1, 2. (a) Landzisa lokuhlangenwe nako lokukhombisa indlela lokubaluleke ngayo kusebentisa imibuto lekhetfwe kahle. (Buka sitfombe lesisekucaleni kwalesihloko.) (b) Kungani kungakafaneli sesabe kucoca ngetindzaba letilukhuni?

EMINYAKENI lembalwa leyengcile, lomunye dzadze bekacoca ngeliBhayibheli nemyeni wakhe longasiye Fakazi. Esikhatsini lesendlulile, umyeni wakhe abelilunga lalenye inkholo letsi yebuKhristu. Njengobe bachubeka bacoca, umyeni wakhe watsi ukholelwa kuMtsatfu Amunye. Lodzadze wabona kutsi kungenteka umyeni wakhe akayati imfundziso yaMtsatfu Amunye kutsi itsini, ngako ngekuhlakanipha wambuta watsi: “Uyakholelwa yini kutsi Nkulunkulu nguNkulunkulu, nekutsi Jesu nguNkulunkulu, nekutsi umoya longcwele nawo unguNkulunkulu; kodvwa bakha Nkulunkulu munye hhayi labatsatfu?” Indvodza yakhe imangele yatsi: “Cha angikukholelwa loko.” Kwabese kucala incociswano lemnandzi lemayelana nesimo saNkulunkulu.

² Lolokuhlangenwe nako kwalodzadze kukhombisa kubaluleka kwekubuta ngekuhlakanipha futsi sisebentise imibuto lekhetfwe kahle. Kuphindze kugcamise neliphuzu lelibalulekile lekutsi kufanele singakwesabi kukhuluma ngetindzaba letilukhuni, njengaMtsatfu Amunye, sihogo, nobe kuba khona kweMdali. Nangabe setsembela kuJehova kanye nasekuceceshweni lasinika kona,  singaniketa bantfu labasilalele timphendvulo letibenetisako, leto letingase tifinyelele tinhlitiyo tabo. (Khol. 4:6) Asesihlole kutsi bashumayeli labaphumelelako benta njani nabacoca ngaletindzaba. Sitawuhlola kutsi (1) singayisebentisa njani imibuto leyenta umuntfu lesicoca naye ative akhululekile, (2) singabonisana njani ngaloko imiBhalo lekushoko, futsi (3) singayisebentisa njani imifanekiso kute sicacise liphuzu.

3, 4. Kungani kubalulekile kusebentisa imibuto kute sibone loko umuntfu lakukholelwako? Niketa sibonelo.

³ Imibuto ingasisita kute sibone loko umuntfu lakukholelwako. Kungani loko kubalulekile? Taga 18:13 titsi: “Kubulima nelihlazo kuphendvula umbuzo ungakeva kutsi utsini.” Ngako-ke senta kahle ngekucale sitfole loko umuntfu lesikhuluma naye lakukholelwako ngaphambi kwekutsi sikhulume ngembono weliBhayibheli endzabeni letsite. Ngaphandle kwaloko, singatitfola sicitsa sikhatsi lesinyenti setama kumcacisela ngemfundziso letsite langayikholelwa kwananaye.—1 Khor. 9:26.

⁴ Asesitsi sicoca nemuntfu lotsite ngesihogo. Akusibo bonkhe bantfu labakholelwa kutsi sihogo yindzawo lapho kuhlushwa khona bantfu ngemlilo. Labanyenti bakholelwa kutsi sihogo sisimo lapho khona bantfu behlukaniswe naNkulunkulu. Ngako singase sitsi: “Njengobe bantfu banemibono leyehlukene ngesihogo, wena ucabangani ngaso?” Nasesivile kutsi ukholelwa ini, sitawubese siyakhona-ke kumsita kutsi acondze loko liBhayibheli lelikushoko ngalendzaba.

5. Imibuto ingasisita njani kutsi sitfole sizatfu lesenta umuntfu akholelwe loko lakukholelwako?

⁵ Kubuta imibuto ngekuhlakanipha kungasisita sibone kutsi yini leyenta umuntfu akholelwe loko lakukholelwako. Nasi sibonelo: Asesitsi ensimini uhlangana nemuntfu lotsi akakholelwa kuNkulunkulu. Kungasheshe kube melula kucabanga kutsi lomuntfu akakholelwa kuNkulunkulu ngobe uhungwe yimfundziso lefana neyekutigucukela kwemvelo. (Hla. 10:4) Nanobe kunjalo, labanye bantfu abasakholelwa kuNkulunkulu ngenca yekuhlupheka lokwandzile labakubonako nobe labahlangabetana nako. Bangahle bakutfole kulukhuni kuhlobanisa kuhlupheka lokukhona kanye neMdali lonelutsandvo. Ngako-ke nangabe umnikati welikhaya angabata kutsi Nkulunkulu ukhona, singambuta sitsi: “Bewusolo utiva ngalendlela yini?” Nangabe atsi cha, singase simbute kutsi kukhona yini lokumente wangabata kuba khona kwaNkulunkulu. Imphendvulo yakhe itasisita sibone indlela lencono yekumsita ngemiBhalo.—Fundza Taga 20:5.

6. Yini lokufanele siyente ngemuva kwekubuta umbuto?

⁶ Ngemuva kwekutsi sibute umbuto, kufanele siyilalelisise imphendvulo yakhe futsi sivelane naye. Nasi sibonelo: Lomunye angatsi wehlelwa ngulokutsite lokubuhlungu lokwamenta wakungabata kuba khona kweMdali lonelutsandvo. Ngaphambi kwekumtjengisa bufakazi bekutsi Nkulunkulu ukhona, senta kahle ngekuvelana naye futsi simtjele kutsi akusikubi kutibuta kutsi kungani sihlupheka. (Hab. 1:2, 3) Nasinesineke kanye nelutsandvo, loko kungamenta kutsi afune kwati kabanti ngalendzaba. *

7. Yini lengasisita kutsi siphumelele ensimini?

⁷ Nyalo asesihlole kutsi singabonisana njani nebantfu ngaloko imiBhalo lekushoko. LiBhayibheli lilithulusi letfu leliyinhloko lesilisebentisako nasishumayela. Lisisita kutsi ‘sikulungele ngalokuphelele, futsi sikufanele kahle kwenta yonkhe imisebenti lemihle.’ (2 Thim. 3:16, 17) Kuphumelela kwetfu ensimini akuyi ngekutsi sifundza imiBhalo lemingakhi, kodvwa kuya ngendlela  lesibonisana ngayo nebantfu kanye nendlela lesiyichaza ngayo imiBhalo. (Fundza Imisebenti 17:2, 3.) Kute sifanekise, asesicabange nganati timo letintsatfu letilandzelako.

8, 9. (a) Nguyiphi lenye indlela yekubonisana nemuntfu lokholelwa kutsi Jesu ulingana naNkulunkulu? (b) Ngutiphi letinye tindlela tekubonisana nemuntfu ngalendzaba lotitfole tiphumelela?

⁸ Simo sekucala: Nasisensimini, singahlangana nemuntfu lokholelwa kutsi Jesu ulingana naNkulunkulu. Ngumiphi imibhalo lesingayisebentisa kute sibonisane naye ngalendzaba? Singamcela kutsi afundze Johane 6:38, lapho Jesu atsi: “Ngehla ezulwini kuze ngitewukwenta intsandvo yaloyo longitfumile, hhayi intsandvo yami.” Ngemuva kwekufundza lelivesi, singase simbute sitsi: “Nangabe Jesu anguNkulunkulu, ngubani-ke lowamtfuma emhlabeni? Ngeke yini silindzele kutsi Loyo muntfu abe mkhulu kunaJesu? Ecinisweni, umuntfu lotfume lotsite mkhulu kunalona lotfunyiwe.”

⁹ Singaphindze sifundze Filiphi 2:9, lapho umphostoli Pawula achaza khona loko Nkulunkulu lakwenta ngemuva kwekufa nekuvuswa kwaJesu. Lelivesi litsi: “Nkulunkulu wamphakamisela [Jesu] esikhundleni lesisetulu, futsi ngemusa wamnika ligama lelingetulu kwawo onkhe emagama.” Kute sisite lomuntfu acabange ngalombhalo, singase simbute sitsi: “Nangabe Jesu abelingana naNkulunkulu ngesikhatsi asengakafi futsi ngekuhamba kwesikhatsi Nkulunkulu wamphakamisela esikhundleni lesisetulu, bekungeke yini loko kwente Jesu abe ngetulu kwaNkulunkulu? Kodvwa ukhona yini umuntfu longaba mkhulu kunaNkulunkulu?” Nangabe lomuntfu lococa naye alihlonipha liVi laNkulunkulu futsi acotfo, kubonisana naye ngalendlela kungamenta afune kuyihlolisisa kabanti lendzaba.—Imis. 17:11.

10. (a) Singabonisana njani nemuntfu lokholelwa kutsi bantfu batawushiswa esihogweni? (b) Nguyiphi indlela loyitfole iphumelela nawucoca ngendzaba yesihogo?

¹⁰ Simo sesibili: Umnikati welikhaya loshisekela inkholo yakhe ukutfola kumatima kukholelwa kutsi bantfu lababi ngeke bahlushwe phakadze esihogweni. Kukholelwa kwakhe esihogweni kungabangelwa sifiso lanaso sekubona bantfu lababi batfola umvuzo wetento tabo letimbi. Singabonisana njani nemuntfu lotiva ngalendlela? Singacale simcinisekise ngekutsi bantfu lababi batawujeziswa. (2 Thes. 1:9) Ngemuva kwaloko, singamcela kutsi afundze Genesisi 2:16, 17, loveta kutsi umvuzo wesono kufa. Singamchazela kutsi ngekona kwa-Adamu, bonkhe bantfu batalwa banesono. (Rom. 5:12) Kodvwa singabese siyamchazela kutsi Nkulunkulu akazange asho lutfo ngekutsi abetamjezisa esihogweni. Singabese siyambuta sitsi: “Kube bo-Adamu na-Eva bebatawuhlushwa phakadze, bekungeke  yini kube kahle kutsi becwayiswe ngaloko?” Ngemuva kwaloko singafundza Genesisi 3:19, lapho baniketwa khona sigwebo ngemuva kwekona kwabo, kodvwa kwangashiwo lutfo ngesihogo. Kunaloko, Adamu watjelwa kutsi abetawubuyela elutfulini. Singase sibute lomuntfu sitsi: “Bekungaba ngulokulungile yini kutjela Adamu kutsi abetawubuyela emhlabatsini kantsi ecinisweni abetawushiswa esihogweni?” Nangabe lomuntfu anemcondvo lovulekile, umbuto lonjalo ungase umente acabangisise ngalendzaba.

11. (a) Nguyiphi lenye indlela yekubonisana nemuntfu lokholelwa kutsi bonkhe bantfu labalungile baya ezulwini? (b) Nguyiphi indlela loyitfole iphumelela nawubonisana nebantfu ngendzaba yekuya ezulwini?

¹¹ Simo sesitsatfu: Ensimini, singahlangana nemuntfu lokholelwa kutsi bonkhe bantfu labalungile baya ezulwini. Lenkholelo ingayitsintsa indlela lomnikati welikhaya lalichaza ngayo liBhayibheli. Nasi sibonelo: Ase sitsi sifundza naye Sembulo 21:4. (Fundza.) Angase acabange kutsi letibusiso letichazwe kulelivesi tikhuluma ngekuphila kwasezulwini. Singabonisana njani naye? Kunekutsi sisebentise leminye imibhalo, singanakisisa liphuzu lelikuwo lombhalo lesiwufundzile. Lombhalo utsi “kufa ngeke kusaba khona.” Singase sibute lomuntfu kutsi uyavuma yini kutsi kuze intfo ingasabi khona, kusho kutsi beyikhona ekucaleni. Kungenteka avume. Ngemuva kwaloko singamchazela kutsi kufa akukaze kube khona ezulwini, bantfu bafa lapha emhlabeni kuphela. Ngako kunengcondvo kuphetsa ngekutsi Sembulo 21:4 sikhuluma ngetibusiso tesikhatsi lesitako lapha emhlabeni.—Hla. 37:29.

12. Kungani Jesu asebentisa imifanekiso?

¹² Ngetulu nje kwekusebentisa imibuto, Jesu wasebentisa nemifanekiso nakashumayela. (Fundza Matewu 13:34, 35.) Imifanekiso Jesu lebekayisebentisa yamsita kutsi abone loko lobekusetingcondvweni talabo labebamlalele. (Mat. 13:10-15) Imifanekiso yaphindze yenta kutsi indlela Jesu labefundzisa ngayo ikhange futsi bantfu bakukhumbule loko labekusho. Singayisebentisa njani imifanekiso nasifundzisa?

13. Ngumuphi umfanekiso lesingawusebentisa kute sichaze kutsi Nkulunkulu mkhulu kunaJesu?

¹³ Kuncono kakhulu kusebentisa imifanekiso lemelula. Nasi sibonelo: Nasichaza kutsi Nkulunkulu mkhulu kunaJesu, mhlawumbe singetama kusebentisa lendlela lelandzelako. Singasho kutsi Nkulunkulu naJesu bachaza buhlobo babo ngemagama lasetjentiswa emndenini. Nkulunkulu watsi Jesu uyiNdvodzana yakhe, kantsi naJesu watsi Nkulunkulu unguBabe wakhe. (Luk. 3:21, 22; Joh. 14:28) Ngemuva kwaloko, singabuta umnikati welikhaya sitsi: “Ase sitsi bewufuna kungichazela kutsi bantfu lababili bayalingana, ngubuphi buhlobo bemndeni lobewungabusebentisa?” Lomuntfu angahle abekise ngebantfwana bandzawonye nobe emaphahla. Nangabe asho njalo, singamchazela kutsi loko lakushoko vele kuyintfo levamile. Ngemuva kwaloko singambuta sitsi: “Nangabe mine nawe singawucabanga kalula kanjena lomfanekiso, abengeke yini Jesu—longuMfundzisi Lomkhulu—acabange ngemfanekiso lofanako? Kodvwa Jesu watsi Nkulunkulu unguBabe wakhe. Ngaleyo ndlela wakhombisa kutsi Nkulunkulu mkhulu kunaye futsi uneligunya lelikhulu kunaye.”

14. Ngumuphi umfanekiso lokhombisa kutsi akunangcondvo kutsi Nkulunkulu utawusebentisa Develi kute ahluphe bantfu esihogweni?

¹⁴ Cabanga ngalesinye sibonelo. Labanye bakholelwa kutsi Sathane “nguye loneligunya” lekushisa bantfu esihogweni. Umfanekiso ungase usite umtali abone kutsi akunangcondvo kutsi Nkulunkulu angasebentisa Develi kute ahluphe bantfu esihogweni. Singase sitsi: “Bewungenta njani nangabe umntfwana wakho avukela futsi enta tintfo letinyenti letimbi?” Kungenteka lomtali atsi abengamekhuta. Angetama  tikhatsi letinyenti kumsita kute ayekele kwenta lokubi. (Taga 22:15) Singabese sibuta lomtali kutsi abengenta njani nangabe lomntfwana angalwemukeli lusito lwakhe. Batali labanyenti bangase batsi bangagcine baphoceleleke kutsi bamjezise lomntfwana. Ngemuva kwaloko singambuta sitsi: “Bowungatsini nawungatfola kutsi kunemuntfu lokhohlakele lobangela kutsi umntfwana wakho avukele?” Akungabateki kutsi lomtali abengamtfukutselela umuntfu lonjalo. Kute sente liphuzu lalomfanekiso licace, singase sibute lomtali sitsi: “Nangabe wati kutsi umuntfu lokhohlakele uhunge umntfwana wakho, bowungamcela yini loyo muntfu kutsi kube nguye lojezisa umntfwana wakho?” Asingabati kutsi abengaphendvula atsi cha. Kuyacaca-ke kutsi Nkulunkulu angeke asebentise Sathane kute ajezise bantfu lababangelwe nguDeveli lucobo lwakhe kutsi bente tintfo letimbi.

15, 16. (a) Kungani kungakafaneli silindzele kutsi bonkhe bantfu lesishumayela kubo bawemukele umlayeto weMbuso? (b) Kudzingeka sibe nesiphiwo yini kute sikwati kufundzisa kahle? Chaza. (Fundza libhokisi lelitsi “ Lithulusi Lelingasisita Sikhone Kuphendvula Bantfu.”)

¹⁵ Siyati kutsi akusibo bonkhe bantfu lesishumayela kubo labatawemukela umlayeto weMbuso. (Mat. 10:11-14) Singalindzela kutsi kube njalo ngisho nobe singabuta imibuto lekahle, sibonisane nebantfu futsi sisebentise imifanekiso lemihle. Ecinisweni, bambalwa kakhulu bantfu labamlalela Jesu nakafundzisa, nanobe abenguMfundzisi lomkhulu kunabo bonkhe labake baba khona emhlabeni.—Joh. 6:66; 7:45-48.

¹⁶ Ngakulokunye, ngisho nobe sicabanga kutsi site siphiwo sekufundzisa, singaphumelela nasishumayela. (Fundza Imisebenti 4:13.) LiVi laNkulunkulu lisiniketa sizatfu lesivakalako sekukholelwa kutsi ‘bonkhe labatimisele kutfola kuphila lokuphakadze,’ batawutilalela tindzaba letimnandzi. (Imis. 13:48) Ngako-ke, kufanele sihlale sinembono lofanele ngatsi, nangalabo lesifuna kubacocela tindzaba letimnandzi teMbuso. Shengatsi singakusebentisa konkhe kuceceshwa Jehova lasinika kona, siciniseke kutsi kutawuzuzisa tsine nalabo labasilalelako. (1 Thim. 4:16) Jehova angasisita sibone kutsi ‘singamphendvula njani umuntfu ngamunye.’ Njengobe sitawubona esihlokweni lesilandzelako, lenye indlela yekuphumelela nasishumayela kutsi sisebentise uMtsetfo Weligolide.