1, 2. (a) Oni penga pa gu kpiapai nayugo gu wenepai du ti mangasunge na wene asanahe. (Oni bi gu sura du ti tonatonaha.) (b) Tipagine si aidanga ani gunde ti ni be sakapai tipa agu apai du ni kpakarakpakaraha ya?

BETE agarã kusayo, wirinarani sa aasakapai na kumbari nangianga Dezire Yekova ya rogo Ziazia Kekeapai. Mbata kusayo, ko anaaya kina boro pambori a nga ko. Ti gu regbo ri aasakapai na ko, ko ape gupai nga ko idi kuti Tirinita. Ho ri abihe ni nga ko ainongo agu ayugopai dunduko nga ga Tirinita te, ri asanako ngba wene gene nga: “Ya mo mo idi kuti gupai nga Mbori nga kina Mbori, Yesu nga Mbori, na ziazia toro nga Mbori; ono anga i nga aMbori biata te ono bangisa Mbori?” Kina ngbari nazere, ho kumbari aya ni wẽ, “Oó, mi aidanga kutini te!” Ni sangbana gipai re, i atona ka sakapai nzunzu tipa ndikidi Mbori.

² Gi kpiapai re nayugo wai nyakipa mangasunge na sanahe ngba wene gene. Si nayugo gu kura nyanyakipa pai a nga: Si aidanga ani gunde be sakapai tipa gu kpakarakpakaraapai du wa Tirinita, we-iferno, na padu  Mbori ho ti ni te. Ka ani kido kuti Yekova na kuti agu arabahe ko afuhe, si rengbe ka sarani ani fu wene karagapai rengbe ka zio ngbadu agu aboro yo ani afura nayo. (Koro. 4:6) Ani wisigingo gupai wene abatungusipai naamangaha ho i asakapai ni tipa ngbatunga apai wa gere. Ani nika wisigo wai rengbe ani (1) ka sana agu asanahe rengbe ka sa boro ni pe gani berãpai, (2) ka wisigopai tipa gupai Ziazia Kekeapai agumbaha, na (3) ka mangasunge na kpiapai tipa boro gi rogo gupai re.

3, 4. Tipagine nyakipa mangasunge ti ni na asanahe ka ino gupai boro naidi kutini? Oni fu nga kpiapai.

³ Asanahe rengbe ka undo rani ani ini gupai boro naidi kutini. Tipagine nyaki gipai re ti ni? Asanza 18:13 naya: “Ka boro karagapai mbata fu gia pai, si nga pa mungo na zee fu ni.” Nirengo, mbata fu ani tona ka sakapai na boro riipa agu apai du rogo Ziazia Kekeapai, si naida ani asadi ka ino gupai ni naidi kutini. Ka si adunga wo ya, ani ima rengba ka dia bakere regbo kuti saka gupai ni aidanga kutini ya.—1 Kor. 9:26.

⁴ Ani ya ani nasakapai na boro riipa gupai nabipa we-iferno. Anga aboro dunduko idi kuti gupai nga iferno nga gu ba i arungosi aboro rogoho na we te. Dungu aboro idi kuti gupai nga, si nga gu ba nakpara aboro kusayo ti Mbori. Sidu, ani rengbe ka pepai wa gere: “Aboro na gayo abipai ni bakiakia tipa iferno, ga bipai tigamo nga gine?” Fuo gia ani gani karagapai, ani ima rengba ka undo ni ni ini gupai Ziazia Kekeapai agumbaha tipa gupai re.

5. Wai rengbe asanahe ka undo rani ani ini gupai nasa boro ni idi kuti gu bipai du ni na ni?

⁵ Wene mangasunge na asanahe ima rengba ka undo rani ani ini gupai sa gu boro re ni idi kuti gupai re. Ni kpiapai, ginipai rengbe ani ka manga ka ani gbia boro gene tungusapai ya ni aidanga kuti Mbori te? Si taata ani gu nibasa kuti gupai nga ni idi kuti gu yugopai nga ahe akuru nisaha. (Tam. 10:4) Ono tie, kura aboro aidanga kuti Mbori te mbiko gu gbegberẽ apai i abihe si nimangi watadu gu namangiyo. Si ima mbu fuyo i idi kuti gupai nga Mbori kina ti ni baraho agi apai re amanga yo ni. Sidu tie, ka irakporo akapa akapa singia Mbori ti ni, ani ima rengba ka sana ni nga, “Wodu ga bipai nidu ti aregbo dũ?” Ka ni ya oó, ani rengbe ka sana ni singia kurapai kinaho naasa ni ni tona kaa bihe nga Mbori ti ni te. Gani karagapai ima rengba ka undo rani ani ini gu wene gene rengbe ani ka undo ni ngbaha.—Oni gedi Asanza 20:5.

6. Ginipai si aida ani mangihe fuo sana ani he?

⁶ Fuo ani sana ni, si naida ani degeturani wenengai kuti gani karagapai na ki idihe nga ni na rengo beni kadu na gu bipai re. Ni kpiapai, boro ima rengba ka pepa gu kerepai naasa ni ni tona ka kapa padu Bakusiahe ti ni. Mbata fu ani fu gu gopai nayugo padu Mbori ti ni, si naida ani yuguhe ayugo funi nga si agberẽnga ni bakibangirini na ndu gupai ani arungo ti ni te. (Abak. 1:2, 3) Ka ani du na zerangbaduse na kini fura na ni wenengai  ni duadu na nyemu ka wirika kura apai. *

7. Gaani diabese gene tungusapai yo naruriipa gine?

⁷ Ani wisigingo wai rengbe ani ka fura na boro ri gupai Ziazia Kekeapai agumbaha. Ziazia Kekeapai nga gu bambata he ani amangasunge na ni gene tungusapai yo. Si nasarani ‘aũ manga wene apai dunduko du berani.’ (2 Tim. 3:16, 17) Gaani diabese gene tungusapai arunga riipa geda ani dungu averesi te, ono si naruriipa wai ani sakarogo agu averesi ani nagedihe. (Oni gedi Amokedi 17:2, 3.) Ani bingo agi akpiapai du biata re.

8, 9. (a) Gini gene rengbe ani ka sakapai ngbaha na gu boro naya Yesu sa na Mbori? (b) Gini kura berãpai berewe tipa gipai re bi oni he nga si ngbaangba ka mangasunge na ni?

⁸ Bambata kpiapai: Gene tungusapai, ani gbia gu boro ya Yesu kina sa na Mbori. Gini veresi rengbe ani ka mangasunge na ni? Ani rengbe ka sana ni ni gedi Yoane 6:38, yo Yesu aya ni wẽ: “Mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.” Fuo geda ani he, ani rengbe ka sana ni nga: “Kangia Yesu nga Mbori, da nakedi ko ngbangbaturũ yo? Ya mo gu boro nakedi Yesu re akiongo tiko te? Kurigure, gu boro nakeda kurani, ni kiipa ni ti guni i akeda ni.”

⁹ Ani ima rengba ka geda AFiripoio 2:9, yo Pauro asakipai ni riipa gupai Mbori amangihe fuo zingisa ko Yesu be kpio. Gu veresi re naya: “Si du Mbori akiisi pako [Yesu] ti ni a gbe, ki fu gu rimo fu ko zogo arimo dũ.” Tipa ka undo gu boro re ni berẽkurii gu veresi re, ani rengbe ka sanahe nga: “Kangia Yesu adu sa na Mbori mbata fu kpi ko na kusa Mbori ki kiisi pako kuari, ya mo gure arengbanga ka sa Yesu ko du kurii Mbori te? Ono tie, wai rengbe kura boro kadu kurii Mbori?” Kangia gu boro re nabi Fugo Mbori na kikiipaha na ni na nyemu rengo, ni idi aida ka sakapai ni bakerehe riipa gupai re.—Amo. 17:11.

10. (a) Wai rengbe ani ka fura na gu boro naya ni idi kuti gu yugopai nga ga iferno? (b) Ginipai bi oni he nga si ni wenehe ho oni asakapai ni na gu boro idi kuti gu yugopai nga ga iferno?

¹⁰ Ue kpiapai: Si ima kpakara fu boro- pambori ni idi gupai nga i ambusanga gbegberẽ aboro rogo we-iferno te. Si rengbe kadu nga ni idi kuti gupai re mbiko ni naida ka bi gbegberẽ aboro i nimbusi yo we yo tipa gu gbegberẽ apai i amangihe. Wai rengbe ani ka sakapai na ngbatunga gu boro du na gu ida re? Bambata pai si aida ani mangihe nga ka kido ni nga i nika mbusa gbegberẽ aboro ambusa. (2 Tesa. 1:9) Fuani, ani rengbe ka geda Bambata Pai 2:16, 17, nayugo gupai nga mosoro ingapai nga kpio. Ani rengbe ka pe gupai funi nga, ga Adamu ingapai naasa gupai nga i vungu aboro dunduko na ingapai. (Rom. 5:12) Na ki pe gupai funi nga Mbori apenga pa mbusa aboro rogo iferno te. Fuani, ani ki sana ni nga, “Ka si adu nga i nika rungosi aAdamu na Eva rogo we yo nyeanye kindi, ya mo ka Mbori apenga pa gu mbusa nga ga we re fuyo te?” Ani ima rengba tie ka geda Bambata Pai 3:19, nafura tipa wai Mbori asaringbanga yo. Si afuranga tipa we-iferno te. Kuba gure, i aya fu Adamu wẽ ko akaraga tiko ku nvutu yo. Ani rengbe ka sanahe nga, “Ya mo ka si aruaru fu Mbori ko ya fu Adamu ko nika karaga tiko ku nvutu yo baraho ko aandu ni ku iferno yo?” Kangia gu boro re na wene ngbadu ni yo, ngbatunga agi asanahe re ima rengba ka sani ni berẽ wenengai kurii gipai re.

11. (a) Gini wene gene rengbe ani ka sakapai ngbaha na gu boro naya wene aboro naga ku ngbangbaturũ yo? (b) Ginipai bi oni he nga si ni wenehe ho oni asakapai ni tipa gate ku ngbangbaturũ yo?

¹¹ Biata kpiapai: Gene tungusapai yo, ani gbia gu boro ya wene aboro dunduko naga ku ngbangbaturũ yo. Ngbatunga gu ida re na ome kurii wai irakporo asakarogo rogo Ziazia Kekeapai yo. Ani ya ani nasakapai na ni riipa gupai du rogo Yugoti 21:4. (Oni gedihe.) Ni ima rengba ka berãha nga gu veresi re nafura tipa agu amaku du ngbangbaturũ yo. Wai rengbe ani ka sakapai na ni? Kuba mangasunge na kura averesi, ani gbe berãrani kuti agu apai du rogo gu veresi re. Si naya: “Kpio adú nga berewe te.” Ani rengbe ka sana ni singia ni idi kuti gupai nga tipa i di he kusayo, si naida si du aduho mbata. Si nawira wa ni idihe aida. Ani rengbe ka pe gupai funi tie nga kpio ngbangbaturũ yo te; aboro nakpi kina auru kpotosende ane. Nirengo, Yugoti 21:4 nafura tipa agu amaku nika du ku mbatayo auru kpotosende ane.—Tam. 37:29.

12. Tipagine Yesu amangisunge ti ni na akpiapai?

¹² Kupati mangasunge na asanahe, Yesu amangisunge a na akpiapai ti regbo gako sunge tungusapai. (Oni gedi Matayo 13:34, 35.) Ga Yesu akpiapai aundo ko ko ini gu berãpai naadu ri agu aboro yo ko anaatungusapai fuyo. (Mt. 13:10-15) Akpiapai asa ga Yesu yugopai si du ni wenehe na aboro ni tingidihe. Wai rengbe ani ka mangasunge na akpiapai rogo gaani yugopai yo?

13. Wai rengbe ani ka yugo gupai nga Mbori du na pagbia kurii Yesu?

¹³ Si adu ni wenepai ka ani mangisunge na agu akpiapai du taata. Ni kpiapai, ho ani asakapai ni nga Mbori kii pako ti Yesu, ani ima rengba ka asada gipa re. Ani rengbe ka ya wẽ, ho aMbori na Yesu afura ni tipa gu pagume du dagbayo, i naringbisaha kuti bagude na wirini. Mbori nayamba Yesu nga Wiriko, na Yesu kini  yambu Mbori nga Bako. (Rk. 3:21, 22; Yo. 14:28) Fuo gure, ani sana gu boro re nga: “Ka mo aida ka yugopai fere nga aboro ue kina sa, gini ngbatunga kpiapai nga ga aborokporo rengbe mo ka mangasunge na ni ka ruga gipai re bangire?” Ni ima rengba ka ya gu kpiapai nga ga abi. Ka ni pehe wo, ani ya funi gu kpiapai re ima ru. Ani rengbe ka sana ni tie nga: “Ka si du nga ani na mo ye na gi kpiapai re, ya mo si arunga ani ya Yesu nangia Bakere Bayugupai aima rengba ka mangasunge na kpiapai wa gere te? Ono kuba gure, ko aya Mbori nga Bako. Si du Yesu ayugu gupai nga Mbori nga kuru boro tiko na ko na pagbia kisusi ko.”

14. Gini kpiapai nayugo ho nga si arunga fu Mbori ko mbu Bakitingbanga ko nizo aboro te?

¹⁴ Ani bingo gu kura kpiapai. Kura aboro idi kuti gupai nga Satana “du ba” zo aboro yo. Kpiapai ima rengba ka undo vungugude nibi wai si arunga ti ni fu Mbori ko moi Satana ba zo aboro yo ya. Ani rengbe ka pepai wa gere: “Ani ya wiro samungu ki tona manga gbegberẽ apai. Ginipai ka mo mangihe?” Si nawira gu vungugude re nika ya ni rugu wirini aruga. Ni ima rengba ka asada na omeni dunduko tipa gu gude re mbu gbegberẽ apai. (Snz. 22:15) Ani ima rengba ka sana ni tipa gupai ka nimangihe ka si du nga gu gude re aidanga ka giapai te. Dungu avunguagude ka pe gupai nga i fu mbusa afu furu. Ani ima rengba ka sana ni tie nga, “Na ka mo bi gupai nga gbegberẽ boro kinaho sa gupai nga wiro samungu?” Nirengo gu vungugude re ima rengba ka zinga kuti gu boro re. Awere tie, “Ka mo ini gupai nga gbegberẽ boro du nagbarasa ri wiro yo, ya mo mo rengbe ka sana ni nifu mbusa fu wiro?” Karagapai du nga oó. Si tie ziazia nga, Mbori arengbanga ka mangasunge na Satana ko nimbusi agu aboro kina ko agbarasa riyo yo te!

15, 16. (a) Ya mo aboro dunduko nika ida na gu wene pangbanga nga ga Kindo? (b) Ya mo si naida ani du na kparakpara inohe tipa ka yugopai wenengai? Oni sakingo rogoho.

¹⁵ Anga agu aboro dunduko ani atungusapai fuyo nika diaha kugume te. (Mt. 10:11-14) Kina rengo du ngaha nga ka ani vura mangasunge na wene asanahe, wene sakarogopai yo, na wene akpiapai, i dunduko nika giaha te. Nirengo, zavura gu bawene Bayugupai nangia Yesu, kina bete aboro nadegetuyo fuko.—Yo. 6:66; 7:45-48.

¹⁶ Ono tipa rani ti gaani, ka ani vura bihe nga ani na inohe te, ani ima rengba kadu na diabese rogo gaani tungusapai yo. (Oni gedi Amokedi 4:13.) Fugo Mbori nangarasa rani nga “agu yo i naima ringbisa yo sa nyenye unga” nika idapa wene pangbanga aida. (Amo. 13:48) Si naida ani du na wene bipai tipa tirani kodihe na agu aboro ani atungusa gu wene pangbanga nga ga Kindo fuyo. Ani dinga gu rabahe adia kugume Yekova afuhe furani, na kidu na kido nga si nika undo rani na agu aboro ani atungusapai fuyo. (1 Tim. 4:16) Yekova ima rengba ka undo rani ani ‘karagapai fu akuarani’ wenengai. A wa ani ka bihe fuo gere, gu kurapai rengbe ani ka du na diabese gene tungusapai nga ka mangapai fu akuarani kina wai ani aida i mangihe furani.