MUMWAKA wa 1923, ŋanda yakucitila zisobano yamu São Paulo yakalizwide bantu. Ba George Young mbabakali kupa makani. Makani aabo oonse akasandululwa mumwaambo waci Portuguese. Bantu boonse bali 585 ibakajanika, bakali kuswiilila cakubikkila maano. Tupango twamu Bbaibbele twamu mwaambo waci Portuguese twakali kutondezyegwa acipekupeku. Kumamanino, tubbuku tuli 100 twakuti Millions Now Living Will Never Die! twakaabilwa, kubikkilizya atwamu Cingisi, ci German alimwi aci Italian. Bubambe bwamuswaangano ooyo bwakazwidilila. Mulumbe wakamwaigwa. Nokwakainda mazuba obilo kumangolezya, ŋanda yakucitila zisobano yakazula alimwi kutegwa baswiilile makani alimwi. Pele ncinzi cakapa kuti kucitike zintu eezyi?

Mumwaka wa 1867, ba Sarah Bellona Ferguson bakalonga amukwasyi wabo kuzwa ku United States kuya ku Brazil. Mumwaka wa 1899, ba Sarah bakazyiba kuti bakajana kasimpe nobakamana kubala mabbuku aapandulula Bbaibbele ngaakaleta ku Brazil musyoonto wabo musankwa kuzwa ku United States. Akaambo kakuti bakali bankutwe kubala, bakalembya kutambula Ngazi Yamulindizi yamu Cingisi. Kabakkomene amulumbe wamu Bbaibbele, bakalembela Mukwesu C. T. Russell, kabalyaamba kuti “balo mbobumboni businizya kuti taakwe bantu bali kulamfwu kapati batakonzyi kusikilwa.”

Ba Sarah Ferguson bakasolekesya kapati kwaambila bamwi kasimpe kamu Bbaibbele, pele kanji-kanji bakali kulibilika kujatikizya iwakali kukonzya kubagwasya amukwasyi wabo, alimwi abantu boonse ibakajisi myoyo mibotu bamu Brazil. Mumwaka wa 1912, Bbeteli yaku Brooklyn yakabaambila kuti kuli muntu wakali kulangilwa kuboola ku São Paulo amatulakiti aajisi mutwe wakuti Where Are the Dead? mumwaambo waci Portuguese. Mumwaka wa 1915 bakaamba kuti bakali kugambwa lyoonse kuzyiba kuti Basikwiiya Bbaibbele banji bakali kulangilwa kutolwa kujulu muciindi buyo cisyoonto. Bakaamba mbobakali kuzilanga zintu nobakalemba kuti: “Mbuti kujatikizya cisi ca Brazil alimwi acooko coonse ca South America? . . . Kuti mwayeeya mbocili cipati cooko ca South America, ncuuba-uba  kubona kuti kucili mulimo mupati wakutebula uuyandika kubelekwa.” Masimpe, mulimo mupati wakutebula wakali kuyakubelekwa!

Kuzikusika mumwaka wa 1920, basikweenzya bwato bana Brazil ibali lusele bakajanika kumiswaangano yambungano iili mbwiibede ku New York City ciindi bwato bwabo bwankondo nobwakali kubambwa. Nobakali kupiluka ku Rio de Janeiro, bakali kwaambila bamwi bulangizi bwamu Bbaibbele mbobakaiya. Kakutanainda ciindi cilamfwu kuzwa waawo, mu March 1923, ba George Young, ibakali balangizi beendeenda bakasika ku Rio de Janeiro, kwalo nkobakajana bantu bajisi luyandisisyo. Bakabikka bubambe bwakuti mabbuku aali mbwaabede asandululwe mumwaambo waci Portuguese. Nokwakainda ciindi cisyoonto, Mukwesu Young wakasika ku São Paulo, dolopo lyakajisi bantu babalilwa ku 600,000 kuciindi eeco. Kabali kokuya bakapa makani akwaabila tubbuku twakuti Millions Now Living Will Never Die!, mbubwenya mbokwaambwa kumatalikilo aacibalo eeci. Bakaamba kuti: “Kandili ndelikke ndakali kusyoma kwaambilizya kwiinda mukubelesya muteende.” Bakayungizya kuti aaya akali “makani aakusaanguna kwaambilizya aakapegwa kwiinda mumbunga ya I.B.S.A. mu Brazil.” *

Ngazi Yamulindizi yamu December 15, 1923 yakaamba boobu kujatikizya cisi ca Brazil: “Ciindi notuyeeya mulimo iwakatalika mu June 1 ookuya alimwi akuti kunyina mabbuku aakaliko kuciindi eeco, cilagambya kubona Mwami mbwaulongezya mulimo.” Lipooti yakazumanana kwaamba kuti makani aabuleya aa Mukwesu Young mu São Paulo obilo akali akati kamakani aali 21 aakapegwa kuzwa mu June 1 kusika mu September 30, abantu ibakajanika bakali 3, 600. Asyoonto-syoonto, mulumbe wa Bwami wakatalika kumwaigwa mu Rio de Janeiro. Alimwi mumyezi buyo misyoonto, mabbuku eesu ainda ku 7,000 mumwaambo waci Portuguese akaabilwa! Kuyungizya waawo, kumwaigwa kwa Ngazi Yamulindizi mumwaambo waci Portuguese kwakalitalikide amagazini ya November-December 1923.

Ba George Young bakaita ba Sarah Ferguson, alimwi Ngazi Yamulindizi yakaamba kuti: “Mucizyi wakaunka kumbele, alimwi kwaciindi cisyoonto wakaalilwa kwaambaula. Naakajatilila kujanza lya Mukwesu Young, alimwi akumulangisisya kumeso, wakaamba kuti: ‘Sena ncobeni uli Mulangizi Weendeenda?’” Balo alimwi abana babo bamwi bakabbapatizyigwa! Kayi, bakali kulindila kwamyaka iili 25 kuti babbapatizyigwe. Ngazi Yamulindizi ya August 1, 1924, yamu Cingisi yakaamba kuti ibali 50 bakabbapatizyigwa mu Brazil, kwaambisya mudolopo lya Rio de Janeiro.

Lino nokwainda myaka iibalilwa ku 90, tweelede kulibuzya kuti: “Mbuti kujatikizya cisi ca Brazil alimwi acooko coonse ca South America?” Bakamboni ba Jehova bainda ku 760,000 balakambauka makani mabotu mucisi ca Brazil. Alimwi mucooko ca South America coonse mulumbe wa Bwami lino ulamwaigwa mumwaambo waci Portuguese, Spanish alimwi amyaambo minji iibelesyegwa mucooko eeci. Mumwaka wa 1915, ba Sarah Ferguson bakaliluzi, ‘Kwakacili mulimo mupati wakutebula iwakali kuyandika kubelekwa.’—Makani Eesu Aakaindi mu Brazil.