Matenek-naʼin sira hatete katak se situasaun neʼe la iha mudansa, toʼo tinan 2030, ema neʼebé mate tanba fuma sei aumenta toʼo ema naʼin-8.000.000 kada tinan. Matenek-naʼin sira siʼik katak toʼo tinan 2100, ema hotu hamutuk naʼin-1.000.000.000 karik sei mate tanba fuma.

Laʼós fumadór deʼit mak sai vítima. Família husi fumadór neʼebé lakon ninia vida mós hanesan vítima tanba sira sente laran-triste no sira mós kona problema osan nian. No mós tinan-tinan, ema naʼin-600.000 mate tanba horon beibeik sigarru nia suar neʼebé ema seluk mak fuma. Ema fuma, bele lori susar ba ema hotu tanba nia suar halo ema kona moras, no halo ema soe osan atu hola ai-moruk.

Baibain, se moras boot ruma kona ema barak, doutór sira lalais atu buka tratamentu hodi kura. Maibé problema kona-ba fuma, ema hotu hatene ona solusaun no loloos lalika mate tanba ida-neʼe. Diretora ida husi Organização Mundial da Saúde, Dr. Margaret Chan hatete: “Problema tabaku nian neʼe ema mak kria. Problema neʼe bele hadiʼa se governu ho povu serbisu makaʼas hamutuk.”

Ohin loron, governu barak iha mundu tomak hakaʼas an liu fali tempu uluk hodi hapara problema saúde nian neʼe. Iha fulan-Agostu 2012, maizumenus rai 175 hamutuk halo planu hodi hapara ema uza tabaku. a Maibé neʼe susar tebes tanba razaun rua. Tinan-tinan kompañia sira gasta osan barak atu halo iklan sira hodi dada tan ema barak, liuliu feto no joven sira neʼebé hela iha rai kiak. No mós, ema sente susar tebes atu para, tan neʼe fuma sei hamate tan ema barak husi naʼin-1.000.000.000 neʼebé fuma agora daudauk. Se fumadór sira la husik toman neʼe, durante tinan 40 oin mai, ema barak tebetebes sei mate.

Ema barak hakarak para fuma maibé susar tebes tanba iklan sira dada nafatin sira no tanba sira-nia toman metin ona. Feto ida naran Naoko iha esperiénsia hanesan neʼe. Bainhira nia sei joven, nia fuma ona. Nia sente ida-neʼe jeitu tanba nia halo tuir artista iha televizaun no filme sira. Maski ninia inan no aman mate tanba kankru iha pulmaun, no nia mós iha oan-feto naʼin-rua, maibé nia fuma nafatin. Nia hatete: “Haʼu hanoin barak karik haʼu sei hetan kankru iha pulmaun, no mós kona haʼu-nia oan sira-nia saúde, maibé susar tebes atu husik toman neʼe. Haʼu hanoin haʼu sei nunka para fuma.”

Maibé Naoko konsege husik duni toman neʼe. Iha buat ida neʼebé ajuda tebes nia. Buat neʼe mós ajuda ona ema rihun ba rihun atu hadook an husi tabaku. Saida mak neʼe? Lee toʼok informasaun tuirmai.