1. Wetin kin apin we wi trit pipul dɛn fayn we wi de prich? Gi wan ɛgzampul. (Luk di pikchɔ nia dis atikul in taytul.)

WAN tɛm, wan brɔda ɛn in wɛf bin de prich na wan kɔntri we dɛn kɔl Fiji. Dɛn bin de invayt pipul dɛn fɔ kam di Mɛmorial fɔ mɛmba Krays in day. As dɛn bin de tɔk to wan uman na do, ren bigin fɔ kam. Di brɔda gi di uman wan ɔmbrɛla, ɛn in ɛn in wɛf bin yuz di ɔda ɔmbrɛla. Di brɔda ɛn in wɛf bin gladi we dɛn si dis uman we dɛn bin tɔk to, kam di Mɛmorial. Di uman bin tɔk se i nɔ mɛmba ɔl wetin dɛn bin tɛl am di tɛm we dɛn bin go to am. Bɔt i bin so lɛk di we aw dɛn bin trit am dat, i mekɔp in maynd se i jɔs gɛt fɔ go di Mɛmorial. Dis brɔda ɛn in wɛf bin fala di advays we Jizɔs bin gi bɔt aw fɔ trit ɔda pipul dɛn fayn.

2. Wetin i min fɔ trit ɔda pipul dɛn fayn? Aw wi go fala Jizɔs in advays?

² Wetin i min fɔ trit ɔda pipul dɛn fayn? Jizɔs bin gi wi di ansa. I bin se: “Dɛn tin we una want mek ɔda pipul du to una, nain una fɔ du to dɛn.” (Mat. 7:12) Aw wi go ebul fɔ fala dis advays? Na we wi du tu tin. Fɔs, wi fɔ aks wisɛf dis kwɛstyɔn, ‘If mi na bin di ɔda pɔsin, aw a go want mek dɛn trit mi?’ Sɛkɔn, wi fɔ tray tranga wan fɔ trit di pɔsin di sem we.—1 Kɔr. 10:24.

3, 4. (a) Ɛksplen wetin mek nɔto wi brɔda ɛn sista dɛn nɔmɔ na di kɔngrigeshɔn wi fɔ trit fayn. (b) Wetin wi go tɔk bɔt insay dis atikul?

 ³ Bɔku tɛm, wi kin trit wi brɔda ɛn sista dɛn fayn. Bɔt Jizɔs nɔ bin se na wi brɔda ɛn sista dɛn nɔmɔ na di kɔngrigeshɔn wi fɔ trit fayn. We Jizɔs bin de tɔk se wi fɔ trit ɔda pipul dɛn fayn, i bin de tɔk se wi fɔ trit ɔlman fayn, ivin wi ɛnimi dɛn. (Rid Lyuk 6:27, 28, 31, 35.) If Jizɔs bin se wi fɔ trit wi ɛnimi dɛn fayn, yu nɔ tink se wi fɔ du am mɔ to di pipul dɛn we wi de prich to? Wetin mek wi se so? Na bikɔs plɛnti pipul dɛn de we rili want fɔ du wetin Gɔd want ɛn gɛt layf we go de sote go!—Akt 13:48, NW.

⁴ Wi de kam tɔk naw bɔt 4 kwɛstyɔn dɛn we wi fɔ mɛmba we wi de prich: Udat na di pipul dɛn we wi de prich to? Usay wi de prich to dɛn? Ustɛm na di bɛst tɛm fɔ go prich to dɛn? Ɛn wetin wi fɔ du fɔs we wi go prich to dɛn? Dɛn kwɛstyɔn ya go ɛp wi fɔ ɔndastand aw pipul dɛn go want fɔ lɛ wi trit dɛn we wi de prich. Ɛn dɛn go ɛp wi bak fɔ no di bɛst we aw fɔ tɔk to ɔlman.—1 Kɔr. 9:19-23.

5. Us kwɛstyɔn dɛn wi fɔ aks wisɛf?

⁵ We wi de prich, wi kin tɔk to difrɛn pipul dɛn. Ɔlman mɛn difrɛn we ɛn gɛt in yon prɔblɛm dɛn. (2 Kro. 6:29) We yu de prich to sɔmbɔdi, aks yusɛf dis kwɛstyɔn: ‘If na mi na bin dis pɔsin, aw a go want mek i si mi? A go want mek i jɔj mi ɔ tek mi aw a nɔ de ivin bifo i no mi? Ɔ a go want lɛ i kam fɔ no udat a rili bi?’ We wi de tink bɔt dɛn kwɛstyɔn ya, dat go ɛp wi fɔ trit ɔlman di we aw dɛn go want mek wi trit dɛn.

6, 7. Wetin wi go du if sɔmbɔdi vɛks pan wi ɔ biev rud we to wi we wi go prich to am?

⁶ Nɔbɔdi nɔ go want mek dɛn tink bad bɔt am. Fɔ ɛgzampul: Wi we na Kristian, kin tray tranga wan fɔ ‘tɛl pipul dɛn tin dɛn we go mek dɛn gladi fɔ yɛri wetin wi de tɔk.’ (Kɔl. 4:6) Bɔt bikɔs wi nɔ pafɛkt, wi kin se sɔntin we kin mek leta wi rigrɛt. (Jems 3:2) If wi nɔ tɔk fayn to sɔmbɔdi bikɔs wi gɛt sɔntin we de mɔna wi, wi nɔ go want mek di pɔsin si wi lɛk se wi “rud” ɔ “wi nɔ kia bɔt aw i de fil.” Ɛn wi nɔ go want mek i fil se na so wi tan; wi go want mek i ɔndastand wi. Yu nɔ tink se na di sem tin wisɛf fɔ du to ɔda pipul dɛn?

⁷ If sɔmbɔdi vɛks pan yu ɔ biev rud we to yu bikɔs yu go prich to am, yu nɔ tink se i go fayn mek yu tray fɔ ɔndastand wetin mek i biev da we de? Fɔ se i gɛt sɔntin we de mɔna am na in wokples ɔ na skul? Ɔ yu tink se i gɛt siriɔs sik we de mɔna am? Bɔku tɛm, pipul dɛn we bin vɛks we Jiova Witnɛs dɛn go prich to dɛn fɔ di fɔs tɛm, dɔn gri fɔ lisin to di Witnɛs dɛn leta bikɔs dɛn bin trit dɛn wit rɛspɛkt ɛn dɛn nɔ bin vɛks pan dɛn.—Prɔv. 15:1; 1 Pit. 3:15, 16a.

8. Wetin mek wi fɔ tray fɔ prich di gud nyus to ɔlkayn pipul dɛn?

⁸ Wi kin prich to ɔlkayn pipul dɛn. Dɛn biɛn tɛm ya, dɛn dɔn rayt pas 60 stori dɛn bɔt pipul dɛn layf, insay wan atikul we kin kam insay Di Wachtawa. Dɛn kɔl dɛn atikul ya “The Bible Changes Lives.” Sɔm pan di pipul dɛn we dɛn rayt bɔt insay dɛn atikul ya na bin tifman dɛn, sɔm bin de drink te dɛn chak, sɔm bin de na grup dɛn we jɔs de fɔ du bad tin, ɛn sɔm bin de tek drɔgs. Ɔda wan dɛn na bin pɔlitishian dɛn, sɔm na bin edman dɛn na di rilijɔn usay dɛn bin de, ɛn sɔm  bin jɔs bisin bɔt di wok we dɛn bin de du. Ɛn sɔm dɛn bin de liv fri layf. Bɔt pan ɔl dat, dɛn ɔl bin yɛri di gud nyus, gri fɔ stɔdi di Baybul, chenj di we aw dɛn bin de liv dɛn layf, ɛn kam fɔ wɔship Jiova. So wi nɔ fɔ ɛva fil se sɔm pipul dɛn nɔ go lisin to di gud nyus bɔt Gɔd in Kiŋdɔm. (Rid Fɔs Lɛta Fɔ Kɔrint 6:9-11.) Bifo dat, wi fɔ no se ɔlkayn pipul dɛn kin lisin to di gud nyus.—1 Kɔr. 9:22, NW.

9. Wetin mek wi fɔ sho rɛspɛkt fɔ ɔda pipul dɛn os?

⁹ Usay wi kin mit pipul dɛn we wi de prich? Bɔku tɛm, wi kin mit dɛn na dɛn os. (Mat. 10:11-13) Wi os impɔtant to wi, so wi kin lɛk we ɔda pipul dɛn de rɛspɛkt wi os ɛn wi prɔpati dɛn. Wi want mek wi os bi say we sef ɛn nɔto ɔlman fɔ no wetin wi de du de. Na di sem we wi fɔ rɛspɛkt ɔda pipul dɛn os ɛn prɔpati. So we wi de prich frɔm os to os, i go fayn lɛ wi de tink bɔt aw wi go rɛspɛkt pipul dɛn os.—Akt 5:42.

10. Aw wi go mek pipul dɛn nɔ vɛks pan wi we wi de prich?

¹⁰ Tide, di wɔl dɔn bad, so bɔku pipul dɛn kin fred we dɛn si trenja. (2 Tim. 3:1-5) So wi nɔ fɔ du ɛnitin we go mek pipul dɛn fred mɔ. Fɔ ɛgzampul, lɛ wi se wi go na wan os ɛn kɔnk na di frɔnt domɔt, bɔt nɔbɔdi nɔ ansa, yu go want fɔ pip na di winda ɔ waka rawnd di kɔmpawnd fɔ luk fɔ di pɔsin. Na di eria usay yu de, yu tink se dis kayn tin go mek di pɔsin we de na di os, vɛks? Wetin di pɔsin in neba dɛn go tink? Na tru se, wi want fɔ prich to ɔlman. (Akt 10:42) Ɛn wi want fɔ ɛp pipul dɛn fɔ lan di tru bɔt Gɔd. (Rom 1:14, 15) Bɔt wi nɔ want fɔ du ɛnitin we go mek pipul dɛn vɛks pan wi we wi de du di prichin wok. Di apɔsul Pɔl bin se: “Wɛn wi de du ɛnitin, wi nɔ de ambɔg ɛnibɔdi, so dat nɔbɔdi nɔ go blem wi fɔ di wok we wi de du.” (2 Kɔr. 6:3) We wi de sho se wi rɛspɛkt pipul dɛn os ɛn prɔpati we wi de prich, dat kin mek sɔm pipul dɛn kam fɔ wɔship Jiova.—Rid Pita In Fɔs Lɛta 2:12.

11. Wetin mek wi kin lɛk we ɔda pipul dɛn kin rɛspɛkt wi tɛm?

¹¹ Bɔku pan wi, gɛt plɛnti tin we wi de du; wi nɔ gɛt bɛtɛ tɛm. Fɔ lɛ wi ebul fɔ du ɔl wetin wi gɛt fɔ du, wi fɔ sidɔm ɛn tek tɛm plan aw wi fɔ yuz wi tɛm. (Ɛfi. 5:16; Fil. 1:10) If sɔntin ambɔg di tin we wi dɔn plan fɔ du, wi kin fil bad. So wi kin lɛk we ɔda pipul dɛn kin rɛspɛkt wi tɛm ɛn ɔndastand se wi nɔ gɛt bɛtɛ tɛm fɔ spɛn wit dɛn. Jizɔs bin se wi fɔ trit pipul dɛn di we aw wi want mek dɛn trit wi. So aw dis advays we Jizɔs gi wi go ɛp wi fɔ rɛspɛkt di wan dɛn we wi de prich to?

12. Aw wi go ebul fɔ no di bɛst tɛm fɔ go prich to pipul dɛn?

¹² Wi fɔ tray fɔ no di bɛst tɛm we wi fɔ go prich to pipul dɛn. Fɔ ɛp wi fɔ no di bɛst tɛm, lɛ wi aks wisɛf dɛn kwɛstyɔn ya, ‘Na di eria we wi de prich, ustɛm pipul dɛn kin de na os mɔ? Ustɛm mɔ dɛn kin gɛt tɛm fɔ lisin to wi?’ I go fayn lɛ wi arenj wi tɛm so dat wi go ebul tɔk to dɛn, dɛn tɛm ya. Na sɔm pat dɛn na di wɔl, wi kin mit mɔ pipul dɛn we rɛdi fɔ lisin to wi we wi de prich frɔm os to os aftanun ɔ ivintɛm. If na so i de bi na di eria usay yu de prich, yu nɔ tink se i go fayn mek yu prich frɔm os to os dɛn tɛm dɛn de? (Rid Fɔs Lɛta Fɔ Kɔrint 10:24.) Wi shɔ se Jiova go blɛs ɛnitin we wi du fɔ lɛ wi ebul fɔ prich di tɛm we pipul dɛn go ebul fɔ lisin to wi.

13. Aw wi go sho se wi rɛspɛkt di pɔsin we wi go prich to?

 ¹³ Us ɔda we wi go sho se wi rɛspɛkt di pɔsin we wi go prich to? We wi mit pɔsin we gladi fɔ lisin to wi, wi fɔ prich gud wan to am, bɔt wi nɔ fɔ te de pasmak. Sɔntɛm di pɔsin go dɔn plan fɔ du sɔntin we in tink se impɔtant to am. If i se i bizi, wi kin tɛl am se wi nɔ go te, ɛn wi fɔ mek shɔ se wi nɔ te. (Mat. 5:37) We wi dɔn fɔ tɔk to di pɔsin, i go fayn mek wi aks am ustɛm na di bɛst tɛm we i go want fɔ mek wi kam bak to am. Sɔm pɔblisha dɛn dɔn si se i kin fayn fɔ tɔk se: “A go gladi fɔ kam bak to yu. Yu go want mek a kɔl ɔ sɛn mɛsej to yu bifo a kam?” We wi tray fɔ rɛspɛkt pipul dɛn tɛm ɛn no se dɛn gɛt ɔda tin dɛn fɔ du, wi de falamakata Pɔl. Pɔl ‘nɔ bin de tray fɔ gen ɛnitin fɔ insɛf, i bin de wok fɔ ɛp mek plɛnti pipul sev.’—1 Kɔr. 10:33.

14-16. (a) We wi go prich to pipul dɛn, wetin mek wi fɔ tɛl dɛn klia wan di rizin we mek wi go to dɛn? Gi ɛgzampul. (b) Us fayn we wan travlin ovasia kin yuz fɔ bigin prich to pipul dɛn?

¹⁴ Lɛ wi se sɔmbɔdi kɔl yu na yu fon, bɔt yu nɔ no udat de tɔk. Dɔn di pɔsin aks yu uskayn it dɛn yu kin lɛk fɔ it. Yu go bigin de tink, Udat na dis pɔsin ɛn wetin i rili want. Bɔt bikɔs yu nɔ go want fɔ biev bad to di pɔsin, yu go tɔk to am smɔl, ɛn mek lɛ i no se yu nɔ want fɔ kɔntinyu wit di tɔk. Bɔt lɛ wi se dis sem pɔsin we kɔl yu, sho yu udat i bi, ɛn i tɛl yu se in na pɔsin we de fɔ ɛp pipul dɛn fɔ no uskayn  it dɛn fayn fɔ it. I tɛl yu bak se i want fɔ ɛp yu. Yu go want fɔ lisin to di pɔsin, nɔto so? Semweso, wi kin lɛk we pipul dɛn de tɛl wi udat dɛn bi we dɛn de tɔk to wi. Aw wisɛf go du dis sem tin we wi de prich to pipul dɛn?

¹⁵ We wi go prich to pipul dɛn, wi fɔ tɛl dɛn fɔs klia wan di rizin we mek wi go to dɛn. Na tru se, wi gɛt impɔtant tin fɔ tɛl di pɔsin we wi go prich to, bɔt lɛ wi se wi nɔ sho am udat wi bi ɛn jɔs bigin fɔ aks am se: “If yu gɛt di pawa fɔ sɔlv ɛni prɔblɛm na di wɔl, us prɔblɛm yu go want fɔ sɔlv?” Di rizin we mek wi aks dis kwɛstyɔn na bikɔs wi want fɔ no wetin di pɔsin tink ɛn sho am wetin di Baybul se. Bɔt di pɔsin go de wɔnda: ‘Udat na dis pɔsin? Wetin mek i de aks mi dis kwɛstyɔn? Wetin mek i kam to mi?’ So wi fɔ tray fɔ mek di pɔsin we wi go prich to, nɔ bigin wɔnda udat wi bi. (Fil. 2:3, 4) Aw wi go du dat?

¹⁶ Wan travlin ovasia dɔn fɛn wan fayn we fɔ du dis. Afta i dɔn grit di pɔsin we i go prich to, i kin sho am in nem ɛn gi am di trakt we dɛn kɔl Yu Go Lɛk fɔ No di Tru? Di brɔda kin se: “Wi de gi dis trakt to ɔlman na di eria tide. I de tɔk bɔt siks kwɛstyɔn dɛn we bɔku pipul dɛn kin aks. Dis na yu yon.” Di brɔda se bɔku pipul dɛn kin gladi fɔ lisin to am we dɛn no wetin mek i go to dɛn, ɛn dis kin mek i izi fɔ kɔntinyu fɔ tɔk to dɛn. Di travlin ovasia kin aks di pɔsin se: “Yu dɔn ɛva tink bɔt ɛni wan pan dɛn kwɛstyɔn ya?” If di pɔsin pik wan pan di kwɛstyɔn dɛn, di brɔda kin opin di trakt ɛn sho am aw di Baybul ansa da kwɛstyɔn de. Bɔt if di pɔsin nɔ pik ɛniwan pan di kwɛstyɔn dɛn, di brɔda kin pik wan kwɛstyɔn ɛn tɔk bɔt am. I kin du dis fɔ mek di pɔsin nɔ shem. Wi no se bɔku we dɛn de fɔ bigin fɔ tɔk to pɔsin. Na sɔm say dɛn we wi de prich, pipul dɛn kin want mek wi grit dɛn fayn fayn wan, aks dɛn aw dɛn de du, ɛn du ɔda tin dɛn bifo wi tɛl dɛn wetin mek wi go to dɛn. So wi fɔ tray fɔ du dɛn kayn tin ya bifo wi bigin prich to dɛn.

17. Frɔm wetin wi dɔn lan na dis atikul, wetin na sɔm we dɛn we wi go trit pipul dɛn fayn we wi go prich?

¹⁷ Aw wi go trit pipul dɛn fayn we wi de prich? Wi fɔ mɛmba se ɔlman difrɛn, so wi fɔ rɛspɛkt dɛn ɛn trit dɛn di we aw dɛn go want mek wi trit dɛn. Wi fɔ sho rɛspɛkt fɔ di pɔsin in os ɛn ɔda prɔpati dɛn. Wi fɔ tray fɔ prich to pipul dɛn di tɛm we dɛn go de na dɛn os ɛn di tɛm we dɛn go rɛdi fɔ lisin to wi. Ɛn wi fɔ bigin tɔk to dɛn di we we go mek dɛn want fɔ lisin to wi.

18. Us bɛnifit dɛn wi go gɛt we wi trit pipul dɛn fayn we wi de prich?

¹⁸ Wi go gɛt bɔku bɛnifit we wi trit di pipul dɛn we wi de prich to, di we aw wi go want mek dɛn trit wi. We wi biev fayn to pipul dɛn ɛn sho se wi kia bɔt dɛn, dat de sho se wi de du wetin wi de lan na di Baybul, ɛn dis go mek dɛn prez wi Papa we de na ɛvin ɛn tɔk se i wɔndaful. (Mat. 5:16) Wi kin mek bɔku pipul dɛn kam fɔ wɔship Jiova bay di we aw wi tɔk to dɛn. (1 Tim. 4:16) I nɔ mata if di wan dɛn we wi de prich to, lisin to wi ɔ nɔ lisin. Wi go stil gladi fɔ no se wi dɔn du wi bɛst fɔ ɛp dɛn. (2 Tim. 4:5) I go fayn fɔ lɛ wi ɔl falamakata di apɔsul Pɔl we rayt se: “Ɔl dɛn tin ya we a de du na fɔ mek di Gud Nyuz go prɛd ɔlɔbɔt.” (1 Kɔr. 9:23) So lɛ wi trit pipul dɛn fayn ɔltɛm we wi de prich.