NGWAGA ke wa 1923. Holo ya Drama and Music Conservatory ya kua São Paulo e tletše wa go falala! Na o kgona go kwa lentšu leo le kwagalago gabotse la George Young? Polelo ya gagwe e fetolelwa ka Sepotokisi. Batheetši ka moka ba 585 bao ba lego gona ba theeditše ka kelohloko. Ditemana tša Beibele di bontšhwa sekirining ka Sepotokisi. Mafelelong, dikopi tše lekgolo tša pukwana ya Millions Now Living Will Never Die! di a abja, gotee le ka Seisemane, Sejeremane le Setaliana. Polelo ya Ngwanabo rena Young e sepetše gabotse! Batho ba tšama ba phatlalatša taba yeo. Ka morago ga mašego a mabedi, holo e tletše gape bakeng sa polelo e nngwe. Eupša ke’ng seo se lebišitšego ditiragalong tše?

Ka 1867, Sarah Bellona Ferguson o ile a hudugela Brazil le lapa la gabo ba etšwa United States. Ka 1899, Sarah o ile a lemoga gore o hweditše therešo ka morago ga go bala dikgatišo tše di theilwego Beibeleng tšeo kgaetšedi ya gagwe a tlilego le tšona Brazil go tšwa United States. Ka ge a be a fišegela go bala, o ile a dira dipeeletšo tša Morokami wa Seisemane. A thabišitšwe ke molaetša wa Beibele, o ile a ngwalela Ngwanabo rena C. T. Russell gomme a itlhalosa e le “bohlatse bjo bo lego molaleng bja gore ga go na motho yo a lego kgole kudu go ka fihlelelwa ka molaetša wa Beibele.”

Sarah Ferguson o ile a dira sohle seo a ka se kgonago go botša ba bangwe therešo ya Beibele, eupša gantši o be a ipotšiša gore ke mang yo a bego a tla tšwela pele go thuša yena le lapa la gabo, gotee le batho ka moka ba ba lokilego ba kua Brazil. Ka 1912, Bethele ya Brooklyn e ile ya mo tsebiša gore motho yo mongwe o be a tlo tla São Paulo le dipampišana tše dikete tša Sepotokisi tšeo di nago le sehlogo se se rego Where Are the Dead? Ka 1915 o ile a re ka mehla o be a makatšwa ke gore Barutwana ba bantši ba Beibele ba be ba letetše gore kgauswinyane ba tla rotošetšwa legodimong. Sarah o ile a hlalosa pono ya gagwe ka taba ye ka go ngwala gore: “Go thwe’ng ka Brazil le Amerika Borwa ka moka? . . . Ge o nagana kamoo Amerika Borwa e lego naga e kgolo ka gona,  go bonolo go bona gore go sa na le modiro o montši wa puno wo o swanetšego go dirwa.” Ee, modiro o mogolo wa puno o be o sa tlo dirwa!

Ka bo-1920, basesiši ba seswai ba bafsa ba go tšwa Brazil ba ile ba ba gona dibokeng tša phuthego kua New York City ge sekepe sa bona sa ntwa se be se lokišwa. Ge ba boetše Rio de Janeiro, ba ile ba botša ba bangwe ka kholofelo ya bona e mpsha yeo ba ithutilego yona ka Beibeleng. Ka moragonyana ga moo, ka March 1923, George Young, yoo e bego e le mosepedi wa bodumedi goba molebeledi wa mosepedi, o ile a goroga kua Rio de Janeiro moo a ilego a hwetša batho bao ba thabelago. O ile a rulaganya gore dikgatišo tše mmalwa di fetolelwe ka Sepotokisi. Go se kgale Ngwanabo rena Young o ile a ya São Paulo, e lego toropo yeo ka nako yeo e bego e na le badudi ba e ka bago ba 600,000. Ka ge go boletšwe mathomong a sehlogo se, gona moo o ile a nea polelo gomme a abela batho dipukwana tše di bitšwago Millions. O begile gore: “Ka ge ke be ke le noši, ke ile ka swanelwa ke go diriša dikuranta go laletša batho go tla dipolelong.” O okeditše ka gore tše e be e le “dipolelo tša mathomo tša phatlalatša tša go tšwelela dikuranteng go dirišwa leina la I.B.S.A. kua Brazil.” *

Morokami wa December 15, 1923 o boletše ka pego ya Brazil gore: “Ge re nagana gore modiro wa boboledi moo o thomile ka June 1 le gore ka nako yeo go be go se na dikgatišo, ke mo go makatšago go bona kamoo Morena a šegofaditšego modiro woo ka gona.” Pego ye e boletše gape gore dipolelo tša phatlalatša tša Ngwanabo rena Young kua São Paulo e bile tše 2 tša tše 21 tšeo a ilego a di nea go thoma ka June 1 go fihla ka September 30 gomme palomoka ya bao ba bilego gona e bile batho ba 3,600. Molaetša wa Mmušo o be o phatlalala ganyenyane-ganyenyane kua Rio de Janeiro. Le gona ka dikgwedi tše sego kae feela, ke ge go šetše go sepedišitšwe dikgatišo tša rena tša ka godimo ga tše 7,000 ka Sepotokisi! Go feta moo, Morokami wa Sepotokisi o ile wa thoma go gatišwa ka tokollo ya November-December 1923.

George Young o ile a etela Sarah Ferguson, gomme Morokami o begile gore: “Kgaetšedi yo o ile a tla ka phapošing ya baeng gomme ka nakwana a hloka mantšu. O ile a swara seatla sa Ngwanabo rena Young, a mo lebelela ka mahlong, ke moka mafelelong a re: ‘Na ka kgonthe o mosepedi wa bodumedi?’” Go se kgale, yena le ba bangwe ba bana ba gagwe ba ile ba kolobetšwa. Ge e le gabotse, o be a letile nywaga e 25 gore a kolobetšwe! Morokami wa August 1, 1924, o boletše gore batho ba 50 ba ile ba kolobetšwa kua Brazil, ba bantši ba bona ba be ba etšwa Rio de Janeiro.

Ga bjale, ka morago ga nywaga e 90, ga go sa hlokagala gore re botšiše gore: “Go thwe’ng ka Brazil le Amerika Borwa ka moka?” Dihlatse tša Jehofa tša ka godimo ga tše 760,000 di bolela ditaba tše dibotse kua Brazil. Le gona, ga bjale molaetša wa Mmušo kua Amerika Borwa ka moka o bolelwa ka Sepotokisi, Sepanishi le maleme a mantši a moo. Ka 1915, Sarah Ferguson o be a nepile ge a be a re: ‘Go be go sa na le modiro o montši wa puno wo o bego o swanetše go dirwa.’—Go tšwa bobolokelong bja rena kua Brazil.