KHÄ 1923 maranjja, Conservatório Dramático e Musical yateqañ utana jachʼa salapanjja, waljaniw tantachasipjjäna, São Paulo (Brasil) markana. Ukanjja, George Young jilataw mä discurso inglés aruta qhana arunakampi arstʼäna, mayniw portugués arur jaqokiparakïna. 585 tantachasirinakajj wali sum istʼapjjäna, Bibliat apstʼat textonakas portugués arutwa mä jachʼa pantallan uñstarakïna. Tukuyarojj portugués, alemán, inglés, italiano arunakat 100 folletonakaw lakirasïna, ukasti Jichhürunakan jakapki ukanakatjja millón millón jaqenakaw jan jiwapkaniti satänwa. Uka tantachäwisti ¡wali sumapuniw apasïna! Wasitatwa tantachäwejj pä uru qhepat apasini sasaw yatiykipasipjjäna. Ukampis ¿kunjamatsa uka markan tantachäwejj utjawayi?

1867 maranjja, Sarah Bellona Ferguson sat warmejj familiapampiw Estados Unidos markat Brasilar sarjjapjjäna. 1899 maransti, Estados Unidos markatwa jilapajj Bibliat apstʼat qellqatanak apäna, ukanak liytʼasaw Sarah warmejj cheqa yatichäwinak yatjjatäna. Jukʼamp yatjjatañ munasajja, Watch Tower sat revista inglés arut katoqañatakiw qellqayasïna. Bibliat yatjjatasajj walpun kusisïna, ukatwa Russell jilatarojj akham qellqäna: “Maynejj jayankchi ukasa, Diosan Arupat yateqaspawa, ukajj nayanwa qhan amuyasi” sasa.

Sarah warmejja, jaqenakar yatiyañatakiw wal chʼamachasïna, ukatwa akham jisktʼasïna: “¿Khitis nayarusa, familiajarusa, aka markankirinakarus Diosat yatichani?” sasa. 1912 maranjja, Brooklyn Betelatwa akham sas qellqapjjäna: “Mayniruw São Paulor khitanipjjä, jupasti portugués arutwa waranqa tratadonak apanini, ukasti ¿Kawkinkapjjes jiwatanakajja? satawa” sasa. 1915 maranjja, Bibliat Yatjjatirinakajj niyaw alajjpachar sarjjañäni sasaw suyasipkäna, uk yatisaw akham qellqäna: “¿Brasilasti Sudamericasti? [...]. Aka markanakan walja jaqenakaw Diosan Arupat yateqañ  munasipki, waljaw apthapiñajj utjaski” sasa. Cheqas ¡ukhamapuniskänwa!

1920 maranjja, Brasilankir kimsaqallqo marinero waynanakawa guerrar sarañ barcop Nueva York markan askichayasipkäna, ukhaw jupanakajj mä qawqha tantachäwir sarapjjäna. Río de Janeiro (Brasil) markapar kuttʼanjjasajja, kuntï yateqapkäna ukwa yatiyapjjäna. Ukatsti 1923 maranjja, George Young sat peregrino (jan ukajj tamanak tumptʼiri) jilataw uka markarojj purïna, marzo phajjsina. Waljanin Bibliat yatjjatañ munapjjatapwa amuyäna. Qhepatsti qellqatanaka portuguesar jaqokipasiñapatakiw jaytawayäna, ukatsti São Pauloruw viajïna, ukansti 600.000 jaqenakaw jakasïna. Kunjamtï qalltan saniwayktanjja, uka markanwa jilatajj mä discurso arstʼäna, ukat ukanarakwa Millón millón sat folleto lakirarakïna. Jilatajj sänwa: “Janiw khiti yanapiris utjkänti, ukatwa periodiconak toqe invittʼirïta”, ukatjja “IBSA * ukankirinakajj nayrïr kutipuniw ukham arstʼäwinak Brasilan lurapjjerïna” sasa.

Watch Tower, diciembre 15, 1923 sat revistanjja, akham sasaw Brasil markat yatiyäna: “Brasilanjja, junio phajjsinwa Diosan Arupat yatiyañajj qalltasi, janïraw qellqatanakas utjkiti, ukampis Jehová Diosan bendicitapajj qhanaw amuyasi” sasa. São Paulonjja, Young jilatajja, junio qalltat septiembre tukuykamajja, 21 discursonakwa arstʼäna, ukampis pä arstʼäwipatakwa uka revistan yatiyasïna. 3.600 ukhaniw tantachasipjjäna. Río de Janeiro markanjja, Diosan Arupajj jukʼat jukʼatwa taqe cheqaru purtʼaskäna, mä qawqha phajjsinakatjja portuguesat 7.000 qellqatanakaw lakirasïna. Watch Tower sat revistajja 1923 maratwa (noviembre-diciembre phajjsita) portuguesaru qellqasiñ qalltasiwayi.

Young jilatajja, Sarah warmiruw visittʼäna. Kunjamsa jikisipjjäna ukjja, Watch Tower revistajj akham siwa: “Sarah warmejj salar mantasajja, Young jilatar uñjasajj jan aruniw qheparäna. Ukatsti jilatar aruntasajja, ukhamakiw uñkatäna, mä jukʼatjja akham sasaw jisktʼäna: ‘¿Cheqapunit peregrinöta?’” sasa. Mä qawqha tiempotjja, jupasa wawanakapat mä qawqhanisa bautisasjjapjjänwa. Bautisasiñatakisti Sarah warmejj 25 marwa suyäna. Watch Tower agosto 1, 1924 revistanjja siwa: “50 jilat kullakanakaw Brasilan bautisasipjjäna, waljanejj Río de Janeiro markana” sasa.

Ukhat jichhakamajja, 90 maranakaw pasjje, ukampis janiw “¿Brasilasti Sudamericasti?” sas jisktʼasiñajj wakisjjeti. Uka markanjja, 760.000 jilat kullakanakatsa jilaw Diosan Reinopat yatiyasipki. Ukatsti, Sudamérica toqenkiri markanakanjja portugués, español ukhamaraki kunayman arunakatwa taqenir yatiyasiskaraki. 1915 maranjja, Sarah warmejj “waljaw apthapiñajj utjaski” sasin siskäna ukajj cheqaskapunïnwa. (Brasil markat qellqanita.)