1, 2. (a) Kisannla Bondie ti kree an premie, ek kouma Jéhovah ti servi li? (b) Ki montre ki bann anz zot bien organize?

 JÉHOVAH, Kreater liniver, fer bann kitsoz dan enn fason organize. So premie kreasion ti so Garson spiritiel ki Li ti kree dan enn fason direk ek ki apel “Laparol,” parski limem prinsipal portparol Bondie. Laparol inn servi Jéhovah pandan plizir milyon lane parski Labib dir: “Dan koumansman, Laparol ti existe, ek Laparol ti avek Bondie.” Labib dir osi: “Atraver li [Laparol] tou kitsoz finn existe, ek san li pa mem enn kitsoz finn existe.” Inn gagn enn tipe plis ki 2,000 an, Bondie ti avoy Laparol lor later, ek avek fidelite Laparol ti fer volonte so Papa antan ki enn zom parfe, Jésus Christ.​—Jean 1:1-3, 14.

² Avan ki Garson Bondie vinn lor later, li ti servi Bondie avek fidelite kouma So “zouvriye kalifie.” (Prov. 8:30) Par so mwayin, Jéhovah ti kree plizir milyon lezot kreatir spiritiel dan lesiel. (Col. 1:16) Konsernan sa bann anz-la, Labib dir: “Mil milye ti pe servi [Jéhovah], ek dis mil fwa dis mil ti pe debout devan Li.” (Dan. 7:10) Kan Labib koz lor bann kreatir spiritiel Bondie ki an gran kantite ek ki bien organize, li apel zot “bann larme” Jéhovah.​—Ps. 103:21.

3. Ki kantite zetwal ek planet ena, ek kouma zot organize?

 ³ Ki nou kapav dir lor bann kitsoz vizib, kouma par exanp sa gran kantite zetwal ek planet ki nou pa kapav konte la? Konsernan bann zetwal, lagazet Houston, Texas, Chronicle dir ki, dapre enn resers ki’nn fer pa tro lontan, bann siantifik panse ki ena “300 sextilyon zetwal, ouswa trwa fwa plis zetwal ki [zot] ti deza kalkile.” Lagazet-la azoute: “Savedir 3 avek 23 zero [dapre sistem Ameriken].” Bann zetwal zot organize an plizir galaxi, ek dan sak galaxi ena bann milyar-milyar zetwal, ek osi boukou planet. Anplis, laplipar bann galaxi zot organize an group ouswa an bann pli gran group.

4. Kifer li lozik pou dir ki Bondie ti pou organiz so bann serviter lor later?

⁴ Parey kouma bann kreatir spiritiel dan lesiel, bann zetwal ek bann planet zot osi zot organize dan enn fason extraordiner. (Is. 40:26) Alor, li lozik pou dir ki Jéhovah ti pou organiz so bann serviter lor later. Li anvi ki zot res bien organize, ek sa li bien inportan parski zot ena boukou travay inportan pou fer. Pandan plizir milye lane, Jéhovah inn organiz so pep pou zot kapav ador Li avek fidelite. Ena boukou lexanp ki montre ki Li’nn touletan avek so pep ek ki Li “pa enn Bondie dezord me enn Bondie lape.”​—Lir 1 Corinthiens 14:33, 40.

5. Kouma proze Bondie ki bann dimounn ranpli later avek zot bann desandan dan enn fason organize, ti arete pou enn ti moman?

⁵ Kan Jéhovah ti kree bann premie imin, Li ti dir zot: “Gagn boukou zanfan, miltipliye, ranpli later ek ena kontrol lor li, ek ena kontrol lor bann pwason dan lamer ek lor bann kreatir ki anvole dan lesiel ek lor tou kreatir vivan ki bouze lor later.” (Gen. 1:28) Bann imin ti bizin ranpli later avek zot bann desandan dan enn fason organize ek fer later antie vinn enn paradi. Me kan Adam ek Ève ti dezobeir Bondie, sa ti aret proze Bondie pou enn ti moman. (Gen. 3:1-6) Avek letan, “Jéhovah ti trouve ki bann dimounn ti pe fer boukou move kitsoz lor later ek zot leker ti touletan ena tandans pou pans seki move.” Pou vre Bondie “later ti’nn degrade, ek ti ranpli ar violans.” Alor, Li ti desid pou amenn enn deliz lor later antie, ki ti pou detrir tou bann dimounn ki pa ti ena respe pou Li.​—Gen. 6:5, 11-13, 17.

6, 7. (a) Kifer Noé ti gagn faver Jéhovah? (Get zimaz koumansman lartik.) (b) Ki ti ariv tou bann dimounn ki pa ti fidel dan lepok Noé?

⁶ Me, “Noé ti gagn faver Jéhovah” parski li “ti enn dimounn drwat” ek li “ti montre ki li san defo parmi bann dimounn ki ti pe viv dan so lepok.” Parski “Noé ti mars avek vre Bondie,” Jéhovah ti donn li linstriksion pou ranz enn gran lars. (Gen. 6:8, 9, 14-16) Sa lars-la ti fer dan enn fason pou ki li kapav protez lavi bann dimounn ek bann zanimo. Noé ti obeir Jéhovah ek “ti fer tou seki Jéhovah ti’nn demann li,” ek avek led so fami, li ti reisi fini sa travay konstriksion la dan enn fason organize. Apre ki Noé ek so fami ek bann zanimo ti rant dan lars, “Jéhovah ti ferm laport.”​—Gen. 7:5, 16.

⁷ Kan ti ena Deliz an 2370 Avan Nou Lepok, Jéhovah “ti detrir tou kreatir vivan ki ti lor later,” me Li ti protez Noé ki ti fidel ek so fami dan lars. (Gen. 7:23) Tou dimounn lor later azordi zot bann desandan Noé, so bann garson, ek zot madam. Me tou bann ki pa ti fidel ek ki ti andeor lars ti detrir parski zot ti’nn refiz ekout Noé “ki ti enn predikater lazistis.”​—2 Pierre 2:5.

8. Ki prev nou ena ki ti ena enn bon lorganizasion dan Israël kan Bondie ti donn linstriksion so pep pou rant dan Later Promiz?

 ⁸ Plis ki wit siek apre Deliz, Bondie ti organiz bann Izraelit pou zot vinn enn nasion. Zot ti bizin bien organize dan tou domenn zot lavi, sirtou dan zot ladorasion. Par exanp, mem si an Israël ti ena boukou pret ek Levit, ti ena osi “bann madam ki ti organize pou servi dan lantre latant renion.” (Ex. 38:8) Selman, kan Jéhovah ti donn linstriksion bann Izraelit pou rant dan Canaan, sa zenerasion-la ti montre ki zot pa fidel, ek Jéhovah ti dir zot: “Personn parmi zot pa pou rant dan sa pei ki mo’nn fer serman pou fer zot reste la, eksepte Caleb garson Yephounné ek Josué garson Noun,” parski apre ki bannla ti espionn Later Promiz, zot ti fer enn bon rapor. (Nomb. 14:30, 37, 38) Plitar, an-akor avek direksion Bondie, Moïse ti fer Josué ranplas li. (Nomb. 27:18-23) Kan Josué ti pre pou fer bann Izraelit rant dan Canaan, Jéhovah ti dir li: “Pran kouraz ek vinn for. Pa tranble ek pa per, parski Jéhovah to Bondie avek twa partou kot to pou ale.”​—Jos. 1:9.

9. Ki Rahab ti panse lor Jéhovah ek So pep?

⁹ Jéhovah ti vremem avek Josué partou kot li ti ale. Par exanp, gete ki ti ariv bann Izraelit kan zot ti kanp pre kot Jéricho, enn lavil dan Canaan. An 1473 Avan Nou Lepok, Josué ti avoy de espion dan Jéricho, ek laba zot ti zwenn Rahab, enn prostitie. Li ti kasiet zot lor so lakaz, ek li ti kouver zot pou ki bann dimounn ki lerwa Jéricho ti avoye pa trouv zot. Rahab ti dir bann espion Izraelit la: “Mo kone ki Jéhovah pou donn zot sa pei-la . . . , parski nou finn tande dan ki fason Jéhovah finn fer delo Lamer Rouge sek devan zot . . . ek seki zot ti fer ar de lerwa Amorit.” Li ti azoute: “Jéhovah, zot Bondie, Limem Bondie lao dan lesiel, ek anba lor later.” (Jos. 2:9-11) Parski Rahab ti asosie li avek lorganizasion ki Jéhovah ti ena sa lepok-la, Bondie ti fer an-sort ki li ek so fami gagn lavi  sov kan bann Izraelit ti gagn viktwar lor Jéricho. (Jos. 6:25) Rahab ti ena lafwa, ti ena enn gran respe pou Jéhovah, ek ti montre respe pou pep Bondie.

10. Ki Jésus ti dir bann sef relizie Zwif dan so lepok, ek kifer li ti dir sa?

¹⁰ Kan Josué ti pe diriz nasion Israël, zot ti gagn viktwar lor bann lavil Canaan enn deryer lot ek zot ti res dan sa pei-la. Me ki ti arive plitar? Pandan bann siek ki’nn vini apre, a-sak fwa bann Izraelit ti dezobeir lalwa Bondie. Kan ti ariv ler pou Jéhovah avoy so Garson lor later, zot ti’nn telman dezobeir Bondie ek refiz ekout so bann portparol, ki Jésus ti apel Jérusalem “lavil ki touy bann profet.” (Lir Matthieu 23:37, 38.) Bondie ti rezet bann sef relizie Zwif parski zot pa ti fidel anver Li. Akoz sa, Jésus ti dir zot: “Pou ras Rwayom Bondie ar zot, ek pou donn sa enn nasion ki pou raport bann frwi.”​—Mat. 21:43.

11, 12. (a) Ki montre ki dan premie siek Jéhovah ti tir so benediksion lor nasion Israël ek ti beni enn lot lorganizasion? (b) Kisannla ti form parti dan sa nouvo lorganizasion ki ti gagn faver Bondie la?

¹¹ Dan premie siek Nou Lepok, Jéhovah ti rezet nasion Israël ki ti infidel. Selman, sa pa vedir ki Li pa ti pou ena enn lorganizasion lor later kot ti pou ena bann serviter fidel. Jéhovah ti tir so benediksion lor nasion Israël ek ti beni enn nouvo lorganizasion bien aktif ki ti konsantre lor Jésus Christ ek so bann lansegnman. Sa lorganizasion-la ti koumans forme zour Pentecôte 33 Nou Lepok. Sa zour-la, ti ena apepre 120 disip Jésus ki ti rasanble dan enn lakaz dan Jérusalem ek “enn kout enn tapaz kouma enn divan bien for ti sorti dan lesiel, ek ti ranpli net sa lakaz[-la].” Lerla, “zot ti koumans trouv bann lalang dan form dife ki ti distribie, ek sa ti poz lor sakenn parmi zot, ek zot tou ti ranpli avek lespri sin ek zot ti koumans koz dan diferan lang, parey kouma lespri sin ti pe permet zot koze.” (Actes 2:1-4) Pena dout ki sa levennman extraordiner la ti prouve ki Jéhovah ti pe soutenir sa nouvo lorganizasion kot ti ena bann disip Christ la.

¹² Sa zour-la, “preske 3,000 dimounn ti azoute” ar kantite disip Christ ki ti ena. Anplis, “toulezour, Jéhovah ti kontign azout avek bann disip, bann dimounn ki ti pe gagn lavi sov.” (Actes 2:41, 47) Sa bann predikater premie siek la ti telman efikas ki “parol Bondie ti pe repann partou, ek kantite disip ti pe kontign ogmante dan Jérusalem.” Mem “enn gran kantite pret ti koumans obeir lafwa.” (Actes 6:7) Dan sa fason-la, boukou dimounn sinser ti aksepte laverite ki bann manb sa nouvo lorganizasion-la ti prese. Plitar, kan Jéhovah ti koumans diriz “bann dimounn lezot nasion” ver kongregasion Kretien, la osi Li ti montre ki Li ti pe soutenir sa nouvo lorganizasion-la.​—Lir Actes 10:44, 45.

13. Ki travay nouvo lorganizasion Bondie ti bizin fer?

¹³ Pena dout ki bann disip Christ ti kone ki travay Bondie ti donn zot pou fer. Jésus limem ti donn lexanp so bann disip, parski zis apre so batem li ti koumans pres lor “Rwayom ki dan lesiel.” (Mat. 4:17) Jésus ti ansegn zot pou fer mem travay. Li ti dir zot: “Zot pou vinn mo bann temwin dan Jérusalem, partou dan Judée ek Samarie, ek ziska dan rezion pli lwin lor later.” (Actes 1:8) Bann premie disip Christ ti bien konpran seki li ti demann zot fer. Par exanp, dan Antioche de Pisidie, Paul ek Barnabas ti dir zot bann persekiter Zwif dan enn fason bien fran: “Li ti neseser ki anons zot parol  Bondie an premie. Me parski zot pe rezet li ek zot pa konsider zotmem dign pou gagn lavi eternel, gete! nou pe tourn nou ver bann nasion. Parski par sa bann parol-la, Jéhovah inn donn nou lord: ‘Mo finn etabli zot kouma lalimier bann nasion, pou ki zot vinn enn delivrans ziska landrwa pli lwin lor later.’” (Actes 13:14, 45-47) Depi premie siek, parti vizib lorganizasion Bondie inn kontign fer bann dimounn kone seki Jéhovah inn fer pou sov bann dimounn.

14. Ki ti ariv Jérusalem dan premie siek, me kisannla ti gagn lavi sov?

¹⁴ Bann Zwif an zeneral pa ti aksepte bonn nouvel, ek zot ti pou konn enn gran maler, parski Jésus ti’nn averti so bann disip: “Kan zot trouv Jérusalem antoure par bann larme ki pe kanpe, zot pou kone ki so destriksion finn koste. Lerla, bann ki dan Judée bizin sove, al dan bann montagn, ek bann ki dan lavil bizin sorti ale, ek bann ki dan lakanpagn zot, fode pa ki zot rant dan lavil.” (Luc 21:20, 21) Seki Jésus ti predir ti arive. Parski bann Zwif ti rebele, larme Romin ki ti dirize par Cestius Gallus ti antour Jérusalem an 66 Nou Lepok. Me, sa larme-la ti ale enn kout koumsa, ek sa ti donn bann disip Jésus lokazion pou kit Jérusalem ek Judée. Dapre istorien Eusèbe, boukou ti travers Larivier Jourdain kan zot ti pe sove pou al Pella dan Pérée. An 70 Nou Lepok, bann larme Romin ki ti dirize par Zeneral Titus ti retourne ek ti detrir Jérusalem. Me, bann Kretien ki ti res fidel ti gagn lavi sov parski zot ti ekout lavertisman Jésus.

15. Malgre ki kitsoz vre relizion Kretien ti prospere?

¹⁵ Malgre ki bann disip Jésus ti konn bann difikilte, persekision, ek lezot problem ki ti teste zot lafwa, vre relizion Kretien ti prospere dan premie siek. (Actes 11:19-21; 19:1, 19, 20) Sa bann premie Kretien-la ti prospere lor plan spiritiel parski zot ti ena benediksion Bondie.​—Prov. 10:22.

16. Ki sak Kretien ti bizin fer pou res for lor plan spiritiel?

¹⁶ Pou res for lor plan spiritiel, sak Kretien ti bizin fer bann zefor. Li ti bien inportan ki zot etidie bann Lekritir avek serye, asiste bann renion regilierman pou ador Bondie, ek pres Rwayom Bondie avek zel. Sa bann laktivite-la ti fer ki pep Jéhovah res for lor plan spiritiel ek res dan linite sa lepok-la, parey kouma azordi. Bann ki ti dan bann kongregasion premie siek ki ti bien organize, ti gagn bann gran bienfe parski bann ansien ek bann asistan ministeryel ti dispoze pou ede. (Phil. 1:1; 1 Pierre 5:1-4) Se sir ki bann kongregasion ti bien kontan kan bann sirveyan, kouma Paul, ti vizit zot! (Actes 15:36, 40, 41) Li extraordiner pou trouve kouma nou ladorasion ek ladorasion bann Kretien dan premie siek bien resanble. Nou vremem ena rekonesans ki Jéhovah ti organiz so bann serviter dan sa lepok-la parey kouma Li pe fer azordi! a

17. Ki nou pou examine dan prosin lartik?

¹⁷ Nou pe viv dan bann dernie zour, ek lemond Satan biento pou detrir. Me parti lorganizasion iniversel Jéhovah ki lor later pe kontign avanse deplizanpli vit. Eski ou pe mars mem pa ar li? Eski ou finn fer bann progre lor plan spiritiel? Prosin lartik pou montre ou kouma ou kapav fer sa.