1. Ngaa nagdalom pa gid ang gugma sang Dios kag sang iya Anak?

ANG Anak ni Jehova nga si Jesucristo nagpahayag: “Ginahigugma ko ang Amay.” (Juan 14:31) Si Jesus nagsiling man: “Ginapalangga sang Amay ang Anak.” (Juan 5:20) Indi na kita makibot sa sini. Kay man, sa malawig nga tion antes nangin tawo si Jesus, sia ang “pangolo nga manugpangabudlay” sang Dios. (Hulu. 8:30) Samtang updanay si Jehova kag si Jesus sa pagpanghikot, madamo gid sing natun-an ang Anak sa mga kinaiya sang iya Amay kag madamo sia sing rason sa paghigugma sa iya. Ang matuod, bangod suod ang ila kaangtanan, nagdalom pa gid ang ila gugma sa isa kag isa.

2. (a) Ano ang nalakip sa gugma? (b) Ano nga mga pamangkot ang binagbinagon naton?

² Ang gugma nagalakip sang pagbatyag sing tudok nga pagpalangga sa isa. Si salmista David nag-amba: “Ako nagahigugma sa imo, O GINOO, kusug nakon.” (Sal. 18:1) Amo man sini dapat ang aton balatyagon sa Dios, bangod palangga niya kita. Kon tumanon naton si Jehova, ipakita niya ang iya gugma sa aton. (Basaha ang Deuteronomio 7:12, 13.) Pero mahigugma gid bala naton ang Dios, bisan indi naton sia makita? Ano ang buot silingon sang paghigugma kay Jehova? Ngaa dapat naton sia higugmaon? Kag paano naton mapakita ang aton gugma sa Dios?

3, 4. Ngaa posible naton mahigugma si Jehova?

³ “Ang Dios Espiritu,” gani indi naton sia makita. (Juan 4:24) Pero posible naton mahigugma si Jehova, kag ginasugo kita sang Kasulatan nga ipakita ini nga gugma. Halimbawa, ginsilingan ni Moises ang mga Israelinhon: “Higugmaon mo ang GINOO nga imo Dios sa bug-os mong tagiposoon, kag sa bug-os mong kalag, kag sa bug-os mong kusug.”—Deut. 6:5.

⁴ Ngaa posible kita makapalambo sing tudok nga gugma sa Dios? Bangod gintuga niya kita nga may espirituwal nga kinahanglanon kag ginhatagan sing ikasarang nga magpabutyag sang gugma. Kon mabusog ang aton espirituwal nga kinahanglanon, magadalom ang aton gugma kay Jehova kag may rason gid kita nga magmalipayon. “Malipayon ang mga mahunahunaon sang ila espirituwal nga kinahanglanon,” siling ni Jesus, “kay ila ang ginharian sang langit.” (Mat. 5:3) Parte sa ginatawag sang iban nga natural nga handum sang tawo sa pagsimba, ang isa ka reperensia nagsiling: “Dapat kita mahalawhaw, mahayanghag kag magdayaw nga makita ang mga tawo bisan diin nga nagapangita, kag nagapati, sa isa ka supremo nga persona.”—­Man ­Does ­Not ­Stand ­Alone, ni A. C. Mor­ri­son.

5. Ngaa indi wala sing pulos ang pagpangita sa Dios?

⁵ Wala bala sing pulos ang pagpangita sa Dios? Indi, kay luyag niya nga makilala naton sia. Maathag ini nga ginpakita ni Pablo sang nagpanaksi sia sa isa ka grupo nga nagatipon sa Areopago. Gikan diri makita ang Par­the­non—ang templo nga nadedikar kay Atena, nga patron nga diosa sang dumaan nga Atenas. Handurawa nga ara ka didto sang nagsiling si Pablo parte sa “Dios nga naghimo sang kalibutan kag sang tanan nga butang sa sini” kag dayon nagpaathag nga ang Dios “wala nagapuyo sa mga templo nga ginhimo sang kamot.” Ang apostol nagdugang nga “ginhimo [sang Dios] gikan sa isa ka tawo ang tagsa ka pungsod sang mga tawo, agod magpuyo sa bug-os nga kadaygan sang duta, kag gintangdo niya ang gintalana nga mga tion kag ang ginpahamtang nga mga dulunan sang puluy-an sang mga tawo, agod pangitaon nila ang Dios, nga nagapangapkap pa gani sila kag makita gid sia, apang, ang matuod, indi sia malayo sa tagsa sa aton.” (Binu. 17:24-27) Huo, posible nga makita ukon makilala sang mga tawo ang Dios. Sobra sa pito ka milyon kag tunga ka Saksi ni Jehova ang ‘nakakita gid sa iya’—kag ginahigugma gid nila sia.

6. Suno kay Jesus, ano ang “labing daku kag nahauna nga sugo”?

⁶ Ang aton gugma kay Jehova dapat naghalin sa aton tagipusuon. Maathag ini nga ginsiling ni Jesus sang namangkot ang Fariseo: “Manunudlo, ano ang labing daku nga sugo sa Kasuguan?” Si Jesus nagsabat: “ ‘Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo.”—Mat. 22:34-38.

7. Ano ang buot silingon sang paghigugma sa Dios sa (a) “bug-os [naton] nga tagipusuon”? (b) “bug-os [naton] nga kalag”? (c) “bug-os [naton] nga hunahuna”?

⁷ Ano ang buot silingon ni Jesus sang nagsiling sia nga dapat naton higugmaon ang Dios sing ‘bug-­os tagipusuon’? Buot niya silingon nga dapat naton higugmaon si Jehova sa aton bug-os nga malaragwayon nga tagipusuon, nga nagaapektar sa aton mga handum, emosyon, kag balatyagon. Dapat man naton sia higugmaon sa “bug-­os [naton] nga kalag,” ukon aton kabuhi kag pagkatawo. Dugang pa, dapat man naton higugmaon ang Dios sa “bug-­os [naton] nga hunahuna,” ukon bug-­os naton nga paghangop. Ginapakita sini nga kinahanglan naton higugmaon si Jehova sing bug-­os, nga wala gid sing pagpangalag-ag ukon kondisyon.

8. Paano naton mapakita nga ginahigugma naton ang Dios?

⁸ Kon higugmaon naton ang Dios sa aton bug-os nga tagipusuon, kalag, kag hunahuna, mangin maukod kita nga estudyante sang iya Pulong, bug-os tagipusuon nga magaalagad sa iya katuyuan, kag makugi nga magapahayag sang maayong balita sang Ginharian. (Mat. 24:14; Roma 12:1, 2) Paagi sa aton matuod nga gugma kay Jehova, magasuod pa gid kita sa iya. (Sant. 4:8) Siempre, indi naton malista ang ­tanan nga rason kon ngaa dapat naton higugmaon ang Dios. Pero, binagbinagon naton ang pila sa sini.

9. Ngaa ginahigugma mo si Jehova subong aton Manunuga kag Manug-aman?

⁹ Si Jehova ang aton Manunuga kag Manug-aman. “Paagi sa iya kita may kabuhi kag nagahulag kag nagaluntad,” siling ni Pablo. (Binu. 17:28) Ginhatag sa aton ni Jehova ang duta subong matahom nga puluy-an. (Sal. 115:16) Ginaamanan man niya kita sing pagkaon kag mga kinahanglanon para mabuhi. Gani, masilingan ni Pablo ang nagasimba sa idolo nga mga pumuluyo sang Listra nga ang ‘buhi nga Dios wala gid nagapabaya sa iya kaugalingon nga wala sing pamatuod bangod naghimo sia sang maayo, nga nagahatag sa inyo sang ulan gikan sa langit kag sang mapatubason nga mga panag-on, nga nagahatag sang bugana nga kalan-on kag nagapuno sang inyo tagipusuon sang kasadya.’ (Binu. 14:15-17) Indi bala nga rason gid ini nga higugmaon ang aton Dungganon nga Manunuga kag mahigugmaon nga Manug-aman?—Man. 12:1.

10. Ano dapat ang aton batyagon bangod naghimo ang Dios sing paagi para madula ang sala kag kamatayon?

¹⁰ Ang Dios naghimo sing paagi nga madula ang sala kag kamatayon nga aton napanubli kay Adan. (Roma 5:12) Huo, “ginarekomendar sang Dios ang iya mismo gugma sa aton amo nga samtang mga makasasala pa kita, si Cristo napatay para sa aton.” (Roma 5:8) Wala sing duhaduha, puno gid ang aton tagipusuon sang gugma kay Jehova bangod naghimo sia sing paagi para mapatawad ang aton mga sala kon maghinulsol kita kag magtuo sa halad gawad ni Jesus.—Juan 3:16.

11, 12. Paano kita ginhatagan ni Jehova sing paglaum?

¹¹ Si Jehova ‘nagahatag sang paglaum nga nagapuno sa aton sang kalipay kag paghidait.’ (Roma 15:13) Ang paglaum nga halin sa Dios nagabulig sa aton nga mabatas ang mga pagtilaw sa aton pagtuo. Ang mga hinaplas nga mangin ‘matutom tubtob sa kamatayon pagahatagan sing korona sang langitnon nga kabuhi.’ (Bug. 2:10) Ang mga nagahupot sing integridad nga may paglaum diri sa duta makaagom sing wala katapusan nga mga pagpakamaayo sa ginsaad nga bug-os globo nga Paraiso. (Luc. 23:43) Ano ang aton reaksion sa sini nga mga paglaum? Indi bala nga napuno kita sing kalipay, paghidait, kag gugma sa Manughatag sang “tagsa ka maayong dulot kag tagsa ka himpit nga regalo”?—Sant. 1:17.

¹² Ang Dios nagahatag sa aton sing makapaumpaw nga paglaum sang pagkabanhaw. (Binu. 24:15) Siempre nasubuan gid kita kon mapatay ang aton hinigugma, pero bangod may paglaum nga pagkabanhaw, ‘wala kita nagakasubo subong sang iban nga wala sing paglaum.’ (1 Tes. 4:13) Bangod sa gugma, gusto gid ni Jehova nga Dios nga banhawon ang mga patay, ilabi na ang mga matutom, kaangay sang matarong nga si Job. (Job 14:15) Handurawa ang daku nga kalipay samtang ginaabiabi ang mga ginbanhaw diri sa duta. Nagadalom gid ang aton gugma sa aton langitnon nga Amay, nga naghatag sa aton sing dalayawon nga paglaum nga pagkabanhaw!

13. Ano ang pamatuod nga ang Dios nagaulikid gid sa aton?

¹³ Si Jehova nagaulikid gid sa aton. (Basaha ang Salmo 34:6, 18, 19; 1 Pedro 5:6, 7.) Nahibaluan naton nga ang aton mahigugmaon nga Dios handa pirme magbulig sa mga matutom sa iya, gani nagabatyag kita sing seguridad bilang bahin sang ‘mga carnero sang iya halalban.’ (Sal. 79:13) Dugang pa, mapakita pa gid sang Dios ang gugma niya sa aton sa iya pagahimuon paagi sa Mesianikong Ginharian. Pagkatapos dulaon sang iya ginpili nga Hari, si Jesucristo, ang kasingki sa duta, pagpamigos, kag kalautan, ang mga matinumanon pakamaayuhon sing walay katapusan nga paghidait kag kahamungayaan. (Sal. 72:7, 12-14, 16) Indi bala ini nga paglaum isa gid ka rason nga higugmaon ang aton nagaulikid nga Dios sa aton bug-os nga tagipusuon, kalag, kusog, kag hunahuna?—Luc. 10:27.

14. Ano ang indi matupungan nga pribilehiyo ang ginhatag sa aton sang Dios?

¹⁴ Si Jehova naghatag sa aton sing indi matupungan nga pribilehiyo nga alagaron sia subong iya mga Saksi. (Isa. 43:10-12) Ginahigugma naton ang Dios bangod ginhatagan niya kita sing kahigayunan nga suportahan ang iya soberanya kag magpaambit sing matuod nga paglaum sa mga tawo sa sining magamo nga kalibutan. Dugang pa, makahambal kita nga may pagtuo kag kombiksion bangod ang maayong balita nga aton ginapahayag nabase sa Pulong sang matuod nga Dios, nga ang iya mga saad wala nagakapaslawan. (Basaha ang Josue 21:45; 23:14.) Siempre, madamo pa ang mga pagpakamaayo kag ang aton mga rason sa paghigugma kay Jehova. Pero paano naton mapakita ang aton gugma sa iya?

15. Paano kita mabuligan sang pagtuon kag pag-aplikar sang Pulong sang Dios?

¹⁵ Tun-i sing maayo ang Pulong sang Dios kag iaplikar ini. Ang paghimo sini nagapakita nga ginahigugma naton si Jehova kag luyag gid naton nga ang iya pulong mangin ‘kapawa sa aton banas.’ (Sal. 119:105) Kon nagaeksperiensia kita sing kabudlayan, malugpayan kita sang mga pasalig subong sini: “Ang boong kag mahinulsulon nga tagiposoon, O Dios, dili mo pagtamayon.” “Ang imo malig-on nga paghigugma, O GINOO, nagpatindug sa akon. Sa kadam-an sang akon mga hunahuna sa sulud nakon, ang imo mga paglipay nagapasadya sang akon kalag.” (Sal. 51:17; 94:18, 19) Naluoy si Jehova sa mga nagaantos, kag amo man si Jesus. (Isa. 49:13; Mat. 15:32) Paagi sa pagtuon sa Biblia, mas mahibaluan naton ang mahigugmaon nga pag-ulikid ni Jehova sa aton, gani mas mapahulag kita nga higugmaon sia.

16. Paano nagadalom ang aton gugma sa Dios kon regular kita nga nagapangamuyo?

¹⁶ Mangamuyo sing regular sa Dios. Ang aton mga pangamuyo nagapasuod sa aton sa “nagapamati sang pangamuyo.” (Sal. 65:2) Kon maeksperiensiahan naton nga ginasabat sang Dios ang aton mga pangamuyo, nagadalom pa gid ang aton gugma sa iya. Halimbawa, mahimo makita naton nga wala niya ginatugutan nga masulay kita nga labaw pa sa aton masarangan. (1 Cor. 10:13) Kon may mga kabalaka kita kag hanuot nga mag-ampo kay Jehova, mahimo naton mabatyagan ang indi matupungan nga “paghidait sang Dios.” (Fil. 4:6, 7) Kon kaisa, nagapangamuyo kita sing mahipos kaangay ni Nehemias, kag narealisar naton nga ginsabat ini. (Neh. 2:1-6) Samtang ‘nagapadayon kita sa pagpangamuyo’ kag maeksperiensiahan nga ginasabat ni Jehova ang aton mga pangabay, nagalig-on ang aton gugma sa iya, amo man ang aton pagsalig nga buligan niya kita sa ­magaabot pa nga mga pagtilaw sa aton pagtuo.—Roma 12:12.

17. Kon ginahigugma naton ang Dios, paano naton dapat tamdon ang pagtambong sa mga miting?

¹⁷ Himua nga kinabatasan ang pagtambong sa mga miting, asembleya, kag kombension. (Heb. 10:24, 25) Ang mga Israelinhon nagatipon agod mamati kag magtuon parte kay Jehova para mapalambo ang tudok nga pagtahod sa iya kag matuman ang iya Kasuguan. (Deut. 31:12) Indi mabug-at ang pagtuman sa kabubut-on sang Dios kon matuod ang gugma naton sa iya. (Basaha ang 1 Juan 5:3.) Gani, indi gid naton pagtugutan ang bisan ano nga makaupang sa aton pagtambong sa mga miting. Sigurado nga indi gid naton gusto nga madula ang aton una nga gugma kay Jehova.—Bug. 2:4.

18. Ano ang aton himuon bangod sang aton gugma sa Dios?

¹⁸ Mangin makugi sa pagsugid sa iban sang “kamatuoran sang maayong balita.” (Gal. 2:5) Ang aton gugma sa Dios nagapahulag sa aton nga isugid ang Mesianikong Ginharian sang iya pinalangga nga Anak, nga sa tion sang Armagedon magasakay sa kabayo para makig-away bangod sa kamatuoran. (Sal. 45:4; Bug. 16:14, 16) Makalilipay gid makigbahin sa paghimo sing disipulo paagi sa pagbulig sa mga tawo nga magtuon parte sa gugma sang Dios kag sa iya saad nga bag-ong kalibutan!—Mat. 28:19, 20.

19. Ngaa dapat naton apresyahon ang kahimusan ni Jehova sa pagbantay sa iya panong?

¹⁹ Apresyaha ang kahimusan sang Dios sa pagbantay sa iya panong. (Binu. 20:28) Gin-aman ni Jehova ang Cristianong mga gulang, nga pirme nagapanghikot para sa aton kaayuhan. Ang mga gulang kaangay “sang palalipdan sa hangin, palanagoan sa unus, subong sang mga ilig sang tubig sa duug nga kigas, subong sang landong sang daku nga igang sa duta nga makalalapyo.” (Isa. 32:1, 2) Nagapasalamat gid kita sa sining palanaguan sa tion sang bagyo ukon matugnaw kag mabaskog nga ulan! Kon nagatagiti ang init, nagapasalamat gid kita sa landong sang igang. Ini nga mga pagpaanggid nagabulig sa aton nga mahangpan nga ang mga gulang nagaaman sing espirituwal nga bulig kag paumpaw. Ang pagsunod sa mga nagapanguna sa aton nagapakita nga ginaapresyar naton ining “mga dulot nga mga lalaki” kag nagapamatuod sang aton gugma sa Dios kag kay Cristo, ang Ulo sang kongregasyon.—Efe. 4:8; 5:23; Heb. 13:17.

20. Kon ginahigugma mo ang Dios, paano mo tumanon ang Santiago 1:22-25?

²⁰ Kon ginahigugma mo si Jehova, mangin “manugtuman [ka] sing pulong, kag indi mga manugpamati lamang.” (Basaha ang Santiago 1:22-25.) Ang isa nga “manugtuman” may pagtuo nga nagapahulag sa iya nga manghikot, pareho sang makugi nga pagbantala kag pagpakigbahin sa mga miting. Bangod ginahigugma mo gid ang Dios, ginatuman mo ang “himpit nga kasuguan” ni Jehova, nga nagalakip sang tanan niya nga ginapatuman sa imo.—Sal. 19:7-11.

21. Sa diin mapaanggid ang imo tinagipusuon nga mga pangamuyo?

²¹ Ang paghigugma kay Jehova nga Dios magapahulag sa imo nga magpalapit pirme sa iya paagi sa tinagipusuon nga pangamuyo. Sang ginpatuhuyan ang pagsunog sang incienso kada adlaw nga ginapatuman sang Kasuguan nga katipan, ang salmista nga si David nag-amba para kay Jehova: “Ang akon pangamuyo magtub-ok subong sang incienso sa atubangan mo, ang pagbayaw sang akon mga kamut subong sang halad sa kahaponon.” (Sal. 141:2; Ex. 30:7, 8) Kabay nga ang imo mapainubuson nga mga pag-ampo, hanuot nga mga pangabay, kag tinagipusuon nga mga pagdayaw kag pagpasalamat sa Dios mangin kaangay sang mahamot nga incienso nga nagarepresentar sa kalahamut-an nga mga pangamuyo.—Bug. 5:8.

22. Ano nga sahi sang gugma ang aton binagbinagon sa masunod?

²² Si Jesus nagsiling nga dapat naton higugmaon ang Dios kag ang aton isigkatawo. (Mat. 22:37-39) Subong sang makita naton sa dugang nga pagbinagbinag sini nga kinaiya, ang aton gugma kay Jehova kag sa iya mga prinsipio magabulig sa aton nga makig-angot sing maayo sa mga tawo kag magpakita sing gugma sa aton isigkatawo.