1. Dahaka dainai Iehova bona Iesu edia huanai lalokau ia bada ia lao?

 IEHOVA ena Natuna, Iesu Keriso ia gwau: “Lau ese Tamana lau lalokau henia.” (Ioa. 14:31) Danu ia gwau: “Tamana ese Natuna ia ura henia.” (Ioa. 5:20) Iesu be tanobada ia do mai lasi neganai, lagani momo lalodiai guba ai ia noho bona ia be Tamana ena “gaukara karaia namonamo tauna.” (Aon. 8:30, NW) Iehova bona Iesu idia gaukara hebou lalonai, Iesu be ena Tamana ena kara namodia momo ia diba bona edia lalokau ia bada ia lao.

2. (a) Bema ita ura Dirava ese ita do ia lalokau henia, dahaka ita karaia be namo? (b) Inai stadi ai edena henanadai do ita haerelaidia?

² King Davida ia gwau: “Lohiabada e, oi be egu goada ena badina. Lau ese oi lau lalokau henia noho!” (Sal. 18:1) Unai bamona Iehova ita laloa be namo, badina ia ese ita ia lalokau henia danu. Bema Iehova ita badinaia, ita do ia lalokau henia. (Deuteronomi 7:12, 13 duahia.) To, Dirava ita itaia diba lasi dainai, edena dala ai ia ita lalokau henia diba? Iehova ita lalokau henia anina be dahaka? Dahaka dainai ita lalokau henia be namo? Bona edena dala ai ita hahedinaraia ia ita lalokau henia?

3, 4. Dahaka dainai Iehova ita lalokau henia diba?

³ “Dirava be Lauma” dainai ita itaia diba lasi. (Ioa. 4:24) To, Dirava ita lalokau henia diba, bona Baibel ese ita ia hagania unai ita karaia totona. Hegeregere, Mose ese Israela taudia ia hamaoroa: “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai.”—Deu. 6:5.

⁴ Dahaka dainai Dirava ita lalokau henia diba? Badina ita ia havaraia neganai, ia do ita tomadiho henia bona lalokau henia urana be eda lalona ai ia atoa. Bema Dirava tomadiho henia dalana ita dibaia, iseda lalokau ia dekenai do ia goada bona moale korikorina do ita davaria. Iesu ia gwau: “Dirava dibaia totona idia hitolo taudia be idia moale, badina guba Basileia be idia edia.” (Mat. 5:3) Toretore tauna A. C. Morrison be ena buka ladana, Man Does Not Stand Alone lalonai ia gwau, hoa gauna be taunimanima be hanaihanai Dirava idia tahua bona idia ura Ia idia abidadama henia. Unai hegeregerena, momo idia abia dae taunimanima idia vara neganai Dirava dibaia urana be edia lalona ai ia noho.

5. Edena bamona ita diba Dirava ita tahua neganai do ita davaria?

⁵ Dirava ita tahua neganai, do ita davaria, a? Oibe, badina ia ura ia do ita tura henia. Guna, aposetolo Paulo be Atena taudia ia hereva henidia neganai, unai ia hahedinaraia. Idia laloa dubu badana ta dekenai idia lao be namo dirava hahinena Atena idia tomadiho henia totona. To, Paulo ia gwau idia ese “tanobada bona ia lalonai idia noho gaudia ibounai ia karaia” Dirava momokanina idia davaria diba. Ia gwau unai Dirava be dubu lalodiai ia noho lasi. Paulo ma ia gwau, Dirava “ese tau tamona amo bese ibounai taudia ia karaia, tanobada ibounai dekenai idia noho totona. Bona ia sibona ese edia nega ia atoa bona taunimanima edia noho gabudia edia hetoa ia makaia. Unai amo Dirava do idia tahua, bema ia idia tahua goadagoada, ia do idia davaria momokani. Oibe, ia be ita ta ta amo ia noho daudau lasi.” (Kara 17:24-27) Unai ese ia hamomokania taunimanima ese Dirava idia davaria diba. Iehova ena Witnes taudia 7 milioni mai kahana be ‘ia idia davaria momokani’ bona idia lalokau henia.

6. Iesu ia gwau edena “taravatu be hereadae bona ia be ginigunana”?

⁶ Namona be mai iseda kudouna ibounai ida Iehova ita lalokau henia. Farisea tauna ta be Iesu ia nanadaia: “Hadibaia Tauna e, Taravatu dekenai, edena taravatu be hereadae?” Iesu ia haere: “‘Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu darana ibounai ida.’ Unai taravatu be hereadae bona ia be ginigunana.”—Mat. 22:34-38.

7. Inai dala ai Dirava ita lalokau henia ena anina be dahaka: (a) eda “kudouna ibounai” ida? (b) eda “mauri ibounai” ida? bona (c) eda “darana ibounai” ida?

⁷ Iesu ia gwau mai eda “kudouna ibounai” ida Dirava ita lalokau henia ena anina be dahaka? Anina be iseda ura gaudia bona eda hemami ibounai ida Iehova do ita lalokau henia. Danu, namona be iseda “mauri ibounai,” o ita karaia gaudia ibounai lalonai do ita hahedinaraia Dirava ita lalokau henia. Unai sibona lasi, to iseda “darana ibounai ida” o ita laloa gaudia amo ita hahedinaraia Dirava ita lalokau henia. Anina be Iehova do ita lalokau henia momokani.

8. Dirava lalokau henia karana ese ita do ia doria, dahaka ita karaia totona?

⁸ Bema mai iseda kudouna, mauri, bona darana ibounai ida Dirava ita lalokau henia, ita be hanaihanai Baibel do ita stadilaia, Dirava ena ura do ita karaia bona Basileia sivarai namona do ita harorolaia goadagoada. (Mat. 24:14; Roma 12:1, 2) Unai ita karaia neganai, Iehova kahirakahira do ita lao. (Iam. 4:8) Momokani, Dirava ita lalokau henia ena badina be momo, to inai stadi ai haida sibona do ita herevalaia.

9. Dahaka dainai Iehova oi lalokau henia?

⁹ Iehova be iseda Havaraia Tauna bona Hariharibada Tauna. Paulo ia gwau: “Ia dainai ita mauri, ita loaloa bona ita noho.” (Kara 17:28) Iehova ese ita dekenai tanobada hairaina ia henia ita noholaia totona. (Sal. 115:16) Ita mauri noho totona aniani bona gau ma haida ia henia. Unai dainai, Paulo ese Lusitera taudia ia hamaoroa, kaivakuku do idia tomadiho henia lasi to “mauri Diravana,” Iehova, idia tomadiho henia be namo. Paulo be Dirava ia herevalaia neganai, ia gwau: “Gau namodia ia karaia dainai, umui dekenai ia hahedinaraia ia be daika. Umui dekenai medu bona aniani momo negadia ia henia, vadaeni aniani momo umui abia bona emui kudouna ia hamoalea.” (Kara 14:15-17) Unai gaudia dainai, iseda Havaraia Tauna bona Hariharibada Tauna ita lalokau henia be namo, ani?—Had. 12:1.

10. Iesu ena mauri davalaia boubouna be edena bamona oi laloa?

¹⁰ Dirava ese dala ia hegaegaelaia unai amo Adamu amo ita abia kara dika bona mase ia kokia diba. (Roma 5:12) Baibel ia gwau: “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Momokani, Iehova ita lalokau henia bada badina dala ia karaia, unai amo bema ita helalo-kerehai bona Iesu ena mauri davalaia boubouna ita abidadama henia, iseda kara dika ia gwauatao diba.—Ioa. 3:16.

11, 12. Edena dala ai Iehova ese ita dekenai helaro ia henia?

¹¹ Iehova amo ‘ia mai helaro ese moale bona maino bada amo ita ia hahonua.’ (Roma 15:13) Dirava amo ia mai helarona ese ita ia hagoadaia dainai, hahetoho ita haheaukalaia diba. Bema horoa taudia be ‘abidadama dekenai idia gini goada ela bona mase, guba ai mauri ena korona do idia abia.’ (Apok. 2:10.) Danu, abidadama taudia ma haida edia helaro be tanobada Paradaisona ai mauri hanaihanai do idia abia. (Luka 23:43) Unai hahenamo dainai, iseda hemami be edena bamona? Ita moale, lalomaino ita davaria bona Dirava ita lalokau henia, badina “harihari gaudia namodia ibounai bona harihari gaudia hereadaedia ibounai” be ia amo idia mai.—Iam. 1:17.

¹² Dirava ese ita dekenai toreisi lou helarona ia henia. (Kara 24:15) Ena be eda lalokau tauna ta ia mase neganai ita daradoko, to toreisi lou helarona dainai, ‘ita be ma haida bamona ita lalohisihisi lasi, badina idia dekenai helaro be lasi.’ (1 Tes. 4:13) Lalokau dainai, Iehova Dirava ia ura idia mase vadaeni abidadama taudia, hegeregere Iobu, ia hatoredia isi lou. (Iobu 14:15) Mani oi laloa, toreisi lou taudia be edia varavara ida idia hedavari lou neganai do idia moale bada. Iseda guba Tamana ese unai toreisi lou helarona ia henia dainai, ia ita lalokau henia bada!

13. Dahaka ese idia hamomokania Dirava be ita ia laloa bada?

¹³ Iehova be ita ia laloa bada. (Salamo 34:6, 18, 19; 1 Petero 5:6, 7 duahia.) Ita diba iseda lalokau Diravana be nega ibounai ia noho hegaegae ia idia badinaia taudia ia durua totona. Unai dainai, iena mamoe serina lalonai ita noho neganai ita gari lasi. (Sal. 79:13) Danu, Dirava ese Mesia Basileiana amo ita totona do ia karaia gaudia ese iena lalokau do idia hahedinaraia. Ia horoa King, Iesu Keriso ese inai tanobada amo dagedage, hisihisi bona kara dika ia kokia murinai, abidadama taudia be maino bona mauri namona do idia moalelaia. (Sal. 72:7, 12-14, 16) Unai gwauhamata ita laloa dobu neganai, ita ura mai eda kudouna, mauri, goada bona darana ibounai ida Dirava ita lalokau henia, ani?—Luka 10:27.

14. Dirava ese ita dekenai dahaka hahenamo badana ia henia?

¹⁴ Iehova ese ita ia abia hidi iena Witnes taudia ai ita lao be hahenamo badana. (Isa. 43:10-12) Dirava ita lalokau henia badina ia ese dala  ia kehoa iena lohia siahuna ita durua, bona ma haida dekenai iseda helaro ita herevalaia diba. Danu, ita be mai abidadama ida ita hereva badina ita herevalaia sivarai namona be Baibel amo, bona ita diba Dirava ena gwauhamata ibounai be do idia guguru. (Iosua 21:45; 23:14 duahia.) Momokani, Dirava amo idia mai hahenamo bona Ia ita lalokau henia ena badina be momo. To, edena dala ai ita hahedinaraia diba Dirava ita lalokau henia?

15. Baibel stadilaia bona badinaia karana ese edena dala ai ita ia durua diba?

¹⁵ Baibel do ita stadilaia bona badinaia. Unai ita karaia neganai, ita hahedinaraia ita be Iehova ita lalokau henia bona ita ura iena Hereva be ‘diari bamona iseda dala ia hadiaria noho.’ (Sal. 119:105) Bema ita be hisihisi ita davaria, inai siri ese ita idia hagoadaia diba. Idia gwau: “Dirava e, bema tau ta be iena kara dika dainai ia lalohisihisi momokani, bona ia manau momokani neganai, oi ese ia do oi negea diba lasi.” “Lohiabada e, oiemu lalokau bada ese lau ia abia isi lou. Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.” (Sal. 51:17; 94:18, 19) Iehova bona Iesu be hisihisi idia davaria taudia ibounai idia hebogahisi henidia. (Isa. 49:13; Mat. 15:32) Baibel ita stadilaia neganai, Iehova ena lalokau ita dekenai ita lalopararalaia, bona unai ese iseda lalona ia veria ia ita lalokau henia totona.

16. Edena dala ai guriguri hanaihanai karana ese ita ia durua eda lalokau Dirava dekenai ia bada totona?

¹⁶ Hanaihanai Dirava ita guriguri henia. Unai ita karaia neganai, ‘guriguri ia kamonai’ Diravana kahirakahira do ita lao. (Sal. 65:2) Bema ita itaia Dirava ese eda guriguri ia haerelaia, eda lalokau ia dekenai be do ia bada ia lao. Hegeregere, reana ita itaia ia ese dala ia karaia unai amo iseda goada ia hereaia hedibagani ita haheaukalaia diba. (1 Kor. 10:13) Bema ita lalohekwarahi negadiai Iehova ita noia goadagoada ita ia durua totona, “Dirava ena maino” ita mamia diba. (Fili. 4:6, 7) Nega haida, Nehemia bamona, reana eda lalona ai Dirava ita guriguri henia, bona gabeai ita itaia Ia ese eda guriguri ia haerelaia. (Neh. 2:1-6) Bema ‘guriguri karana ita hadokoa lasi’ bona ita itaia Iehova ese iseda noinoi ia haerelaia, iseda lalokau ia dekenai be do ia bada, bona do  ita abia dae ia ese ita do ia durua hahetoho ma haida ita haheaukalaia totona.—Roma 12:12.

17. Bema Dirava ita lalokau henia, hebou lao karana be edena bamona do ita laloa?

¹⁷ Namona be hanaihanai Keristani hebou badadia bona maragidia ita lao. (Heb. 10:24, 25) Israela taudia be hebou idia karaia Iehova ena hakaua herevadia idia dibaia bona kamonai henia totona, unai amo Ia idia matauraia bona iena Taravatu idia badinaia diba. (Deu. 31:12) Bema Dirava ita lalokau henia bada, iena taravatu ita badinadia be auka lasi. (1 Ioane 5:3 duahia.) Unai dainai, ita ura lasi gau ta ese iseda hebou lao karana ia koua. Oibe, ita ura lasi guna Iehova dekenai ita hahedinaraia lalokauna ita haboioa.—Apok. 2:4.

18. Dirava ita lalokau henia dainai ita ura dahaka ita karaia?

¹⁸ “Sivarai namona ena hereva momokani” be ma haida dekenai ita harorolaia goadagoada. (Gal. 2:5) Dirava ita lalokau henia dainai, ita ura iena Natuna ena Mesia Basileiana do ita harorolaia. Ia be Aramagedono ai ‘hereva momokani gimaia totona do ia tuari.’ (Sal. 45:4; Apok. 16:14, 16.) Ita moale badina taunimanima ita durua Dirava ena lalokau bona ia gwauhamatalaia tanobada matamata ena sivarai idia diba totona!—Mat. 28:19, 20.

19. Dahaka dainai elda taudia ita matauraia be namo?

¹⁹ Ita hahedinaraia kongrigeisen elda taudia ita matauraia. (Kara 20:28) Keristani elda taudia be harihari gaudia Iehova amo, bona idia be hanaihanai iseda namo idia laloa bada. Elda taudia be “guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena ikerukeru bamona, tano kaukau dekenai.” (Isa. 32:1, 2) Bema lai o medu badana ia mai bona ita be hunia gabuna ta ai ita noho, unai gabu dainai do ita moale, ani? Dina ia siahu bada neganai, ita ura nadi badana ena ikerukeru henunai ita noho. Unai hegeregerena, elda taudia ese ita idia durua bona hagoadaia, unai amo Iehova ita hesiai henia noho, herevana hekwakwanai ita davaria. Ita idia gunalaia taudia ita badinaia karana ese ia hahedinaraia, ita be unai “harihari gaudia” ita matauraia, bona Iehova bona Keriso, kongrigeisen ena Kwarana, ita lalokau henidia.—Efe. 4:8; 5:23; Heb. 13:17.

20. Bema Dirava oi lalokau henia, dahaka do oi karaia?

²⁰ Iehova ese ia henia “taravatu goevadaena” ta ese ita dekenai Iehova ia ura do ita karaia gaudia ibounai ia hadibaia. (Iamesi 1:22-25 duahia.) Bema oi ura emu hetura karana Iehova ida ia goada, iena hereva oi kamonai sibona be hegeregere lasi. (Sal. 19:7-11) Oi dibaia gaudia oi badinaia danu be namo. Hegeregere, Dirava oi lalokau henia dainai ma haida dekenai ia do oi herevalaia bona hebou ai do oi haere.

21. Iseda guriguri be dahaka ida ita hahegeregerea diba?

²¹ Bema Iehova Dirava oi lalokau henia, hanaihanai ia do oi guriguri henia. Israela ai, hahelaga taudia be dina ta ta ai Iehova dekenai bonana namo muramura idia gabua. King Davida ese ena guriguri be unai bonana namo muramura ida ia hahegeregerea, ia gwau: “Lau ura egu guriguri do oi [Iehova] abia dae, bona ena mamina oi dekenai be namo, muramura mai bonana namona bamona. Bona lau ura egu imana lau abia isi kara ena namo, be adorahi boubouna ena namo hegeregerena.” (Sal. 141:2; Eso. 30:7, 8) Iehova be Davida ena guriguri ia kamonai henia. Bema iseda guriguri lalonai mai momokani ida Iehova ita tanikiu henia bona ita manau, iseda guriguri be bonana namo muramura bamona bona Iehova do ia hamoalea.—Apok. 5:8.

22. Stadi gabena ai dahaka do ita herevalaia?

²² Iesu ia gwau Dirava bona eda dekena taudia ita lalokau henia be namo. (Mat. 22:37-39) Bema Iehova bona ena hakaua herevadia ita laloa bada, unai ese ita do ia durua eda dekena taudia ita lalokau henia totona. Stadi gabena ai unai ena anina do ita herevalaia.