NA 1923, nzo yina bo ke salaka bansaka na mbanza São Paulo fulukaka ti bantu. Bo vandaka kuwidikila George Young na dikebi yonso! Muntu ya nkaka vandaka kubalula diskure na yandi na Kiportige. Bantu 585 yina vandaka pana, vandaka kuwidikila yandi na dikebi. Bo sadilaka projecteur sambu na kumonisa baverse na tablo mosi na ntwala. Na nsuka na yo, bo pesaka bantu mingi kamukanda Mafunda ya Bantu ya Ke Zinga Bubu Yai Ta Fwa Diaka Ve!, yina vandaka mpi na Kingelesi, Kialema mpi na Italien. Diskure vandaka kitoko mpi nsangu na yo panzanaka. Bo songisaka yo diaka bankokila zole yina landaka, mpi bantu fulukaka na nzo yina sambu na kulanda diskure ya nkaka. Kansi nki salaka nde badiskure yina kusalama?

Na 1867, Sara Bellona Ferguson katukaka na États-Unis ti dibuta na yandi mpi kwendaka na Brésil. Na 1899, Sara zabaka kieleka na nima ya kutanga mikanda yina ke tendulaka Biblia yina leke na yandi ya bakala kwisaka ti yo ntangu yandi katukaka na États-Unis. Sambu yandi vandaka kuzola kutanga mingi, Sara fulusaka formilere ya kulomba nde bo tindilaka yandi ba Nzozulu ya Nkengi ya Kingelesi. Kiese ya kuzaba nsangu ya Biblia pusaka yandi na kusonikila Mpangi Charles Taze Russell nde, yandi mosi kele “nzikisa ya ke ndimisa nde nsangu lenda kumina ata ti bantu yina kele ntama kibeni.”

Sara Ferguson salaka bikesa sambu na kuzabisa kieleka ya Biblia na bantu ya nkaka, kansi mbala mingi yandi vandaka kudiyula kana nani ta sadisa yandi ti dibuta na yandi mpi bantu ya nkaka ya ntima-mbote ya Brésil. Na 1912, Betele ya Brooklyn zabisaka yandi nde mpangi mosi ta kwenda na São Paulo ti mafunda ya batrakiti yina kele ti ntu-diambu Bafwa Kele Wapi? na Kiportige. Na 1915, yandi tubaka nde yandi vandaka kuyituka na kuwa nde Balongoki mingi ya Biblia vandaka kuyindula nde ntama mingi ve Yezu ta kwisa kubaka bo sambu na kukwenda kuzinga na zulu. Sambu na kumonisa dibanza na yandi, yandi sonikaka nde: “Ebuna nki ta kumina bantu ya Brésil mpi bantu yonso ya Amerika ya Sudi? . . . Na kutadila nene ya Amerika ya Sudi, beto ke bakisa nde kisalu  yina fwete salama sambu na kukatula bambuma kele mingi.” Ya kieleka, kisalu ya mingi fwete salama!

Pene-pene ya 1 920, batoko nana ya Brésil yina vandaka kusala na maswa kwendaka na balukutakanu ya dibundu na Mbanza New York ntangu bo vandaka kuyidika maswa na bo. Ntangu bo vutukaka na Rio de Janeiro, bo zabisaka bantu ya nkaka mambu ya mpa yina bo longukaka na Biblia. Ntangu fioti na nima, na Marsi 1 923, George Young yina vandaka nkengi ya nziunga, kumaka na Rio de Janeiro, kisika yina yandi kutanaka ti bantu yina vandaka kusepela na kieleka. Yandi bakaka bangidika sambu bo balula mikanda mingi na Kiportige. Na nima, Mpangi Young kwendaka na São Paulo, mbanza mosi yina vandaka ti bantu kiteso ya 600 000. Kuna, yandi salaka diskure mpi kabulaka bamilio ya tumikanda mutindu bangogo ya luyantiku ya disolo yai monisaka yo. Mpangi Young ke tuba nde: “Sambu mono vandaka mono mosi, yo lombaka nde mono zabisa nsangu yina na nzila ya bazulunalu ya bimwangi-nsangu.” Yandi ke yika nde: “Yo vandaka mbala ya ntete ya kuzabisa nsangu na bantu yonso na lusadisu ya kimvuka I.B.S.A. na Brésil.” *

Na rapore mosi yina bo tubilaka insi Brésil, Nzozulu ya Nkengi ya Kingelesi ya Desembri 15, 1 923 tubaka nde: “Kana beto tadila mutindu kisalu yai yantikaka na Brésil na Yuni 1 mpi ata mukanda mosi ve vandaka na ntangu yina, yo ke monana pwelele nde Mfumu me sakumuna kisalu.” Rapore yikaka nde diskure ya Mpangi Young na São Paulo vandaka diskure ya zole na kati ya badiskure 21 yina bo salaka yantika na Yuni 1 ti na Septembri 30, mpi bantu 3600 vukanaka na kulanda yo. Na Rio de Janeiro, nsangu ya Kimfumu vandaka kupanzana malembe-malembe. Mpi kaka na nima ya bangonda fioti, bansamuni kabulaka mikanda kuluta 7 000 na Kiportige! Diaka kubasika ya Nzozulu ya Nkengi na Kiportige yantikaka ti nimero ya Novembri-Desembri 1 923.

George Young bingaka Sara Ferguson, mpi Nzozulu ya Nkengi tubaka na yina me tala mpangi yai nde: “Mpangi-nkento kwendaka na estrade, mpi lutisaka mwa ntangu kukonda kutuba ata kima mosi. Ntangu Sara simbaka Mpangi Young na diboko mpi talaka yandi na luse, nsuka-nsuka Sara tubaka nde: ‘Keti ya masonga nge kele nzenza?’” Ntangu fioti na nima, Sara mpi bana na yandi ya nkaka bakaka mbotika. Na kutuba ya mbote, yandi vandaka kuvingila nde yandi lungisa bamvula 25 sambu yandi baka mbotika. Na Augusti 1, 1 924 Nzozulu ya Nkengi tubaka nde bantu 50 bakaka mbotika na Brésil, mingi-mingi na Rio de Janeiro.

Bubu yai, bamvula 90 na nima, beto kele ve na mfunu ya kuyula nde: “Ebuna nki ta kumina bantu yonso ya Brésil mpi ya Amerika ya Sudi?” Bambangi ya Yehowa kuluta 760 000 ke samunaka nsangu ya mbote na Brésil. Mpi na Amerika ya Sudi nsangu ya mbote ya Kimfumu ke na kulongama na Kiportige, na Kiespaniole, mpi na bandinga mingi ya nkaka. Na 1 915, Sara Ferguson vandaka na kikuma ya kutuba nde: ‘Kisalu Yina Fwete Salama Sambu na Kukatula Bambuma Vandaka Mingi.’—Yo me katuka na mikanda na beto ya ntama na Brésil.