KO TE mataiti 1923 teia. Kua ki te ngai akaputuputuanga i ko i te Drama and Music Conservatory i São Paulo! Te oronga ra a George Young i tetai akoanga. I taua taime rai, te uriia ra tana akoanga ki roto i te reo Portugal. E 585 tangata te akarongo ra ki te akoanga. Te neneiia ra te au irava i roto i te reo Portugal ki runga i tetai ngai ka kiteaia e te katoatoa. Ei taopenga i tana akoanga, kua orongaia e tai anere kopi o te puka rikiriki Millions Now Living Will Never Die! Kapiti mai ki teia, ko te au puka rikiriki i roto i te reo Papaa, Tiamani, e te reo Itaria. Kua puapingaia te akoanga. E rua aiai i muri mai, kua ki akaou te ngai akaputuputuanga no tetai akoanga. Inara, eaa tei tupu i mua ake i teia nga uipaanga?

I te mataiti 1867, kua neke a Sarah Bellona Ferguson e tona ngutuare tangata ki Brazil mei Marike mai. I te mataiti 1899, kua rauka ia Sarah te tuatua mou i muri ake te tatau anga aia i tetai au puka Pipiria ta tona tungane i apai mai ki Brazil no Marike mai. No tona inangaro i te tatau, kua tata aia kia tukuia mai Te Punanga Tiaki i roto i te reo Papaa. No te mea kua umere tikai aia i te karere a te Pipiria, kua tata aia ki te Taeake C. T. Russell no runga iaia uaorai e, “kare e tangata e mamao roa kia taeria e te karere.”

Kua tauta pakari a Sarah Ferguson i te akakite i te tuatua mou Pipiria ki etai ke, inara e manako ua ana aia e koai te ka tauturu iaia e tona ngutuare tangata, pera katoa te iti tangata o Brazil. I te mataiti 1912, kua akakite te Betela i Brooklyn kiaia e ka apai mai tetai taeake i te au tauatini aenga pepa ki São Paulo, te tumu tuatua Where Are the Dead? i roto i te reo Portugal. I te mataiti 1915, kua akakite aia e e poitirere ua ana aia i te tatau e e maata te Aronga Apii Pipiria tei tapapa atu i te aere ki runga i te rangi. Kua tata aia i te akakite i tona manako e: “Akapeea i konei i Brazil e Marike Apatonga? . . . Me akamanako koe, e tuanga maata a Marike  Apatonga i roto i teia ao, e mama ua i te kite e e maata te angaanga tutuanga ka raveia.” Ae, e maata rai te angaanga tutuanga ka raveia!

I te mataiti 1920, e varu mātaro no Brazil tei aere ki te au uipaanga Kerititiano i New York City, i te tuatau e ripeaia ra to ratou pai tamaki. Te oki anga ratou ki Rio de Janeiro, kua akakitekite ratou i te au tuatua mou Pipiria ta ratou i mou mai ki te tangata. Kare e roa atu i muri mai, i roto ia Mati 1923, kua tae mai tetai akaaere tutaka ko George Young ki Rio de Janeiro, e kua kite aia i te aronga tei inangaro i te kite i te tuatua mou. Kua akanoo aia kia uriia tetai au puka ki roto i te reo Portugal. Muri mai kua aere te Taeake Young ki São Paulo, mei te 600,000 tangata i reira i tera tuatau. Kua oronga aia i tetai akoanga e kua tuʼa aere i te puka rikiriki Millions, mei tei akatakaia i te akamataanga o teia atikara. Kua akakite aia e, “No te mea ko au anake ua, kua taangaanga au i te nuti pepa kia akakitekite i te au akoanga.” Kua karanga aia e ko teia “te nga akoanga mua na te katoatoa tei orongaia i raro ake i te ingoa o te I.B.S.A. i Brazil.” *

I roto i tetai ripoti no runga ia Brazil, kua akakite mai te Watch Tower o Titema 15, 1923 e, “Me akamanako koe e kua akamata te angaanga i reira i roto ia Tiunu ra 1 e kare e puka i roto i te reo, e mea umere tikai e kua akameitaki mai te Atu i ta tatou angaanga.” Kua akakite katoa te ripoti e ko te nga akoanga ta te Taeake Young i oronga i São Paulo, ko te nga akoanga te reira i roto i te 21 akoanga tei orongaia akamata mai mei ia Tiunu ra 1 kia Tepetema ra 30, e e 3,600 tangata tei tae mai. I roto ia Rio de Janeiro, kua totoa te karere Patireia. Tetai au marama i muri mai, tere atu i te 7,000 puka i roto i te reo Portugal tei tuʼa aereia! Pera katoa, ko te itiu mua o Te Punanga Tiaki tei neneiia i roto i te reo Portugal, no te marama o Noema-Titema 1923.

Kua aravei a George Young ia Sarah Ferguson, e kua akakite mai The Watch Tower e: “Kua aere mai te tuaine ki te uipaanga, e kua noo muteki ua aia no tetai tuatau roa. Kua mou aia i te rima o te Taeake Young e kua akara atura i tona mata, e i te openga kua ui aia e: ‘E akaaere tutaka tikai ainei koe?’” Kare i roa atu i muri mai, kua papetitoia aia e tetai o tana au tamariki. Te tikaanga, kua tiaki aia no tetai 25 mataiti kia papetitoia! Kua akakite mai te Watch Tower o Aukute 1, 1924 e e 50 tangata tei papetitoia i Brazil, te maataanga ia ratou i Rio de Janeiro.

I teia tuatau, e 90 mataiti i topa, kare tatou e ui ana e: “Akapeea i konei i Brazil e Marike Apatonga?” Tere atu i te 760,000 Au Kite o Iehova e tutu aere nei i te tuatua meitaki i Brazil. E i roto ia Marike Apatonga, te tutu aereia nei te karere Patireia i roto i te reo Portugal, Paniora, e te au reo tupuna. I te mataiti 1915, kua tano rai ta Sarah Ferguson i tuatua, ‘E maata rai te angaanga tutuanga ka raveia.’—Au apinga takere i Brazil.