KAY 1923 watapi, São Paulo llajtapi Sala de conciertos de Conservatório Dramático e Musical, nisqa, lugarqa runamanta juntʼa kasharqa. Hermano George Youngqa jatunmanta umallirichisharqa, chaypi kajkuna portugués qalluta parlasqankuraykutaj chay umallirichiyta portuguesman tijrachikorqa. Chay tantakuypi 585 runas karqanku, uj pantallanejtataj portugués qallupi Bibliaj versiculosninta rikuchikorqa. Umallirichiyninta tukunanpajtaj “May chhika runas kunan kausajkuna, wiñaypaj kausanqanku”, nisqa folletota portuguespi, alemanpi, inglespi, italianopi ima jaywakorqa, tukuyninpitaj jaywakorqa 100 folletos. Chay tantakuypi kajkuna chay umallirichiymanta tukuyman willarisqankuraykutaj, iskay chʼisinman chay lugarqa watejmanta juntʼallataj kasharqa. ¿Imaraykú tukuy chaykuna karqa?

Kay 1867 watapi, Sarah Bellona Ferguson familianwan Estados Unidosmanta, Brasilman riporqa. Kay 1899 watapitaj, publicacionesninchejta leerqa, mayqentachus sullkʼan Estados Unidosmanta aparqa, cheqa kajta tarisqantataj yuyarqa. Cheqa kajmanta yachakuyta munaspataj inglespi Watch Tower revistata sapa killa japʼinanpaj qhelqachikorqa. Cheqa kajta rejsisqanraykutaj hermano Russellman uj cartata qhelqarqa, chaypitaj kausayninta cheqa yachachiy tijrachinanpaj yanapasqanta, cheqa yachachiy yaku jina kasqanta, tukuypis chaywan yanapachikuyta atisqankuta ima nerqa.

Sarahqa yachakusqanta willananpaj mayta kallpachakorqa, nitaj yacharqachu pichus Diosta yupaychaypi ñauparinankupaj payta, familianta, Brasilpi tiyakojkunata ima yanapananta. Kay 1912 watapi Brooklyn Betelmanta, São Paulo llajtaman pillatapis kachanankuta ¿Maypitaj wañusqas kashanku?, nisqa tratadota portuguespi apachinankuta ima willarqanku. Kay 1915 watapitaj, Sarah yachakorqa, Bibliamanta Yachaqajkuna cieloman ripuyta suyakushasqankuta. Chayrayku  qhelqarqa: “¿Imataj kanqa Brasilpi, Sudamericapi tiyakojkunamanta? [...] Kaypi tiyakojkuna ashkha kanku, sutʼitataj rikukun runaman, ¡maytaraj willana kasqanta!”, nispa. Nisqanman jinapunitaj karqa.

Kay 1920 watapi Brasilmanta pusaj waynas Nueva York llajtapi uj tantakuyman rerqanku, barconkuta allinchapunankukama. Brasilman kutipuspataj imatachus yachakusqankuta willarqanku Río de Janeiro llajtapi. Kay 1923 marzo killapi qotuchakuykunata waturej jina llankʼaj George Young, Río de Janeiroman chayarqa. Chay llajtaman chayaspataj sutʼita repararqa runas cheqa kajmanta yachakuyta munasqankuta. Portugués qalluman wakin publicacionesta tijrachinankupaj wakichiytawan, São Paulomanñataj rerqa. Chaypitaj 600.000 runas tiyakorqanku. Chaypi umallirichiytawantaj May chhika runas, nisqa folletota runasman jaywarqa. Pay nin: “Sapallay kashasqayrayku, umallirichiyniyman runas jamunankoqa, periodicopi willakusqanmanta kasharqa”, nispa. Pay Brasilpi ñaupaj kutirayku umalliricherqa I.B.S.A. sutipi. *

Kay 15 de diciembre de 1923 watamanta Watch Tower revista Brasilmanta kayta nerqa: “Brasilpi juniollamantaraj willayta qallarikorqa, nitaj ima publicacionespis portuguespi karqachu. Señor willayninchejta bendecishasqantaj sutʼi rikukun”, nispa. Chay revista nisqanman jinataj hermano Youngqa, juniomanta septiembrekama 21 kutista umallirichisqanmanta, iskay kutillata São Paulo llajtapi umalliricherqa. Chay tantakuykunamantaj 3.600 runas rerqanku. Río de Janeiropitaj Diosmanta willakullarqataj, pisi killasllapitaj 7.000 kuraj publicacionesta portugués qallupi saqekorqa. Portuguespi ñaupajta llojsej, Watch Tower revistaqa noviembre-diciembre 1923 fechayoj karqa.

George Young, Sarahta waturej rerqa. Watch Tower revistataj waturej risqanmanta nerqa: “Sarahqa, salaman yaykuytawan simi kichalla qhepakorqa, hermano Georgeta qʼapirispataj, ‘¿cheqamantapunichu qotuchakuykunata jaturej kanki?’”, nispa. Sarah, wakin wawasnin ima, pisi tiemponman bautizakorqanku. Payqa 25 watasta bautizakunanpaj suyakorqa. Chantá Watch Tower revista 1 de agosto de 1924 watamanta nisqanman jinaqa, Brasilpi 50 runas bautizakorqanku, chay runasmanta ashkhas Río de Jaineromanta karqanku.

Chaymanta kunankama 90 watasña, niñataj tapukunachu tiyan: “¿Imataj kanqa Brasilpi, Sudamericapi tiyakojkunamanta?”, nispa. Brasilpi 760.000 Jehovaj testigosnin sumaj willaykunata willashanku. Tukuy Sudamericapitaj portuguespi, castellanopi, waj qalluspi ima willakushan. Sarah 1915 watapi nisqanman jinapunitaj, ¡mayraj willakunan karqa! (Brasilpi waqaychakusqanmanta.)