Akapeea Tatou me “Tuatua Atu ki te Tangata Katoa Ra”?
‘Ei tuatua aroa ua anake ta kotou, kia kite i te mea tika kia tuatua atu ki te tangata katoa ra.’—KOLO. 4:6.
1, 2. (a) Akakite mai i tetai tupuanga tei akaari i te puapinga kia ui i te au uianga meitaki. (Akara i te tutu mua o teia atikara.) (e) Eaa te tumu kare tatou i mataku i te tuatua no runga i te au tumu manako oonu?
KUA uriuri tetai tuaine Kerititiano i te Pipiria ki tana tane kare i te Kite no Iehova. Kua karanga te tane e kua irinaki aia ki roto i te apiianga Toru Tai. Tera ra, kua kite te tuaine e penei kare tona tokorua i kite e eaa tikai ta tana akonoanga e apii ra no runga i te apiianga Toru Tai. No reira, kua ui maru atu aia ki tona tokorua e, “Kua irinaki ainei koe no runga i te Atua e koia te Atua, ko Iesu katoa te Atua, pera katoa te vaerua tapu koia te Atua; inara, e tai rai Atua kare e toru?” Kua poitirere tana tane e kua karanga mai aia e, “Kare, kare au e irinaki ana i te reira!” Tei tupu mai, kua pukapuka ua raua e koai tikai te Atua.
2 Eaa ta tatou ka mou mai mei teia tupuanga? E mea puapinga kia ui i te au uianga meitaki na roto i te tu maru. Apii katoa tatou e kare tatou e anoanoia kia mataku i te uriuri no runga i te au tumu manako oonu, mei te apiianga Toru Tai, te ai era, e te tu o Tei Anga mai ia tatou. Me irinaki tatou ki roto ia Iehova e te terenianga tana i oronga mai, ka rauka ia tatou i te apii atu i te tangata na roto i te tu te ka akakeu i to ratou ngakau. (Kolo. ) I roto i teia atikara, ka uriuri ana tatou e akapeea me apii atu i te tangata na te (1) ui anga i te au uianga kia akakite mai ratou i to ratou manako, (2) akamarama anga e eaa ta te au Tuatua Tapu e akakite maira, e te (3) na te taangaanga anga i te au akatutuanga kia kite meitaki te tangata i te manako puapinga. 4:6
UI I TE AU UIANGA KIA AKAKITE MAI TE TANGATA I TO RATOU MANAKO
3, 4. Eaa ra i puapinga ai kia ui tatou i te au uianga kia kite e eaa ta te tangata e irinaki ra? Akakite mai i tetai tupuanga.
3 Na te au uianga e tauturu ia tatou kia kite e eaa ta te tangata e irinaki ra. Eaa ra te reira i puapinga ai? Te na ko ra a Maseli 18:13 e: “Ko tei tuatua vave mai e kare i akakiteia atu, e neneva tona, e ka akama ïa aia.” No reira, ka anoanoia tatou kia kite na mua e eaa tikai ta te tangata e irinaki ra. Me kare tatou e rave i te reira, ka kaimoumou tatou i te taime i te akapapu ki tetai tangata e e tarevake tetai manako, e oti kite mai tatou e kare taua tangata ra e irinaki i te reira.—1 Kori. 9:26.
4 Ei akaraanga, penei te uriuri ra tatou ki tetai tangata no runga i te apiianga era. E manako ana tetai pae e ka aere te aronga kino ki taua ngai ra e ka takinoia ratou i roto i te ai. Tetai pae, e manako ana ratou e me aere koe ki teia ngai ko era, te aiteanga kare oou pirianga ki te Atua. No reira, penei ka rauka ia tatou i te ui i teia, “No te mea e tukeke te manako o te tangata no runga ia era, eaa taau e irinaki ra?” Muri ake i te akarongo anga kiaia, ka rauka i reira ia tatou i te tauturu iaia kia marama e eaa ta te Pipiria e apii maira.
5. Akapeea te au uianga te tauturu anga ia tatou kia kite i te tumu i irinaki ei te tangata i ta ratou e irinaki ra?
5 Me ui maru ua tatou i te au uianga, ka kite tatou i te tumu i irinaki ei tetai tangata i tana i irinaki. Ei akaraanga, akapeea me aravei tatou i tetai tangata i roto i te angaanga orometua tei kare e irinaki ki roto i te Atua? Penei ka manako tatou e kare taua tangata ra e irinaki e kua angaia mai tatou. (Sala. 10:4) Tetai aronga ra, kare ratou e irinaki ana ki roto i te Atua no te mea kua kite ratou i te au tu mamae ta tetai aronga e na roto ra me kore kua rokoia ratou e te tumatetenga. Kare roa ratou e irinaki ana e ka akatika mai tetai Atua aroa kia tupu te mamae. No reira, me karanga mai te pu ngutuare e, “Kare au e irinaki ana ki roto i te Atua,” e ui koe e, “E manako ua ana rai koe i te reira?” Me karanga mai te tangata e kare, penei ka ui tatou e me kua tupu ana tetai apinga tei maani iaia kia akamanako akapera no runga i te Atua. Penei na roto i tana pauanga e tauturu ia tatou kia kite i te mataara meitaki rava atu kia tauturu iaia.—E tatau ia Maseli 20:5.
6. Eaa ta tatou ka rave me ui tatou i tetai uianga?
6 Me ui koe i tetai uianga ki te tangata, ka anoanoia koe kia akarongo ki tana pauanga e kia akameitaki iaia no tona manako. Ei akaraanga, no tetai tupuanga tumatetenga, penei ka karanga mai tetai tangata e kare aia e irinaki e te vai nei rai tetai Atua. No reira, e akakite kiaia na mua e kare i te mea tarevake kia akamanako no runga i te tumu i aro atu ei tatou i te au tumatetenga. E oti, akamarama atu kiaia e akapeea tatou e kite ei e te vai ra rai te Atua. (Haba. 1:2, 3) Me akakoromaki tatou e me akaari tatou i te tu aroa, penei ka inangaro aia i te apii maata atu no runga i te Atua. *
AKAMARAMA E EAA TA TE AU TUATUA TAPU E AKAKITE MAI
Eaa te ka tauturu ia tatou kia puapingaia i roto i te angaanga orometua? (Akara i te parakarapa 7)
7. Eaa ta tatou ka rave kia puapingaia i roto i ta tatou angaanga orometua?
7 Ko te Pipiria te puka puapinga rava atu ta tatou e taangaanga ra i roto i te angaanga orometua. Te tauturu maira te reira ia 2 Timo. 3:16, 17) Kia rauka te puapinga i roto i te angaanga orometua, e maata atu tei anoanoia i to te tatau ua anga i te au irava. Ka anoanoia tatou kia kite e akapeea me akamarama atu i ta te au irava e akakite maira. (E tatau ia Angaanga 17:2, 3.) Ei akatauanga, ka uriuri ana tatou e toru akaraanga.
tatou kia “tau tikai i te au angaanga memeitaki katoa ra.” (8, 9. (a) Eaa tetai mataara kia akamarama atu i te au irava ki tetai tangata tei irinaki e e aiteite ua a Iesu ki te Atua? (e)Akapeea koe me tauturu i tetai tangata kia marama no runga i teia tumu manako?
8 Akaraanga 1: I roto i te angaanga orometua, penei ka aravei tatou i tetai tangata tei irinaki e kua aiteite a Iesu ki te Atua. Eaa te au irava ta tatou ka taangaanga kia akamarama i te reira ki te pu ngutuare? Penei ka pati tatou iaia kia tatau i te au tuatua a Iesu i roto ia Ioane 6:38, te na ko ra e: “I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano.” I muri ake i te tatau anga i tera irava, e ui kiaia e: “Me ko Iesu te Atua, naai i tono ia Iesu ki te enua nei mei te rangi mai? Kare ainei e teitei atu Aia ia Iesu? Ko te tikaanga, e teitei atu Tei tono mai i tei tonoia mai.”
9 Ka rauka katoa i te tatau ia Philipi 2:9, i roto i teia irava kua akataka te apotetoro ko Paulo i ta te Atua i rave i muri ake te matenga e te tuakaouanga o Iesu. Akakite mai tera irava e kua oronga te Atua kia Iesu “te ingoa i maata ua atu i te teitei i te au ingoa ravarai nei.” Ei tauturu iaia kia marama i te aiteanga o tera irava, penei ka ui tatou e: “Me aiteite a Iesu ki te Atua i mua ake i tona matenga e kua oronga te Atua kiaia tetai taoonga teitei, te aiteanga i reira e e teitei atu a Iesu i te Atua? Inara, akapeea tetai ua atu tangata i teitei atu ei i te Atua?” Na roto i teia akamaramaanga, ka akakeu te reira i te aronga tei akangateitei i te Tuatua a te Atua kia kite maata atu no runga Iaia.—Anga. 17:11.
10. (a) Akapeea tatou me akamarama atu i te au irava ki tetai tangata tei irinaki i roto i te ai era? (e)Akapeea koe te tauturu anga i te tangata kia marama no runga i teia tumu manako?
10 Akaraanga 2: E ngata no tetai pu ngutuare kia irinaki e kare te au tangata kino e takinoia e tuatau ua atu i roto i te ngai ko era. Penei kua irinaki aia no runga i te ai era no te mea te inangaro ra aia i te aronga kino kia takinoia no te au mea kino ta ratou e rave ra. Akapeea tatou me akamarama atu i te au irava ki tetai tangata e manako akapera ra? Te mea mua, kia akapapu kiaia e ka akautungaia te aronga kino. (2 Tesa. 1:9) E oti, pati iaia kia tatau ia Genese 2:16, 17, tei akaari mai e ko te utunga no te ara, ko te mate. Penei ka akamarama atu tatou e no te ara a Adamu, kua iri mai te ara ki runga i te tangata katoatoa. (Roma 5:12) E akakite kiaia e kare te Atua i karanga ana e ka akautungaia te aronga kino i roto i te ai era. E oti, tatau ia Genese 3:19. I roto i tera irava, kua akakite te Atua kia Adamu e ko te utunga no tana ara koia oki, ka oki aia ki te one pueu. Penei ka ui tatou e, “Kua tau ainei no te Atua kia karanga kia Adamu e ka oki aia ki te one pueu i te mea e ka takinoia aia i roto i te ai era?” Na roto i tetai uianga mei teia rai te tu e tauturu i tetai tangata akaaka te ngakau kia kite i te aiteanga o taua tumu manako ra.
11. (a) Eaa tetai mataara ka rauka ia tatou i te akamarama atu ki tetai tangata tei irinaki e ka aere pouroa te aronga meitaki ki te rangi? (e) Akapeea koe te tauturu anga i tetai tangata no runga i teia tumu manako?
11 Akaraanga 3: I roto i te angaanga orometua, ka aravei tatou i tetai tangata tei irinaki e ka aere pouroa te aronga meitaki ki te rangi. Penei kare te pu ngutuare e marama tikai ana i ta te Pipiria e akakite maira. Ei akaraanga, me tatau koe ia Apokalupo 21:4, penei ka manako aia e te akataka maira teia irava i te oraanga i runga i te rangi. (E tatau.) Akapeea koe me akamarama atu kiaia i te aiteanga o tera irava? Ma te kore e taangaanga i te au irava pouroa, e akamarama atu kiaia i tetai tuanga i roto ia Apokalupo 21:4. Te karanga ra tera irava e ka “kore rava te mate.” No reira e ui e, “I toou manako kua tau ainei no tetai apinga kia akakoreia i te mea e kare te reira i vai ana?” Penei ka karanga aia e, ae. I reira, ka rauka ia tatou i te karanga e kare e mate i runga i te rangi. Ka mate ua te tangata i te enua nei. E mea tau i reira e te akataka maira a Apokalupo 21:4 i te au akameitakianga i runga nei i te enua.—Sala. 37:29.
TAANGAANGA I TE AU AKATUTUANGA KIA KITE RATOU I TE MANAKO PUAPINGA
12. Eaa te tumu i taangaanga ai a Iesu i te au akatutuanga?
12 Kua taangaanga a Iesu i te au akatutuanga i roto i tana angaanga orometua. (E tatau ia Mataio 13:34, 35.) Na te reira e tauturu iaia kia kite e me te inangaro tikai ra te tangata i te tavini ia Iehova. (Mata. 13:10-15) Kua taangaanga katoa a Iesu i te au akatutuanga kia akamaara te tangata i tana i apii atu kia ratou e kia rekareka i te akarongo kiaia. Ka akapeea tatou me taangaanga i te au akatutuanga me apii atu i te tangata?
13. Eaa tetai akatutuanga ka rauka ia koe i te taangaanga kia tauturu i te tangata kia kite e e teitei atu te Atua ia Iesu?
13 E mea meitaki kia taangaanga i te au akatutuanga mama ua. Ei akaraanga, me inangaro tatou i te apii atu i te tangata e e teitei atu te Atua ia Iesu, e tamata i teia akatutuanga: Te mea mua, e akakite kiaia e kua akaaite te Atua e Iesu i to raua pirianga mei tetai Metua e tana Tamaiti. (Luka 3:21, 22; Ioa. 14:28) E oti, e ui e: “Eaa te pirianga i roto i tetai ngutuare tangata taau ka akatutu kia akaari e e aiteite ua tetai nga tangata?” Penei ka karanga mai te pu ngutuare e ko tetai teina e te tuakana, me kore tetai nga maanga. E oti, e karanga e: “Ae, e akatutuanga mako tikai tena. No reira, i te mea e e mama ua no taua kia akamanako i teia akatutuanga, eaa ra te tumu kare a Iesu, te Puapii Maata, i taangaanga i tetai akatutuanga mei teia rai? Mari ra, kua karanga aia e ko te Atua tona Metua. Na roto i teia mataara, kua tauturu a Iesu ia taua kia kite e e pakari ake te Atua e e maata atu Tona mana i to Iesu.”
14. Eaa tetai akatutuanga tei akaari e kare i te mea tau no te Atua kia taangaanga i te Tiaporo kia takinokino i te tangata i roto i te ai era?
14 Ka uriuri ana tatou i tetai akaou akaraanga. E irinaki ana tetai pae e kua oronga te Atua kia Satani te taoonga kia akaaere i te ngai ko era. Akapeea tatou me tauturu i tetai metua kia kite e kare i te mea tau no te Atua kia taangaanga i te Tiaporo kia takinokino i te tangata i roto i te ai era? E ui koe e, “Eaa taau ka rave me akarongo kore taau tamaiti e kua rave aia i te au mea kino e manganui?” Ka karanga paʼa te metua e ka akatikatika aia i tana tamaiti. Penei ka tauta ua rai aia kia Mase. 22:15) Penei ka ui koe e, “Eaa taau ka rave me kare taau tamaiti e taui i tona tu?” Maata te au metua ka karanga e ka akautunga ratou iaia. E oti, e ui e, “Akapeea me kite mai koe e na tetai tangata rave kino i akakeu i taau tamaiti kia rave i te mea kino?” Kare e ekoko e ka riri te metua i tera tangata. I te openga, kia kite e me te marama ra aia i tera akatutuanga, e ui koe e, “Te kite anga e na tetai tangata rave kino i akakeu i taau tamaiti, ka pati ainei koe i tera tangata kia akautunga iaia?” Te pauanga, kare. Na Satani e akakeu i te tangata kia rave i te kino. No reira te taka ua ra e kare te Atua e taangaanga ana ia Satani kia akautunga i te aronga kino.
tauturu i tana tamaiti kia kore e rave akaou i te mea kino. (KIA AKAMANAKO MEITAKI
15, 16. (a) Eaa te tumu kare tatou e tapapa i te au tangata ravarai kia ariki mai i te karere o te Patireia? (e)Ka anoanoia ainei koe kia riro mai ei puapii tukatau kia rauka i te apii meitaki atu i te tangata? Akamarama mai. (Akara i te pia “ Tetai Ravenga ei Tauturu ia Tatou Kia Tuatua ki te Tangata.”)
15 I te mea e ka ui tatou i te au uianga meitaki e me akamarama atu ki te tangata i te au irava no runga i tetai tumu manako, e me taangaanga i te au akatutuanga meitaki, kare te maata anga o te tangata e ariki mai ana i te karere no runga i te Patireia. (Mata. 10:11-14) E iti ua te aronga tei ariki i te au apiianga a Iesu noatu koia te Puapii maata rava atu tei ora ana i te enua nei!—Ioa. 6:66; 7:45-48.
16 Akapeea me te manako ra tatou e kare tatou i te puapii tukatau? Noatu rai, ka rauka ia tatou i te rave meitaki i te angaanga tutuanga. (E tatau ia Angaanga 4:13.) Te akapapu maira te Pipiria kia tatou e ko “te aronga i akonoia no te ora mutu kore,” ko ratou te ka ariki mai i te tuatua meitaki. (Anga. 13:48) No reira kia akamanako meitaki tatou. Tauta kia akameitaki mai te tu e apii ra tatou i te tangata, inara eiaa e manako paruparu me kare te aronga ta tatou e tuatua ra e ariki mai i te tuatua meitaki. Me irinaki pu tikai tatou ki roto ia Iehova e te terenianga tana i oronga mai, ka riro mai tatou ei au puapii meitaki atu, e ka puapingaia tatou e te aronga e akarongo maira. (1 Timo. 4:16) Ka oronga mai a Iehova i te tauturu kia tatou kia “tuatua atu ki te tangata katoa ra.” I roto i te atikara ka aru mai, ka apii tatou e akapeea me puapingaia i roto i te angaanga orometua na te aru anga i te kaveinga kia akono i tetai ke na roto i te mataara taau ka inangaro kia akonoia mai.
^ para. 6 Akara i te atikara “Ka Rauka Ainei Kia Akatupu i te Akarongo ki Roto i Tei Anga Mai ia Tatou?” i roto i Te Punanga Tiaki o Okotopa 1, 2009.