TAWEN 1923 idi. Napusek iti tao ti siled a pagkonsiertuan iti Drama and Music Conservatory of São Paulo! Agpalpalawag ni George Young ket sentensia por sentensia a maipatpatarus dayta iti Portugues. Siaatentibo nga agdengdengngeg ti amin a 585 a timmabuno. Dagiti teksto ti Biblia iti Portugues ket naiparang iti iskrin. Nagngudo dayta iti pannakaibunong ti ginasut a kopia ti bokleta a Millions Now Living Will Never Die! agraman ti sumagmamano nga Ingles, German, ken Italiano nga edision. Nagballigi ti lektiur! Nagwaras ti damag. Dua a rabii kalpasanna, napusek manen ti siled para iti sabali pay a lektiur. Ngem kasano a nangrugi daytoy?

Idi 1867, ni Sarah Bellona Ferguson a taga-Estados Unidos agraman ti pamiliana ket immakar iti Brazil. Idi 1899, kombinsido ni Sarah a nasarakannan ti kinapudno kalpasan a nabasana ti sumagmamano a literatura ti Biblia nga insangpet ni adingna manipud Estados Unidos. Magustuanna a basaen dagita isu a nagsuskriber iti Ingles a Watch Tower. Naragsakan iti naammuanna a mensahe ti Biblia ket nagsurat ken Kabsat C. T. Russell, a kinunana a maysa isuna kadagiti “sibibiag a pammaneknek nga adu pay ti mabalin a kasabaan iti adayo a luglugar.”

Inkagumaan ni Sarah Ferguson nga iranud ti kinapudno iti sabsabali, ngem masansan a pampanunotenna no siasino ti mabalin a tumulong kenkuana ken ti pamiliana, kasta met ti adu a nasingpet a tattao iti Brazil. Idi 1912, imbaga ti Brooklyn Bethel nga adda umay iti São Paulo ket agitugot iti rinibu a tract a Where Are the Dead? iti lengguahe a Portugues. Idi 1915, masmasdaaw ni Sarah ta ekspektaren ti adu a Bible Students a dandanidan mapan idiay langit. Inyebkasna ti kaririknana iti suratna: “Kasano ngaruden ti Brazil ken ti intero nga Abagatan nga America? . . . No panunotem no kasano kadakkel ti Abagatan nga America,  nabatad nga adu pay ti masapul nga anien.” Wen, talaga nga adu pay ti maani!

Idi agarup 1920, walo nga agkabannuag a marinero a taga-Brazil ti immatender iti sumagmamano a gimong ti kongregasion iti New York City bayat a matartarimaan ti naglugananda a barko a pakigubat. Idi nagawiddan iti Rio de Janeiro, inranudda ti naammuanda a namnama manipud iti Biblia. Di nagbayag, idi Marso 1923, simmangpet iti Rio de Janeiro ni George Young, a maysa a pilgrim, wenno agdaldaliasat a manangaywan, ket nakasarak sadiay kadagiti interesado. Inyurnosna a maipatarus iti Portugues ti sumagmamano kadagiti publikasiontayo. Napan ngarud ni Kabsat Young iti São Paulo, siudad nga addaan idi iti agarup 600,000 nga umili. Nangipaay iti lektiur ken nagibunong iti bokleta a Millions, kas nadakamat iti rugi daytoy nga artikulo. “Gapu ta agmaymaysaak,” kinunana, “kasapulan nga ipakaammok daytoy babaen iti diario.” Dagitoy ti “kaunaan a nayanunsio a lektiur iti publiko a suportado ti I.B.S.A. iti Brazil,” innayonna. *

Iti maysa a report maipapan iti Brazil, kuna ti Disiembre 15, 1923, a Watch Tower: “Nakaskasdaaw ti panangbendision ti Apo iti trabahotayo gapu ta idi laeng Hunio 1 a nangrugi ti panangasaba sadiay ken awan pay idi ti literatura nga usarenda.” Kuna pay ti report a 21 a publiko a lektiur ti naiparang manipud Hunio 1 agingga’t Septiembre 30, nga agdagup iti 3,600 ti timmabuno. Dua kadagita ti imparang ni Kabsat Young iti São Paulo. In-inut met a naiwaras ti mensahe ti Pagarian iti Rio de Janeiro. Ket iti sumagmamano laeng a bulan, nasurok a 7,000 a publikasiontayo iti Portugues ti naipaima! Kasta met, nangrugi a maipablaak ti Watch Tower iti Portugues iti ruar a Nobiembre-Disiembre 1923.

Binisita ni George Young ni Sarah Ferguson, ket kastoy ti report ti Watch Tower: “Simrek [ni Sarah] iti salas, ket medio nabayag bassit a di nakauni. Nakialamano ken Kabsat Young a mingmingminganna ti rupana, sa kinunana: ‘Talaga kadi a maysaka a Pilgrim?’” Idi agangay, nabautisaran ni Sarah ken ti dadduma nga annakna. Kinapudnona, 25 a tawen a nagur-uray iti pannakabautisarna! Dinakamat ti Agosto 1, 1924, a Watch Tower a 50 ti nabautisaran iti Brazil, a kaaduan ket taga-Rio de Janeiro.

Ita, agarup 90 a tawen kalpasanna, saantayon a kasapulan nga isaludsod: “Kasano ngaruden ti Brazil ken ti intero nga Abagatan nga America?” Nasurok a 760,000 a Saksi ni Jehova itan ti mangikaskasaba iti naimbag a damag iti Brazil. Ket iti intero nga Abagatan nga America, maikaskasaba itan ti mensahe ti Pagarian iti Portugues, Espaniol, ken iti adu a katutubo a lengguahe. Idi 1915, umiso ni Sarah Ferguson idi kinunana, ‘Adu pay ti masapul nga anien.’—Manipud iti archives-tayo iti Brazil.