1. ¿Tuku xlakata xlakaskinka la kalikatsiniyaw latamanin akxni lichuwinanaw Dios? Kawili akgtum liʼakxilhtit (kaʼakxilhti xapulana dibujo).

NINA lhuwa kata, anta kʼFiyi, akgtum tamakgaxtokgat xmakgpitsimakgo invitación xlakata akxni lakapastakkan akxni tinilh Cristo. Akxni xtachuwinamakgo chatum puskat, tsukulh senan. Tala maxkilh puskat akgtum paraguas chu uma tala chu xpuskat akxtum kasnankgolh. Alistalh, uma puskat kilalh akxni lakapastakkan akxni tinilh Cristo. ¡Tamakgaxtokgat lu lipaxuwakgolh! Puskat wa pi nialh xlakapastaka tuku xTatayananin Jehová xwanikgonit, pero lu kaks lilakawa la xlikatsinikgonit, wa xlakata nila xlakgmakgan uma invitación. ¿Tuku xtlawakgonit umakgo natalan? Makgantaxtikgolh tuku litalakgapasa Regla de Oro.

2. 1) ¿Tuku wamputun Regla de Oro? 2) ¿La tlan namakgantaxtiyaw Regla de Oro?

² ¿Tuku wamputun Regla de Oro? Wa tastakyaw nema mastalh Jesús: «Xlipaks nkatuwa wa ntu xlakaskintit nakatlawanikgoyan nchixkuwin, nachuna wixin natlawanikgoyatit» (Mat. 7:12). ¿La tlan namakgantaxtiyaw uma limapakgsin? Pulaktiy tuku tlan natlawayaw. Pulana kakinkakgalhskinkan: «Komo akit xakwa, uma puskat o uma chixku, ¿la xaklakaskilh xkilikatsinika?».  Xlipulaktiy, wa natlawayaw tuku namakgapaxuwa kintalatamankan (1 Cor. 10:24).

3, 4. 1) ¿Tuku xlakata ni kajwatiya tlan nakalikatsiniyaw kinatalankan? 2) ¿Tuku naʼakxilhaw kʼuma artículo?

³ Makglhuwa makgantaxtiyaw uma Regla de Oro xlakata la katalalinaw kinatalankan. Pero Jesús ni wa pi kajwatiya kinatalankan chuna nakalikatsiniyaw. Akxni masiyalh uma limapakgsin, xlichuwinama la nakalikatsiniyaw putum latamanin chu kintalamakgasitsinkan (kalikgalhtawakga Lucas 6:27, 28, 31, 35). Xlakata kilimakgantaxtitkan uma limapakgsin pi tlan nakalikatsiniyaw kintalamakgasitsinkan, liwaka akxni lichuwinanaw Dios, tlan nakalikatsiniyaw tiku katachuwinanaw, xlakata umakgo max «[na]makglhtinamputunkgo latamat nema ni kgalhi xlisputni» (Hech. 13:48).

⁴ Kaʼakxilhwi pulaktati tuku kililakapastakatkan akxni lichuwinanaw Dios: 1) tiku nakkatachuwinan, 2) niku nakkatachuwinan, 3) tukuya hora tlakg tlan nakkatachuwinan chu 4) la nakmatsuki takgalhchuwin. Akxni lakapastakaw uma, nakinkamakgtayayan kuenta natlawayaw tuku makgkatsikgo latamanin (1 Cor. 9:19-23).

5. ¿Tukuya takgalhskinin tlan akstu nakinkatlawanikanan akxni tachuwinanaw chatum lataman?

⁵ Akxni lichuwinanaw Dios, tanu tanu tiku katekgsaw, chatunu chatunu kgalhi xtaʼakglhuwit chu tuku titaxtuma (2 Crón. 6:29). Akxni wi tiku nalitachuwinamputuna xalakwan xalaksasti, kakgalhskinka: «Komo akit xakwa, ¿xaklakgatilh pi kajwatiya la chatum talakatsu xkiliʼakxilhka? ¿O xaklakgatilh pi tlakg xkilakgapaska?». Akxni akstu kinkatlawanikanan uma takgalhskinin, kinkamalakapastakayan pi latamanin ni lakxtum.

6, 7. ¿Tuku natlawayaw komo wi tiku nitlan nakinkalikatsiniyaw akxni lichuwinamaw Dios?

⁶ Nitlan lakapala nalakpuwanaw pi nitlan likatsi o nawanaw pi «lixkajni likatsi». Xlakata akinin, maski lu liskujaw namakgantaxtiyaw limapakgsin xalak Biblia niku wan pi «[k]intachuwinkan putum kilhtamaku tlan katakgaxmatli», xlakata makglakgalhinanin akinin, min kilhtamaku wanaw tuku alistalh nitlan limakgkatsiyaw (Col. 4:6; Sant. 3:2). Komo wi tiku nitlan xkgalhtiw xlakata max nitlan kinkakitaxtunin uma kilhtamaku, nitlan xlimakgkatsiw pi xkinkalilakgapasni la chatum «tiku xasitsin» o «tiku lixkajni likatsi», ¿ni xlikana? Xlakaskiw pi xkinkaʼakgatekgsnin. Wa xlakata na chuna kilikatsinitkan amakgapitsin.

⁷ Komo natekgsaw tiku nitlan nakinkalikatsiniyan akxni lichuwinamaw Dios, ni lakapala kalakpuwaw pi nitlan likatsi (Rom. 12:15). Max wi tuku tuwa titaxtuma kxtaskujut o kʼescuela, o max kgalhi akgtum xasnun tajatat. Lhuwa latamanin tiku xapulana ksitsikgo, alistalh lakgpalikgo xtapuwankan akxni kskujnin Jehová tlan kalikatsinikgo chu kamaxkikgo kakni (Prov. 15:1; 1 Ped. 3:15).

8. ¿Tuku xlakata nakalitachuwinanaw tamakatsin xla Tamapakgsin «kaxati kawaj xtiwaj» latamanin?

⁸ Kintamakatsinkan kalakgchan kaxatikawa latamanin. Kata nema aku titaxtukgolh, serie nema wanikan «Biblia kalakgpalinilh xlatamatkan» xla revista Makatsinina, taxtunit liwaka tutumpuxam biografías. Makgapitsi tiku talichuwinan xkgalhanankgo, xkgotkgo, xlakatsalakgo limapakgsin o max xlimaklakaskinkgo drogas. Amakgapitsi lu xlakgatikgo política, xpulalinkgo takanajla o wi tiku kajwatiya xlakapastaka nakgalhi xatalhman takgalhtawakga. Wi tiku xtlawa talakgxtumit xalimaxana. Pero, putum umakgolh, kgaxmatkgolh xalakwan xalaksasti tamakatsin, chu tsukukgolh katsinikgo tuku wan Biblia, lakgpalikgolh xlatamatkan chu xTatayananin Jehová wankgolh. Wa xlakata ni kalakpuwaw pi wi tiku nikxni katikgaxmatli tamakatsin xla Tamapakgsin (kalikgalhtawakga  1 Corintios 6:9-11). Wata kalakapastakwi pi uma tamakatsinin tlan nachan xnakujkan «kaxati kawaj xtiwaj» latamanin (1 Cor. 9:22).

9. ¿Tuku xlakata kililakgachixkuwilitkan xchikkan latamanin?

⁹ ¿Niku katachuwinanaw latamanin akxni lichuwinanaw Dios? Kxchikkan (Mat. 10:11-13). Kalakpuwaw uma: putum akinin paxtikatsiniyaw pi amakgapitsin nalakgachixkuwilikgo tuku kinkatapakgsiniyan. Xlakata xlakaskinka kimpalakatakan. Lakaskinaw pi kinchikkan kalitaxtulh niku natamakgtayayaw chu niku ni nakinkaʼakxilhkgoyan latamanin. Nachuna kxchikkan kintalatamankan talakaskin pi nalakgachixkuwiliyaw. ¿Chuna tlawamaw? (Hech. 5:42.)

10. ¿Tuku kuenta kilitlawatkan xlakata ni nakamakgasitsiyaw tiku kalitachuwinanaw Dios niku lamaw?

¹⁰ Kakilhtamaku xala uku, niku chali chali lakatsalakan limapakgsin, latamanin lakpuwankgo pi nitlan likatsikgo tiku ni kalakgapaskgo (2 Tim. 3:1-5). Ni natlawayaw wantuku natlawa pi latamanin nitlan nakinkaʼakxilhkgoyan. Akgtum liʼakxilhtit, kalilakpuwaw pi talakatsuwiyaw kʼakgtum chiki chu lakgatlakgaw malakcha. Komo niti nakinkakgalhtiyan max natalakanuputunaw kʼventana o natlawanaw kxkilhtin chiki xlakata naputsayaw tiku kxchik. Niku wix lichuwinana Dios, ¿nalisitsikgo tiku anta wilakgo? ¿Tuku nalakpuwankgo tiku naʼakxilhkgoyan? Xlikana pi talakaskin liwana nakaputsayaw latamanin akxni lichuwinanaw Dios (Hech. 10:42). Tamakatsinin nema linaw matliwakglhnan, chu lu lakaskinaw pi latamanin kakatsikgolh, lu tlan tuku tlawaputunaw (Rom. 1:14, 15). Pero talakaskin kuenta natlawayaw chu ni natlawayaw tuku nalisitsikgo latamanin. Apóstol Pablo tsokgli: «Ni xati nakmaxkiyaw nkilhtamaku naliʼakgchakgxkgoy, lakimpi ti ni naliʼakgsan nkintaskujutkan» (2 Cor. 6:3). Komo nalakgachixkuwiliyaw xchikkan tiku kalitachuwinanaw Dios niku lamaw, uma max natlawa pi wi tiku nakatsiputun tuku xaxlikana (kalikgalhtawakga 1 Pedro 2:12).

11. ¿Tuku xlakata paxtikatsiniyaw pi amakgapitsi kalakgachixkuwilikgolh kinkilhtamakujkan?

¹¹ Lhuwa akinin, kgalhiyaw lhuwa taskujut. Xlakata namakgantaxtiyaw tuku kinkalakgayawakanitan, talakaskin naʼakxilhaw tuku tlakg xlakaskinka chu liwana nalakkaxwiliyaw kinkilhtamakujkan (Efes. 5:16; Filip. 1:10). Komo wi tiku nalaktlawa kintaskujutkan, max nitlan katilimakgkatsiw. Wa xlakata, paxtikatsiniyaw pi amakgapitsin kalakgachixkuwilikgolh kinkilhtamakujkan chu kaʼakgatekgskgolh pi nila lhuwa kilhtamaku nakatachuwinanaw. Chuna la lakaskinaw kakinkalikatsinikan, ¿la tlan nakalakgachixkuwiliyaw tiku kalitachuwinanaw Dios?

12. ¿La nakatsiyaw tukuya hora tlakg tlan nakalakgapaxialhnanaw latamanin?

¹² Kalakpuwaw tukuya kilhtamaku tlakg tlan nakalakgapaxialhnanaw latamanin. Niku lichuwinanaw Dios, ¿tukuya hora tlakg wilakgo kxchikkan? ¿Tukuya kilhtamaku tlakg nakgaxmatnikgoyan? Talakaskin nakaputsayaw akxni kgalhikgo kilhtamaku. Kmakgapitsi kachikinin, tlakg tlan kitaxtu lichuwinankan Dios kakgotanun. Komo nachuna niku lamaw, ¿tlan xʼaw lichuwinanaw Dios akgatunu chiki akxni kgotanunit? (Kalikgalhtawakga 1 Corintios 10:24.) Tlan nalipawanaw pi Jehová nasikulunatlawa tuku tlawayaw xlakata nalichuwinanaw Dios akxni latamanin kgalhikgo kilhtamaku.

13. ¿Tuku atanu tlan nalimasiyayaw pi kamaxkiyaw kakni latamanin?

¹³ ¿Tuku atanu tlan nalimasiyayaw pi  kamaxkiyaw kakni latamanin? Akxni tekgsaw tiku kinkakgaxmatniputunan, talakaskin pi lu tlan natachuwinanaw, pero ni namalakatsaliyaw kilhtamaku. Tiku tachuwinamaw max limaxtunit kilhtamaku xlakata natlawa atanu tuku xlakaskinka akxilha. Komo nakinkawaniyan pi wi tuku tlawama, tlan nawaniyaw pi ni lhuwa kilhtamaku katitachuwinaw... chu chuna kilitlawatkan (Mat. 5:37). Akxni natachuwinankgoyaw, tlan nakgalhskinaw tukuya kilhtamaku tlakg tlan nalakgamparayaw. Makgapitsi tiku lichuwinankgo Dios, tlan kakitaxtuninit akxni wankgo: «Kmimputumpara atanu kilhtamaku. ¿Tlakg tlan xwa pulana xakkilhminin o xakmakaminin akgtum mensaje?». Komo katachuwinanaw latamanin akxni kgalhikgo kilhtamaku stalaniyaw xliʼakxilhtit Pablo, tiku wa: «Ni wa kputsay wa ntu ntlan nakinkitaxtuniy, wampi wa lantla ntlan nakitaxtunikgoy lilhuwa, lakimpi naliakgaputaxtukgoy» (1 Cor. 10:33).

14-16. 1) ¿Tuku xlakata talakaskin tunkun nakawaniyaw latamanin tuku xlakata kalakgapaxialhnamaw? Kawili akgtum liʼakxilhtit. 2) ¿Tuku lu tlan kitaxtuninit chatum superintendente viajante?

¹⁴ Kalakpuwanti pi wi tiku tachuwinanan kteléfono pero ni katsiya tiku tachuwinaman. Ni lakgapasa, pero kgalhskinan tukuya liwat lakgatiya. Wix lakpuwampat tiku uma lataman, chu tuku lakaskin. Xlakata ni lixkajnit likatsiya max kaj tsinu natachuwinana. Pero atanu liʼakxilhtit, kalakpuwanti pi tiku tachuwinaman nawaniyan xtukuwani, chu nawaniyan pi liskuja xlakata nakawani latamanin tuku tlan nawakgo chu nawaniyan pi limin tuku tlan namakgtayayan. Max tlakg nakgaxmatniputuna, ¿ni xlikana?  Putum akinin paxtikatsiniyaw pi makgapitsin kakinkamaxkikgon kakni akxni kinkatachuwinankgoyan, pero na lakaskinaw pi liwana kakinkawanin xtukuwani. ¿Tlan chuna natlawayaw akxni lichuwinanaw Dios?

¹⁵ Kmakgapitsi kachikinin talakaskin pi tunkun nakawaniyaw tuku xlakata kalakgapaxialhnamaw. Xlikana pi kaliniyaw akgtum lu xlakaskinka tamakatsin nema ni katsikgo, pero kalakpuwanti pi ni nakawaniyaw kintukuwanikan chu tuku kalitachuwinamputunaw chu kaj lakapala nakakgalhskinaw: «Komo wix xkgalhi litliwekge xlakata xmapanu taʼakglhuwit xalak kakilhtamaku, ¿tuku xmapanu?». Katsiyaw pi uma takgalhskinin kinkamakgtayayan nakatsiyaw tuku lakpuwankgo latamanin chu alistalh nakamasiyaniyaw tuku wan Biblia. Pero tiku tachuwinamaw max nalakpuwan: «¿Tiku uma chixku chu tuku xlakata kintlawanima uma takgalhskinin? ¿Tuku lakaskin?». Wa xlakata, talakaskin nawaniyaw tiku akinin chu tuku xlakata lakgamaw (Filip. 2:3, 4). ¿La natlawayaw?

¹⁶ Chatum superintendente viajante lu tlan kitaxtuninit akxni pulana makgachipa, chu wani xtukuwani tiku tachuwinama, alistalh maxki tratado ¿Katsiputuna tuku xaxlikana?, chu wani: «La uku kkamaxkimaw uma kapsnat putum tiku kkatekgsmaw. Lichuwinan pulakchaxan takgalhskinin. Kmaxkiyan uma». (Kintalakan wan pi latamanin tlakg tlan makgkatsikgo akxni katsikgo tuku xlakata kalakgapaxialhnamaka, uma tlawa pi tlakg tlan katachuwinankan.) Kintalakan wanipara: «¿Minit kilhtamaku akstu tlawanikanita umakgolh takgalhskinin?». Komo tiku tachuwinama masiya pulaktum takgalhskinin, malakini tratado chu masiyani tuku wan Biblia xlakata uma. Pero komo ni chuna, kintalakan laksaka akgtum takgalhskinin chu tsuku litachuwinan. Xlikana, pulaklhuwa la tlan namatsukiyaw takgalhchuwin. Kmakgapitsi kachikinin talakaskin pulana natlawayaw tuku talismaninit akxni nina kawaniyaw tuku xlakata kalakgapaxialhnamaw. Tuku talakaskin wa pi nakalikatsiniyaw latamanin chuna la lakaskinaw kakinkalikatsinikan chu nakatachuwinanaw chuna la xlakan lakgatikgo.

17. Chuna la katsiw kʼuma artículo, ¿la tlan namakgantaxtiyaw Regla de Oro?

¹⁷ Xlakata tuku aku katsiw, ¿la tlan namakgantaxtiyaw Regla de Oro akxni lichuwinanaw Dios? Kalakapastakwi pi latamanin ni akxtum la lakapastaknankgo. Kalakgachixkuwiliw xchikkan chu tuku katapakgsini. Kaliskujwi nalichuwinanaw Dios akxni latamanin wilakgo kxchikkan chu akxni max nakinkakgaxmatniputunkgoyan. Chu nalakputsayaw la nakalitachuwinanaw Dios chuna la wi talismanin niku lamaw.

18. ¿Tuku xlakata nakalikatsiniyaw latamanin chuna la lakaskinaw nakinkalikatsinikanan?

¹⁸ Nakalikatsiniyaw latamanin chuna la lakaskinaw kakinkalikatsinikan lu tlan kitaxtu. Akxni tlan kalikatsiniyaw chu kamaxkiyaw kakni, tlawayaw pi kaxkgakganalh kixkgakganatkan, limasiyayaw pi makgantaxtiyaw tuku wan Biblia chu malankiyaw kinTlatkan xalak akgapun (Mat. 5:16). Akxni chuna katachuwinanaw, natlawa pi tlakg lhuwa latamanin nakatsiputunkgo xaxlikana (1 Tim. 4:16). Komo tiku nakatachuwinanaw nakgaxmatkgo tamakatsinin xla Tamapakgsin o ni nakgaxmatputunkgo, tlan limakgkatsiyaw xlakata katsiyaw pi makgantaxtimaw kintaskujutkan chuna la xlilat (2 Tim. 4:5). Katlawaw chuna la Pablo, tiku tsokgli: «Wa yuma nchuna klitlaway xpalakata xatlan tamakatsinin, lakimpi makxtum naktakgalhikgoy amakgapitsin» (1 Cor. 9:23). Wa xlakata, putum kilhtamaku kamakgantaxtiw tuku litalakgapasa Regla de Oro akxni lichuwinanaw Dios.