1. Importante ba kon paonan-o naton gintatratar an mga tawo ha ministeryo? Paghatag hin ehemplo. (Kitaa an retrato hini nga pahina.)

MGA pipira ka tuig na an naglabay, usa nga Kristiano nga mag-asawa ha Fiji an nananaltag hin imbitasyon para ha Memoryal han kamatayon ni Kristo. Tigda nga umuran samtang kaistorya nira an usa nga babaye ha gawas han balay hito. Iginpahuram han brother ha babaye an usa nga payong ngan sumuno hiya ha payong han iya asawa. An mag-asawa nalipay tungod kay tumambong an babaye ha Memoryal. Nagsiring ito nga gutiay gud la an iya nahinumdoman mahitungod han igin-istorya ha iya han mag-asawa nga Saksi. Kondi bumilib gud hiya ha paagi han pagtratar ha iya salit tumambong hiya ha Memoryal. Kay ano nga nagkaada hiya hin sugad hito nga maopay nga impresyon? Kay igin-aplikar han mag-asawa an gintatawag han kadam-an nga Bulawanon nga Surundon.

2. Ano an Bulawanon nga Surundon, ngan paonan-o naton ito maiaaplikar?

² Ano an Bulawanon nga Surundon? Ito an sagdon nga iginhatag ni Jesus han hiya nagsiring: “An ngatanan nga karuyag niyo buhaton ha iyo han mga tawo, buhata liwat niyo ha ira.” (Mat. 7:12) Paonan-o naton ito maiaaplikar? May duha nga paagi. Siyahan, sadang naton pakianhan an aton kalugaringon, ‘Ano an akon karuyag nga magin pagtratar ha akon ha iba?’ Katapos, himoa an ngatanan  basi trataron hira ha paagi nga karuyag mo.—1 Cor. 10:24.

3, 4. (a) Isaysay kon kay ano nga an Bulawanon nga Surundon diri la aplikado ha aton pakig-upod ha aton kabugtoan. (b) Ano an aton hihisgotan hini nga artikulo?

³ Agsob naton iaplikar an Bulawanon nga Surundon ha aton pakig-upod ha aton mga igkasi-tumuroo. Kondi hi Jesus waray magsiring nga sadang la naton ito buhaton ha aton kabugtoan. Ha pagkamatuod, iya gin-unabi an Bulawanon nga Surundon han naghisgot hiya kon paonan-o naton tatrataron an mga tawo pati na an aton mga kaaway. (Basaha an Lucas 6:27, 28, 31, 35.) Kon igin-aaplikar naton an Bulawanon nga Surundon bisan ha aton mga kaaway, mas labi na nga sadang naton iaplikar ito kon nagsasangyaw kita ha mga tawo—damu ha ira an bangin “may husto nga disposisyon basi magkaada kinabuhi nga waray kataposan”!—Buh. 13:48.

⁴ Hihisgotan naton yana an upat nga pakiana nga sadang naton hinumdoman kon nakikigbahin kita ha ministeryo: Hin-o an akon kaistorya? Diin ko hira ginkakaistorya? San-o an pinakamaopay nga oras ha pakiistorya ha ira? Paonan-o ko hira sadang kaistoryahon? Ini nga mga pakiana mabulig ha aton basi mahibaroan an mga pagbati han aton ginsasangyawan ngan maipahiuyon ha ira an aton paagi han pakiistorya.—1 Cor. 9:19-23.

5. Ano an mahimo naton ipakiana ha aton kalugaringon?

⁵ Ha ministeryo, nakakaistorya naton an mga indibiduwal nga may iba-iba nga kahimtang ngan mga problema. (2 Kron. 6:29) Salit kon ginsasangyawan mo an usa nga tawo han maopay nga sumat, pakianhi an imo kalugaringon: ‘Kon ako an aada ha iya kahimtang, ano an akon karuyag nga magin pagtratar niya ha akon? Malilipay ba ako nga hukman niya ako dayon bisan kon diri pa niya ako kilala? O mas karuyag ko nga kilalahon anay niya ako? Ini nga mga pakiana magpapahinumdom ha aton kon paonan-o tatrataron an tagsa nga tagbalay uyon ha iya kahimtang.

6, 7. Ano an sadang naton himoon kon an aton ginsasangyawan baga hin nasisina o bastos?

⁶ Waray bisan usa nga naruruyag nga makilala sugad nga “bastos nga tawo.” Pananglitan, sugad nga mga Kristiano, ginhihimo naton an ngatanan basi maiaplikar an sagdon ha Biblia nga ‘magin buotan pirme ha aton pagyakan.’ (Col. 4:6) Pero tungod kay diri kita hingpit, usahay may nayayakan kita nga ginbabasolan naton ha urhi. (San. 3:2) Kon nakayakan kita hin diri maopay ha iba, bangin tungod kay maraot an aton adlaw, diri gud naton karuyag nga magkaada hira impresyon nga “bastos” kita ngan “waray konsiderasyon.” Karuyag naton nga masabtan kita nira. Diri ba sadang magin sugad hito an aton pagtagad ha iba?

⁷ Kon an imo ginsasangyawan baga hin nasisina o bastos, diri ba mas maopay kon hibaroan mo anay kon kay ano nga sugad hiya hito? Posible ba nga may problema hiya ha trabaho o ha eskwelahan? May-ada ba hiya grabe nga sakit? Ha damu nga kahimtang, may mga tagbalay nga ha siyahan nasisina ha mga Saksi pero han gintratar hira hin may pagkabuotan ngan may pagtahod, kumarawat hira han mensahe.—Prob. 15:1; 1 Ped. 3:15.

8. Kay ano nga diri kita sadang mag-alang ha pagsangyaw han mensahe han Ginhadian ha “ngatanan nga klase hin tawo”?

⁸ Nagsasangyaw kita ha ngatanan nga klase hin tawo. Pananglitan, han naglabay nga pipira pa la ka tuig, sobra 60 nga eksperyensya an iginpublikar ha Barantayan ha serye nga “An Biblia Nakakagbag-o han Kinabuhi.” Naghisgot ito mahitungod han pipira nga tawo nga hadto anay mga kawatan, parahubog, membro han gang, o mga adik ha droga. An iba naman mga politiko, lider han relihiyon, o mga tawo nga nakapokus gud la ha ira propesyon. An pipira may imoral nga pagkinabuhi. Kondi hira ngatanan namati han maopay nga sumat, nagpa-Bible study, naghimo hin mga pagbag-o, ngan nagpabawtismo. Salit diri gud naton sadang hunahunaon nga an usa nga tawo diri na makarawat han  mensahe han Ginhadian. (Basaha an 1 Corinto 6:9-11.) Lugod, naglalaom kita nga an “ngatanan nga klase hin tawo” makarawat han maopay nga sumat.—1 Cor. 9:22.

9. Kay ano nga sadang naton irespeto an panimalay han iba?

⁹ Kasagaran nga ginsasangyawan naton an mga tawo ha ira balay. (Mat. 10:11-13) Gin-aapresyar naton kon ginrirespeto han iba an aton panimalay ngan mga panag-iya. Kay ha tinuod la importante gud ha aton an aton panimalay. Karuyag naton nga may-ada kita privacy ngan seguridad kon aada kita hito. Sadang naton ipakita an sugad nga respeto ha aton igkasi-tawo. Salit kon nagsasangyaw kita ha ira, sadang kita magin mahunahunaon kon paonan-o naton maipapakita an pagtahod ha ira panimalay.—Buh. 5: 42.

10. Paonan-o naton malilikyan nga masina an iba kon nagsasangyaw kita ha ira?

¹⁰ Hini nga kalibotan diin kalyap an krimen, damu nga tagbalay an nagsususpetsa ha mga estranghero. (2 Tim. 3:1-5) Salit diri kita sadang maghimo hin mga butang nga mahimo magin hinungdan nga magsuspetsa hira ha aton. Pananglitan, nagtuktok kita ha prente nga purtahan han balay. Kon waray nabaton bangin mahunahuna mo nga humiling ha bintana o maglakat-lakat ha palibot han balay basi bilngon an tagbalay. Ha iyo lugar, ito ba nga buhat mahimo makapasina ha tagbalay? Ano an posible hunahunaon han iya mga amyaw? Tinuod, diri naton karuyag nga may malikatan kita ha aton pagsangyaw. (Buh. 10:42) Karuyag gud naton nga isangyaw an makalilipay nga mensahe, ngan maopay an aton motibo. (Roma 1:14, 15) Bisan pa hito, maaramon kon lilikyan naton an pagbuhat hin mga butang nga makakapasina ha mga tawo ha aton teritoryo. Hi apostol Pablo nagsurat: “Diri gud kami naghihimo hin hinungdan nga makapakdol, basi waray makita nga sayop ha amon sagrado nga buruhaton.” (2 Cor. 6:3) Kon irirespeto naton an panimalay ngan mga panag-iya han mga tawo ha aton teritoryo, an aton paggawi mahimo makadani ha ira ha kamatuoran.—Basaha an 1 Pedro 2:12.

11. Kay ano nga gin-aapresyar naton kon ginrirespeto han iba an aton panahon?

¹¹ Sugad nga mga Kristiano, kadam-an ha aton an sagipo ha adlaw-adlaw nga mga buruhaton. Basi mahimo naton an aton mga obligasyon, kinahanglan magplano ngan maghimo kita hin maopay nga eskedyol. (Efe. 5:16; Fil. 1:10) Kon may makaulang ha aton eskedyol, bangin maaringit kita. Salit gin-aapresyar naton kon ginrirespeto han iba an aton panahon ngan nagpapakita hin pagin makatadunganon pinaagi ha diri pag-iniha ha pakiistorya ha aton. Paonan-o makakabulig ha aton an Bulawanon nga Surundon basi maipakita nga ginrirespeto naton an panahon han aton ginsasangyawan?

12. Paonan-o naton hibabaroan kon san-o an gimaopayi nga oras ha pagsangyaw ha mga tawo ha aton teritoryo?

¹² Sadang kita mangalimbasog nga hibaroan kon san-o an gimaopayi nga oras ha pakiistorya ha mga tawo. Ha aton teritoryo, san-o kasagaran nga aada ha balay an mga tawo? San-o hira posible nga andam mamati? Maopay kon i-a-adjust naton an aton eskedyol basi makaistorya hira hito nga panahon. Ha iba nga nasud, mas epektibo an pagsangyaw ha balay-balay kon nagtitikagab-i na. Kon praktikal ito ha iyo teritoryo, mahimo ba kamo mag-eskedyol pagsangyaw ha balay-balay durante hito nga mga oras? (Basaha an 1 Corinto 10:24.) Makakasiguro kita nga bibendisyonan ni Jehova an aton mga pangalimbasog nga makigbahin ha ministeryo ha mga oras nga makakaistorya gud naton an mga tawo ha aton teritoryo.

13. Paonan-o naton maipapakita nga ginrirespeto naton an tagbalay?

¹³ Ha ano pa nga paagi maipapakita naton nga ginrirespeto naton an tagbalay? Kon may makaistorya kita nga interesado, sadang naton hiya  sangyawan hin maopay kondi diri kita sadang mag-iniha. Bangin igin-gahin niya ito nga oras para ha buruhaton nga importante ha iya. Kon sumiring hiya nga okupado hiya, mahimo kita sumiring nga diri kita mag-iiha—ngan kinahanglan naton ito tumanon. (Mat. 5:37) Antes tapuson an pakiistorya, maopay kon pakianhan naton hiya kon san-o an iya kombinyente nga oras nga puydi hiya bisitahon utro. Naobserbaran han pipira nga magwarali nga epektibo an pagsiring: “Nalilipay ako nga bisitahon ka utro. Okey la ba kon tawagan ko anay ikaw o i-text antes ako kumanhi?” Kon iginpapahiuyon naton an aton eskedyol ha kon ano an kombinyente nga oras han mga tawo ha aton teritoryo, ginsusubad naton an ehemplo ni Pablo, nga ‘diri ginhuhunahuna an iya kalugaringon nga kaopayan kondi an kaopayan han damu, basi man hira matalwas.’—1 Cor. 10:33.

14-16. (a) Kay ano nga sadang naton isumat hin matin-aw ha tagbalay an katuyoan han aton pagbisita? Iilustrar. (b) Ano an usa nga paagi han pakiistorya nga napamatud-an nga epektibo han nagbibiyahe nga paramangno?

¹⁴ Pananglitan may tumawag ha aton nga diri naton kilala. Nagpakiana hiya kon ano an aton paborito nga mga pagkaon. Maghuhunahuna kita kon hin-o daw la ito nga tumawag ngan kon ano gud an iya tuyo. Tungod kay diri naton karuyag nga magin bastos, bangin makiistorya kita ha iya hin madaliay, kondi posible nga tapuson dayon naton ito nga pakiistorya. Ha luyo nga bahin, pananglitan an tumawag nagpakilala ha aton, nagsiring nga an iya trabaho may kalabotan ha nutrisyon, ngan may pagkabuotan nga nagsiring nga may-ada hiya igsusumat nga mga impormasyon nga makakabulig ha aton. Posible  nga mamamati kita ha iya. Ha pagkamatuod, gin-aapresyar naton kon iginsusumat dayon han usa an iya tuyo ha mataktika nga paagi. Paonan-o naton maipapakita an pariho nga pagrespeto ha aton mga nakakaistorya ha ministeryo?

¹⁵ Ha damu nga teritoryo, kinahanglan isumat naton hin matin-aw ha tagbalay an katuyoan han aton pagbisita. Tinuod, may mapulsanon kita nga impormasyon nga diri hinbabaroan han tagbalay, kondi pananglitan diri kita magpakilala ha iya ngan tigda na la kita nga magpakiana hin sugad hini: “Kon may-ada ka gahum basi sulbaron an bisan ano nga problema ha kalibotan, ano an imo susulbaron?” Nagpapakiana kita hito tungod kay karuyag naton hibaroan an aada ha hunahuna han aton kaistorya ngan magamit naton an Biblia ha aton pakiistorya. Kondi bangin maghunahuna an tagbalay: ‘Hin-o ini nga tawo, ngan kay ano nagpapakiana hiya hito ha akon? May kalabotan ini ha ano?’ Salit sadang mangalimbasog kita nga magin komportable ha aton an tagbalay. (Fil. 2:3, 4) Paonan-o naton bubuhaton ito?

¹⁶ Naobserbaran han usa nga nagbibiyahe nga paramangno nga epektibo an masunod nga paagi. Katapos maghatag hin katalahoran ha tagbalay, iya gintatagan ito hin tract nga Karuyag Mo ba Hibaroan an Kamatuoran? ngan nasiring: “Gintatagan namon hini an ngatanan nga tawo dinhi ha iyo lugar. Ginhihisgotan hini an unom nga pakiana nga iginpapakiana han damu nga tawo. Ini an imo kopya.” An brother nagsiring nga baga hin nagigin komportable makiistorya an kadam-an nga tawo kon maaram hira han katuyoan han pagbisita. Salit mas masayon nga maipadayon an pag-istorya. Katapos, papakianhan niya an tagbalay: “Hain hini nga mga pakiana an nahunahuna mo na?” Kon pumili an tagbalay, iya ipapakita an tract ngan hihisgotan kon ano an ginsisiring han Biblia mahitungod hito. Kon diri magpili an tagbalay, hiya an napili hin pakiana ngan iginpapadayon niya an paghisgot ha paagi nga diri maaalohan an tagbalay. Syempre damu pa an paagi ha pagtikang hin pakiistorya. Ha pipira nga lugar, bangin kinahanglan anay naton sundon an pipira nga kustomre ha paghatag hin katalahoran ha tagbalay antes naton isumat an katuyoan han aton pagbisita. Kinahanglan ipahiuyon naton an aton presentasyon ha kon ano an posible nga maruruyagan han mga tawo.

17. Ha ano nga mga paagi maiaaplikar naton an Bulawanon nga Surundon?

¹⁷ Kon sugad, ha ano nga mga paagi maiaaplikar naton an Bulawanon nga Surundon ha aton ministeryo? Gintatratar naton an tagsa nga indibiduwal nga aton nakakaistorya uyon ha ira kahimtang ngan mga problema. Ginrirespeto naton an ira panimalay ngan mga panag-iya. Nangangalimbasog kita nga magsangyaw ha oras diin an mga tawo posible nga aada ha ira balay ngan andam mamati ha aton. Iginsasangyaw naton an mensahe ha paagi nga kakarawaton ito han mga tawo ha aton teritoryo.

18. Ano an mga kapulsanan kon tatrataron naton an mga tawo ha aton teritoryo sugad han karuyag naton nga magin pagtratar ha aton?

¹⁸ Damu an kapulsanan kon gintatratar naton an mga tawo ha aton teritoryo sugad han karuyag naton nga magin pagtratar ha aton. Pinaagi ha pagin buotan ngan makonsiderasyon, naipapasanag naton an aton suga, naipapakita an pagkaimportante han mga prinsipyo ha Kasuratan, ngan nahihimaya naton an aton langitnon nga Amay. (Mat. 5:16) Hinaot madani naton an damu pa nga tawo nga karawaton an kamatuoran pinaagi ha pagin matinalahuron ha ira. (1 Tim. 4:16) Karawaton man o diri han aton mga ginsasangyawan an mensahe han Ginhadian, nalilipay kita ha paghibaro nga ginbubuhat naton an gimaopayi basi matuman an aton ministeryo. (2 Tim. 4:5) Hinaot an tagsa ha aton magsubad kan apostol Pablo, nga nagsurat: “Ginbubuhat ko an ngatanan para ha maopay nga sumat, basi maisangyaw ko ito ha iba.” (1 Cor. 9:23) Hinaot iaplikar naton pirme an Bulawanon nga Surundon ha aton ministeryo.