чи баххуыс кӕндзӕн, ахӕм цӕвиттонтӕй пайда кӕнын.

3, 4. Адӕймаг цӕуыл ӕууӕнды, уый базонынӕн фарстатӕ дӕттын ахсджиаг цӕмӕн у? Ӕрхӕсс цӕвиттон.

³ Фарстаты руаджы нӕ бон вӕййы базонын, адӕймаг цӕуыл ӕууӕнды, уый. Цымӕ уый ахсджиаг цӕмӕн у? Ӕмбисӕндты 18:13 кӕсӕм: «Адӕймагмӕ куы нӕ байхъусай, афтӕмӕй дзуапп куы раттай, уӕд уый у ӕнӕзонд ми ӕмӕ худинаг». Уӕдӕ уал-иу фыццаг хъуамӕ базонӕм, адӕймаг бӕлвырдӕй цӕуыл ӕууӕнды, уый. Науӕд, чи зоны, афтӕ рауайа, ӕмӕ йын ӕмбарын кӕндзыстӕм, йӕхӕдӕг дӕр кӕуыл не ’ууӕнды, уыцы ахуырад раст кӕй нӕу (1 Кор. 9:26).

⁴ Зӕгъӕм, кӕимӕдӕр ныхас кӕнӕм зындоны тыххӕй. Зындоны тыххӕй иутӕ афтӕ хъуыды кӕнынц, ӕмӕ уый у, адӕм арты кӕм судзынц, ахӕм бынат, иннӕтӕ та ӕндӕрхуызон хъуыды кӕнынц. Уӕдӕ нӕ бон у адӕймагӕн афтӕ зӕгъын: «Зындон цы у, уый фӕдыл адӕм иухуызон нӕ хъуыды кӕнынц. Дӕумӕ гӕсгӕ та зындон цы у?» Йӕ хъуыды нын куы зӕгъа, уӕд ын нӕ бон бауыдзӕн, Библи уый фӕдыл цы дзуры, уый бамбарын кӕнын.

5. Адӕймаг цӕуылдӕр цӕмӕн ӕууӕнды, уый бамбарынӕн нын фарстатӕ куыд баххуыс кӕндзысты?

⁵ Адӕймагмӕ фарстатӕ уӕзданӕй куы дӕттӕм, уӕд нӕ бон уыдзӕн бамбарын, цӕуылдӕр цӕмӕн ӕууӕнды, уый. Зӕгъӕм нын загъта, Хуыцау ӕй кӕй нӕ уырны. Уӕд, чи зоны, ахъуыды кӕнӕм, зӕгъгӕ, ӕвӕццӕгӕн, эволюцийыл ӕууӕнды (Пс. 10:4). Фӕлӕ кӕйдӕрты Хуыцау нал уырны, адӕм куыд хъизӕмар кӕнынц, уый кӕй уынынц кӕнӕ та сӕхӕдӕг маст кӕй бавзӕрстой, уый тыххӕй. Афтӕ фӕзӕгъынц, зӕгъгӕ, дам, кӕд Хуыцау ис ӕмӕ нӕ кӕд уарзы, уӕд, дам, адӕм хъизӕмӕрттӕ цӕмӕн ӕвзарынц. Уӕдӕ нын исчи афтӕ куы зӕгъа, Хуыцау мӕ нӕ уырны, зӕгъгӕ, уӕд ӕй нӕ бон у бафӕрсын: «Ӕмӕ дӕ никуы уырныдта?» Афтӕ нын куы зӕгъа, раздӕр мӕ уырныдта, зӕгъгӕ, уӕд ӕй ис бафӕрсӕн: «Мыййаг, исты ӕвзӕр хабары тыххӕй ӕрцыдтӕ ахӕм хъуыдымӕ, Хуыцау нӕй, зӕгъгӕ?» Цы дзуапп нын ратта, уый руаджы бамбардзыстӕм, хуыздӕр ын куыд уыдзӕн баххуыс кӕнын. (Бакӕс Ӕмбисӕндтӕ 20:5.)

6. Адӕймагмӕ фарста куы раттӕм, уӕд дарддӕр куыд хъуамӕ бакӕнӕм?

⁶ Адӕймагмӕ фарста куы раттӕм, уӕд-иу ӕм стӕй хъуамӕ лӕмбынӕг байхъусӕм ӕмӕ-иу ын равдисӕм, йӕ хъуыдыйӕн ын кӕй аргъ кӕнӕм. Чи зоны йыл исты ӕвзӕр хабар ӕрцыд, ӕмӕ уый тыххӕй, Хуыцау кӕй ис, ууыл дызӕрдыг кӕнын райдыдта. Ахӕм уавӕры уал хуыздӕр уаид, куы йын равдисиккам, йӕ мастыл ын кӕй маст кӕнӕм. Стӕй ма йын нӕ бон у бамбарын кӕнын, уым ӕвзӕрӕй кӕй ницы ис, ӕмӕ адӕймаг, уыйбӕрц хъизӕмӕрттӕ цӕмӕн ис, ууыл кӕй фӕхъуыды кӕны. Ӕмӕ йын уый фӕстӕ нӕ бон у бӕлвырдгӕнӕнтӕ ӕрхӕссын, Хуыцау кӕй ис, уымӕн (Ав. 1:2, 3). Фӕразон ӕмӕ хӕларзӕрдӕ куы уӕм, уӕд ӕй, чи зоны, фылдӕр базонын бафӕнда *.

7. Хъусын кӕнгӕйӕ ӕнтыстджын уыдзыстӕм ӕви нӕ, уый сӕйраджыдӕр цӕмӕй кӕнгӕ у?

⁷ Ныр та ӕркӕсӕм, Библийы стихтыл арӕхстджынӕй ныхас кӕнӕн куыд ис, уымӕ. Кӕй зӕгъын ӕй хъӕуы, уацамынды нӕ сӕйраг кусӕнгарз у Библи. Хуыцауы Ныхас нын ӕххуыс кӕны, цӕмӕй «алцыдӕр хорз зонӕм ӕмӕ алы хорз хъуыддагмӕ дӕр алцӕмӕй дӕр цӕттӕ уӕм» (2 Тим. 3:16, 17). Фӕлӕ, хъусын кӕнгӕйӕ ӕнтыстджын уыдзыстӕм ӕви нӕ, уый сӕйраджыдӕр кӕнгӕ у, цас стихтӕ бакӕсдзыстӕм, уымӕй нӕ, фӕлӕ сыл куыд аныхас кӕндзыстӕм ӕмӕ сӕ куыд бамбарын кӕндзыстӕм, уымӕй. (Бакӕс Хъуыддӕгтӕ 17:2, 3.)  Цӕмӕй уыцы хъуыддаг хуыздӕр бамбарӕм, уый тыххӕй ӕркӕсӕм ӕртӕ цӕвиттонмӕ.

8, 9. а) Афтӕ чи хъуыды кӕны, ӕмӕ Чырысти Хуыцауы ӕмсӕр у, ахӕм адӕймагимӕ куыд ис аныхас кӕнӕн? ӕ) Ахӕм уавӕры ды та цавӕр стихтӕ ӕмӕ фарстатӕй фӕпайда кӕныс?

⁸ 1-аг цӕвиттон: уацамынды фембӕлдыстӕм, афтӕ чи зӕгъы, Чырысти Хуыцауы ӕмсӕр у, зӕгъгӕ, ахӕм адӕймагыл. Цавӕр стихтыл ис йемӕ аныхас кӕнӕн? Нӕ бон ын у бакӕсын кӕнын Иоанны 6:38 стих. Уым Йесо загъта: «Ӕз уӕларвӕй уый тыххӕй не ’рцыдтӕн, цӕмӕй, мӕхи цы фӕнды, уый кӕнон, фӕлӕ мӕ рарвитӕджы цы фӕнды, уый». Уыцы стих куы бакӕса, уӕд ӕй ис бафӕрсӕн: «Кӕд Чырысти Хуыцау у, уӕд ӕй уӕлӕрвтӕй зӕхмӕ чи рарвыста? Уыцы чидӕр Чырыстийӕ уӕлдӕр хъуамӕ ма уыдаид? Чи вӕййы уӕлдӕр – чи арвиты, уый ӕви, кӕй арвитынц, уый?»

⁹ Нӕ бон ма у Филиппӕгтӕм 2:9 стих дӕр бакӕсын. Уым апостол Павел ныффыста, Чырысти куы райгас, уый фӕстӕ Хуыцау цы сарӕзта, уый тыххӕй. Фыст дзы ис: «Хуыцау [Йесойы] ноджы уӕлдӕр сӕвӕрдта ӕмӕ йын нӕ бавгъау кодта, ӕппӕт иннӕ нӕмттӕй уӕлдӕр чи у, ахӕм ном». Цӕмӕй адӕймагӕн ацы стихыл ахъуыды кӕнынӕн баххуыс кӕнӕм, уый тыххӕй йӕм ис раттӕн ахӕм фарста: «Кӕд Чырысти йӕ мӕлӕты размӕ Хуыцауы ӕмсӕр уыди ӕмӕ йӕ уый фӕстӕ Хуыцау ноджы уӕлдӕр сӕвӕрдта, уӕд афтӕ нӕ уайы, ӕмӕ йӕ йӕхицӕй уӕлдӕр сӕвӕрдта? Фӕлӕ уымӕн гӕнӕн ис, цӕмӕй исчи Хуыцауӕй уӕлдӕр суа?» Сыгъдӕгзӕрдӕ чи у ӕмӕ Хуыцауы Ныхасӕн чи аргъ кӕны, ахӕм адӕймаджы, ӕвӕццӕгӕн, бафӕнддзӕн уый тыххӕй фылдӕр базонын (Хъуыд. 17:11).

10. а) Афтӕ чи дзуры, фыдгӕнджытӕ зындоны хъизӕмар кӕндзысты, зӕгъгӕ, ахӕм адӕймагимӕ куыд ис аныхас кӕнӕн? ӕ) Ацы хъуыддагыл ныхас кӕнгӕйӕ ды та цавӕр стихтӕ ӕмӕ фарстатӕй фӕпайда кӕныс?

¹⁰ 2-аг цӕвиттон: адӕймаг нын загъта, кӕй йӕ уырны, фыдгӕнджытӕ зындоны кӕй хъизӕмар кӕндзысты. Уый йӕ, чи зоны, уымӕн уырны, ӕмӕ йӕ фӕнды, цӕмӕй фыдгӕнджытӕ се ’взӕр хъуыддӕгты тыххӕй аккаг тӕрхон баййафой. Ахӕм адӕймагимӕ куыд ис аныхас кӕнӕн? Фыццаг уал ын нӕ бон у зӕгъын, фыдгӕнджытӕ ӕнӕмӕнгдӕр кӕй баййафдзысты тӕрхон (2 Фес. 1:9). Уый фӕстӕ йын нӕ бон у бакӕсын кӕнын Райдианы 2:16, 17 стихтӕ. Уыцы стихтӕй бӕрӕг у, адӕймаг йӕ тӕригъӕд мӕлӕтӕй кӕй фиды. Ӕмӕ йын нӕ бон у йӕ хъус ӕрдарын, ацы ран Хуыцау Адамӕн афтӕ кӕй нӕ загъта, ӕмӕ зындоны хъизӕмар кӕндзысты. Стӕй йӕм ис ахӕм фарста раттӕн: «Адам ӕмӕ Евӕйӕн зындонмӕ бахауынӕй тӕссаг куы уыдаид, уӕд сын ӕй Хуыцау хъуамӕ рагацау ма загътаид?» Уый фӕстӕ йын нӕ бон у Райдианы 3:19 стих бакӕсын ӕмӕ йын йӕ хъус ӕрдарын, Хуыцау Адам ӕмӕ Евӕйӕн тӕрхон куы рахаста, уӕд зындоны кой кӕй не скодта, уымӕ. Йегъовӕ Адамӕн загъта, фӕстӕмӕ сыджытмӕ кӕй аздӕхдзӕн.  Стӕй йӕ нӕ бон у бафӕрсын: «Хуыцау Адамӕн куы загътаид, фӕстӕмӕ сыджытмӕ аздӕхдзынӕ, зӕгъгӕ, ӕцӕгӕй та йӕ зындонмӕ ’рвитынмӕ куы хъавыдаид, уӕд уый раст уыдаид?» Ахӕм фарстаты руаджы сыгъдӕгзӕрдӕ адӕймаг, ӕвӕццӕгӕн, уыцы хъуыддагыл лӕмбынӕгдӕр ахъуыды кӕндзӕн.

11. а) Афтӕ чи хъуыды кӕны, ӕмӕ хорз адӕм се ’ппӕт дӕр уӕлӕрвтӕм цӕуынц, ахӕм адӕймагимӕ куыд ис аныхас кӕнӕн? ӕ) Ахӕм уавӕры ды та цавӕр стихтӕ ӕмӕ фарстатӕй фӕпайда кӕныс?

¹¹ 3-аг цӕвиттон: адӕймаг нын зӕгъы, зӕгъгӕ, мӕн уырны, хорз адӕм се ’ппӕт дӕр уӕлӕрвтӕм кӕй цӕуынц. Уыцы ахуырады тыххӕй бирӕтӕ Библийӕ кӕцыдӕр стихтӕ раст не ’мбарынц. Зӕгъӕм, адӕймагимӕ ныхас кӕнӕм Раргомады 21:4 стихыл. (Бакӕс ӕй.) Чи зоны нын зӕгъа, зӕгъгӕ, ацы ран цы арфӕдзинӕдты кой цӕуы, уыдон хауынц уӕларвон цардмӕ. Куыд ис йемӕ дарддӕр ууыл аныхас кӕнӕн? Ацы стих ӕцӕгӕй цӕмӕ амоны, уый бамбарын кӕныны тыххӕй ноджыдӕр ӕндӕр стихтӕ кӕсын ӕнӕмӕнг нӕу. Нӕ бон у, ӕмӕ йын ӕй бамбарын кӕнӕм, ацы стихӕн йӕхимидӕг цы ныхӕстӕ ис, уыдоны фӕрцы, «нал уыдзӕн... мӕлӕт», зӕгъгӕ. Нӕ бон у адӕймагӕн зӕгъын: «Ӕвӕццӕгӕн, сразы уыдзынӕ, ӕмӕ, афтӕ цӕмӕй зӕгъай, нал ис, зӕгъгӕ, уый хъуамӕ уый размӕ уыдаид». Ӕмӕ, ӕвӕццӕгӕн, уыцы адӕймаг немӕ сразы уыдзӕн. Стӕй нӕ бон у зӕгъын, зӕгъгӕ, уӕлӕрвты мӕлӕт никуы уыд, адӕм ӕрмӕстдӕр ам, зӕххыл, мӕлынц. Ӕмӕ кӕд афтӕ у, уӕд, Раргомады 21:4 стихы ноджыдӕр цы арфӕдзинӕдты кой цӕуы, уыдон дӕр, фидӕны зӕххыл цы цард уыдзӕн, уымӕ хъуамӕ ма хауой? (Пс. 37:29).

12. Йесо цӕвиттонтӕй цӕмӕн пайда кодта?

¹² Чырысти адӕмы куы ахуыр кодта, уӕд ма фарстатӕй уӕлдай пайда кодта фӕсномыг ныхӕстӕй дӕр, кӕнӕ цӕвиттонтӕй. (Бакӕс Матфейы 13:34, 35.) Йӕ фӕсномыг ныхӕсты фӕрцы-иу рабӕрӕг, адӕмӕн сӕ зӕрдӕты цы уыд, уый (Матф. 13:10–15). Стӕй, Чырысти цӕвиттонтӕй кӕй пайда кодта, уый руаджы йӕм адӕм зӕрдиагдӕрӕй хъуыстой, ӕмӕ-иу сын цы амыдта, уый-иу хуыздӕр бахъуыды кодтой. Махӕн та нӕ бон куыд у иннӕты ахуыр кӕнгӕйӕ цӕвиттонтӕй пайда кӕнын?

13. Чырысти Хуыцауы ӕмсӕр кӕй нӕу, уый цавӕр цӕвиттоны фӕрцы ис бамбарын кӕнӕн?

¹³ Хуыздӕр уыдзӕн, хуымӕтӕг цӕвиттонтӕй куы пайда кӕнӕм. Зӕгъӕм, адӕймагӕн, Чырысти Хуыцауы ӕмсӕр кӕй нӕу, уый куы ’мбарын кӕнӕм, уӕд нӕ бон цавӕр цӕвиттонӕй у спайда кӕнын? Фыццаг уал ын нӕ бон у йӕ хъус ӕрдарын, Хуыцау Йесойы йӕ Фырт кӕй хуыдта, Йесо та Йегъовӕйы йӕ Фыд кӕй хуыдта, уымӕ (Лук. 3:21, 22; Иоан. 14:28). Ӕмӕ йӕ стӕй нӕ бон у бафӕрсын: «Дыууӕ адӕймагӕн ӕмхуызон бартӕ кӕй ис, уый мын куы ’мбарын кӕнис, уӕд мын бинонтӕй цӕвиттонӕн кӕй ӕрхӕссис?» Чи зоны, адӕймаг зӕгъа: «Дыууӕ ӕфсымӕры, растдӕр зӕгъгӕйӕ та фаззӕтты». Уӕд ын нӕ бон у зӕгъын: «Уый хорз цӕвиттон у, ӕз дӕр афтӕ хъуыды кӕнын. Уӕдӕ кӕд нӕ дыууӕ дӕр ахӕм цӕвиттон ӕрхастаиккам, уӕд Чырысти дӕр ахӕм цӕвиттонӕй нӕ пайда кодтаид? Фӕлӕ уый Хуыцауы алкӕддӕр хуыдта, мӕ Фыд, зӕгъгӕ. Афтӕмӕй Йесойы фӕндыд бамбарын кӕнын, Хуыцау дзы бирӕ хистӕр кӕй у ӕмӕ йӕм фылдӕр бартӕ кӕй ис, уый».

14. Хуыцау адӕмы зындоны арты хъизӕмарӕй кӕй мары, уыцы ахуырад раст кӕй нӕу, уый цавӕр цӕвиттонӕй ис равдисӕн?

¹⁴ Ӕркӕсӕм ӕндӕр цӕвиттонмӕ дӕр. Иуӕй-иуты уырны, Хуыцау фыдгӕнджыты зындоны арты хъизӕмарӕй кӕй мары. Уыцы ахуырад раст кӕй нӕу, уый бамбарын кӕнынӕн цӕвиттонӕн ӕрхӕссӕн ис ныййарӕг ӕмӕ сывӕллоны. Нӕ бон у адӕймагмӕ ахӕм фарста раттын: «Зӕгъӕм, дӕ сывӕллон схивӕнд ӕмӕ ӕвзӕр митӕ кӕнын райдыдта. Куыд бакӕндзынӕ ахӕм уавӕры?» Ӕвӕццӕгӕн, адӕймаг зӕгъдзӕн, йӕ сывӕллонимӕ кӕй аныхас кӕндзӕн ӕмӕ йын йӕ рӕдыд кӕй бацамондзӕн. Ӕмӕ афтӕ, ӕвӕццӕгӕн, иу ӕмӕ дыууӕ хатты нӕ бакӕндзӕн (Ӕмб. 22:15). Уӕд ӕй нӕ бон  у бафӕрсын: «Ӕмӕ йӕм, зӕгъӕм, дӕ ныхӕстӕ нӕ хъарынц, уӕд та?» Ныййарджытӕн сӕ фылдӕр зӕгъиккой, ӕндӕр гӕнӕн куы нӕ уа, уӕд сывӕллоны ӕфхӕргӕ дӕр кӕй бакӕндзысты. Уӕд адӕймаджы бафӕрсӕн ис: «Ӕмӕ йӕ куыд бафхӕрдзынӕ? Йӕ къух ын артмӕ дардзынӕ?» Ӕвӕццӕгӕн, цыфӕнды ныййарӕг дӕр зӕгъид, афтӕ кӕй никуы бакӕндзӕн. Ацы цӕвиттон цӕмӕн ӕрхастай, уый равдисынӕн дӕ бон у адӕймагмӕ ахӕм фарста раттын: «Уӕдӕ адӕймаг афтӕ кӕм нӕ бакӕнид, уым уарзӕгой Хуыцау куыд хъуамӕ бакӕна афтӕ?» Ӕвӕццӕгӕн, ныййарӕгӕн йӕ зӕрдӕмӕ уыцы цӕвиттон бахъардзӕн ӕмӕ бамбардзӕн, Хуыцау адӕмы зындоны арты хъизӕмарӕй кӕй нӕ мары.

15, 16. а) Афтӕ цӕуылнӕ хъуамӕ хъуыды кӕнӕм, ӕмӕ адӕм се ’ппӕт дӕр хорз хабар сӕ зӕрдӕмӕ айсдзысты? ӕ) Цӕмӕй уацамынды ӕнтыстджын уӕм, уый тыххӕй нӕм хъуамӕ исты курдиӕттӕ уа? Бамбарын ӕй кӕн. (Ноджыдӕр кӕс рамкӕ « Дзуапп дӕттынӕн нын чи ӕххуыс кӕны, ахӕм кусӕнгарз».)

¹⁵ Адӕммӕ раст фарстатӕ дӕр куы дӕттӕм, семӕ Библийы стихтыл дӕр арӕхстджынӕй куы ныхас кӕнӕм ӕмӕ сын хорз цӕвиттонтӕ дӕр куы хӕссӕм, уӕддӕр сӕ алчи хорз хабар йӕ зӕрдӕмӕ нӕ айсдзӕн (Матф. 10:11–14). Йесо Чырысти уыди ӕппӕты хуыздӕр Ахуыргӕнӕг, фӕлӕ уӕддӕр, цы хабар хъусын кодта, уый ӕрмӕстдӕр стӕмтӕ айстой сӕ зӕрдӕмӕ (Иоан. 6:66; 7:45–48).

¹⁶ Фӕлӕ нӕм афтӕ куы кӕса, ӕмӕ нӕм иннӕты ахуыр кӕныны курдиат нӕй, уӕд та? Уӕд дӕр нӕ бон у, ӕмӕ уацамынды ӕнтыстджын уӕм. (Бакӕс Хъуыддӕгтӕ 4:13.) Хуыцауы Ныхасы цы фыст ис, уымӕ гӕсгӕ фидарӕй зӕгъӕн ис, ӕмӕ, «ӕнусон царды фӕндагыл цӕуын кӕй фӕнды, уыдон се ’ппӕт дӕр» хорз хабар сӕ зӕрдӕмӕ кӕй айсдзысты (Хъуыд. 13:48). Цӕй уӕдӕ нӕхимӕ дӕр ӕмӕ, кӕмӕн хъусын кӕнӕм, уыдонмӕ дӕр раст цӕстӕй кӕсӕм. Йегъовӕ нын куыд амоны, афтӕ куы хъусын кӕнӕм, уӕд уый стыр пайда ӕрхӕсдзӕн нӕхицӕн дӕр ӕмӕ нӕм чи хъусы, уыдонӕн дӕр (1 Тим. 4:16). Йегъовӕйы фӕрцы «зондзыстӕм, кӕмӕн цавӕр дзуапп раттын хъӕуы, уый». Иннӕ статьяйы ӕркӕсдзыстӕм, Чырыстийы уынаффӕтӕй сӕйрагдӕр кӕй хонынц, уымӕ. Уый дӕр нын баххуыс кӕндзӕн, цӕмӕй уацамынды ӕнтыстджын уӕм.