1, 2. a) ¿Imamandata tapuicunataca aliguta pensarishpa rurana capanchi? Shuj ejemplota nipai. (Callari dibujota ricupangui.) b) ¿Imamandata shinlli temacunamanda parlanataca na manllana capanchi?

SHUJ paniguca paipa cusahuanmi parlajurca. Cusaca na Testigo carcachu. Trinidadpi crini nijpimi paniguca aliguman cusataca tapurca: “¿Taita Diosllata Dios cajta, Jesusllata Dios cajta, espíritu santollata Dios cajta yashpapash, shujlla Diosmi tian nijunguichu?” nishpa. Shina nijpimi cusaca na chaita nijunichu nirca. Shinami paicunaca Taita Diosmanda aliguta parlai callarirca.

² Imashinami ricupanchi, aliguta pensarishpa, aligumanmi tapuicunataca rurana cashcanchi. Shinallata Trinidadmanda, infiernomanda, Taita Dios tucuita rurashcamanda parlanataca na manllanachu canchi. Shinlli temacuna cajpipash Jehová Diospi confiashpa, paipa organizacionba instrucciongunata catishpaca aliguta contestashpami gentecunapa shunguman chayaita ushashun (Col. 4:6). Shinlli temacunamanda parlashpaca  ¿imata huaquin huauquipanicunaca rurashca? Paicunapa ali ejemplota catingapaca cai quimsa yuyaicunata ricupashunchi: 1) Gentecuna imata pensajujta yachangapaca tapuicunata rurashunchi. 2) Bibliapi textocunata intindichishpa aliguta gentecunata pensachishunchi. 3) Aliguta intindichunga chimbapuraicunata churashunchi.

3, 4. ¿Imamandata gentecuna imata crijta yachangapaca tapuicunata rurana capanchi? Shuj ejemplota nipai.

³ Gentecuna imata pensajujta yachangapaca tapuicunatami rurana canchi. Shinapash ¿imamandata tapuicunata ruranaca minishtirin? Proverbios 18:13​pica ninmi: ‘Narapash uyashpallata imatapash tigrachijlla runaca, muspa runashnami nalicachishpa rimai tucun’ nishpa. Shinaca ama yanga parlajungapaca gentecuna imata crijta yachashparami parlai callarina capanchi (1 Cor. 9:26).

⁴ Shuj ejemplota ricupashun. Infiernomanda parlanajushcanchiman. Shinapash na tucui gentecunachu infiernopi rupangapaj rinata crin. Paicunahuan parlanajushpaca tapushunchi: Gentecunaca infiernomandaca shuj shuj yuyaitami charin. Quiquinga ¿imatata pensapashcangui? nishpa. Imata nijta uyashca jipami Bibliahuan ayudaita ushashun.

5. ¿Imamandata aliguman tapuicunata ruranaca gentecuna imata crishcata yachachun ayudan?

⁵ Aliguman tapuicunata rurashpami gentecuna imata crishcata yachashun. Shuj ejemplota ricupashun. Taita Diospi na crinichu nijpica ¿imatata yanchi? ¿Evolución nishcapi crishpami shina nijun yanchimanllu? (Sal. 14:⁠1.) Huaquin gentecunaca ashtacata sufrimanda o shujcuna ninanda sufrijujta ricushpami Taita Diospi na crin. Paicunaca ninmi, gentecunata Taita Dios ciertopacha juyashpaca na sufrichun saquinmanllu nishpa. Taita Diospi na crij gentecunataca nita ushanchimi: “¿Siemprechu Taita Diospica na crishcangui?” nishpa. Na nijpica tapushunchi, ¿imamandata Taita Diospi crinata saquiparcangui? nishpa. Imata nijta uyashca jipami aliguta ayudai ushashun (Proverbios 20:​5, liingui).

6. Tapuita rurashca jipaca ¿imatata rurana capanchi?

⁶ Tapushca jipaca, imata nijtami ali uyana canchi. Imapash llaquita charimanda Taita Diospi na cri callarishcata parlajujpica, cashna nishparami animai ushanchi: Intindipanimi, tucuicunallatami huaquinbica imamandata cashnapacha sufrina cani nishpa tapurishcanchi nishpa (Hab. 1:​2, 3). Paicunata intindijpi, pacienciata charijpica tal vez gentecunaca uyangapaj munangami. *

7. Ali yachachingapaca ¿imatata rurana capanchi?

⁷ Cunanga Bibliapi textocunata imashina ali intindichinata ricupashun. Villachingapaj, yachachingapaj rishpaca Bibliatami ashtahuanbachaca utilizanchi, Bibliami ñucanchitaca ‘ima pandatapash na rurashpa, tucui imata cashpapash aliguta rurachun’ ayudan (2 Tim. 3:​16, 17). Ali yachachingapaca ashtaca textocunata liinaca na minishtirinllu. Liishca textocunata aliguta intindichishpa gentecunata pensachinami ashtahuan minishtirishca can (Hechos 17:​2, 3, liingui). Shinaca quimsa ejemplocunata ricupashunchi.

8, 9. a) Jesusca Taita Dioshuan igualmi can nijpica ¿imatata nishun? b) Jesusca Taita Dioshuan igualmi can nijpica ¿imatata quiquinga nipashcangui?

 ⁸ Jesusca Taita Dioshuan igualmi can nijpica ¿imatata nishun? ¿Maijan textocunatata liinchiman? Jesús imata nishcata ricupashun nishpa Juan 6:38​ta liishunchi. Chaipica nijunmi: ‘Jahua pachamandaca na ñuca munashcata rurangapaj shamurcanichu. Ashtahuangarin ñucata cachamuj Taita munashcata pactachingapami shamurcani’ nishpa. Cai textota liishca jipaca tapushunchi: Jesusllata Taita Dios cashpaca ¿pita Jesustaca cachamurca? ¿Nachu Jesusta cachamujca Jesusta ashtahuan yali canman? nishpa.

⁹ Jipaca Filipenses 2:9​tapash liipashunchi. Chaipica Jesusta Taita Dios causachishca jipa ima pasashcata parlashpami apóstol Pabloca nirca: ‘Shina cajpimi Taita Diosca, tucuita yali ashtahuan alicachishpa, paitaca jatunbi churarca. Tucuicunapa shuticunata yali ashtahuan ali shutigutami cararca’ nishpa. Gentecunaman cai textopi pensachishpa aliguta intindichingapaca cashna tapushunchi: “Jesús nara huañushpa Taita Dioshuan igual cashca cashpaca ¿nachu Jesusta causachishpa jatunbi churajpica Taita Diosta ashtahuan yali canman? ¿Pita Taita Diosta ashtahuan yali caita ushan? Chashna tapuicunami Bibliata respetaj gentecunataca ashtahuan yachajushpa catichun ayudanga (Hech. 17:11).

10. a) Infiernopi crij gentecunataca ¿imashinata aliguta pensarichun ayudana capanchi? b) Infiernomanda parlajpica ¿imashinata ayudapashcangui?

¹⁰ Huaquin gentecunaca ninmi, nali gentecuna infiernopi na rupanataca na crinichu nishpa. Chai gentecunaca nalicuna cashtigai tucunami can nishpami shina nin. Shinaca ¿imashinata paicunataca ayudashun? Pundapica nalicuna cashtigai tucunatami ricuchina canchi (2 Tes. 1:9). Chai jipaca Génesis 2:16, 17​ta liipashunchi. Chai textocunaca, Jehová Diosta na cazuimanda Adán huañuita tarishcatami ricuchin. Jipaca, Taita Diosca na infiernomanda parlajurcachu nishpami cashna tapuna canchi: ¿Nachu Adán y Eva infiernopi rupagrina cajpica Taita Diosca villana carca? Ciertopacha infiernoman cachana cashpaca ¿nachu huañunguimi nishpaca llullajunman carca? Chai jipaca Génesis 3:19​ta liipashunchi. Chai textopica infiernopi rupangapaj rinataca na nijunllu. Chaipica Adandaca nijunmi, ñutu alpami cangui ñutu alpamanllatami tigrangui nishpa. Chai jipaca nipashunchi: Ciertopacha infiernoman rina cajpita ñutu alpami  tucungui nijushpaca ¿nachu llullata nijunman? nishpa. Chashna tapuicunami ali shungu gentecunataca aliguta pensarichun ayudanga.

11. a) Ali gentecunaca cielomanmi rin nijpica ¿imatata nishun? b) Ali gentecunaca cielomanmi rin nijpica ¿imatata quiquinga nipashcangui?

¹¹ Huaquin gentecunaca ninmi, ali gentecunaca cielomanmi rin nishpa. Chaita crimandami gentecunaca Bibliapi textocunata panda intindin. Shuj ejemplopi pensaripashun. Apocalipsis 21:4​ta ña liishcanchiman (liingui). Chaita uyashpaca tal vez gentecunaca ningami, cielopimi chai bendiciongunataca charishun nishpa. Chai gentecunataca ¿imashinata ayudashun? Shuj textocunata ricuchijunapa randica Apocalipsis 21:4​tallata aliguta intindichipashunchi. Chaipica nijunmi ‘huañuipash na ashtahuan tiangachu’ nishpa. Chai jipaca tapupashunchi: “¿Nachu gentecuna huañunajujpi huañuica ñana tiangachu nin?”. Shina nijpica ari ningami. Ari nijpica cashna nishunchi: Cielopica nunca na huañuica tiashcachu. Cai Alpapimi huañuica tiashca. Shinaca Apocalipsis 21:4​ca, cai Alpapi bendiciongunamandami parlajun, na cielopi bendiciongunamandachu parlajun nishpa intindichishunchi (Is. 25:8).

12. Jesusca ¿imamandata chimbapuraicunata churashpa yachachirca?

¹² Tapuicunata rurashca jahuapash, Jesusca chimbapuraicunata churashpami aliguta villachirca (Mateo 13:​34, 35, liingui). Chimbapuraicunahuanmi Jesusca gentecunapa shunguman chayarca (Mat. 13:​10-15). Shinallata chimbapuraicunata churashpa yachachijpimi gentecunaca alicachishpa uyarca, imata yachachishcatapash yarirca. Shinaca ¿imashinata ñucanchicunapash chimbapuraicunata churashpa yachachishun?

13. Taita Diosmi Jesusta yali can nishpa yachachingapaca ¿ima chimbapuraitata churai ushapanchi?

¹³ Aliguta yachachingapaca intindirinalla chimbapuraicunahuanmi yachachina canchi. Shuj ejemplota ricupashun. Taita Diosmi Jesusmanda ashtahuan yali can ningapaca, cashna nipashunchi: Jesusca nircami, Taita Diosmi ñuca Taita nishpa. Cutin Taita Diosca Jesusmi ñucapa Churi nircami (Luc. 3:​21, 22; Juan 14:28). Chai jipaca tapushunchi: “Ishcai gentecuna igual cashcata intindichingapaca, ¿taitamanda churimandachu parlapanguiman? ¿O ishcai gemelo huauquicunamandachu parlapanguiman?” nishpa. Ishcai gemelo huauquicunamandami parlaiman nijpica, cashna nipangui: Jesusca alipachami yachachin carca. Shinaca ¿nachu paipash gemelo huauquicunamanda parlanman carca? Jesusca na gemelo huauquicunamanda parlarcachu. Ashtahuangarin Taita Dios ashtahuan yali cashcata, ashtahuan autoridadta charishcata intindichingapami Taita Diosmanda parlashpaca ñuca Taitami nishpa Jesusca yachachirca”.

14. Taita Diosca Diablomanmi mingashca nalicunata infiernopi llaquichichun nijpica ¿ima chimbapuraihuanda ayudashun?

¹⁴ Shuj ejemplotapash ricupashunchi. Huaquin gentecunaca ninmi: Taita Diosca Diablomanmi mingashca nalicunata infiernopi llaquichichun nishpa. Shina nijpica tapupashunchi: Quiquinba churi na cazushpa nalita rurajujpica ¿imatata rurapanguiman? nishpa. Shina nijpica tal vez ningami: Cutin cutin tacurishpa consejanami tucunga nishpa (Prov. 22:15). Chai jipaca cutin tapushunchi: Tacurishpa consejajpipash nallata cazujpica ¿imatata rurapanguiman? nishpa.  Chaipica tal vez ningami, nallata uyajpica astinami tucunga nishpa. Shina nijpica cashna nipangui, shuj nali runa yachachijpi, quiquinba churi na cazujushcata yachashpaca ¿nachu chai nali runataca ninanda culiranguiman? Ashtahuan aliguta intindichunga tapupangui: ¿Chai nali runamanllatachu ñuca churita cashtigapai nishpa minganguiman? Shina nijpica, na chaitaca ruraimanllu ningami. Imashinami ricunchi, Diablollata gentecunaman nalita rurachun yachachijpica, Taita Diosca na Diablomanllata mingangachu cai gentecunata cashtigapai nishpa.

15, 16. a) ¿Imamandata ninchi na tucui gentecunachu villachijpica uyanga nishpa? b) Aliguta yachachingapaca ¿imata minishtirin? (“ Aliguta villachingapaj, yachachingapaca ¿ima ayudatata charinchi?” nishca recuadrotapash ricupangui).

¹⁵ Aliguta tapujpipash, aliguta pensachijpipash, ali chimbapuraicunata churashpa yachachijpipash huaquin gentecunaca Taita Diospa shimitaca na chasquingapaj munangachu (Mat. 10:​11-14). Jesusca tucui gentecunata yali, ashtahuan ali yachachijmi carca. Shinapash huaquin gentecunallami Jesuspa yachachishcacunataca chasquingapaj munarca (Juan 6:66; 7:​45-48).

¹⁶ Ñucanchicunaca na Jesús shinachu canchi. Shinapash ali villaita, ali yachachitaca ushanchimi (Hechos 4:​13, liingui). Diospa Shimi Bibliapica ninmi, ali villaicunata chasquijcunaca ‘causaitami causagringa’ nishpa (Hech. 13:48). Shinaca huaquin gentecunallami uyanga, taucacunaca na uyangachu. Shinapash Jehová Diospa organizacionbi instrucciongunata catishpaca, ali yachachita ushashunmi. Ali yachachishpaca ñucanchicunapash beneficiarishpami shujcunatapash ayudashun (1 Tim. 4:16). Jehová Diosca ‘pi imata tapuchijpipash’ cada unoman aliguta contestachumi yachachin. Shamuj temapica, Mateo 7:12​pi Jesuspa consejota catishpa ashtahuan ali villachinata, ashtahuan ali yachachinatami ricupashun.