1. Ekuma zola kwa Yesu yo S’andi kwawokelela?

 YESU KRISTU wa Mwan’a Yave wavova vo: “Nzolele Se.” (Yoa. 14:31) Wakudikila mpe vo: “O Se ozolele o Mwana.” (Yoa. 5:20) Ediadi ke difwete kutusivikisa ko, kadi una kayizidi ko ova ntoto, Yesu wasalanga kumosi yo S’andi mu mvu miayingi. (Nga. 8:30) Muna kolo kiaki kiawonso, Yesu mayingi kalongoka mu kuma kia fu ya S’andi, o zola kwau kwawokela.

2. (a) Adieyi divavwanga muna songa o zola? (b) Nkia yuvu tubadika?

² Vava tuzolanga muntu, tutoma kunyangalelanga. Davidi wayimbila vo: “Izolele, e Yave, wa ngolo zame.” (Nku. 18:1) Yeto mpe i wau tufwete monanga mu kuma kia Nzambi, kadi yandi mpe okutuzolanga. Osianga nsilu vo avo tunlemvokele, okutuzola. (Tanga Nsiku 7:12, 13.) Kansi wau vo katulendi mona Nzambi ko aweyi tulenda kunzolela? O zola Yave aweyi disongele? Ekuma tufwete kunzolela? Aweyi tulenda kunzolela?

3, 4. Ekuma tulenda zolela Yave?

³ “O Nzambi i mwanda.” Muna kuma kiaki, ka tulendi kumona ko. (Yoa. 4:24) Kana una vo i wau, tulenda zola Yave. Nkand’a Nzambi ukutukasakesanga twazola Nzambi.  Kasikil’owu, Mose wavovesa Aneyisaele vo: “Zolang’o Yave wa Nzambi aku yamuna nsi a ntim’aku yawonso yo muna fulumwinu kiaku kiawonso, yo mun’efuka diaku diawonso.”—Nsi. 6:5.

⁴ Ekuma tulenda zolela Nzambi? Ekuma kadi watuvanga y’etima dia kunsambila yo song’o zola. Ekolo zayi weto muna Yave uwokelanga, o zola kweto mpe muna yandi kuwokelanga, ediadi kiese kiayingi dikututwasilanga. Ediadi i diau kazola Yesu vava kavova vo: ‘Akwa nsambu awana bazeye nsatu zau za mwanda: kadi kiau e Kintinu ki’ezulu.’ (Mat. 5:3) Muna nkand’andi, O Homem não Está Só, Abraham C. Morrison wavova vo diasivi kikilu mu mona vo tuka kolo wantu bevavanga Nzambi yo kwikila muna yandi. Nze una usonganga mvovo mia nsoneki ndioyo, ndonga bebakulanga vo wantu bavangwa y’etima dia zaya Nzambi.

5. Aweyi tuzayidi wo vo tulenda solola Nzambi?

⁵ Nga tulenda solola Nzambi? Elo, Nzambi ozolanga vo twakala ye ngwizani ambote yo yandi. Paulu wa ntumwa watoma kiesesa e diambu diadi vava kasila umbangi kwa esi Atenai. Ndonga muna yau bayindulanga vo bafwete kwenda kuna tempelo mu sambila nzambi Atenai. Yindula vo u mosi mun’awana bakala vana Paulu kavovela vo, “Nzambi ona wayivangila nza ye ma yawonso ina mo” yo sasila vo Nzambi ‘ke zingilanga mu tempelo yavangilwa mu moko ko.’ Paulu wakudikila vo Nzambi, “muna mpwa mosi i kavangila zula ya wantu yawonso ina in’ova ndose a nza, una kasia sungi yau yakanwa, ye nkendelo za kalu yau; bavava Nzambi, benkwa kumbabata bansolola, kufwil’owu kavavukidi muna konso muntu vava twina ko.” (Mav. 17:24-27) Kieleka, wantu balenda solola Nzambi. Vioka mafunda nsambwadi ma mafunda ma Mbangi za Yave, ‘basolola Nzambi’ yo kunzola.

6. Aweyi i ‘nkanikinu anene ye wantete’ kayika o Yesu?

⁶ O zola kweto muna Yave kufwete tukanga muna ntima. Yesu watoma kiesesa diambu diadi vava Mfarisi mosi kanyuvula vo: “E Nlongi, nkia nkanikinu wanene muna nsiku?” Yesu wamvutula vo: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe.”—Mat. 22:34-38.

7. Ayeyi i nsas’a mvovo zola Nzambi muna (a) ‘nsi a ntim’eto yawonso’? (b) ‘fulumwinu kieto kiawonso’? (c) ‘nyindu eto wawonso’?

⁷ Yesu adieyi kazola vova vava kavova vo tufwete zola Nzambi ye ‘nsi a ntim’eto yawonso,’ muna ‘fulumwinu kieto kiawonso’ yo muna ‘nyindu eto wawonso’? Muna ‘nsi a ntim’eto yawonso’ disongele vo makani, ngindu ye zolela yeto. Muna ‘fulumwinu kieto kiawonso’ disongele vo kiwuntu kieto kiawonso kumosi ye mana tuvanganga muna zingu kieto. Muna ‘nyindu eto wawonso,’ disongele vo mpila tuyindulwilanga ye mana tuyindulanga. Muna mpila yayi, Yesu watoma songa vo tufwete zola Yave muna mawonso ma zingu kieto.

8. Aweyi tusongelanga vo Nzambi tuzolanga?

⁸ Avo tuzolanga Nzambi ye nsi a ntima, fulumwinu yo nyindu eto wawonso, tukala ye fu kia longoka Nkand’a Nzambi, vanga mawonso kekutulombanga yo kala yo vema muna salu kia samuna nsangu zambote za Kintinu. (Mat. 24:14; Roma 12:1, 2) O zola kwakieleka muna Yave kukutufilanga mu kumfinama. (Yak. 4:8) Kieleka, ka tulendi yika kuma yawonso ko ifwete kutufila mu  zola Nzambi. Kansi, yambula twabadika yaka kuma.

9. Ekuma tufwete zolela Yave?

⁹ Yave i Nsemi eto, okutuvananga yawonso tuvwidi o mfunu. Paulu wa ntumwa wavova vo: “Kadi muna yandi i tunin’o moyo, yo kiya, yo kala.” (Mav. 17:28) Yave watuvana ntoto una vo fulu kiambote kia zingila. (Nku. 115:16) Okutuvananga mpe madia ye yawonso tuvwidi o mfunu muna zinga. Ekiaki i kuma Paulu kavovesela asambidi a teke ana bazingilanga kuna Luseta vo: “Nzambi amoyo, . . . kalembwa kwandi mbangi ko, wau kavanganga mawete, yo kunuvana mvula zituka kun’ezulu, ye nsungi zanyimi, kanuzadisanga ntima yo madia y’eyangi.” (Mav. 14:15-17) Nga ekiaki ke kuma kiasikila ko kifwete kutufila mu zola Nsemi yo Mvani eto anzolwa?—Kim. 12:1.

10. Aweyi omonanga mu kuma kia lukûlu?

¹⁰ Nzambi waziula nzila mu katula esumu yo lufwa twasambukiswa kwa Adami. (Roma 5:12) Nkand’a Nzambi uvovanga vo: “Nzambi osongele yandi nzola katuzolele, e kuma wau twakal’asumuki, o Kristu watufwila.” (Roma 5:8) Avo tuvilukidi kikilu o ntima yo kwikila muna kimenga kia lukûlu, Nzambi ololoka masumu meto. Tuvutulanga kikilu matondo kwa Yave mu kuma kia zola katusonga muna fila mwan’andi kafwa mu kuma kieto.—Yoa. 3:16.

11, 12. Nkia vuvu kekutuvananga o Yave?

¹¹ Yave ‘okutuvananga e vuvu ye kiese yo luvuvamu.’ (Roma 15:13) Nzambi okutuvanang’e vuvu kikutusadisanga mu zizidila ntonta za lukwikilu. Akristu akuswa ana besikila ye kwikizi ‘yamu lufwa, betambula kolow’a moyo kuna zulu.’ (Lus. 2:10) Akristu akaka ana besonganga e kwikizi, bena ye vuvu kia zinga yakwele mvu muna Paradiso ova ntoto. (Luka 23:43) Aweyi tumonanga mu kuma kia vuvu tuna kiau? Tukalanga ye kiese kiayingi yo luvuvamu yo zola muna Nzambi ona okutuvananga “konso lukau luambote, yo konso lukau luaziku.”—Yak. 1:17.

¹² Yave okutuvananga vuvu kia lufuluku. (Mav. 24:15) Dialudi vo tukendalalanga kikilu mu kuma kia lufwa lwa azolw’eto. Kansi wau vo tuna ye vuvu kia lufuluku, ‘ke tumonanga ntantu ko, nze akaka, ana bakondelo vuvu.’ (1 Tes. 4:13) Mu kuma kia zola kwandi, Yave wa Nzambi una y’etima dia fula mafwa, musungula akwa kwikizi nze Yobi. (Yobi 14:15) Yindula e kiese tumona vava mafwa befuluka yo vutuka zinga diaka ova ntoto! Kieleka, tuzolanga kikilu Yave ona watuvana vuvu kia lufuluku.

13. Nkia ziku tuna kiau vo Nzambi okutuvwanga kieleka o mfunu?

¹³ Yave okutuvwanga kikilu o mfunu. (Tanga Nkunga 34:6, 18, 19; 1 Petelo 5:6, 7.) Kana nkutu o unu, tulenda kala ye vuvu kiasikila kadi tuzeye wo vo Yave osadisanga awana besonganga kwikizi muna yandi. (Nku. 79:13) Vana ntandu, o zola kwa Nzambi muna yeto kutoma moneka muna mana kelungisa muna wete dieto muna Kintinu kia Masia. Vava Yesu Kristu wa Ntinu kekatula umpumbulu yo bi wawonso ova ntoto, alembami bezingila mu luvuvamu yo vwa mawete makwele mvu. (Nku. 72:7, 12-14, 16) Vava tubadikanga nsilu miami, dikutufilanga mu zola Nzambi yamuna nsi a ntima eto yawonso, fulumwinu, ngolo yo nyindu eto wawonso.—Luka 10:27.

14. Nkia lau kekutuvananga o Nzambi?

¹⁴ Yave okutuvananga elau diampwena dia kala Mbangi zandi. (Yes. 43:10-12) Tuzolanga Nzambi kadi watuvana elau dia yikama Kintinu kiandi yo zayisa oma  ma vuvu kieto kw’awonso bemonanga e mpasi. Vana ntandu, tuvovanga ye ziku kiawonso kadi tusamunanga e nsangu zambote zitukanga muna Diambu dia Nzambi ona ovananga e nsilu emi ke mifunganga ko. (Tanga Yosua 21:45; 23:14.) Elo, vena ye kuma yayingi tuzolelanga Yave. Kansi, aweyi tulenda songela zola muna yandi?

15. O longoka e Diambu dia Nzambi yo sadila mana tulongokanga aweyi dilenda kutusadisila?

¹⁵ Longokanga e diambu dia Nzambi lumbu yawonso yo sadila mana olongokanga. O vanga wo disonga vo tuzolanga kikilu Yave ye tuzolele vo e diambu diandi diakala se ‘mini kia tambi yeto.’ (Nku. 119:105) Vava tukalanga mu mpasi, tufiaulwiswanga muna nsilu emi mia lukasakeso: “O ntim’abudika yo kosomoka, e Nzambi, kuveza wo ko.” “O walakazi waku, e Yave, unsikini. Muna ulolo wa ngindu zame za mbundu. O fiauzi waku uyangidika moyo ame.” (Nku. 51:17; 94:18, 19) Yave yo Yesu besonganga nkenda kw’awonso bemonanga e mpasi. (Yes. 49:13; Mat. 15:32) Vava tulongokanga Nkand’a Nzambi, tubakulanga una Yave kekutuzolelanga. Ediadi dikutufilanga mu songa zola muna yandi.

16. O samba ntangwa zawonso aweyi kuwokeselanga o zola kweto muna Nzambi?

¹⁶ Sambanga kwa Nzambi. Vava tusambanga kwa Nzambi yo mona una kevaninanga e mvutu za sambu yeto, o zola kweto muna yandi kuwokelanga. (Nku. 65:2) Kasikil’owu, tumonanga vo Nzambi keyambulanga ko vo twatontwa e ntontwa ina iviokele. (1 Kor. 10:13) Avo tudodokela Yave ye ziku kiawonso vava tutelamwanga o moyo, tulenda kala ye “luvuvamu lua Nzambi.” (Fili. 4:6, 7) Ezak’e ntangwa tulenda samba muna nsi a ntima nze una Nekemiya kavanga yo mona una Yave kevaninanga e mvutu za sambu yeto. (Nek. 2:1-6) Ekolo ‘tukwamanananga muna sambu’ yo mona una Yave kevaninanga e mvutu muna ndomba zeto, o zola kweto muna yandi kuwokelanga, tukalanga ye vuvu vo okutusadisa muna zizidila e ntonta za lukwikilu zilenda kutubwila.—Roma 12:12.

17. Avo tuzolanga Nzambi, aweyi tubadikila diambu dia kwenda mu tukutakanu?

 ¹⁷ Kalanga ye fu kia kwenda muna tukutakanu twakete ye twampwena. (Ayib. 10:24, 25) Aneyisaele balungananga vamosi muna wá yo longoka oma ma Yave kimana bavumina Nzambi yo lemvokela e Nsiku miandi. (Nsi. 31:12) Avo tuzolanga kikilu Nzambi, tumona vo ke diampasi ko mu vanga luzolo lwandi. (Tanga 1 Yoane 5:3.) Muna kuma kiaki, ke tufwete yambula konso diambu ko diatusimba mu lungana muna tukutakanu twawonso. Dialudi, ke tuzolele yambula konso diambu ko diakulula nzol’eto antete muna Yave.—Lus. 2:4.

18. O zola muna Nzambi kutufilanga mu vanga kia diambu?

¹⁸ Kalanga yo vema muna salu kia samuna “e ludi kia nsangu zambote” kw’akaka. (Ngal. 2:5) O zola kweto muna Nzambi kukutufilanga mu samuna oma ma Kintinu kia Nzambi kw’akaka. Muna Armangedo, Yesu una vo i Ntinu kasola Nzambi, otanina e wisa kia Yave kia yala. (Nku. 45:4; Lus. 16:14, 16) Ekwe kiese tumonanga muna sadisa wantu balongoka zola kwa Nzambi yo nsilu andi wa nz’ampa!—Mat. 28:19, 20.

19. Ekuma tufwete yangalelanga akuluntu a nkutakani?

¹⁹ Songa vo oyangalelanga akuluntu muna nkutakani. (Mav. 20:28) Yave wete dieto kevavanga, ekiaki i kuma kekutuvaninanga akuluntu. Akuluntu bena nze “eswekameno muna nkuka; nze nkoko mia maza muna fulu kia kaya, nze vevelo kia mbek’ampwena muna nsi a lunioko.” (Yes. 32:1, 2) Yindula una tumonanga vava tusololanga eswekameno vava kibwanga e tembwa kiangolo yovo vava kibayanga e mwini! Diau adimosi mpe, akuluntu bekutuvananga lusadisu yo lukasakeso tuvwidi o mfunu muna kwamanana sadila Yave kana nkutu nkia mpasi tulenda wanana zau muna zingu. Ekuma tufwete lemvokelanga akuluntu? E kuma kadi tuyangalelanga ‘tukau twatu twa wantu’ ye tuzolanga Yave yo Kristu una vo i Ntu a nkutakani.—Ef. 4:8; 5:23; Ayib. 13:17.

20. Avo ozolanga Nzambi, adieyi ovanga?

²⁰ Avo oyangalelanga e ngwizani aku yo Yave okala se ‘mvangi a diambu, ke nwé kaka ko.’ (Tanga Yakobo 1:22-25.) O ‘mvangi a diambu’ osonganga lukwikilu muna mavangu, nze samuna nsangu zambote yo vana e nkomena muna tukutakanu twa Kikristu. Wau vo ozolanga kikiulu Nzambi, olemvokela “nsiku a Yave walunga” i sia vo, mawonso kevavanga kwa ngeye.—Nku. 19:7-11.

21. Nki tulenda tezanesa e sambu yeto yaziku?

²¹ O zola muna Yave wa Nzambi kukutufila mu sambanga kwa yandi ye nsi a ntima. Kuna Isaele yankulu, o ngang’ambuta wayokelanga Yave e ndumbu lumbu yawonso. Davidi wa Ntinu watezanesa sambu yandi ye ndumbu vava kayimbila vo: “Mbula sambu kiame kiakala yaku [Yave] nze ndumbu; e nzanguk’a moko mame nze lukau lua masika.” (Nku. 141:2; Luv. 30:7, 8) Yave wawá e sambu ya Davidi. Avo tusamba kwa yandi ye ziku kiawonso yo kumvutula matondo, e sambu yeto ikala nze ndumbu yo yangidika Yave.—Lus. 5:8.

22. Nkia mpil’a zola tuvovela muna longi dilanda?

²² Yesu wavova vo tufwete zolanga Nzambi ye mfinangani zeto. (Mat. 22:37-39) Vava tuzolanga Yave ye nkanikinu miandi, dikutusadisanga mu zola mfinangani zeto. Muna longi dilanda tulongoka una tulenda zolela mfinangani zeto.