Kontan Zeova ou Bondye

“Kontan [Zeova] ou Bondye avek tou ou leker, avek tou ou lam, e avek tou ou lespri.”​—MAT. 22:37.

KI OU POU REPONN?

Ki i vedir pour kontan Bondye?

Akoz nou devret kontan Zeova?

Ki mannyer nou kapab demontre nou lanmour pour Zeova?

1. Akoz sa lanmour ant Bondye ek son Garson ti vin pli for?

ZEZI KRI, Garson Zeova ti dir: “Mon kontan mon Papa.” (Zan 14:31) Zezi ti osi dir: “Papa i kontan son Garson.” (Zan 5:20) Sa pa devret sirprann nou. Apre tou, pour plizyer lannen avan ki Zezi ti vin lo later i ti “zouvriye abil” Bondye. (Prov. 8:30) Anmezir ki Zeova ek Zezi ti travay ansanm, sa Garson ti aprann bokou konsernan bann kalite son Papa e i ti annan bokou rezon pour kontan li. Anfet, vi ki zot ti pas bokou letan ansanm zot lanmour pour kanmarad ti vin pli for.

2. (a) Kisisa lanmour? (b) Ki kestyon nou pou diskite?

² Lanmour i sa santiman ek lafeksyon profon ki en dimoun i annan pour en lot. Psalmis David ti sante: “Mon annan lafeksyon pour ou, O Zeova mon lafors.” (Ps. 18:1) Koumsanmenm nou devret santi konsernan Bondye akoz i annan lafeksyon pour nou. Si nou obei Zeova, I pou demontre ki i kontan nou. (Lir Deterononm 7:12, 13. *) Me, eski nou vreman kapab kontan Bondye menm si nou pa kapab vwar li? Ki i vedir pour kontan Zeova?  Akoz nou devret kontan li? Ki mannyer nou kapab demontre ki nou kontan Bondye?

AKOZ NOU KAPAB KONTAN BONDYE

3, 4. Akoz i posib pour nou kontan Zeova?

³ “Bondye i Lespri,” alor, nou pa kapab vwar li. (Zan 4:24) Par kont, i posib pour kontan Zeova e nou ganny demande dan Labib pour demontre sa lanmour. Par egzanp, Moiz ti dir bann Izraelit: “Ou devret kontan Zeova ou Bondye avek tou ou leker, avek tou ou nanm e avek tou ou lafors.”​—Det. 6:5.

⁴ Akoz nou kapab annan en gran lanmour pour Bondye? Parski i’n kre nou avek en bezwen spirityel e i’n donn nou sa abilite pour demontre lanmour. Kan nou bezwen spirityel i ganny byen satisfe, nou lanmour pour Zeova i vin pli for e nou annan bon rezon pour ere. Zezi ti dir: “Ere bann ki konsyan zot bezwen spirityel akoz Rwayonm lesyel i pour zot.” (Mat. 5:3, NW) Konsernan sa dezir ki dan imen pour adore, parey serten i apel li, i’n ganny dir: “Kan nou vwar sa resers ki dimoun pe fer dan lemonn antye pour rod e krwar dan en personnaz siprenm, nou devret annan ladmirasyon, etonnen e annan en profon respe.”​—Man Does Not Stand Alone, par A. Morrison.

5. Ki mannyer nou konnen ki i vo lapenn pour rod Bondye?

⁵ Eski i vo lapenn pour rod Bondye? Wi, parski i anvi ki nou trouv li. Zapot Pol ti fer sa kler ler i ti rann temwannyaz en group ki ti’n rasanble Lareopaz. Kot Lareopaz i ete zot ti kapab vwar Parthenon, en tanp ki ti’n ganny dedye avek Athena, Bondye bann dimoun ki ti reste Atenn dan lepase. Imazinen ki ou la kan Pol pe koz konsernan sa “Bondye ki’n fer lemonn ek tou sa ki ladan” e apre i eksplike ki i “pa reste dan bann tanp ki’n konstri par lanmen zonm.” Sa zapot i azoute ki Bondye, “apartir en sel zonm i’n kree tou bann nasyon dan lemonn e etabli zot lo later antye. Limenm ki davans in fikse letan egzakt e limit bann rezyon kot zot devre reste. Bondye in fer sa pour ki zonm i rod li, e esey antre an kontak avek li, e ki an tatan zot a trouv li. An realite i pa lwen avek sakenn parmi nou.” (Akt 17:24-27) Wi, dimoun i kapab trouv Bondye. Plis ki set milyon edmi Temwen Zeova in “trouv li” e zot vreman kontan li.

KI I VEDIR POUR KONTAN BONDYE

6. Ki Zezi ti dir i “premye e pli gran konmannman”?

⁶ Nou lanmour pour Zeova i devret sorti dan nou leker. Zezi ti fer sa kler ler en Farizyen ti demande: “‘Met, lekel pli gran konmannman dan Lalwa?’ Zezi ti reponn li, ‘Kontan [Zeova] ou Bondye avek tou ou leker, avek tou ou lam, e avek tou ou lespri.’ Sa se premye e pli gran konmannman.”​—Mat. 22:34-38.

7. Ki i vedir pour kontan Bondye avek (a) ‘tou nou leker?’ (b) ‘tou nou lam’? (c) ‘tou nou lespri’?

⁷ Ki Zezi ti pe esey dir kan i ti dir kontan Bondye avek ‘tou nou leker’? I ti pe dir ki nou merit kontan Zeova avek tou nou leker senbolik, setadir nou dezir, lemosyon ek nou bann santiman. Nou osi bezwen kontan li avek ‘tou nou lam,’ setadir tou sa ki nou ete, sa i enkli tou sa ki nou fer. An plis, nou bezwen kontan Bondye avek ‘tou nou lespri,’ setadir nou lentelizans. Andotmo, nou devret kontan Zeova avek tou sa ki nou ete, enkli tou sa ki nou annan.

8. Ler nou kontan Bondye avek tou sa ki nou ete ki sa pou pous nou pour fer?

⁸ Si nou kontan Bondye avek tou nou leker, lam ek lespri, nou pou etidye son Parol o profon, nou pou fer son lavolonte avek tou nou leker e nou pou devoue pour pres sa bon nouvel Rwayonm. (Mat. 24:14; Rom. 12:1, 2) Vre lanmour pour Zeova pou fer nou vin pli pros avek li. (Zak 4:8) Byensir, nou pa kapab donn tou bann rezon akoz nou devret kontan Bondye. Par kont, annou vwar detrwa.

 AKOZ NOU DEVRET KONTAN ZEOVA

9. Akoz ou kontan Zeova konman nou Kreater e sa Enn ki donnen?

⁹ Zeova i nou Kreater e sa Enn ki donnen. Pol ti dir, “atraver li nou ganny lavi, nou kapab mouvmante e nou egziste.” (Akt 17:28) Zeova in donn nou en zoli later pour viv lo la. (Ps. 115:16) I osi donn nou manze e lezot keksoz ki nou bezwen pour nou reste vivan. Alor, Pol ti kapab dir bann zabitan Lis ki ti ador zidol ki “Bondye ki vivan . . . i’n touzour revel son lekor par bann dibyen ki i’n fer: I’n donn zot son lapli sorti dan lesyel, ek bann rekolt, sakenn dan son sezon. I’n donn zot osi manze e i’n ranpli zot leker avek lazwa.” (Akt 14:15-17) Eski pa sa i donn nou rezon pour kontan nou Gran Kreater e sa Enn ki donn avek lanmour?​—Ekle. 12:1.

10. Ki mannyer nou devret reazir anver provizyon ki Bondye in met an plas pour retir pese ek lanmor?

¹⁰ Bondye in fer li posib pour retir pese ek lanmor ki nou’n erite avek Adan. (Rom. 5:12) Byensir, “Bondye in prouv son lanmour pour nou: Kan nou ti ankor peser, Kris in mor pour nou.” (Rom. 5:8) San dout, nou leker i ranpli avek lanmour pour Zeova, parski i’n fer li posib pour nou ganny pardonnen nou pese si nou repantir e demontre lafwa dan sakrifis Zezi.​—Zan 3:16.

11, 12. Dan ki fason Zeova i’n donn nou lespwar?

¹¹ Zeova i ‘donn lesperans ki ranpli nou avek lazwa ek lape.’ (Rom. 15:13) Lespwar sorti kot Bondye i ed nou pour andir bann leprev ki teste nou lafwa. Bann Kretyen swazir ki ‘reste fidel ziska lanmor pou ganny kouronn lavi.’ (Rev. 2:10) Bann dimoun ki gard zot lentegrite ki annan lespwar pour viv lo later, pou ganny bann benediksyon eternel dan sa Paradi ki’n ganny promet. (Lik 23:43) Ki mannyer nou reazir anver sa bann promes? Pa nou ranpli avek lazwa, lape ek lanmour pour sa Enn ki donn “tou don ekselan, tou kado parfe”?​—Zak 1:17.

¹² Bondye in donn nou en zoli lespwar rezireksyon. (Akt 24:15) I vre, nou sagren ler en dimoun ki nou kontan i mor, me akoz nou annou lespwar ki i pou resisite, nou “pa sagren parey bann ki napa lesperans.” (1 Tesa. 4:13) Lefet ki Zeova i annan lanmour, i vreman anvi resisit bann mor, espesyalman bann ki fidel, parey Zob ki ti en dimoun drwat. (Zob 14:15) Imazin sa lazwa kan bann ki’n mor pou rezwenn zot fanmir ek zanmi ler zot ganny resisite isi lo later. Pa nou leker i ranpli avek lanmour pour nou Papa dan lesyel ki’n donn nou sa zoli lespwar rezireksyon!

13. Ki levidans nou annan ki Bondye i vreman enterese avek nou?

¹³ Zeova i vreman pran swen avek nou. (Lir Psonm 34:6, * 18, 19; * 1 Pyer 5:6, 7.) Parski nou konnen ki nou Bondye ranpli avek lanmour i toultan pare pour ed bann ki fidel anver li, nou santi nou an sekirite konman bann ki form parti son “troupo.” (Ps. 79:13) Deplis, lanmour Bondye anver nou pou vin evidan dan sa ki i pou akonplir pour nou atraver Rwayonm Bondye dirize par Kris. Apre ki son Lerwa ki i’n swazir, Zezi Kri, pou’n retir vyolans, labi pouvwar e bann move keksoz lo later, bann imen obeisan pou ganny beni avek lape ek prosperite. (Ps. 72:7, 12-14, 16) Eski pa ou dakor ki sa bann promes i donn nou rezon pour kontan nou Bondye avek tou nou leker, nanm, lafors ek lespri?​—Lik 10:27.

14. Ki privilez ekstraordiner Bondye in swazir pour donn nou?

¹⁴ Zeova in swazir pour donn nou sa privilez ekstraordiner pour servi konman son Temwen. (Iza. 43:10-12) Nou kontan Bondye parski i’n donn nou sa loportinite pour siport son souvrennte e donn sa vre lespwar  bann dimoun dan sa lemonn ki ranpli avek problenm. An plis ki sa, nou kapab koz avek konfyans ek konviksyon parski nou pe anons bon nouvel baze lo Parol sa vre Bondye, ki son bann promes pa pou zanmen tonm dan delo. (Lir Zozye 21:45; * 23:14. *) Byensir, si nou kontinyen koz lo bann benediksyon ek rezon pour kontan Zeova nou pou ankor la demen. Me ki mannyer nou kapab demontre nou lanmour pour li?

KI MANNYER NOU KAPAB DEMONTRE KI NOU KONTAN BONDYE?

15. Ki mannyer ler nou etidye e aplik Parol Bondye, sa i ed nou?

¹⁵ Etidye Parol Bondye o profon e aplik li. Par fer sa, nou montre ki nou kontan Zeova e ki nou vreman anvi ki son parol i vin en ‘lalimyer pour nou semen.’ (Ps. 119:105) Si nou pe fer fas avek bann sityasyon difisil, nou kapab ganny rekonfor avek sa bann parol ranpli avek lanmour ki asir nou: “O Bondye, ou pa pou mepriz en leker kase e brize.” “Ou lanmour fidel, O Zeova, ti kontinyen soutenir mwan. Ler bann traka ti pe fatig mwan en kantite, ou ti rekonfort mwan e soulaz mwan.” (Ps. 51:17; 94:18, 19) Zeova i demontre konpasyon anver bann ki soufer e pareyman Zezi i pran pitye pour bann dimoun. (Iza. 49:13; Mat. 15:32) Par etidye Labib, sa i kapab ed nou konn lanmour ki Zeova i annan pour nou e an retour sa i fer nou devlop lanmour pour li.

16. Ki mannyer kan nou priy regilyerman sa i kapab fer nou lanmour pour Bondye vin pli for?

¹⁶ Priy Bondye regilyerman. Nou lapriyer i fer nou vin pli pros avek “sa Enn ki ekout lapriyer.” (Ps. 65:2) Kan nou konnen ki Bondye i ekout nou lapriyer, nou lanmour pour li i vin pli for. Par egzanp, i kapab nou’n vwar ki i pa permet ki nou ganny tante plis ki nou kapab siporte. (1 Kor. 10:13) Si i annan en keksoz ki pe fatig nou e nou tourn ver Zeova atraver nou bann siplikasyon, nou pou eksperyans sa “lape Bondye” ki napa son parey. (Fili. 4:6, 7) Parfwa, nou  kapab fer en lapriyer dan nou leker, parey Neemya ti fer e vwar ki nou lapriyer i ganny reponn. (Nee. 2:1-6) Ler nou “priye tou letan” e rekonnet ki Zeova pe azir anver nou bann demann, sa i fer nou lanmour pour li i vin pli for e osi annan konfyans ki i pou ed nou fer fas avek lezot leprev ki teste nou lafwa.​—Rom. 12:12.

17. Ki mannyer nou pou konsider asiste renyon si nou kontan Bondye?

¹⁷ Fer li ou labitid pour asiste bann renyon ek lasanble Kretyen. (Ebr. 10:24, 25) Bann Izraelit ti zwenn ansanm pour ekoute e aprann lo Zeova pour ki zot kapab annan respe pour li e pour aplik son Lalwa. (Det. 31:12) Si nou senserman kontan Bondye, i pa en fardo pour fer son lavolonte. (Lir 1 Zan 5:3.) Alor, annou pa zanmen les nanryen anpes nou asiste renyon. Sirman nou pa anvi les okenn keksoz fer nou perdi nou premye lanmour pour Zeova.​—Rev. 2:4.

18. Lanmour pour Bondye i motiv nou pour fer kwa konsernan sa bon nouvel?

¹⁸ Avek devouman partaz “laverite levanzil” avek lezot. (Gal. 2:5) Nou lanmour pour Bondye i motiv nou pour koz konsernan Rwayonm Bondye dirize par Kris, son Garson, ki pou ‘mont son seval pour defann laverite’ zour Armagedon. (Ps. 45:4; Rev. 16:14, 16) Pa i en lazwa pour partisip dan sa travay fer disip pour ed dimoun aprann konsernan lanmour Bondye e son nouvo lemonn ki i’n promet!​—Mat. 28:19, 20.

19. Akoz nou devret apresye laranzman Zeova pour pran swen avek son troupo?

¹⁹ Demontre lapresyasyon pour laranzman Bondye pour pran swen avek son troupo. (Akt 20:28) Zeova in donn nou bann ansyen, ki toultan azir pour nou prop byennet. Bann ansyen i parey “en landrwa kasyet kont divan, en landrwa maske kont tanpet lapli, parey bann pti larivyer dan en landrwa sek, parey lonbraz en gro ros dan en dezer.” (Iza. 32:1, 2) Pa nou apresye en landrwa kasyet kont en divan for oubyen en gro lapli! Ler gro ker soley pe tap lo nou, nou apresye lonbraz ki en gro ros i donnen. Sa bann lekspresyon i ed nou pour vwar ki bann ansyen i donn bann led spirityel ki neseser e osi lankourazman. Par obei bann ki pe diriz kongregasyon, nou demontre ki kantite nou apresye bann “kado zonm lo later” e montre ki nou kontan Bondye ek Kris, Sef kongregasyon.​—Efe. 4:8; 5:23; Ebr. 13:17.

KONTINYEN ANNAN PLIS LANMOUR POUR BONDYE

20. Dapre Zak 1:22-25, ki mannyer ou pou reazir si ou kontan Bondye?

²⁰ Si ou annan en relasyon pros avek Zeova, ou ‘pa pou zis ekout laparol me osi met li an pratik.’ (Lir Zak 1:22-25.) En dimoun ki ‘met an pratik,’ son lafwa i pous li pour pres avek devouman e partisip dan bann renyon Kretyen. Parski ou senserman kontan Bondye, ou pou obei “lalwa Zeova ki parfe,” sa i enplik tou sa ki i ekspekte avek ou.​—Ps. 19:7-11.

21. Ou bann lapriyer senser i kapab ganny konpare avek kwa?

²¹ Lanmour pour Zeova pou motiv ou pour priy souvan avek tou ou leker. I paret ki psalmis David ti pe refer avek lansan ki ti ganny brile tou le zour dapre lalyans Lalwa ler i ti sante: “Ki mon lapriyer i parey lansan ki’n ganny prepare devan ou [Zeova] e mon siplikasyon parey lofrann lagrenn aswar.” (Ps. 141:2; Egz. 30:7, 8) Ki ou bann demann, siplikasyon e lapriyer louanz ek remersiman pour Bondye i parey bann lofrann ki anvoy en bon loder ki senboliz bann lapriyer akseptab.​—Rev. 5:8.

22. Ki kalite lanmour nou pou diskit lo la dan lot lartik?

²² Zezi ti dir nou merit kontan Bondye e osi nou prosen. (Mat. 22:37-39) Parey nou pou vwar pli tar, nou lanmour pour Zeova ek son bann prensip pou ed nou pour annan bann bon relasyon avek lezot e demontre lanmour anver nou prosen.

[Not anba lo paz]

[Kestyon]

[Portre lo paz 15]

Zeova in donn bann berze ki demontre lentere senser anver son troupo (Vwar paragraf 19)