1, 2. (a) Pathian thil siam hmasak ber chu tu nge ni a, Jehova’n ani chu eng atân nge a hman? (b) Vântirhkohte chu fel taka ruahman an ni tih engin nge târ lang?

LEI leh vân Siamtu Jehova chuan ruahmanna fel tak neiin thil a ti ṭhîn. A thilsiam hmasa ber, a Fapa neihchhun chu a thu sawitu ber a nih avângin “Thu” tia koh a ni a. Bible chuan: “Atîrin Thu a awm, Thu chu Pathian hnênah a awm,” tia a sawi avângin Thu chuan kum tam tak chhûng Jehova rawng a bâwl tih kan hre thei a ni. Chu bâkah: “Engkim azain ama siam a ni; thilsiam zawng zawng hi ama siam loh engmah a awm lo,” tia hrilh kan ni bawk. Kum 2,000 vêl kal ta khân, Pathian chuan Thu chu mi ṭha famkim Isua Krista angin leiah a rawn tîr a, chutah chuan a Pa duhzâwng rinawm takin a ti a ni.—Joh. 1:1-3, 14.

² Pathian Fapa chuan leia a lo kal hma khân, a Pa tâna “mi themthiam” tak angin rinawm takin hna a thawk a. (Thuf. 8:30) Jehova chuan vâna thlarau thil siam maktaduai tam takte siam nân Isua a hmang a ni. (Kol. 1:16) Chûng vântirhkohte chungchângah Bible chuan: “A sânga sângin [Jehova] rawng an bâwlsak a, a hmâah chuan sîng hmun sîng an ding,” tiin min hrilh a ni. (Dan. 7:10) Pathian thlarau thil siam tam takte chu fel taka ruahman Jehova “sipaihote” anga sawi an ni ṭhîn.—Sâm 103:21.

3. Arsi leh planet-te chu eng anga tam nge nia, eng anga rem khâwm nge a nih?

 ³ Thil siam arsi leh planet chhiarsen loh ang chite chungchângah hian eng nge sawi theih awm? Arsi chungchângah Houston, Texas, Chronicle chanchinbu sawi dânin, tûn hnaia zir chianna chuan arsi “tlûklehdingâwn hmun tlûklehdingâwn nuai thum, a nih loh leh scientists-te’n an lo chhût tawh dân aia a lêt thuma tam a awm” tih a sawi a. “Chu chu number 3 zawhah bial hlîr 23 a intlar,” tihna a ni tih a sawi belh a ni. Chûng arsite chu a hlâwmin an awm a, chu chu galaxy tia koh a ni a, chûng arsi hlâwm tinah chuan arsi tlûklehdingâwn têl, a nih loh leh tlûklehdingâwn sâng têl leh planet tam tak a awm a ni. Chûng arsi hlâwm a tam zâwkte chu cluster tia koh hlâwm bâwr lian takah insiam lehin, chûng zînga a lian zualte chu supercluster tia koh a ni.

4. Engvângin nge lei lama Pathian chhiahhlawhte chu a pâwl anga fel taka din an ni ang tia thu tâwp siam chu a inâwm?

⁴ Vâna thlarau thil siamte ang bawkin, arsi leh planet-te chu fel taka rem khâwm a ni a. (Is. 40:26) Chuvângin, Jehova’n lei lama a chhiahhlawhte pawh pâwl pakhat angin fel takin a din ngei ang tia thu tâwp siam chu a inâwm hle. Hna pawimawh tak thawh tûr an neih avângin Jehova chuan anni chu dân leh thupêk kengkawh tûrin a duh a. Tûn hma leh tûn laia Jehova betute’n rinawm taka rawng an bâwlna chuan ani’n a awmpui tih leh “Pathian chu buaina Pathian a ni lo va, remna Pathian a ni zâwk” tih a târ lang chiang hle a ni.—1 Korinth 14:33, 40 chhiar rawh.

5. Mihring chhûngkuate leilung luah khahtîr tûra ruahmanna chu engtin nge tih khaihlak a nih?

⁵ Pathian Jehova’n mihring hmasa berte a siam khân, anni chu: “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u,” tiin a hrilh a. (Gen. 1:28) Mihring chhûngkua chu pung chho zêl a, leilung luah khat a, khawvêl pum hi Paradis-a chantîr tûr an ni. Chutiang ruahmanna fel tak chu Adama leh Evi thu âwih lohna avângin tih khaihlak a ni a. (Gen. 3:1-6) A hnuah, “LALPA chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a.” Chuvâng chuan, “lei hi Pathian mithmuhin a chhe zo tawh a, lei hi inpâwngnêknain a khat zo ta bawk.” Pathian chuan amah ngaihsak lotute tiboral tûrin khawvêl puma tuilêt thlentîr a tum ta a ni.—Gen. 6:5, 11-13, 17.

6, 7. (a) Engvângin nge Nova chuan Jehova mit a tlun? (A thupui chunga milem en rawh.) (b) Nova hun laia rinna nei lo mite chungah eng thil nge thleng?

⁶ Mahse, “Nova chu mi fel tak a ni a, a dam rualpuite zîngah chuan sawisêlbo” a nih avângin “LALPA mit a tlung a.” ‘Nova chu Pathian nên an lên dun ṭhin’ avângin lawng lian tak tuk tûrin thu A pe a ni. (Gen. 6:8, 9, 14-16) Lawng chu mihring leh ramsate ṭha taka an nun theihna tûra ruahman a ni a. Thuâwih takin, “Nova chuan LALPAN a hnêna thu a pêk zawng zawng ang zêl chuan a ti ta a,” a chhûngte ṭanpuina nên fel takin lawng tuk hna chu a thawk zo ta a ni. Nunna neite chu lawng chhûnga hruai luh an nih hnuah, ‘LALPAN a khâr khum ta a.’—Gen. 7:5, 16.

⁷ B.C.E. 2370-a tui a lêt chuan, Jehova’n ‘lei chunga thil nung tinrêng awmte chu . . . lei ata a tiboral ta a,’ mahse mi rinawm Nova leh a chhûngte chu lawng chhûngah a vênghim a ni. (Gen. 7:23) Tûna leia awmte hi Nova leh a chhûngte thlah kan ni vek a. Mahse, rinna nei lo lawng pâwna awmte chuan Nova, “felna thu hriltu” thusawi chu an ngaihthlâk duh loh avângin an boral ta vek a ni.—2 Pet. 2:5.

8. Pathianin Israel mite Ram Tiama lût tûra a hrilh khân ruahmanna ṭha a awm tih engin nge târ lang?

 ⁸ Tuilêt hnu aṭanga kum zabi riat aia tam a liam hnuah Pathian chuan Israel mite chu a hnam angin a din a. An nun kawng hrang hrangah, a bîk takin amah an biak dân tûrah ruahmanna ṭha tak a siamsak a ni. Entîr nân, Israel mi puithiamte leh Levia mi tam takte bâkah, “inbiakna puan in kawngka bula hmeichhe rawngbâwl ṭhînte” an awm bawk. (Ex. 38:8) Pathian Jehova chuan Israel mite chu Kanaan rama lût tûrin a hrilh a, mahse chu chhuan chu an rinawm loh avângin: “Ka awmtîr ang che u, ka tih ramah chuan Jephunea fapa Kaleba leh Nuna fapa Josua chauh lo chu in lût tawp lo vang,” tiin a hrilh a. Chutianga a sawi chhan chu Kaleba leh Josua chu Ram Tiam an va enthlâk hnua chanchin ṭha rawn hawntu awm chhun an nih vâng a ni. (Num. 14:30, 37, 38) Pathian kaihhruaina nêna inmilin, a hnuah Mosia chuan Josua chu a ai awh tûrin thuneihna a pe ta a. (Num. 27:18-23) Josua’n Israel mite Kanaan rama a hruai luh dâwn chuan: “Chak tak leh huai takin awm rawh; hlau suh la, zâm hek suh: LALPA i Pathian chu i kalna apiangan i hnênah a awm zêl dâwn alâwm,” tia hrilh a ni.—Jos. 1:9.

9. Rahabi chuan Jehova leh a mite chu engtin nge a ngaih?

⁹ Josua kalna apiangah Jehova chuan a awmpui zêl a. Entîr nân, Kanaan khawpui Jeriko bula Israel mite an inkulh laia thil thleng kha han ngaihtuah teh. B.C.E. 1473 khân Josua chuan mi pahnihte chu Jeriko enthla tûrin a tîr a, chutah chuan nawhchizuar Rahabi an va tawng a. Ani chuan enthlatute chu Jeriko lalin anmahni man tûra a tirhte lak aṭanga humhim nân a inchung zâwlah a lo thukru a ni. Rahabi chuan enthlatu Israel mite chu: ‘He ram hi LALPAIN a pe tawh che u a, . . . LALPAN Tuifinriat Sen kha a tihkangsak che u a, . . . Amor-ho lal pahnih . . . a tihboral tâk hlauh dân te chu. . . . kan lo hria,’ tiin a hrilh a. “LALPA in Pathian chu chung lam vânah leh hnuai lam leiah Pathian a ni  si a,” tiin a sawi belh a ni. (Jos. 2:9-11) Rahabi chu chutih laia Jehova inawpna pâwl mila a awm avângin, Israel mite’n Jeriko an hneh khân Pathian chuan amah leh a chhûngte chu a chhanhim a. (Jos. 6:25) Rahabi chuan rinna a lantîr a, Jehova ṭihna a neiin, a mite zahna pawh a lantîr bawk a ni.

10. Isua’n a hun laia Juda sakhaw hruaitute chu eng thu nge a hrilh a, engvangin nge chutiang thu chu a sawi?

¹⁰ Israel mite chuan Josua kaihhruaina hnuaiah khawpui chu an hneh belh zêl a, Kanaan ram chu an luah ta a ni. Mahse, a hnuah eng thil nge thleng? Kum zabi tam tak chhûng chuan Israel mite chuan Pathian dânte chu an bawhchhe zawm zêl a. Jehova’n a Fapa leia a rawn tirh hunah meuh chuan Pathian thu an zawm lohna leh a aiawha thusawitute an ngaihthlâk duh lohna chu a nasat êm avângin Isua chuan Jerusalema chêngte chu “zâwlneiho thattu” tiin a ko hial a ni. (Matthaia 23:37, 38 chhiar rawh.) Pathian chuan Juda sakhaw hruaitute chu a laka an rinawm loh avângin a hnâwl a. Isua chuan an hnênah: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tiin a hrilh a ni.—Mt. 21:43.

11, 12. (a) Jehova’n a malsâwmna chu Juda hnam aṭangin kum zabi khatnaa inawpna pâwl dangah a sawn tih engin nge târ lang? (b) Pathian pawm, chu inawpna pâwl thar chu tute hmanga din nge?

¹¹ C.E. kum zabi khatnaah khân, Jehova chuan Israel hnam rinawm lote chu a kalsan a. Mahse, Ani chuan leiah hian a chhiahhlawh rinawmte awmna inawpna pâwl a nei tho va. A malsâwmna chu Krista leh a zirtîrnatea innghat fel taka din a inawpna pâwl tharah a sawn a ni. Chu chu C.E. 33 Pentikost nî khân a inṭan a. Chutih lai chuan, Isua zirtîr 120-te chu Jerusalema hmun pakhatah an kal khâwm laiin, “thâwklehkhatan vân ata ri, thlipui tleh angin a lo thleng ta phut a. Tin, chu chuan an ṭhutna in chu a tikhat ta vek a.” Tichuan “lei te, amaha insem darhin, mei angin an hnênah a lo inlâr ta a. Tin, an chungah a chuang ṭheuh va, an zain thlarau thianghlimin an khat ta vek a, thlarauvin a ṭawngtîr ang zêlin ṭawng dangin an lo ṭawng ta a.” (Tirh. 2:1-4) Chu thil thleng mak tak chuan chu inawpna pâwl thar, Krista zirtîrte hmanga din chu a thlâwp tlat tih rinhlelh rual loh finfiahna a pe a ni.

¹² Chu mi nî vêk chuan, Isua zirtîrte chu mi “sângthum lai belhchhahin an awm a.’’ Chu bâkah, “a chhandam mêk apiangte chu Lalpain ni tin an hnênah a teltîr zêl ṭhîn.’’ (Tirh. 2:41, 47) Kum zabi khatnaa thu hriltute chuan an thawh ṭhat êm avângin “Pathian thu chu a lo darh a; Jerusalem khuaah zirtîrteho an pung ta êm êm a; Puithiamte zîngah pawh mi tam takin rinna chu an âwih ta a.” (Tirh. 6:7) Mi rilru ṭha pu tam takte chuan chu inawpna pâwl thar zînga mite puan chhuah thutak chu an pawm ta a ni. A hnuah, Jehova chuan Kristian Kohhrana “Jentailte” a rawn hruai luh khân a thlâwpzia finfiahna ngai bawk chu a pe leh a ni.—Tirhkohte 10:44, 45 chhiar rawh.

13. Pathian inawpna pâwl tharin eng hna nge a thawh?

¹³ Pathianin Krista zuitute hnêna hna thawh tûr a pêk chu a chiang hle a. Isua ngei chuan an tâna entawn tûr siamin, baptisma a chan hnu chuan, “vân ram” chanchin chu a hril ṭan ta nghâl a ni. (Mt. 4:17) A zirtîrte pawh chu hna chu thawk tûrin a hrilh a. Anni chu: “Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin a hrilh bawk a ni. (Tirh. 1:8) Krista zuitu hmasate chuan an thiltih ngai chu an hre chiang hle a. Entîr nân, Pisidia rama Antiokei khuaah Paula leh Barnaba chuan dodâltu Judate chu: “Pathian thu hi nangmahni hnênah sawi hmasak tûr rêng a ni; nimahsela in hnar kîr a, chatuana nung  tlâk lova in inruat tâk ahnuin, hre rawh u, Jentailte lam kan hawi ta ve ang. Chutiang chuan Lalpain thu min pe a ni, ‘Jentailte tiêngtuah ka ruat a che, kâwlkil thlenga chhandamtua i awm theihna tûrin, tih ziak ang khân,’” tiin huai takin an hrilh a. (Tirh. 13:14, 45-47) Kum zabi khatna aṭang khân Pathian inawpna pâwl lei lam pêng chuan mihringte chhandam nâna Pathian thiltihte chu mite an hriattîr a ni.

14. Kum zabi khatnaah khân Jerusalem-ah eng thil nge thleng a, tute nge dam khawchhuak?

¹⁴ Juda mi nâwlpuite chuan chanchin ṭha chu an pawm lo va, Isua’n a zirtîrte hnênah: “Sipaihoten Jerusalem khua an hual in hmuh hunah, a boral dâwn tih hria ang che u. Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama awmte chu a chhûngah lût suh se,” tia a vaukhân ang khân chhiatna chu an chungah a thleng dâwn a ni. (Lk. 21:20, 21) Isua sawi lâwk ang chuan a thleng dik ta rêng a. Judate an hel avângin C.E. 66 khân Cestius Gallus-a kaihhruai Rom sipaite chuan Jerusalem chu an hual ta a ni. Mahse, chûng sipaite chu an inhnûkdâwk ta thut mai a, chu chuan Isua hnungzuitute chu Jerusalem leh Judai ram aṭanga tlân chhiat theihna hun remchâng a siamsak ta a ni. Thil thleng chanchin ziaktu Eusebius-a chuan Jordan Lui kal tlanga Perea hmuna Pella ram an pan thu a sawi. C.E. 70 khân General Titus-a kaihhruai Rom sipaite chuan Jerusalemah kîr lehin an tichhe ta a. Isua vaukhânna an zawm avângin Kristian rinawmte erawh chu an dam khawchhuak thung a ni.

15. Kristianna chu eng a tâwk chung pawhin nge a darh zau zêl theih?

¹⁵ Kum zabi khatnaah khân Krista zuitute chuan harsatna te, tihduhdahna te, leh rinna fiahna thil dangte an tâwk chung pawhin, Kristianna chu a darh zau zêl a. (Tirh. 11:19-21; 19:1, 19, 20) Chûng Kristian hmasate chuan Pathian malsâwmna an dawn avângin thlarau lamah an ṭhang nasa hle a ni.—Thuf. 10:22.

16. Thlarau lama chak tûrin Kristiante’n eng nge an tih ṭheuh ngai?

¹⁶ Thlarau lama chak tak ni tûr chuan, Kristiante chuan ṭan an lâk ṭheuh a ngai a. Ngun taka Bible zir te, inkhâwma tel ziah te, leh Ram chanchin hrilh hnaa taima taka telte chu a pawimawh a ni. Chûng thiltihte chuan thlarau lama hrisêlna leh chutih hun laia Jehova mite chunga inlungrualna a thlen ang bawkin tûn laiah pawh a thlen a ni. Ṭha taka ruahman Kristian kohhran hmasaa awmte chuan upate leh kohhranho rawngbâwltute inpêkna leh ṭanpuina chu an hlâwkpui hle a. (Phil. 1:1; 1 Pet. 5:1-4) Paula ang bialkantu upate’n kohhrante an tlawh lai chuan a va nuam dâwn êm! (Tirh. 15:36, 40, 41) Pathian kan biak dân leh kum zabi khatnaa Kristiante biak dân a inang chu thil chhinchhiahtlâk tak a ni. Chutih hun lai leh tûn huna Jehova’n a chhiahhlawhte fel taka a ruahman avângin kan va lâwm êm! *

17. A dawta thuziakah eng nge sawi a nih ang?

¹⁷ Hêng ni hnuhnûnga Setana khawvêl tâwpna a hnaih hunah hian lei lama Jehova inawpna pâwl chuan a hma zawng aia chakin hma lam a pan mêk a ni. A rualin i kal em? Thlarau lamah hma i sâwn em? A dawta thuziak chuan chutianga i tih theih dân chu a sawi ang. (w14-E 05/15)