AZO kwa kere mvhura 1923. Sala zomaudano noyikwamusika zomoSão Paulo kwa zulire vantu! George Young kwa geve siuyungwa. Aso kwa si torokere moRuputu. Navenye 585 ava va ka pongere kwa purakenene nelituromo. Matjangwa gomoRuputu kwa monekere pekuma kupitira mehina lyokulikida mafano. Mokuhulisa, mafere goyimbapiratjangwa yosiparatjangwa Millions Now Living Will Never Die! kwa yi gaverere moRuputu, kumwe neyi yoRuingilisa noRundovesi ntani neyi yoRuitalia. Aso kwa kere siuyungwa sokunkondopeka! Ano mbudi kwa lihene. Konyima zomazuva gavali, sala kwa ya zulire hena morwa kwa ya gaverere mo siuyungwa nasopeke. Nye yisinke ya twaredesere koyihorokwa eyi?

Momvhura 1867, Sarah Bellona Ferguson kwa tundire nepata lyendi koAmerika va dirukire koBrasilia. Mo-1899, Sarah ga yi dimbwilire asi ana gwana usili konyima zokuresa yimbapiratjangwa yoBibeli eyi ga ka pitwire mumbyendi gomumati ogu ga ka tundire koAmerika. Ngomukadi ogu ga kere neharo lyokuresa, kwa tulire mo ehundiro koWatch Tower. Morwa kuhafera mbudi zomoBibeli, age kwa tjangerere munazinyetu C. T. Russell, nokumusingonwena asi “kwato ogu ga kara ure unene asi a dire kugwana mbudi zongwa.”

Sarah Ferguson kwa rugene paapa ga hulira mokutantera ko wopeke usili womoBibeli, nye age ngali pura asi yilye ogu nga twikira kumuvatera nepata lyendi, ntani novantu navenye wovawa womoBrasilia. Mo-1912, Beteli zomoBrooklyn kwa mu divisire asi kweli ogu ana kutunda koSão Paulo nomayovi goyitratate gosiparatjangwa Kupi va kara vafe? meraka lyoRuputu. Ano 1915 age kwa tente asi kwa mu tetukisire pokudiva asi sinzi soValirongi woBibeli kwa ndindilire asi ngava za meguru. Mokupwagesa malizuvho gendi, age kwa tjenge asi: “Ngapi kuhamena vantu womoBrasilia ntani womoAmerika Mbindakano nazinye? . . . Nsene o tara unene waAmerika Mbindakano mouzuni, ngayi ku  rerupira mokudimburura asi pana kara sirugana sosinene somuzangu twa hepa simpe kurugana.” Yosili, sirugana sosinene somuzangu ngava si rugana!

Koyiha 1920, vakwayita ntantatu woVabrasilia wovadinkantu kwa zire komapongo gamwe mositata saNew York, posiruwo oso sikepa sawo soyita kuna kusiwapaika. Apa va tengwire koRio de Janeiro, awo kwa ka tanterere ko vakwawo ehuguvaro lyepe eli va lirongere moBibeli. Konyima zokaruwogona, mwaNsinano 1923, George Young ogu ga kere mutareli gokudingura, yipo ga ka sikire koRio de Janeiro, omu ga ka gwene vantu ava va kere neharo. Yipo ga tulire po mawapaiko gokutoroka yimbapiratjangwa yimwe moRuputu. Munazinyetu Young kwa zire hena koSão Paulo, mositata esi va tungire konyara vantu wokusika 600 000. Oko kwa ka geve siuyungwa nokukahanesa yifo Millions, ngomu vana yi tumbura ketamekero lyosirongwa esi. Age kwa divisire asi: “Kukara nyamelike, ame na hepere kukorera mezuvhiso lyokupitira mosaitunga.” Age kwa gwederere ko asi eyi kwa kere “yiuyungwa yanavenye yokuhova ngava divisa mosaitunga pokuruganesa edina I.B.S.A. moBrasilia.” *

Merapoto lyoRuhungu 15 Sindimba 1923 kuhamena Brasilia, kwa tente asi: “Nsene tu tara asi sirugana kwa tamekere 1 Pembagona ntani asi kapi pwa kere yimbapiratjangwa posiruwo sina, ayo kutetukisa omu Hompa ga tungika sirugana esi.” Erapoto kwa gwedere ko asi munazinyetu Young kwa geve yiuyungwa yanavenye 2 moSão Paulo yoyiuyungwa 21 eyi ga hepere kugava kutundilira 1 Pembagona dogoro 30 Sitarara, moyiuyungwa yivali oyo vantu 3 600 va ya pongere. MoRio de Janeiro, mbudi zoUhompa kwa lihene kanunu-kanunu. Ano momakwedi gongandi tupu, konyara 7 000 goyimbapiratjangwa yetu moRuputu kwa yi hanesere. Ntani hena, sifo soRuhungu moRuputu kwa tamekere kusipwagesa mwaMangundu-Sindimba 1923.

George Young kwa ka dingwire Sarah Ferguson, ntani The Watch Tower kwa rapota asi: “Munazinyetukadi kwa wizire kwaYoung, morwa kwa tukukire age kapi ga vhulire kuuyunga. Makura ta kwata ewoko lyamunazinyetu Young, nokumutara mosipara, makura ta tanta asi: ‘Ove yosili mutareli gokudingura ndi?’” Age novana vendi vane tava ka gwana ekuho. Age kwa ndindilire nomvhura 25 mokugwana ekuho! Ruhungu 1 Siwogedi 1924, kwa tumbwire asi vantu 50 kwa gwene ekuho moBrasilia, sinzi sawo womoRio de Janeiro.

Konyima zonomvhura 90, ose kapi twa hepa kulipura asi: “Ngapi kuhamena vantu womoBrasilia ntani womoAmerika Mbindakano nazinye?” Nombangi daJehova dokupitakana 760 000 kuna kuzuvhisa mbudi zongwa moBrasilia. Ntani Amerika Mbindakano nazinye kuna kuzuvhisa mbudi zongwa moRuputu nomoRusipanye ntani nomomaraka gomanzi gokulisiga-siga. Mo-1915, Sarah Ferguson ga hungikire pokutanta asi: ‘Pana kara sirugana sosinene somuzangu twa hepa kurugana.’—Upungwiro woyininke yanare moBrasilia.