Ki lespwar i annan pour mon bann zanset?

EN PE letan pase, i ti annan en lartik enteresan dan The Chosun Ilbo, en zournal Koreen. Sa lartik ti pe demande: “Eski ‘Shim Cheong,’ ki ti en bon dimoun me ki pa ti konn nanryen lo Zezi, in al dan lanfer?”

Sa lartik ti kree en kontrovers parski Shim Cheong ti en zenn madanm ki dimoun ti kontan dan en lezann Koreen, ki ti fer sakrifis dan son lavi pour ed son papa aveg. En kantite dimoun in devlop en gran respe pour li diran bann lannen ki’n pase. Anfet, dimoun Kore i konsider Shim Cheong konman legzanp en fiy devoue.

Pour bokou, sa nide konmkwa en tel dimoun ti pou ganny pini dan lanfer zis akoz i pa ti en Kretyen batize ti paret enzis e menm ofans zot. Apre tou, sa zistwar ti’n aparaman arive en bann letan avan ki mesaz konsernan Kris ti ganny anonse pour premye fwa dan son vilaz.

Dan sa lartik i ti annan en entervyou avek en pret. I ti ganny demande si bann dimoun ki’n mor san ki zot ganny sans aprann konn Zezi in al dan lanfer. Ki larepons i ti donnen? “Nou pa konnen. Nou krwar ki desten [sa bann dimoun] i depan lo Bondye.”

SA KI NESESER POUR GANNY SOVE

The New Catholic Encyclopedia i dir: “Pour ganny sove fodre batize. Parey Zezi li menm ti dir, si en dimoun pa ne de nouvo avek delo ek lespri sen, i pa pou kapab antre dan Rwayonm Bondye (Zan 3:5).” Akoz sa, bokou i panse ki ler dimoun i mor san batize, zot ganny zete dan lanfer ouswa zot soufer dan en lot fason apre lanmor.

Par kont, i annan plizyer lezot ki vwar sa kalite krwayans pa fer sans. En gran kantite dimoun in mor san konnen ki Labib i dir. Eski zot merit ganny tourmante pour touzour? Ki Labib li menm i dir lo sa size?

LESPWAR KI DAN LABIB

Labib i montre klerman ki Bondye pa rezet bann dimoun ki ti viv san konnen ki i ti oule zot fer. Nou ganny sa lasirans dan Akt 17:30: “Bondye i nepli tenir kont bann letan linyorans.” Alor, ki lespwar Labib i ofer sa bann ki’n mor san ki zot in ganny sa loportinite pour aprann konn Bondye?

Nou kapab trouv larepons dan sa parol ki Zezi ti dir enn sa bandi ki ti mor akote li. Sa zonm ti dir Zezi: “Mazin mwan ler ou retournen konman lerwa.” Ki Zezi ti reponn li? ‘An verite, mon dir ou ozordi, ou pou avek mwan dan paradi.’​—Lik 23:39-43.

Eski Zezi ti pe promet sa zonm ki i ti pou al dan lesyel? Non. Sa zonm pa ti’n “ne de nouvo” avek delo ek lespri sen, ki ti neseser pour antre dan Rwayonm Bondye. (Zan 3:3-6) Plito, Zezi ti pe promet sa bandi ki i ti pou reviv ankor, dan Paradi. Lefet ki i ti en Zwif, tre probab sa zonm ti konn konsernan Paradi lo later, andotmo, zarden Edenn ki premye liv Labib i koz lo la. (Zenez 2:8) Promes ki Zezi ti fer avek li ti pe asir li ki i ti pou ganny resisite pour kapab viv dan Paradi ki pou’n ganny reetablir lo later.

Anfet, Labib i promet ki “tou dimoun bon konman move, pour resisite.” (Akt 24:15) Bann “move” dimoun i sa bann ki pa’n viv dapre standar Bondye akoz zot pa ti konn son lavolonte. Zezi pou resisit sa move bandi ki ti koz avek li, ensi ki plizyer milyon, petet menm bilyon lezot ki’n mor dan linyorans. Apre, dan Paradi lo later zot pou ganny ansennyen sa ki Bondye i ekspekte avek zot e zot pou ganny sa loportinite pour prouve ki zot kontan Bondye par obeir son bann komannman.

 LER BANN MOVE POU RESISITE

Ler bann move pou resisite, eski zot pou ganny zize dapre sa ki zot ti fer dan lepase? Non. Romen 6:7 i dir: “En dimoun ki’n mor, i’n ganny libere avek pouvwar pese.” Zot lanmor i vedir ki zot in fini peye pour zot pese. Alor, zot pou ganny zize dapre sa ki zot pou fer apre ki zot pou’n resisite e non pa dapre sa ki zot ti fer dan linyorans avan zot ti mor. Ki byenfe zot pou gannyen?

Apre ki zot resisite, sa bann move dimoun pou annan sa sans pour aprann konsernan bann lalwa Bondye ki pou ganny donnen ler bann roulo senbolik pou ganny ouver. Zot pou ganny zize ‘dapre sa ki zot fer,’ setadir si zot obeir lalwa Bondye oubyen non. (Revelasyon 20:12, 13) Pour bokou sa bann move dimoun ki pou resisite i pa pou en dezyenm sans, me i pou sa premye loportinite pour zot ganny lavi eternel lo later par aprann e fer lavolonte Bondye.

Sa lansennyman sorti dan Labib in ed bokou dimoun pour rebatir zot lafwa dan Bondye. Yeong Sug i enn parmi zot. I ti grandi konman en Katolik devoue. Serten dan son fanmir ti pret. I ti anvi vin en leser, alor i ti antre dan kouvan. Pli tar, i ti kite akoz i ti dezapwente par sa ki i ti vwar laba. An plis ki sa, i pa ti aksepte sa krwayans lo lanfer akoz i ti santi ki tourmant dimoun dan dife pa en fason pour demontre lanmour ni lazistis.

Apre sa, en Temwen Zeova ti montre Yeong Sug sa parol ki dan Labib: “Bann vivan i konnen ki zot pou mor, me bann mor pa konn nanryen ditou, zot nepli annan rekonpans.” (Eklezyast 9:5) Sa Temwen ti ed li realize ki son bann zanset pa pe ganny tourmante dan lanfer. Plito, zot pe dormi dan lanmor e pe esper rezireksyon.

Vi ki i ti arive konpran ki plizyer dimoun pa’n zanmen tann laverite sorti dan Labib, Yeong Sug ti pran aker parol Zezi dan Matye 24:14 ki dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” Aprezan li osi i pe anons sa bon nouvel ek sa zoli lespwar dan Labib avek lezot.

“BONDYE PA FER PREFERANS”

Labib i dir: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Sa i sa kalite lazistis parfe ki nou tou nou kapab ekspekte avek Bondye parski i “kontan ladrwatir ek lazistis.”​—Psonm 33:5.

[Portre lo paz 11]

Ki sinifikasyon promes Zezi: “Ou pou avek mwan dan paradi”?