1. Apay nga immuneg ti ayat iti nagbaetan ti Dios ken ti Anakna?

KINUNA ni Jesus maipapan ken Amana: “Ay-ayatek ti Ama.” (Juan 14:31) Kinunana pay: “Ti Ama addaan panagayat iti Anak.” (Juan 5:20) Ditay pakasdaawan dayta ta nabayag a nagserserbi ni Jesus kas “nasigo a managobra” ti Dios sakbay a nagbalin a tao. (Prov. 8:30) Bayat ti pannakipagtrabahona ken Jehova, adu ti nasursuro ni Jesus kadagiti kualidad ni Amana ken adu ti makagapu no apay nga ay-ayatenna. Gapu iti nasinged a panagkaduada, immuneg ti ayatda iti maysa ken maysa.

2. (a) Kasanotay a maibaga nga ay-ayatentayo ti maysa? (b) Ania dagiti saludsod nga usigentayo?

² No ay-ayatentayo ti maysa, adda nauneg a panangipategtayo kenkuana. Inkanta ni salmista David: ‘Addaanak iti panagayat kenka, O Jehova a pigsak.’ (Sal. 18:1) Kasta koma ti rumbeng a panagriknatayo iti Dios agsipud ta ipatpategnatayo. No agtulnogtayo ken Jehova, ipakitana ti ayatna kadatayo. (Basaen ti Deuteronomio 7:12, 13.) Ngem talaga kadi a mabalintayo nga ayaten ti Dios uray no ditay makita? Ania ti kaipapanan ti panangayat ken Jehova? Apay a rumbeng nga ayatentayo ti Dios? Ken kasanotayo a maipakita nga ay-ayatentayo isuna?

3, 4. Apay a mabalintay nga ayaten ni Jehova?

³ “Ti Dios maysa nga Espiritu,” isu a saantayo a makita. (Juan 4:24) Ngem mabalintay nga ayaten ni Jehova, ket imbilin ti Kasuratan nga ipakitatayo dayta a panagayat. Kas pagarigan, imbaga ni Moises kadagiti Israelita: “Masapul nga ayatem ni Jehova a Diosmo buyogen ti isuamin a pusom ken isuamin a kararuam ken isuamin a bikasmo [wenno, bilegmo].”—Deut. 6:5.

⁴ Apay a mabalintay nga ayaten ti Dios? Gapu ta pinarsuanatayo nga addaan iti naespirituan a panagkasapulan ken abilidad a mangipakita iti ayat. No maam-ammotayo ni Jehova, umuneg ti panagayattayo kenkuana ken daytoy ti mamagbalin kadatayo a naragsak. “Naragsak dagidiay sipapanunot iti naespirituan a kasapulanda,” kinuna ni Jesus, “yantangay kukuada ti pagarian ti langlangit.” (Mat. 5:3) Maipapan iti nainkasigudan a tarigagay ti tao nga agdaydayaw, kuna ni A. C. Morrison iti libro a Man Does Not Stand Alone: “Nakaskasdaaw ta gistay amin a tattao ket agbirbirok ken mamati iti maysa a katan-okan a persona.”

5. Kasanotay nga ammo a kabaelantayo a sapulen ti Dios?

⁵ Posible kadi a masapulantayo ti Dios? Wen, agsipud ta kasta ti kayatna nga aramidentayo. Imbatad dayta ni apostol Pablo idi nangasaba iti maysa a grupo idiay Areopago. Makitkitada sadiay ti Parthenon—maysa a templo a naidedikar iti diosa a ni Athena, ti patron ti nagkauna nga Atenas. Iladawam nga addaka sadiay bayat nga agsasao ni Pablo maipapan iti “Dios a nangaramid iti lubong ken amin a bambanag nga adda iti dayta” sa inlawlawagna a “saan nga agnaed [ti Dios] kadagiti templo nga inaramid ti ima.” Kinuna pay ti apostol a “manipud iti maysa a tao inaramid [ti Dios] ti tunggal nasion dagiti tattao, tapno agnaedda iti intero a rabaw ti daga, ket inkeddengna dagiti naituding a tiempo ken dagiti naipasdek a pagpatinggaan ti pagnaedan dagiti tattao, tapno sapulenda ti Dios, no isu maarikapda ket pudno a masarakanda, nupay, iti kinapudnona, saan nga adayo iti tunggal maysa kadatayo.” (Ara. 17:24-27) Wen, posible a mabirokan dagiti tattao ti Dios. Nasurok a pito ket kagudua a milion a Saksi ni Jehova ti ‘pudno a nakasarak kenkuana’—ket talaga nga ay-ayatenda isuna.

6. Ania ti imbaga ni Jesus a “kadakkelan ken umuna a bilin”?

⁶ Masapul nga aggubuay iti pusotayo ti panagayattayo ken Jehova. Impaganetget dayta ni Jesus idi insaludsod kenkuana ti maysa a Fariseo: “Mannursuro, ania ti kadakkelan a bilin iti Linteg?” Insungbat ni Jesus: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin.”—Mat. 22:34-38.

7. Ania ti kaipapanan ti panangayat ti Dios iti (a) ‘intero a pusotayo’? (b) ‘intero a kararuatayo’? (c) ‘intero a panunottayo’?

⁷ Ania ti kayat a sawen ni Jesus idi imbagana a masapul nga ayatentayo ti Dios iti ‘intero a pusotayo’? Kaipapanan dayta a masapul a makita iti tarigagay, emosion, ken rikriknatayo nga ay-ayatentayo ni Jehova. Masapul met nga ayatentayo isuna iti ‘intero a kararuatayo,’ wenno iti intero a biag ken kinataotayo. Masapul met nga ayatentayo ti Dios iti ‘intero a panunottayo,’ wenno iti amin nga isiptayo. Nalawag a rumbeng a naan-anay nga ayatentayo ni Jehova.

8. No pudpudno nga ay-ayatentayo ti Dios, ania ti aramidentayo?

⁸ No ayatentayo ti Dios iti intero a puso, kararua, ken panunottayo, regular nga adalentayo ti Saona, aramidentayo ti amin a kalikagumanna, ken naregtatayo a mangikasaba iti naimbag a damag ti Pagarian. (Mat. 24:14; Roma 12:1, 2) No pudpudno nga ay-ayatentayo ni Jehova, ad-adda nga umadanitayo kenkuana. (Sant. 4:8) Siempre, saantayo a madakamat ti amin a makagapu no apay a masapul nga ayatentayo ti Dios. Ngem usigentayo ti sumagmamano kadagita.

9. Apay nga ay-ayatem ni Jehova kas Namarsua ken Manangipaay iti kasapulantayo?

⁹ Ni Jehova ti Namarsua ken Manangipaay iti kasapulantayo. “Babaen kenkuana addaantayo ti biag ken aggunaytayo ken addatayo,” kinuna ni Pablo. (Ara. 17:28) Inted kadatayo ni Jehova ti daga kas nagsayaat a pagtaengantayo. (Sal. 115:16) Ipapaayna met ti taraon ken dadduma pay a kasapulantayo tapno masustiner ti biagtayo. Gapuna, naibaga ni Pablo kadagiti managdaydayaw iti idolo a taga-Listra a ti “Dios a sibibiag . . . saanna a binay-an nga awan mangsaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.” (Ara. 14:15-17) Saan kadi a maysa dayta a rason nga ayatentayo ti Naindaklan a Namarsua ken naayat a Manangipaay iti kasapulantayo?—Ecl. 12:1.

10. Ania koma ti panagriknatayo maipapan iti daton a subbot nga impaay ti Dios?

¹⁰ Ti Dios ti nangaramid iti pamay-an tapno maikkat ti basol ken ipapatay a natawidtayo ken Adan. (Roma 5:12) Wen, “ti Dios irekomendana ti bukodna nga ayat kadatayo ta, bayat a managbasoltayo pay laeng idi, ni Kristo natay a maipaay kadatayo.” (Roma 5:8) Rumbeng laeng nga agyamantayo ken Jehova gapu iti inaramidna a pamay-an tapno mapakawan dagiti basoltayo no agbabawi ken mamatitayo iti daton a subbot ni Jesus.—Juan 3:16.

11, 12. Aniada a namnama ti impaay kadatayo ni Jehova?

¹¹ Impaayannatay ni Jehova iti namnama nga agbiag nga agnanayon. (Roma 15:13) Gapu iti namnama nga inted ti Dios, maibturantayo dagiti pannakasuot ti pammatitayo. Dagiti napulotan nga agtalinaed a ‘matalek agingga ken patay maitedto kadakuada ti korona ti nailangitan a biag.’ (Apoc. 2:10) Dagiti nasungdo a mangnamnama nga agbiag nga agnanayon ditoy daga tagiragsakendanto dagiti naikari a bendision para iti sangalubongan a Paraiso. (Luc. 23:43) Ania ti gagangay a mariknatayo kadagita a namnama? Saan kadi a makariknatayo iti aglaplapusanan a rag-o ken talna, kasta met iti panagayattayo iti Daydiay mangmangted iti “tunggal naimbag a sagut ken tunggal naan-anay a rangkap”?—Sant. 1:17.

¹² Impaayannatayo ti Dios iti namnama a panagungar. (Ara. 24:15) Siempre, maladingitantayo no matay ti maysa a dungdungnguentayo. Ngem gapu iti namnama a panagungar, ‘saantayo nga agladingit a kas iti dadduma nga awanan namnama.’ (1 Tes. 4:13) Gapu iti ayatna, magagaran ni Jehova a Dios a mangpagungar kadagiti natay, nangnangruna kadagidiay matalek, a kas ken nalinteg a Job. (Job 14:15) Anian a ragsaktayo inton agkikita manen dagiti agkakapamilia ken aggagayyem gapu iti panagungar. Daytoy a nakaskasdaaw a namnama ti pakatignayantayo nga ad-adda pay a mangayat iti nailangitan nga Amatayo!

13. Ania ti pammaneknek a talaga a maseknan ti Dios kadatayo?

¹³ Talaga a maseknan kadatayo ni Jehova. (Basaen ti Salmo 34:6, 18, 19; 1 Pedro 5:6, 7.) Gapu ta ammotayo a kanayon a nakasagana a tumulong ti naayat a Diostayo kadagidiay matalek kenkuana, natalged ti riknatayo kas paset ti ‘arban iti pagpaarabanna.’ (Sal. 79:13) Nabatad met ti ayat ti Dios kadatayo kadagiti ibanagnanto babaen ti Mesianiko a Pagarian. Inton ti pinilina nga Ari a ni Jesu-Kristo maikkatnan ti kinaranggas, panangirurumen, ken kinadakes ditoy daga, matagiragsakton ti natulnog a tattao ti manayon a talna ken kinarang-ay. (Sal. 72:7, 12-14, 16) Saan kadi ngarud a matignaytayo a mangayat iti nadungngo a Diostayo iti intero a puso, kararua, ken panunottayo?—Luc. 10:27.

14. Ania a dakkel a pribilehio ti impaay kadatayo ti Dios?

¹⁴ Impaayannatayo ni Jehova iti dakkel a pribilehio nga agserbi kas Saksina. (Isa. 43: 10-12) Ay-ayatentayo ti Dios ta inikkannatayo iti gundaway a mangsuporta iti Pagarianna ken mangiranud iti namnamatayo kadagiti amin nga agsagsagaba. Kasta met, mamati ken agtalektayo iti naimbag a damag nga idekdeklaratayo gapu ta naibatay dayta iti Sao ti pudno a Dios, a dagiti karina ket di pulos mapaay. (Basaen ti Josue 21:45; 23:14.) Awan patinggana dagiti bendision ken makagapu nga ayatentayo ni Jehova. Ngem kasanotayo a maipakita nga ay-ayatentayo isuna?

15. Kasano a makatulong kadatayo ti panangadal ken panangyaplikar iti Sao ti Dios?

¹⁵ Regular nga adalen ken iyaplikar ti Sao ti Dios. No kasta ti aramidentayo, ipakpakitatayo nga ay-ayatentayo ni Jehova ken kayattayo a ti saona ti agbalin a ‘silaw iti danatayo.’ (Sal. 119:105) No agpaspasartayo iti rigat, maliwliwatayo kadagiti naayat a pammatalged a kas kadagitoy: “Ti puso a nadunor ken naidagel, O Dios, saanmonto nga umsien.” “Ti bukodmo a naayat a kinamanangngaasi, O Jehova, sinarsaranaynak. Idi a ti mangrirriribuk a pampanunotko immaduda iti unegko, dagiti bukodmo a pangliwliwa rinugianda a sappuyoten ti kararuak.” (Sal. 51:17; 94:18, 19) Maasian ni Jehova kadagiti agsagsagaba, ket kasta met ti marikna ni Jesus. (Isa. 49:13; Mat. 15:32) No adalentayo ti Biblia, agbalintayo a sipapanunot iti naayat a pannakaseknan ni Jehova ken umuneg ti panagayattayo kenkuana.

16. Kasano nga umuneg ti panagayattayo iti Dios no regular nga agkararagtayo kenkuana?

¹⁶ Regular nga agkararag iti Dios. Ti panagkararagtayo ad-adda a pasingedennatayo iti “Managdengngeg iti kararag.” (Sal. 65:2) No makitatayo a sungsungbatan ti Dios dagiti kararagtayo, umuneg ti panagayattayo kenkuana. Kas pagarigan, mabalin a nariknatayo a dina impalubos a masulisogtayo iti labes ti kabaelantayo. (1 Cor. 10:13) No sipapasnek nga iyararawtayo ken Jehova ti pakarigatanyo, mabalin a mariknatayo ti “talna ti Dios”—ti kalmado a rikna a ni laeng Jehova ti makaipaay. (Fil. 4:6, 7) No dadduma, mabalin a siuulimek nga agkararagtayo a kas ken Nehemias ket inton agangay, makitatayo ti panangsungbat ni Jehova iti kararagtayo. (Neh. 2:1-6) Bayat a ‘reggetantayo ti agkararag’ ken makitkitatayo a sungsungbatan ni Jehova dagiti panagpakaasitayo, umuneg ti  panagayattayo kenkuana kasta met ti panagtalektayo a tulongannatayo a mangdaer iti dadduma pay a suot.—Roma 12:12.

17. No ay-ayatentayo ti Dios, kasano koma ti panangmatmattayo kadagiti gimong?

¹⁷ Tumabuno a kanayon kadagiti Nakristianuan a gimong, asamblea, ken kombension. (Heb. 10:24, 25) Aguummong idi dagiti Israelita tapno dumngeg ken agsursuroda maipapan ken Jehova, iti kasta makapagdaydayawda kenkuana buyogen ti nauneg a panagraem ken masurotda ti Lintegna. (Deut. 31:12) No talaga nga ay-ayatentayo ti Dios, saan a makapadagsen kadatayo ti panangtungpal iti pagayatanna. (Basaen ti 1 Juan 5:3.) Gapuna, ditay koma ipalubos nga adda makalapped iti pannakigimongtayo. Ditay la ketdi kayat a mapukaw ti damo nga ayattayo ken Jehova.—Apoc. 2:4.

18. Ania ti kayattayo nga aramiden no ay-ayatentayo ti Dios?

¹⁸ Sireregta nga ikasaba ti “kinapudno ti naimbag a damag.” (Gal. 2:5) Ti ayattayo iti Dios ti mangtignay kadatayo a mangikasaba iti Mesianiko a Pagarian ti dungdungnguenna nga Anak, nga “agsakay maipuon ti kinapudno” inton Armagedon. (Sal. 45:4; Apoc. 16:14, 16) Anian a makaparagsak ti tumulong kadagiti tattao a mangammo iti ayat ti Dios ken iti karina a baro a lubong!—Mat. 28:19, 20.

19. Apay a masapul nga apresiarentayo ti urnos ni Jehova a panangipastor iti arbanna?

¹⁹ Ipakita ti panagyaman iti urnos ti Dios a panangipastor iti arbanna. (Ara. 20:28) Impaay kadatayo ni Jehova dagiti Kristiano a panglakayen a kanayon a maseknan iti pagimbagantayo. Dagiti panglakayen ket “kas paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a [dakkel] a bato iti napaksuyan a daga.” (Isa. 32:1, 2) Anian a yamantayo no adda paglemmengantayo manipud iti napigsa nga angin wenno makapaketter a bagyo! Agyamantay met iti linong nga ipaay ti dakkel a bato no makasinit ti pudot ti init. Nayarig kadagita ti naespirituan a tulong ken bang-ar nga ipapaay dagiti panglakayen. No agtulnogtayo kadagiti mangidadaulo kadatayo, ipakpakitatayo nga ap-apresiarentayo dagitoy a “sagut a tattao” ken iparparangarangtayo ti ayattayo iti Dios ken ni Kristo, ti Ulo ti kongregasion.—Efe. 4:8; 5:23; Heb. 13:17.

20. Kasanom a mayaplikar ti Santiago 1:22-25 no ay-ayatem ti Dios?

²⁰ No kayatmo ti agbalin a nasinged ken Jehova, agbalinka a ‘managtungpal iti sao, saan a managdengngeg laeng.’ (Basaen ti Santiago 1:22-25.) Ti maysa a “managtungpal” ket addaan iti pammati a mangtignay kenkuana a sireregta a mangasaba ken makipaset kadagiti gimong. No talaga nga ay-ayatem ni Jehova, pagtulnogam ti ‘perpekto a lintegna,’ a pakairamanan ti amin a kalikagumanna kenka.—Sal. 19:7-11.

21. Ania koma ti pakayarigan dagiti naimpusuan a kararagmo?

²¹ No ay-ayatem ni Jehova, kanayon a naimpusuan nga agkararagka kenkuana. Inkanta ni salmista David maipapan iti inaldaw a panagpuor iti insienso nga imbilin ti Linteg ti tulag: “Ti kararagko maisagana koma kas insienso iti sanguanam [Jehova], ti panangitag-ay kadagiti dakulapko kas ti daton a bukbukel iti rabii.” (Sal. 141:2; Ex. 30:7, 8) Sapay koma ta ti napakumbaba a panagpakpakaasim, napasnek nga ararawmo, ken naimpusuan a panangidayaw ken panagyamanmo iti Dios ket makaay-ayo a kas iti nabanglo nga insienso.—Apoc. 5:8.

22. Ania a kita ti ayat ti mailawlawag iti sumaganad nga artikulo?

²² Imbaga ni Jesus a masapul nga ayatentayo ti Dios kasta met ti padatayo a tao. (Mat. 22:37-39) Maammuantayo iti sumaruno nga artikulo no kasano a ti panagayattayo ken Jehova ken kadagiti prinsipiona tulongannatayo a makilangen ken mangipakita iti ayat iti padatayo a tao.