1, 2. (a) San na a fosi sani di Gado meki èn fa Yehovah gebroiki en? (b) Fa wi sabi taki den engel orga bun?

ALA san wi Mekiman Yehovah e du, a e orga bun. A fosi sani di a meki ben de en Manpikin Yesus di Bijbel e kari „a Wortu”, fu di a de a moro prenspari sma di e taki gi Gado. A Wortu e dini Yehovah dusundusun yari kaba. Bijbel e taki: „Na ini a bigin a Wortu ben de, [èn] a Wortu ben de nanga Gado.” Bijbel e taki tu: „Ala sani kon de nanga yepi fu en [a Wortu], èn sondro en nowan sani kon de.” Moro leki 2000 yari pasa, Gado seni a Wortu kon na grontapu leki Yesus Krestes, wan man di no ben abi sondu. Drape a tan du a wani fu en Tata.—Yoh. 1:1-3, 14.

² Fosi Gado Manpikin tron wan libisma, a ben de a „tumusi bun wrokoman” fu En (Odo 8:30). Yehovah gebroiki en fu meki furu milyunmilyun tra engel na ini hemel (Kol. 1:16). Luku san wan Bijbeltekst e fruteri wi fu den engel disi: „Dusun tron dusun engel ben e dini [Yehovah] èn tin dusun tron tin dusun ben e tanapu leti na en fesi” (Dan. 7:10). Bijbel e taki dati ala den someni engel disi orga bun. A e kari den a „legre” fu Yehovah.—Ps. 103:21.

3. Omeni stari nanga planeiti de èn fa den orga?

³ Di Yehovah meki hemel nanga grontapu, a meki someni  stari nanga planeiti taki wi no man teri den alamala. Omeni stari de? Wan koranti fu Texas skrifi taki no so langa pasa sabiman kon si taki milyardmilyard stari nanga planeiti de. Dati na dri tron so furu leki san sabiman ben denki fosi. * Den stari orga na ini grupu di sma e kari starisistema. Ibriwan fu den abi milyardmilyard stari nanga furu planeiti sosrefi. Furu fu den starisistema disi orga na ini bigi grupu èn den grupu disi orga na ini moro bigi grupu baka.

4. Fa wi sabi taki Gado orga den futuboi fu en na grontapu?

⁴ Den engel na hemel èn den stari nanga den planeiti, orga na wan kefalek moi fasi (Yes. 40:26). Sobun, wi kan frustan fu san ede Yehovah orga den futuboi fu en na grontapu. A wani taki den musu orga sani bun fu di den abi furu prenspari wroko fu du. Dusundusun yari langa Yehovah orga a pipel fu en so taki den kan anbegi en nanga den heri ati. Furu eksempre de di e sori taki Gado de nanga en pipel èn taki en „a no wan Gado fu bruya, ma fu freide”.—Leisi 1 Korentesma 14:33, 40.

5. San meki taki a sani di Gado ben abi na prakseri gi grontapu no go doro?

⁵ Di Yehovah meki den fosi libisma, a taigi den: „Meki pikin èn kon furu, teleki unu kon lai na grontapu èn basi ala sani na grontapu. Basi den fisi na ini se, den meti di e frei na loktu, nanga ibri meti di e kroipi na gron” (Gen. 1:28). Yehovah no meki milyunmilyun libisma na a srefi ten. Na presi fu dati a gi Adam nanga Eva na okasi fu kisi pikin èn den pikin fu den ben o kisi pikin tu teleki heri grontapu ben o lai nanga libisma. Gado ben wani taki den ben musu meki grontapu tron wan paradijs. Ma fu di Adam nanga Eva trangayesi Gado, meki a sani disi di a ben abi na prakseri no go doro na a ten dati (Gen. 3:1-6). Baka wan pisi ten „Yehovah kon si taki libisma ben e du bun furu ogri na grontapu èn taki doronomo den ben abi soso ogri prakseri na ini den ati”. A bakapisi ben de taki „a tru Gado kon si taki grontapu ben pori èn taki grontapu ben kon lai ogridu”. Dati meki a bosroiti fu tyari wan frudu kon na heri grontapu fu pori den ogrisma.—Gen. 6:5, 11-13, 17.

6, 7. (a) Fu san ede Yehovah ben feni Noa bun? (Luku a prenki na a bigin fu na artikel.) (b) San pasa nanga ala den trangayesi sma na ini a ten fu Noa?

⁶ Ma „Noa ben e plisi Yehovah” fu di a „ben de wan reti-ati man. Te yu ben e luku den sma fu en ten, dan a ben de sondro fowtu.” Fu di „Noa ben e waka nanga a tru Gado”, meki Yehovah taigi en fu bow wan bigi ark (Gen. 6:8, 9, 14-16). Na ark ben musu meki na so wan fasi taki libisma nanga meti ben man tan na libi. Noa gi yesi na Gado èn a „du ala san Yehovah taigi en fu du”. En nanga en osofamiri wroko makandra fu bow na ark na wan fasi di orga bun. Baka di den tyari den meti go na ini na ark, „Yehovah tapu a doro”.—Gen. 7:5, 16.

⁷ Di a Frudu kon na ini 2370 Fosi Krestes, Yehovah „figi ala libisani puru di ben de na grontapu”, ma a sorgu taki Noa nanga en osofamiri tan na libi na ini na ark (Gen. 7:23). Ala sma na grontapu na bakapikin fu Noa, fu den manpikin fu en èn fu den wefi fu den. Ma ala den trangayesi sma na dorosei fu na ark dede, fu di den no ben wani arki Noa, di ben de „wan preikiman fu retidu”.—2 Petr. 2:5.

8. Fa wi sabi taki Gado ben orga ala sani bun fosi den Israelsma go na ini a Pramisi Kondre?

⁸ Moro leki aiti hondro yari baka a Frudu,  Gado orga den Israelsma leki wan pipel. A orga ala sani na ini den libi bun, spesrutu na anbegi fu den. Fu eksempre, a poti son Israelsma leki priester nanga Leifisma. Yu ben abi ’uma tu di ben e wroko na a mofodoro fu a konmakandra-tenti’. Den uma disi ben orga fu du den wroko (Eks. 38:8). Bakaten Yehovah Gado taigi a pipel fu Israel fu go na ini Kanan, a kondre di a ben sweri fu gi den. Ma fu di den ben frede, meki den no ben wani go. Dati meki a taigi den: „Unu no sa go na ini a kondre . . . Soso Kaleb, a manpikin fu Yefune, nanga Yosua, a manpikin fu Nun, sa go na ini.” Na Yosua nanga Kaleb nomo no taki ogri fu a Pramisi Kondre (Num. 14:30, 37, 38). Bakaten Yehovah taigi Moses fu meki Yosua teki a wroko fu en abra èn na dati Moses du tu (Num. 27:18-23). Di Yosua ben o tyari a pipel fu Israel go na ini Kanan, Gado taigi en: „Abi deki-ati èn no frede. No meki sma tapu skreki gi yu èn no beifi, bika Yehovah yu Gado de nanga yu, awinsi pe yu e go.”—Yos. 1:9.

9. San Rakab ben denki fu Yehovah nanga en pipel?

⁹ Yehovah Gado ben de nanga Yosua awinsi pe a ben e go. Fu eksempre, luku san pasa di den Israelsma ben seti kampu krosibei fu a foto Yerikow na ini Kanan. Na ini 1473 Fosi Krestes, Yosua seni tu man go luku a foto Yerikow kibrikibri. Drape den miti a huru-uma Rakab. Ma fu di a kownu fu Yerikow ben seni man go na den baka, meki Rakab kibri den na tapu a daki fu en oso, so taki sma no feni den. A taigi den man fu Israel: „Mi sabi taki Yehovah o gi unu a kondre disi . . . bika wi yere fa Yehovah ben drei a watra fu a Redi Se gi unu. . . . Wi yere sosrefi san unu du nanga . . . den kownu fu den Amorietsma.” A taigi den tu: „Yehovah un Gado na a Gado fu hemel nanga grontapu” (Yos. 2:9-11). Fu di Rakab nanga en famiri teki a sei fu Yehovah en pipel, meki Gado sorgu taki den no dede di den Israelsma kon feti nanga Yerikow (Yos. 6:25). Rakab sori bribi na ini Yehovah èn a ben abi bigi lespeki gi en nanga en pipel.

10. San Yesus taigi den Dyu kerki fesiman na ini a ten fu en èn fu san ede a taki dati?

¹⁰ Di Yosua ben e tiri a pipel fu Israel, den bigin teki den foto fu Kanan abra wan-fru-wan èn den go libi na ini a kondre. Ma san pasa bakaten? Na ini den hondrohondro yari baka dati, den Israelsma trangayesi den wet fu Gado ibri tron baka. Na a ten di Yehovah seni en Manpikin kon na grontapu, a pipel ben kon ogri so te taki Yesus kari Yerusalem wan foto „di e kiri den profeiti”. A taki disi fu di den no gi yesi na Gado èn den no arki den boskopuman fu En. (Leisi Mateyus 23:37, 38.) Gado drai baka gi den Dyu kerki fesiman fu di den ben trangayesi en. Na fu dati ede Yesus taigi den: „Gado o puru en Kownukondre na un anu èn a o gi en na wan pipel di e du san a wani.”—Mat. 21:43.

11, 12. (a) San e sori taki Yehovah bigin blesi wan nyun organisâsi na presi fu a pipel fu Israel? (b) Suma ben de na ini a nyun organisâsi disi?

¹¹ Na ini a fosi yarihondro, Yehovah no ben wani den trangayesi Israelsma moro leki en pipel. Ma disi no wani taki dati a no ben o abi wan organisâsi moro na grontapu nanga futuboi di e gi yesi na en. Sobun, na a Pinksterfesa fu a yari 33, Yehovah bigin blesi wan nyun organisâsi di ben e gi yesi na Yesus Krestes nanga den leri fu en. Na a ten dati, sowan 120 bakaman fu Yesus kon makandra na wan presi na ini Yerusalem. Di den ben de drape, dan „wantronso wan babari komoto na hemel. A ben de neleki te wan tranga winti e wai, èn a ben de fu yere na ini a heri oso.” „Ne den si sani leki pikin faya di go sidon na tapu na ede fu ibriwan fu den sma drape. Ne santa yeye kon na tapu den alamala èn den bigin taki difrenti tongo, soleki fa santa yeye ben e meki den taki” (Tori 2:1-4). A moi sani disi di pasa sori krin taki Yehovah ben e horibaka gi a nyun organisâsi disi pe yu ben abi den bakaman fu Krestes.

¹² Na a span dei dati, „sowan dri dusun sma” tron bakaman fu Yesus. Bijbel e taki moro fara: „Ibri dei Yehovah ben frulusu sma èn moro nanga moro sma ben tron bribiman” (Tori 2:41, 47). A fasi fa den preikiman fu a fosi yarihondro ben e preiki, ben bun so kefalek taki „moro nanga moro sma ben e kon yere a wortu fu Gado, èn moro nanga moro sma na ini Yerusalem ben e tron disipel. Bun furu priester tron bribiman tu” (Tori 6:7). Furu reti-ati sma bribi den tru leri di den sma fu a nyun organisâsi disi ben e preiki gi den. Bakaten Yehovah sori ete wan tron taki a ben e horibaka gi na organisâsi disi di a bigin tyari „sma di no de Dyu” kon na ini a Kresten gemeente.—Leisi Tori fu den apostel 10:44, 45.

13. Sortu wroko a nyun organisâsi fu Gado ben musu du?

¹³ A ben de krin sortu wroko Gado ben gi den bakaman fu Krestes. Yesus srefi ben sori den fa fu du a wroko disi, fu di syatu baka di a teki dopu a bigin preiki fu „a Kownukondre fu hemel” (Mat. 4:17). Yesus leri den bakaman fu en fu du a srefi wroko. A taigi den: „Unu sa kisi krakti te a santa yeye kon na un tapu, èn unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:8). Den fosi bakaman fu Krestes frustan krin san den ben musu du. Fu eksempre, di Paulus nanga Barnabas ben de na Antiokia na ini Pisidia, dan sondro fu frede den taigi den Dyu di ben e gens den: „A ben de fanowdu fu fruteri unu a wortu fu Gado fosi. Ma fu di unu e weigri fu bribi en èn fu di unu feni taki unu no warti nofo fu kisi têgo libi, meki wi e go na den tra pipel. Fu taki en leti, Yehovah gi wi a komando disi: ’Mi  poti unu leki wan leti gi den pipel, so taki unu kan tyari frulusu kon te na den moro farawe presi fu grontapu’” (Tori 13:14, 45-47). Sensi a fosi yarihondro, a pisi fu Gado organisâsi di de na grontapu, e fruteri sortu sani Gado seti fu meki sma kisi frulusu.

14. San pasa nanga Yerusalem na ini a fosi yarihondro, ma suma tan na libi?

¹⁴ Furu Dyu no gi yesi na a bun nyunsu èn den no arki di Yesus taki dati wan bigi rampu ben o miti Yerusalem. A ben warskow den bakaman fu en: „Te unu e si taki legre seti kampu lontu Yerusalem, dan un musu sabi taki a ten doro te a foto o kisi pori. Dan meki den sma di de na Yudea, bigin lowe go na den bergi, meki den sma di de na ini Yerusalem hari gowe fu drape, èn meki den sma di de na den boitipresi no go na ini a foto” (Luk. 21:20, 21). A sani di Yesus taki pasa trutru. Fu di den Dyu opo densrefi teige den Romesma, meki a legre-edeman Cestius Gallus makandra nanga a legre fu Rome lontu a foto Yerusalem na ini a yari 66. Ma wantronso a legre disi hari gowe fu drape èn dati gi den bakaman fu Yesus na okasi fu komoto na ini Yerusalem nanga Yudea. A historia skrifiman Eusebius e fruteri taki furu Kresten lowe go na Pela na ini Perea, abrasei fu Yordan-liba. Na ini a yari 70, a legre-edeman Titus makandra nanga a legre fu Rome drai kon baka èn den pori Yerusalem. Ma den Kresten di ben gi yesi na Gado tan na libi fu di den arki a warskow fu Yesus.

15. Aladi a ben e go bun nanga a Kresten gemeente, toku sortu sani miti den?

¹⁵ Den bakaman fu Krestes na ini a fosi yarihondro ben abi furu problema, sma ben frufolgu den èn den ben kisi tra tesi. Toku a ben e go bun nanga a Kresten gemeente na ini a ten dati (Tori 11:19-21; 19:1, 19, 20). Fu san ede? Fu di Gado ben e blesi a Kresten gemeente.—Odo 10:22.

16. San ibri Kresten ben musu du fu kan tan abi wan tranga bribi?

¹⁶ Ibri Kresten ben abi fu meki tranga muiti fu meki sani waka bun na ini a Kresten gemeente èn fu meki den tan de wán. A ben de prenspari fu studeri Gado Wortu fayafaya, fu no misi konmakandra èn fu du a Kownukondre preikiwroko fayafaya. Disi ben meki taki a pipel fu Yehovah na a ten dati ben abi wan tranga bribi èn den ben de wán, neleki fa a de na ini a ten disi. Den Kresten gemeente na ini a fosi yarihondro ben orga bun. Den sma fu den gemeente dati kisi furu wini fu di den owruman nanga den dinari ini a diniwroko ben de klariklari fu yepi den (Fil. 1:1; 1 Petr. 5:1-4). A musu de taki den ben breiti tu te owruman leki Paulus ben e kon fisiti den gemeente (Tori 15:36, 40, 41). A moi fu si taki furu sani di wi e du na ini a ten disi, de a srefi leki fa den fosi-yarihondro Kresten ben e du sani. Wi breiti srefisrefi taki Yehovah orga den futuboi fu en na ini a ten disi, leki fa a du dati na ini fosi yarihondro. *

17. San wi o luku na ini a tra artikel?

¹⁷ Wi e libi na ini den lasti dei èn a grontapu fu Satan o kisi pori heri esi. Ma noiti ete a pisi fu Yehovah organisâsi di de na grontapu ben e go na fesi so esi leki now. Yu e go na fesi makandra nanga Yehovah en organisâsi? Yu e meki muiti fu tan abi wan tranga bribi? Na ini a tra artikel wi o si fa yu kan du dati.