IMYAKA ibili iyapita, inyunshipepala ya ku Korea, iyo beta ati The Chosun Ilbo, yakwete umutwe uukalamba uwaleti: “‘Bushe Shim Cheong, Umukashana Uwali no Mutima Uusuma,’ Lelo Uushaishibe Yesu—Aile mu Kupya mu Mulilo Wa Pe?”

Uyu mutwe walengele imitima ya bantu ukukalipa pantu Shim Cheong mukashana watemwikwa uwa mu lyashi lya kale ilya bena Korea uwaipeeleshe sana ica kuti afwilanapo pa kuti fye afwilishe bawishi abali impofu. Pa myaka iingi nga nshi, abantu balamulumbilisha. Na kuba, mu Korea, Shim Cheong aba cilangililo icisuma ica mukashana uwaipeelesha.

Abengi baletontonkanya ukuti ukoca umuntu umusuma ifi mu mulilo wa pe pa mulandu fye wa kuti tali Mwina Kristu uwabatishiwa lufyengo, kabili balekalipa no kukalipa. Pantu na kuba, batila ili lyashi lyacitike kale sana ninshi ne mbila nsuma pali Kristu tailabilwa mu mushi aleikala.

Muli ici cipande mwali na mashiwi yasosele shimapepo. Bamwipwishe ukuti, bushe abantu abafwile ukwabula ukukwata ishuko lya kusambilila pali Yesu baya mu kupya mu mulilo wa pe? Shimapepo ayaswike ati, “Tatwaishiba. Lelo tutunganya ukuti kufwile kwaliba ifyo Lesa apekanya.”

Icitabo ca The New Catholic Encyclopedia catila: “Ulubatisho e lwingalenga umuntu ukupusuka. Nge fyo Kristu umwine alandile, umuntu nga tafyelwe libili ku menshi na ku Mupashi wa Mushilo, te kuti engile mu Bufumu bwa kwa Lesa (Yn 3.5).” Ici, e calenga bamo ukusumina ukuti abantu abafwile ukwabula ukubatishiwa babapoosa mu mulilo wa pe nelyo balacula mu nshila imbi.

Lelo kwaliba na bambi abengi abamona ukuti ici cisumino ca bufi. Abantu abengi nga nshi balifwa ukwabula ukuti beshibe ifyo Baibolo isambilisha. Bushe aba bantu balinga ukuboca? Finshi Baibolo yalandapo pali ili lyashi?

Baibolo yalanda ukuti Lesa tasuulako ku bantu abafwile ukwabula ukwishiba ukufwaya kwakwe. Pa Imilimo 17:30 patila: “Lesa alisuulako ishi nshita sha kukanaishiba.” Ninshi lisubilo nshi Baibolo yalandapo ilya bantu abafwile ukwabula ukukwata ishuko lya kusambilila pali Lesa?

Icasuko caba muli yalya mashiwi Yesu aebele icipondo cimo ico bamupopele pamo na co. Ulya mwaume aebele Yesu ukuti: “Mwe Yesu, mukanjibukishe ilyo mukaba imfumu.” Bushe Yesu ayaswike shani? Atile: “Cine cine ndekweba lelo nati, uli no kuba na ine mu Paradaise.”—Luka 23:39-43.

Bushe Yesu alelaya ulya mwaume ukuti akaya ku muulu? Awe. Ulya mwaume “tafyelwe libili” ku menshi na ku mupashi, icifwaikwa pa kuti umuntu engile mu Bufumu bwa mu muulu. (Yohane 3:3-6) Lelo, Yesu alelaya ukuti ulya mwaume icipondo ali no kuba no mweo na kabili mu Paradaise. Apo ulya mwaume ali muYuda, afwile alishibe ukuti pano calo palipo Paradaise, e kutila ibala lya Edeni, ilyo Baibolo yalandapo mwi buuku ilya kubalilapo. (Ukutendeka 2:8) Ubulayo Yesu amulaile bwalengele abe ne subilo lya kuti bakamubuusha ilyo cino calo cikaba Paradaise na kabili.

Na kuba, Baibolo yalaya ukuti “kukaba ukubuuka kwa balungama na bashalungama.” (Imilimo 24:15) “Abashalungama” ni balya abashalekonka amafunde ya kwa Lesa pa mulandu wa kuti tabaishibe ukufwaya kwa kwa Lesa. Yesu akabuusha ulya mwaume ushalungama uwali icipondo icalandile nankwe, e lyo na bambi abengi nga nshi abafwile ukwabula ukwishiba ukufwaya kwa kwa Lesa. Lyena, ilyo bakaba mu Paradaise pano calo, bakasambilila amafunde ya kwa Lesa, kabili bakakwata ishuko lya kulanga ukuti balitemwa Lesa ilyo bakalacita ifyo afwaya.

Ilyo abashalungama bakabuushiwa, bushe bakabapingula ukulingana ne fyo balecita ilyo bashilafwa? Iyo. Pa Abena Roma 6:7 patila: “Umuntu nga afwa, ninshi umulandu wakwe uwa lubembu wapwa.” Umulandu wa lubembu uwa bashalungama walipwile ilyo bafwile. Kanshi bakabapingwila pa fyo bakacita ilyo bakabuushiwa, te pa fyo balecita ilyo bashilafwa pa nshita bashaishibe ukufwaya kwa kwa Lesa. Bushe bakanonkelamo shani?

Nga babuushiwa, abashalungama bakasambilila amafunde ya kwa Lesa, ayakasokololwa ilyo amabuuku ayapombwa yakafungululwa. Kanshi bakabapingula “ukulingana ne fyo balecita,” e kutila nampo nga bakalaumfwila Lesa nelyo iyo. (Ukusokolola 20:12, 13) Ku bashalungama abengi, uyu tawakabe muku walenga bubili uwa kupeelwa ishuko lya kuti babe no mweo wa muyayaya, lelo ukaba e muku wa kubalilapo uwa kusambilila no kulacita ukufwaya kwa kwa Lesa.

Ili sambilisho lya mu Baibolo lyalilenga abengi ukucetekela Lesa na kabili. Bamo pali aba ni ba Yeong Sug, abakulile mu lupwa lwa ba Katolika. Abengi mu lupwa lwabo bali ni bashimapepo. Apo balefwaisha ukuba ba sista, baile mu kwikala apekala ba sista ba ku Katolika. Pa numa, balifuminepo pantu tabatemenwe ifyalecitikapo. Lelo icikalamba ca kuti balifililwe ukusumina mu cisambilisho ca kuti kwaliba umulilo wa pe, pantu balemona ukuti Lesa nga aleoca abantu mu mulilo ninshi munkalwe kabili te wa mulinganya.

Lyena Inte ya kwa Yehova yalangile ba Yeong Sug aya mashiwi yaba mu Baibolo ayatila: “Aba mweo balishiba ukuti bakafwa; lelo abafwa, tabaishiba akantu nangu kamo, kabili te kuti balambulwe.” (Lukala Milandu 9:5) Inte ya kwa Yehova yalibafwile ukwishiba ukuti ifikolwe fyabo tafyalepya mu mulilo. Lelo, balifwa balolela ukubuushiwa.

Apo balishibe ukuti abengi tabaishiba icine icaba mu Baibolo, ba Yeong Sug batampile ukukonka amashiwi ya kwa Yesu ayaba pali Mateo 24:14 apatila: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” Nomba balashimikila imbila nsuma kabili balebako bambi isubilo bakwata ilya mu Baibolo.

Baibolo itila: “Lesa taba na kapaatulula, lelo umuntu uwa mu luko lonse uutiina Lesa no kucita icalungama alapokelelwa kuli ena.” (Imilimo 10:34, 35) Ifi e fyo Lesa aba no mulinganya kuli ifwe bonse, pantu na kuba, Baibolo itila: ‘Alitemwa ubulungami no mulinganya.’—Amalumbo 33:5.