1, 2. 1) ¿Tiku pulana tlawaka? 2) ¿Tuku taskujut tlawanit tiku pulana tlawaka? 3) ¿La likatsiyaw pi ángeles liwana kalakkaxwilikanit?

JEHOVÁ, tiku malakatsukilh putum tuku anan, liwana lakkaxwili tuku tlawa. Tiku pulana tlawalh wa xachastum xKgawasa, nila akxilhaw chu litalakgapasa «Tachiwin», xlakata wa tiku tlakg xlakaskinka tiku palakachuwinan Dios. Tachiwin, skujninit Dios millones kata. Biblia wan: «Akxni ni naj tu xʼanan, [...] Tachiwin na xlamaja, pus yama Tachiwin, na lakxtum xtalama Kintlatikan Dios». Na wampara: «Xla paks makgtlawanit wantu anan, chu nitu anan lapi xla ni makgtlawanit wantu malakatsukinit Dios». Liwakaya akgtiy mil kata, Dios makamilh Tachuwin unu kKatiyatni, chatum chixku tiku ni xkgalhi talakgalhin chu litalakgapasli, Jesucristo, tlawalh xtalakaskin xTlat (Juan 1:1-3, 14, Hua Xasasti Talaccaxlan, TXS, 1999).

² Akxni nina xmin kKatiyatni, xKgawasa Dios xlitaxtu «skujni xapuxku» nema ni makgxtakgnan (Prov. 8:30). Dios limaklakaskilh akxni katlawalh millones chu millones ángeles kʼakgapun (Col. 1:16). Biblia wan: «Xwilakgolh akgtum millón tiku skujnimakgo, chu akgtum ciento millón xyakgolh kxlakatin» (Dan. 7:10). Uma ángeles lu liwana kalakkaxwilikanit, wa xlakata kawanikan “wixin laklipaw ixángeles” (Sal. 103:21).

3. 1) ¿La akglit staku chu planetas lakpuwankan pi anan? 2) ¿La kalakkaxwilikanit staku?

 ³ ¿Chu tuku tlan nawanaw xlakata putum tuku Dios tlawanit? Jehová tlawanit lhuwa staku chu planetas. Periódico xalak México El Universal wan: «Xaʼawatiya taputsan nema tlawaka kinkamasiyaniyan pi tuku anan kʼakgapun, max kgalhi makgtutu tlakg staku ni xawa tuku científicos xputlekgekgonit asta la uku. La uku lakpuwankan pi anan [...] 300 mil trillones». Staku kalakkaxwilikanit kʼgalaxias, pulakatunu galaxia kgalhi akglhuwa mil millones o asta akglhuwa millones xla millones staku, chu lhuwa planetas. Lhuwa galaxias makxtum wilakgo, uma tlawa pi naʼanan tuku litalakgapasa supercúmulos.

4. ¿Tuku xlakata wanaw pi Dios kalakkaxwilinit kskujnin kKatiyatni?

⁴ Ángeles xalak akgapun nema nila kaʼakxilhaw chu staku chu planetas nema anan kʼakgapun, kaks malakawaninan xlakata la kalakkaxwilikanit (Is. 40:26). Uma kinkamasiyaniyan pi Malakatsukina liwana kalakkaxwili kskujnin unu kKatiyatni. Chuna xliwanat, xlakata lhuwa taskujut xlitlawatkan chu lu xlakaskinka. Jehová liwana lakkaxwilinit xkachikin akglhuwa mil kata, chu xlakan akgstitum skujnikgonit lata makgasa asta la uku. Kaʼakxilhwi makgapitsi tuku limasiya pi Jehová akxtum katawi chu litaxtu chatum «Dios [tiku] liwana lakkaxwili tuku tlawa, chu ni kaj akglakgwa» (kalikgalhtawakga 1 Corintios 14:33, 40, TNM).

5. ¿Tuku tlawalh pi ni tunkun kgantaxtulh xtalakaskin Dios xlakata latamanin?

⁵ Akxni Jehová katlawalh xapulana kinatlatnikan, kawanilh: «Kakgalhitit kamanan chu kalhuwantit chu kamalakgatsamatit katiyatni chu kakuentajtlawatit, chu kakuentajtlawatit skiti xalak pupunu, animales nema kgoskgo kkatalhman chu putum animales nema tatsuwikgo kkatiyatni» (Gén. 1:28). Latamanin xʼamakgo lhuwankgo chu liwana xtalakkaxtawilakgolh kKatiyatni asta xmalakgatsamakgolh chu akgtum paraíso xtlawakgolh. Lu nitlan pero akxni Adán chu Eva ni kgalhakgaxmatkgolh Jehová, uma tlawalh pi ni tunkun xkgantaxtulh xtalakaskin Dios (Gén. 3:1-6). Titaxtulh kilhtamaku, «Jehová akxilhli pi tuku nitlan xtlawakgo lakchixkuwin xtalhuwinit kkatiyatni, chu putum xtalakapastakni xnakujkan putum kilhtamaku nitlan xwanit». Xlakata uma «tiyat nitlan tawilalh kxlakatin xaxlikana Dios, chu katiyatni litatsamalh tuku nitlan». Wa xlakata Dios makamilh munkaklat xlikalanka kakilhtamaku xlakata nakamasputu tiku nitlan xlikatsikgo (Gén. 6:5, 11-13, 17).

6, 7. 1) ¿Tuku xlakata «Jehová tlan akxilhli Noé»? (Kaʼakxilhti xapulana dibujo.) 2) ¿Tuku lanikgolh latamanin tiku lixkajnit xlikatsikgo kxkilhtamaku Noé?

⁶ Pero «Jehová tlan akxilhli Noé» xlakata «xaʼakgstitum» xwanit chu «ni tlawalh tuku nitlan chuna la amakgapitsin latamanin». Xlakata «ni xmakgxtakga xaxlikana Dios» Jehová lakgayawalh natlawa akgtum lanka arca (Gén. 6:8, 9, 14-16). Chuna la xʼamaka tlawakan uma arca, xʼamakgo litamakgtayakgo latamanin chu animales akxni xmilh Munkaklat. Noé tlawalh «putum tuku Jehová xlimapakgsinit». Xlakata liwana lakkaxwililh la xʼama tlawa uma arca chu xlakata xfamilia makgtayanankgolh, Noé tlan tlawalh arca. Akxni putum animales xtanukgonit kʼarca «Jehová malakchawalh malakcha» (Gén. 7:5, 16).

⁷ Munkaklat nema timilh kata 2370 akxni nina xmin Jesús, Dios masputulh «putum tuku xʼanan kkatiyatni», pero Dios kalakgmaxtulh kʼarca, Noé chu xfamilia (Gén. 7:23). Putum tiku lamakgo uku, xkamanan Noé chu xla xlakgkgawasan. Pero latamanin tiku lixkajnit xlikatsikgo chu ni xtanumakgolh kʼarca nikgolh. ¿Tuku xlakata? Xlakata ni kgaxmatnikgolh Noé «nti ntiliakgchuwinalh lantla Dios natlaway ntalulokgtat» (2 Ped. 2:5).

8. ¿La likatsiyaw pi israelitas liwana xtalakkaxtawilakgonit akxni Dios kalimapakgsilh natanukgo kʼTiyat nema xKawanikanit pi Nakamaxkikan?

 ⁸ Xtitaxtunita akgtsayan ciento kata la timilh Munkaklat, Jehová kalakkaxwililh israelitas la akgtum kachikin. Putum xlatamatkan chu la xkakninanikgo Jehová liwana xlakkaxwilikanit. Akgtum liʼakxilhtit, xkgalhikgo lhuwa sacerdotes chu levitas, chu na xwilakgo «lakpuskatin tiku xtlawakgo taskujut niku xlaktanukan kchiki niku xtamasta takaknin, chuna la xlakkaxwilikanit» (Éx. 38:8). Pero akxni Jehová limapakgsilh xkachikin natanukgo kxtiyat Canaán, lhuwa tiku pekuankgolh chu ni kgalhakgaxmatkgolh. Kaj Josué chu Caleb mastakgolh tlan tamakatsinin akxni kiʼakxilhkgolh Tiyat nema xKawanikanit pi Nakamaxkikan. Wa xlakata Dios kawanilh umakgolh tiku ni xkanajlanikgo: «Ni katitanutit ktiyat niku xakwanit pi nakkatalatamayan, kajwatiya Caleb xkgawasa Jefuné chu Josué xkgawasa Nun» (Núm. 14:30, 37, 38). Alistalh, Jehová lakgayawalh Josué nakapulalin israelitas (Núm. 27:18-23). Akxni nialh lhuwa kilhtamaku xtsankga xlakata Josué xkatamaknulh israelitas kʼCanaán, wanilh: «Ni nataxlajwaniya chu tliwakga kawanti. Ni lhpipakg kalat chu ni kapekuanti, xlakata Jehová miDios tawilan anta niku napina» (Jos. 1:9).

9. ¿Tuku xlakpuwan Rahab xpalakata Jehová chu xkachikin?

⁹ Jehová xlikana putum kilhtamaku xtawi Josué. Akgtum liʼakxilhtit, kalilakpuwaw tuku lalh kata 1473. Israelitas xwilakgo lakatsu kkachikin Jericó, chu Josué kamalakgachalh chatiy skgalananin xlakata naʼakxilhkgo kachikin Canaán. Anta lakgapaskgolh Rahab, chatum puskat tiku ksta xmakni, xla kamatsekgli akxni mapakgsina limapakgsinalh nakachipakan. ¿Tuku xlakata chuna tlawalh? Rahab kawanilh skgalananin: «Akit liwana kkatsi pi Jehová nakamaxkiyan país [...]. Xlakata kkatsinitaw pi Jehová maskakalh xaSpinini pupunu kmilakatinkan [...], chu wa tuku katlawanitit chatiy xmapakgsinanin amorreos». Chu kawanipa: «Jehová miDioskan wa Dios xalak akgapun chu wa Dios xalak katiyatni» (Jos. 2:9-11). Xlakata Rahab tatayalh Jehová chu  xkachikin xalak kxkilhtamaku, Jehová lakgmaxtulh Rahab chu xfamilia akxni israelitas akgchipakgolh Jericó (Jos. 6:25). Rahab limasiyalh takanajla chu lakgachixkuwililh Jehová chu xkachikin.

10. ¿Tuku kawanilh Jesús judíos tiku xpulalinkgo takanajla chu tuku xlakata?

¹⁰ Israelitas akgchipakgolh tiyat xla Canaán, akgatunu akgatunu kachikin chu Josué xkapulalima. Pero, ¿tuku lalh alistalh? Akgtum mil akgkitsis ciento kata nema titaxtulh, israelitas ni kgalhakgaxmatparakgolh Jehová. Akxni xKgawasa Dios milh kKatiyatni, lu nialh xkgalhakgaxmatkgo Jehová chu nipara xpalakachuwinanin, wa xlakata Jesús limapakuwilh Jerusalén, tiku «makgnikgoy xpalakachuwinanin Dios» (kalikgalhtawakga Mateo 23:37, 38). Jehová kalakgmakgalh judíos tiku xpulalinanin takanajla xwankgonit xlakata ni kgalhakgaxmatkgolh. Wa xlakata Jesús kawanilh: «Xta[ma]pakgsin Dios, nakamakglhtikanatit, na wa namakamaxkikgokan nchixkuwin wa nti naliyankgoy xlatamatkan wa ntu mininiy» (Mat. 21:43).

11, 12. 1) ¿Tuku litasiyalh kxapulana siglo pi Jehová laksakli xasasti xkachikin? 2) ¿Tiku litaxtukgolh xasasti xkachikin Dios?

¹¹ Kxapulana siglo Jehová lakgmakgalh kachikin Israel nema ni xkgalhakgaxmatninan. ¿Xwamputun uma pi nialh xʼama anan akgtum kachikin nema liwana xtalakkaxwililh unu kKatiyatni? Ni chuna, Jehová laksakli atanu kachikin nema kstalanikgo Jesús chu xtamasiyat. Uma xasasti kachikin tsukulh kPentecostés xla kata 33, akxni 120 kstalaninanin Cristo xtamakxtumikgonit kʼJerusalén, chu «kaj xamakgtum nchu ntitakgaxmatli lu[...] palha ntu ntimakawa ntimincha nkʼakgapun, kaj xtachuna xmakasanat un ntu lu[...] tliwakga mpala xlawi, na anta nchu [litatsamalh] kchiki». Alistalh «ntitasiyunikgolh lhkuyat xtachuna simakgat wa ntu ntakgpitsinikgolh ntitayanikgolh kxokgspun xakgxakgakan nchatunu. Paks chi tilitatsamakgolh spíritu santo, na tanuj tachuwin ntitsukukgolh lichuwinankgoy, wa lantlata xlimachuwinikgoy spíritu» (Hech. 2:1-4). Tuku lalh nema kaks malakawaninan, liwana limasiyalh pi Jehová xkamakgtaya uma xasasti kachikin xla kstalaninanin Cristo.

¹² Amacha kilhtamaku, «akgtutu mil chixkuwin» na kstalaninanin Cristo litaxtukgolh. Biblia kinkawaniyan pi «na wa nkimPuchinakan, xmaliwakatilhama nchali chali nkgamputum kanajlananin wa nti xakgaputaxtutilhakgoy» (Hech. 2:41, 47). Lu tlan kakitaxtunilh kstalaninanin Cristo la xlichuwinamakgo Dios, wa xlakata Biblia wan: «Xtakgawanima xtachuwin nkintlatikan, na lu[...] xtalhuwima limakgalhtawakgat kʼJerusalén». Asta «lhuwa [sacerdotes] xlakgachixkuwikgoy ntakanajla» (Hech. 6:7). Chuna, lhuwa tiku makgamakglhtinankgolh tamasiyat nema xlichuwinankgo xasasti xkachikin Dios. Alistalh, akxni Jehová tsukulh kalimin «yama wanti ni judíos xwankgonit» kcongregación xla kstalaninanin Cristo, limasiyapa pi xkamakgtayama xkachikin (kalikgalhtawakga Hechos 10:44, 45, TXS, 1999).

13. ¿Tukuya taskujut lakgayawalh Dios xasasti xkachikin?

¹³ ¿Tukuya taskujut kalakgayawalh Dios kstalaninanin Cristo? Liwana xkatsikgo tuku xlitlawatkan xwanit. Jesús xkawilininit liʼakxilhtit. Akxni aku xtamununit, tsukulh lichuwinan «xta[ma]pakgsin akgapun» (Mat. 4:17). Kamasiyanilh kstalaninanin nachuna natlawakgo. Na kawanilh: «Na nalichuwinanatit kʼJerusalén nkimpalakata, chu xlikatlanka kJudea, chu kSamaria, chu asta awatiya kxtankgana [o makgat] tiyat» (Hech. 1:8). Xapulana kstalaninanin akgatekgskgolh tuku xlitlawatkan xwanit. Akgtum kilhtamaku, akxni Pablo chu Bernabé, xwilakgolh kAntioquía xla Pisidia, kawanikgolh xtalamakgasitsin judíos: «Wixin nti xapulana xlakaskinka xkalixakgatlikantit xtachuwin Dios; wampi  kumu ni matlaniyatit lantla xkalakgchan latamat xlipan, pus wa nchu wa naklakgankgoyaw xakgmakgat chixkuwin. Sampi chuna nkinkalimapakgsinitan nkimPuchinakan, tiwaj: “Kxkgakganat xaʼakgmakgat chixkuwin kkaliwilinitan, lakimpi mimpalakatakan nalikgalhikgoy akgaputaxtut lantla xlikatlanka asta kxtankgana tiyat”» (Hech. 13:14, 45-47). Lata xapulana siglo xkachikin Dios kkatiyatni lichuwinama tuku Dios tlawanit xlakata nakalakgmaxtu latamanin.

14. 1) ¿Tuku akgspulalh Jerusalén kxapulana siglo? 2) ¿Tiku lakgtaxtukgolh?

¹⁴ Lhuwa judíos ni makgamakglhtinankgolh xalakwan xalaksasti tamakatsin chu ni kgalhakgaxmatkgolh xtamakatsin Jesús, tiku kawanilh kstalaninanin: «Akxni naukxilhatit Jerusalén limakstuka nkgamptum ntropa, wa nalikatsiyatit mpi wa xlisputni chinitta. Pus wa nchu nti wilakgolh nawan kxatiyat Judea, katsalakgolh; kalaksipijni nkankgolh; chi nchu wa nti ntanumakgo [kkachikin], kataxtunikgolh; chi nchu wa nti kpukuxtu xtawilakgolh, ni katitanukgolh [kkachikin]» (Luc. 21:20, 21). Uma kgantaxtulh chuna la xwankanit. Xlakata xkamakaksakgolh judíos tiku xtatlankanimakgo, soldados romanos stiliwilikgolh Jerusalén kkata 66, chu xkapulalima Cestio Galo. Pero kaj xamakgtum tapanukgolh. Chuna kstalaninanin Cristo tlan taxtukgolh kʼJerusalén chu Judea. Eusebio, chatum tiku lichuwinan tuku lanit makgasa, wa pi lhuwa tiku patakutkgolh kgalhtuchokgo wanikan Jordán chu ankgolh kPela, anta kPerea. Kata 70, soldados romanos taspitparakgolh, chu masputukgolh Jerusalén. ¡Lu tlan pi xaʼakgstitum kstalaninanin Cristo kgalhakgaxmatkgolh xtamakatsinin Jesús! Chuna tlan lakgtaxtukgolh.

15. ¿Tuku xlakata chuntiya kstakma congregación xla kstalaninanin Cristo maski tuwa tuku titaxtulh?

¹⁵ Maski lhuwa taʼakglhuwit, taputsastalanit chu atanu tuku tuwa titaxtukgolh kxtakanajlakan xapulana kstalaninanin Cristo, congregación chuntiya kstaktilhama (Hech. 11:19-21; 19:1, 19, 20). ¿Tuku xlakata? Xlakata Jehová xkasikulunatlawama (Prov. 10:22).

16. ¿Tuku xlitlawatkan xwanit chatunu kstalaninanin Cristo xlakata tliwakga xtawilalh xtakanajlakan?

¹⁶ Pero xlakata tliwakga xtawi xtakanajlakan kstalaninanin Cristo xtalakaskin xliskujkgolh. Lu xlakaskinka pi xlikgalhtawakgakgolh xTachuwin Dios, ni xmakgatsankgakgolh tamakxtumit chu katapaxuwana xlichuwinankgolh xTamapakgsin Dios. Uma xʼama kamakgtaya xlakata tliwakga xtawi xtakanajlakan chu makxtum xtawi congregación chuna la uku. Congregaciones liwana xtalakkaxwilikgonit. Natalan xlitamakgtayakgo taskujut nema xtlawakgo lakgkgolotsin chu siervos ministeriales, nema xatapaxuwan xkamakgtayakgo (Filip. 1:1; 1 Ped. 5:1-4). Lu xlipaxuwakgo akxni superintendentes viajantes xkalakgapaxialhnankgo chuna la Pablo (Hech. 15:36, 40, 41). Nila tiku nawan pi takaknin nema xmastakgo xapulana kstalaninanin Cristo ni xtachuna la xala uku. ¡Lu lipaxuwayaw pi Jehová liwana kalakkaxwililh kskujnin lata xamakgan chu la uku! *

17. ¿Tuku nakatsiyaw kʼartículo nema aku nalikgalhtawakgayaw?

¹⁷ Uma xaʼawatiya kilhtamaku, chuna la talakatsuwitilhama xlisputni xkakilhtamaku Satanás, xkachikin Jehová xalak katiyatni tlakg lakapala staktilhama. ¿Akxtum taskujmaw uma kachikin? ¿Staktilhama kintakanajlakan? Artículo nema aku nalikgalhtawakgayaw nakatsiyaw la akxtum nataskujaw uma kachikin.