1, 2. 1) Xi bizaaca ti gunaa xpinni Cristu ni rusihuinni naquiiñeʼ guiníʼ ique chaahuinu xi guinabadiidxanu. (Biiyaʼ foto ni zeeda ra ruzulú tema riʼ.) 2) Xiñee cadi naquiiñeʼ guidxíbinu ora guininu de xiixa tema nagana.

RACA chupa chonna iza, ti gunaa xpinni Cristu caniʼné xheelaʼ de Biblia, peru xheelabe riʼ cadi naca testigu stiʼ Jiobá. Guyuube ndaaniʼ ti religión ne raqué bisiidicabe laabe guni crebe Trinidad. Gunaa xpinni Cristu riʼ, bidii cuenta zándaca qué ganna chaahuiʼ xheelaʼ xii nga Trinidad, ngue runi biyubi ximodo gunabadiidxaʼ laabe: «Runi creluʼ Dios nga Dios ne Jesús nga Dios ne espíritu santu nga Dios, peru cadi chonna Dios nuu, sínuque tobi si la?». Bidxagayaabe ni guníʼ xheelabe ne bicábibe laa: «¡Coʼ, cadi nga diʼ nga ni runeʼ cré!». Zaqué bizulú guníʼcabe tupeʼ nga Dios.

² Xi zanda guizíʼdinu de ni bizaaca xpinni Cristu riʼ yaʼ. Rizíʼdinu naquiiñeʼ guiníʼ ique chaahuinu xi guinabadiidxanu binni ne guyúbinu modo gúninu ni. Ne laaca rusiidiʼ ni laanu sti cosa risaca: cadi guidxíbinu ora guininu de xiixa tema ni nagana, casi de Trinidad, infiernu o pa nuu tuuxa ni Bizáʼ guiráʼ ni nuu. Pa gápanu confianza Jiobá ne cani  rusiidibe laanu, zanda guicábinu cani guinabadiidxaʼ binni ne chindani ndaaniʼ ladxidoʼcaʼ (Col. 4:6). Lu tema riʼ zuzéʼtenu ximodo huayuni chupa chonna xpinni Cristu ni nanna gusiidiʼ. Guidúʼyanu 1) xi rinabadiidxacabe binni para guicabi laacabe, 2) ximodo racanécabe binni guiene Biblia ne 3) xi ejemplu riquiiñecabe para gusiénecabe ni caníʼcabe.

3, 4. Xiñee galán guinabadiidxanu binni xiixa ni gacané laanu gánnanu xi runi cré. Bizeeteʼ ti ejemplu.

³ Zanda gánnanu xi runi cré binni ora guinabadiidxanu laaca. Xiñee naquiiñeʼ gánnanu xi runi cré binni yaʼ. Purtiʼ Proverbios 18:13 na: «Ora guicabi tuuxa xiixa cosa ante gucaadiaga la? zusihuinni nahuati ne zatuilú». Nga runi, naquiiñeʼ gánnanu primé xi riníʼ ique binni ni caníʼnenu ca. Pacaa la? zunítinu stale tiempu guinínenu laabe de xiixa ni qué runi crebe (1 Cor. 9:26).

⁴ Zándaca caníʼnenu tuuxa de infiernu. Cumu cadi guiráʼ binni runi cré zeeda gácani ti lugar ra cacaguí binni la? «Ñee zanda gábiluʼ naa xii nga infiernu para lii la?». Ora maʼ bicaadiáganu xi bicábibe, zanda gacanenu laabe guiénebe xi caníʼ Biblia de tema ca.

5. Ximodo zanda gacané ca guendarinabadiidxaʼ ca laanu gánnanu xi runi cré binni.

⁵ Ora guiníʼ ique chaahuinu xi guinabadiidxanu binni laaca zacaneni laanu gánnanu xiñee runi crebe xiixa cosa. Guzéʼtenu ti ejemplu, pa ora canagucheechenu diidxaʼ gabi tuuxa binni laanu qué runi cré Dios, xi niníʼ íquenu yaʼ. Ñándaca niníʼ íquenu runi crebe ni rusiidiʼ binni, casi evolución (Sal. 10:4). Peru nuu binni maʼ qué runi cré Dios pur guiráʼ guendanagana ni huayapa o purtiʼ huayuuyaʼ modo huayacaná xcaadxi binni. Raca nagana para laacabe guni crécabe gudii ti Dios ni nadxii binni lugar gacananu. Nga runi, pa tuuxa gabi laanu qué runi cré Dios, zanda guicábinu laacaʼ: «Ñee maʼ xadxí riníʼ íqueluʼ zacá la?». Pa guicábibe cadi xadxipeʼ de runi crebe ni la? zanda guinabadiidxanu laabe xi bicaa laabe guni crebe gastiʼ Dios. Ni guicábibe zacané ni laanu gánnanu ximodo jma galán gacanenu laabe guiziidibe de Dios. Biblia na: «Casi nisa ziaʼ nga ca conseju ni nuu ndaaniʼ ladxidóʼ ti hombre, peru tobi ni nuu xpiaaniʼ zanda cuee cani» (Proverbios 20:5).

6. Xi naquiiñeʼ gúninu despué de guinabadiidxanu binni xiixa.

⁶ Ora guicabi binni ca laanu, naquiiñeʼ gucaadiaga chaahuinu laa ne gusihuínninu runi respetarnu cani runi cré. Guzéʼtenu ti ejemplu, zándaca gábibe laanu bizaacabe ti desgracia ne pur ngue maʼ qué runi crebe pa nuu Dios. Xi nicábinu laabe yaʼ. Ante gábinu laabe xi razón nápanu para guininu nuu Dios, jma galán gábinu laabe cayanu laabe pur ni bizaacabe ne gastiʼ naca guiníʼ íquebe xiñee rizaacanu xiixa desgracia (Hab. 1:2, 3). Pa gápanu paciencia ne guiénenu ni cazaacabe, ziuuláʼdxibe guiziidibe. *

7. Xi naquiiñeʼ gúninu para gácanu ti binni ni nanna gucheeche diidxaʼ.

⁷ Guidúʼyanu yanna ximodo zanda gacanenu binni guiene ni na Biblia, purtiʼ laani nga ni jma riquiiñenu ora  rucheechenu diidxaʼ. Zanda gusiidiʼ chaahuini laanu «para ganda [gúninu] irá ni riree ndu» (2 Tim. 3:16, 17). Para gácanu ti binni ni nanna gucheeche diidxaʼ la? cadi caquiiñeʼ guidúʼndanu stale textu. Ni jma jneza gúninu nga gánnanu gusiene chaahuinu ca versículo ni guidúʼndanenu binni ne iquiiñenu cani para gacanenu laa ganna pa jneza cani runi cré (biindaʼ Hechos 17:2, 3). Guidúʼyanu chonna ejemplu ni zándaca guizaacanu ora maʼ cucheechenu diidxaʼ.

8, 9. 1) Ximodo zanda gacanenu tuuxa ni runi cré Jesús nga Dios. 2) Ximodo huayacaneluʼ binni ni runi cré Jesús nga Dios.

⁸ Primé ejemplu. Ora guinínenu tuuxa ni runi cré Jesús nga Dios. Xi textu zanda iquiiñenu para gacanenu binni ganna pa dxandíʼ ni runi cré yaʼ. Zanda guidúʼndanenu laabe Juan 6:38 ra guníʼ Jesús ca diidxaʼ riʼ: «Purti biete de ibáʼ cadi para gune ni racaladxeʼ, sínuque para gune ni na ni biseenda naa». Ora maʼ bisiénenu versículo riʼ, ñanda nininu sicaríʼ: «Pa Jesús nga Dios, tu biseendaʼ laabe lu Guidxilayú riʼ yaʼ. Ñee cadi jma risaca binni ni biseendaʼ Jesús ca la? Cadi jma risaca binni ni ruseendaʼ tuuxa guni xiixa la?».

⁹ Laaca ñanda nidúʼndanu ni na Filipenses 2:9, ra cayeeteʼ ni biʼniʼ Jiobá despué de guti Jesús ne biasa de lade gueʼtuʼ. Racá na: «Ma bidxiiba Dios [Jesús] ne bisisaca laabe jma que irá xixé». Para ganda gusiénenu versículo riʼ, ñanda ñábinu laabe: «Pa ante gatiʼ Jesús biaʼca Dios laa ne despué bisisaca laabe jma que guiráʼ xixé, ñee cadi nisácabe jma que Dios la? Peru qué zanda guisaca tuuxa jma que Dios». Pa binni ca runi respetar Stiidxaʼ Dios ne nayá ladxidóʼ, ni gábinu laabe ca zanda gucaani laabe guʼndaʼ chaahuibe tema ca (Hech. 17:11).

10. 1) Ximodo zanda gacanenu tuuxa ni runi cré infiernu. 2) Ximodo huayacaneluʼ binni ni runi cré nuu infiernu.

¹⁰ Guiropa ejemplu. Ora guiníʼ binni ni napa religión dxandipeʼ zié guiráʼ binni malu infiernu. Zándaca riníʼ íquebe zacá purtiʼ racaláʼdxibe guni castigar Dios guiráʼ binni malu. Ximodo zanda gacanenu binni riʼ yaʼ. Primé, zanda gábinu laabe dxandipeʼ zaca castigar binni malu (2 Tes. 1:9). Ora maʼ bisiénenu ni laabe, zanda guidúʼndanenu laabe Génesis 2:16, 17, ra guníʼ Jiobá zati Adán pa guchee, ne nga nga castigu stiʼ. De racá, zanda gábinu binni ni caninenu ca qué niníʼ Dios zié Adán ne Eva infiernu para gaca castigarcaʼ,  ne guinabadiidxanu binni ca: «Ñee cadi jma galán ñabi Dios ni laaca la?». Despué guidúʼndanenu laabe Génesis 3:19 ra cayeeteʼ xi castigu ngue na Dios zacaa Adán ne Eva pur bichee. Dios gudxi laabe zabiguetaʼ zácabe yu ne qué lica nuzeeteʼ de infiernu. Laaca zanda guininu: «Ñee jneza ngue ni gudxi Dios laabe zabiguetaʼ zácabe yu pa ndaaniʼ infiernu chiguilúxebe la?». Ni guinabadiidxanu riʼ zacané ni binni guiníʼ ique jneza de tema riʼ.

11. 1) Ximodo zanda gacanenu tuuxa ni runi cré rié binni nachaʼhuiʼ guibáʼ. 2) Ximodo huayacaneluʼ binni ni runi cré rié binni nachaʼhuiʼ guibáʼ.

¹¹ Guionna ejemplu. Ora guinínenu tuuxa binni ni runi cré rié guiráʼ binni nachaʼhuiʼ guibáʼ. Zándaca runi crebe zacá pur modo riénebe Biblia. Guiníʼ íquenu cásipeʼ bíʼndanenu laabe Apocalipsis 21:4 (biindaʼ ni). Zándaca riníʼ ique binni guibáʼ nga chigaca guiráʼ ni na textu ca. Ximodo zanda gacanenu laabe yaʼ. Lugar de guidúʼndanenu laabe sti textu de lu Biblia, zanda iquiiñenu ca diidxaʼ «ma qué ziuu ru enda guti» ni zeeda laaca lu versículo ca. Ne guinabadiidxanu laabe: «Cadi dxandíʼ ca diidxaʼ maʼ qué ziuuruʼ riníʼ ni maca huayuu guendaguti la?», zándaca gábibe lii dxandíʼ ni. De racá, zanda gábinu laabe qué huayuu dxi gatiʼ binni guibáʼ; lu Guidxilayú riʼ nga rati binni. Nga runi, zanda guininu lu Guidxilayú riʼ nga chigaca guiráʼ ni rieeteʼ lu Apocalipsis 21:4 (Sal. 37:29).

12. Xiñee biquiiñeʼ Jesús ejemplu ora bisiidiʼ.

¹² Biquiiñeʼ Jesús ejemplu ora bisiidiʼ binni (biindaʼ Mateo 13:34, 35). Zacá gúnnabe pa dxandíʼ racalaʼdxiʼ ca binni que gúnicaʼ ni na Jiobá (Mat. 13:10-15). Né ca ejemplu riʼ guyuulaʼdxiʼ binni gucaadiaga laabe ne cadi nagana guca para laacaʼ guietenaláʼdxicaʼ cani bisiidibe. Ximodo zanda iquiiñenu ejemplu ora gusíʼdinu yaʼ.

13. Xi ejemplu ñanda niquiiñenu para nuluinu binni Bixhoze Jesús nga Dios.

¹³ Jma galán iquiiñenu ejemplu ni guiene binni. Guzéʼtenu tobi de laacani, pa chigusiénenu Dios nga Bixhoze Jesús la? zanda guininu sicaríʼ. Primé, zanda guininu cásica Dios ne Jesús bichaagacaʼ laacaʼ casi ti binni ne xiiñiʼ: Dios guníʼ Jesús nga Xiiñiʼ, ne Jesús guníʼ Dios nga Bixhoze (Luc. 3:21, 22; Juan 14:28). De racá, zanda guinabadiidxanu binni ca: «Xi ejemplu niquiiñeluʼ para nusiéneluʼ igual chupa binni. Ejemplu stiʼ ti binni ne xiiñiʼ la? o stiʼ chupa cuachi». Zándaca guicábibe ejemplu stiʼ chupa cuachi. Pa zacá ni la? zanda gábinu laabe: «Pa guirópanu riníʼ íquenu zacá, ñee cadi niquiiñeʼ Jesús, Maestru ni jma nanna gusiidiʼ, ejemplu stiʼ chupa cuachi la? Peru laabe guniʼbe Dios nga Bixhózebe, ne laa napa jma poder que laabe».

14. Xi ejemplu rusihuinni qué riquiiñeʼ Dios Binidxabaʼ para guni castigar binni ndaaniʼ infiernu.

¹⁴ Guidúʼyanu sti ejemplu. Nuu binni runi cré bidii Dios Binidxabaʼ dxiiñaʼ de guni castigar binni lu infiernu. Xi ejemplu ñanda niquiiñenu para nuluinu ti binni napa xiiñiʼ cadi zacá diʼ ni yaʼ. Ñanda ñábinu laabe: «Guníʼ ique maʼ qué lica náʼ xiiñiluʼ guzuubaʼ stiidxaluʼ ne ñúnibe stale cosa malu. Xi ñúniluʼ». Zándaca binni ni caníʼneluʼ ca ñabi lii nulidxe xiiñiʼ ne cadi ti biaje si, sínuque ñúnibe ni stale biaje (Prov. 22:15). De racá, ñanda ninabadiidxanu laabe xi  ñúnibe pa qué náʼ xiiñibe guzuubaʼ stiidxabe. Nanna dxíchinu ñábibe laanu ñuni castigarbe laa. Despué, zanda guinabadiidxanu laabe: «Xi ñúniluʼ pa ñánnaluʼ guyuu tuuxa binni bicaa laabe gúnibe cosa malu yaʼ». Zándaca gábibe laanu nidxiichinebe binni ni bicaa xiiñibe guni cosa malu. Yanna, para gusiene chaahuinu ejemplu riʼ, ñanda ñábinu binni ca: «Cumu maʼ nánnaluʼ tuu nga guleechú xiiñiluʼ la? ñee ñábiluʼ binni ca ñuni castigar xiiñiluʼ la?». Coʼ njaʼ. ¡Racá ridúʼyanu, Binidxabaʼ nga rucaa binni guni cosa malu, nga runi qué zaquiiñeʼ Dios laabe para guni castigarbe binni ni maʼ guleechube!

15, 16. 1) Xiñee cadi naquiiñeʼ cuézanu gucaadiaga guiráʼ binni Stiidxaʼ Reinu. 2) Ñee naquiiñepeʼ gánnanu stale ti ganda gucheechenu diidxaʼ la? Xiñee ricábiluʼ zacá (laaca zanda gúʼyaluʼ cuadru ra na: « Ni zacané laanu para guicábinu binni»).

¹⁵ Neca guiníʼ ique chaahuinu xi guinabadiidxanu binni, jneza modo gusiénenu ni na Biblia ne iquiiñenu ejemplu ni jma galán, naquiiñeʼ gánnanu cadi guiráʼ binni zaná gucaadiaga ora guinínenu laa de Reinu stiʼ Dios (Mat. 10:11-14). Cadi guiaandaʼ laanu huaxiéʼ si binni bicaadiaga cani bisiidiʼ Jesús, ¡laandabe nga Maestru ni jma nanna ni guyuu lu Guidxilayú! (Juan 6:66; 7:45-48.)

¹⁶ Yanna, pa riníʼ íquenu huaxiéʼ nánnanu gusíʼdinu yaʼ. Neca zacá, zanda gucheechenu diidxaʼ jneza (biindaʼ Hechos 4:13). Stiidxaʼ Dios rudii laanu caadxi razón para guni crenu zucaadiaga cani «maʼ nuu listu para icaa guendanabani ni qué zaluxe» ca diidxaʼ nacubi ne galán (Hech. 13:48). Nga runi, naquiiñeʼ gúninu stipa pur gusíʼdinu binni jneza, peru cadi guireʼnu gana pa qué náʼ binni gucaadiaga laanu. Pa gápanu confianza Jiobá ne cani cusiidibe laanu la? zánnanu gusíʼdinu jneza, zacané ni laanu ne cani gucaadiaga laanu (1 Tim. 4:16). Rusiidiʼ Jiobá laanu gánnanu ximodo guicábinu cada binni. Lu sti tema ca zadúʼyanu ximodo zanda cueendunu ni galán ora gucheechenu diidxaʼ ra chinándanu ni runibiáʼcabe casi Regla de Oro.