1. Mwomwo ika Kalunga naMwanenyi valizangila chikuma?

MWANA Yehova Yesu Kulishitu ahanjikile ngwenyi: “Ami ngwazanga Tata.” (Yowa. 14:31) Yesu ambile nawa ngwenyi: “Ise azanga Mwana.” (Yowa. 5:20) Shimbu kanda Yesu ezenga hano hamavu, azachilenga hamwe naIse hamyaka yayivulu. (Vishi. 8:30) Hamyaka yoseneyi, Yesu alinangwile vyavivulu havilinga vyaIse, kaha valizangilenga chikuma.

2. (a) Vyuma muka twatela kulinga numba Kalunga atuzange? (b) Vihula muka natushimutwila?

² Muka-kwimba jisamu Ndavichi embile ngwenyi: “Ove ngolo jami Yehova, ngunakuzange.” (Samu 18:1) Omu mukiko twatela kuzanga Kalunga mwomwo atuzanga. Nge natwononoka Yehova kaha mwatuzanga. (Tangenu Lushimbi lwamuchivali 7:12, 13.) Kutala tunahase kuzanga Kalunga numba tuhu katwamumonako tahi? Uno kuzanga Yehova chalumbununa ika? Mwomwo ika twatela kumuzangila? Kaha mujila muka tunahase kusolola ngwetu twamuzanga?

3, 4. Mwomwo ika chapwila chachashi kuzanga Yehova?

³ Katweshi kahasa kumona Kalungako mwomwo “Kalunga apwa  Shipilitu.” (Yowa. 4:24) Chipwe ngocho tunahase kuzanga Yehova. Mbimbiliya yatulweza tumuzangenga. Chakutalilaho, Mose alwezele vaIsalele ngwenyi: “Zangenunga Yehova Kalunga kenu namichima yenu yosena, namyono yenu yosena, nangolo jenu josena.”—Lushi. 6:5.

⁴ Mwomwo ika twatela kuzangila chikuma Kalunga? Mwomwo ikiye atutengele namuchima wakusaka kumulemesa nakumuzanga. Omu natutachikiza Yehova, natumuzanga chikuma, kahechi nachitulingisa tupwenga vakuwahilila. Yesu ahanjikile ngwenyi: “Vawahilila vaze vejiva ngwavo vasaka vyuma vyakushipilitu, mwomwo Wangana wamelu unapu wavo.” (Mateu 5:3) A. C. Morrison asonekele mumukanda wenyi wakwamba ngwavo Man Does Not Stand Alone ngwenyi, chapwa chakukomwesa hakumona vatu vanakutondatonda nakufwila kulemesa Kalunga. Ngana muze asonekele ou muka-kusoneka, vatu vavavulu vasemuka namuchima wakufwila kutachikiza Kalunga.

5. Twejiva ngachilihi ngwetu tunahase kuwana Kalunga?

⁵ Kutala tunahase kuwana Kalunga tahi? Eyo, mwomwo Kalunga asaka tupwenga nausoko naikiye. Omu kaposetolo Paulu ahanjikile kulizavu lyapwile muAtene, ambile ngwenyi chapwa chachashi kuwana Kalunga. Vatu vavavulu vashinganyekele ngwavo vatelele kuya kutembele nakulemesa kalunga wapwevo vavuluka ngwavo Atena. Oloze Paulu ambile ngwenyi vanahase kuwana Kalunga wamuchano “uze atangile kaye navyosena evi vilimo.” Paulu alumbunwine ngwenyi Kalunga “katwama mujitembele jakutunga namavokoko.” Kaha nawa ambile ngwenyi “kumutu umwe [Kalunga] aloweleko miyachi yavatu yosena mangana ngwenyi vatwamenga hamavu hosena, kaha ahakileko lwola lwakutongola nakupula jingiza javihela vyakutwama vatu, mangana vatondetonde Kalunga, chipwe vene kumupupuchila nakumuwana, mwomwo ikiye kapwa kwakusuku nayetu tuvosena mutu himutuko.” (Vili. 17:24-27) Chikupu vene vatu vanahase kuwana Kalunga. Vinjiho jaYehova vakuhambakana ha 7 miliyoni nachimbwa vanamuwane lyehi Kalunga kaha vali nakumuzanga chikupu.

6. Lushimbi muka ‘lwalulemu kaha nawa lwatete?’

⁶ Twatela kuzanga Yehova kufuma kumuchima wetu. Omu mukiko Yesu ahanjikile omu vamuhulishile kuli kaFwaliseu ngwenyi: “Ove Muka-kunangula, lushimbi muka lwapwa lwalulemu haJishimbi josena?” Yesu amukumbulwile ngwenyi: “‘Watela kuzanga Yehova Kalunga kove namuchima wove wosena, namwono wove wosena, navishinganyeka vyove vyosena.’ Elu lukiko lushimbi lwalulemu kaha nawa lukiko lwatete.”—Mateu 22:34-38.

7. Uno chalumbununa ika kuzanga Kalunga (a) ‘namuchima wetu wosena,’ (b) ‘namwono wetu wosena,’ (c) ‘navishinganyeka vyetu vyosena’?

⁷ Yesu atalishile mulihi hakwamba ngwenyi twatela kuzanga Kalunga ‘namuchima wetu wosena,’ ‘namwono wetu wosena,’ ‘navishinganyeka vyetu vyosena’? Kuzanga Yehova ‘namuchima wetu wosena’ chalumbununa kumuzanga navishinganyeka vyetu vyosena navyuma twafwila kulinga. Twatela nawa kuzanga Kalunga ‘namwono wetu wosena,’ kulumbununa kumuzachila mukuyoya chetu chosena navyuma vize tweji kulinganga mukuyoya. Kaha kuzanga Kalunga ‘navishinganyeka vyetu vyosena’ chalumbununa mujila tweji kushinganyekanga navyuma tweji kushinganyekanga. Ngocho, Yesu apwile nakulumbununa nge twatela kuzanga Yehova mukuyoya chetu chosena navyuma vyosena twatwama navyo.

8. Uno tweji kusololanga ngachilihi nge twazanga Kalunga?

⁸ Nge natutanganga Mbimbiliya lwola lwosena, nakulinga vyuma vyosena vize Kalunga mwatulweza kulinga, nakwambulula mujimbu wamwaza waWangana natwima, kaha natusolola nge twazanga Kalunga ‘namuchima wetu wosena,’ ‘namwono wetu wosena,’ ‘navishinganyeka vyetu vyosena.’ (Mateu 24:14; Loma 12:1, 2) Nge natulinga ngocho, kaha natupandama chikuma kuli Yehova. (Yako. 4:8) Katweshi kuhasa kuvuluka vyuma vyosena vize vyatela kutulingisa tuzange Kalungako. Tushimutwilenu havyuma vimwe vyatela kutulingisa tuzange Kalunga.

9. Mwomwo ika mwazangila Yehova?

⁹ Yehova ikiye Tengi yetu kaha nawa Muka-kutuhana vyuma vyosena twasaka. Paulu ambile ngwenyi: “Twayoya, tweji kutambukanga, kaha nawa twapwako mwomwo yaikiye.” (Vili. 17:28) Yehova atuhana ano mavu mangana tutwamengaho. (Samu 115:16) Kaha nawa eji kutuhananga vyakulya navyuma vyeka mangana tutwaleho lika kuyoya. Echi chikiko chalingishile Paulu alweze vatu vamuLusutala vapwile nakulemesa tuponya ngwenyi: “Kalunga ou ayoya . . . ahanyine unjiho hakulinga mwamwaza, hakumihana vula yakufuma mwilu, najingonde jakwima mihako, nakusuulwisa michima yenu navyakulya nakumivwisa kuwaha.” (Vili. 14:15-17) Chikupu vene Yehova atuhana vyuma vyosena vize twasaka. Echi chikiko chatulingisa tuzange Tengi yetu Wamunene.—Kwambu. 12:1.

10. Uno tweji kwivwanga ngachilihi handando yakusokola?

¹⁰ Kalunga mwakafumisako shili nakufwa vize twaswana kuli Alama. (Loma 5:8) Mbimbiliya yamba ngwayo: “Kalunga asolola lyehi zangi yenyi kuli etu, mwomwo shimbu twachipwilenga tuvaka-shili, Kulishitu atufwilile.” (Loma 5:8) Nge natupihilila nakwalumuka nakufwelela mundando yakusokola yaYesu, kaha Kalunga mwatukonekela milonga yetu yashili. Tweji kuzanga Yehova mwomwo atuzanga chikuma hakutuma Mwanenyi kwiza nakutufwila.—Yowa. 3:16.

11, 12. Yehova atuhana lutalililo muka?

¹¹ Yehova atuhana lutalililo lwakukayoya haya myaka yosena. (Loma 15:13) Elu lutalililo lweji kutukafwanga tumike muvyeseko. Vawavisa vaze navapwa ‘vakushishika palanga nakukufwa, navakavahana muchama wakuyoya mwilu.’ (Kuso. 2:10) Kaha vaka-Kulishitu vakwavo vakushishika navakayoyela muPalachise hano hamavu myaka yosena. (Luka 23:43) Uno tweji kwivwanga ngachilihi halutalililo twatwama nalwo? Lutalililo lweji kutulingisanga tupwenga vakuwahilila, nakuunda nakuzanga Kalunga uze eji kutuhananga “mawana amwaza osena namawana akukupuka osena.”—Yako. 1:17.

¹² Kalunga atuhana lutalililo lwakusanguka. (Vili. 24:15) Tweji kulishonanga nge mutu twazanga nafu. Oloze katwalishona ngana mwavatu ‘vaze vahona lutalililoko,’ mwomwo Yehova atufwelelesa ngwenyi mwakasangula vafu. (Teso. 1, 4:13) Mwomwo yazangi yenyi, Yehova Kalunga afwila kukasangula jimiliyoni javatu vaze vafwa chikumanyi vangamba jenyi vakushishika. (Yopa 14:15) Achishinganyekenu ocho kuwaha natukevwa omu vafu navakasanguka nakukaliwana cheka navausoko wavo namasepa javo! Twazanga chikuma Setu wamwilu mwomwo atuhana lutalililo lwamwaza lwakusanguka.

13. Twatachikiza ngachilihi ngwetu Kalunga eji kutuzakamanga?

¹³ Yehova eji kutuzakamanga. (Tangenu Samu 34:6, 18, 19; WaPetulu 1, 5:6, 7.) Tweji kulivwa kupwa vakukingiwa mwomwo twatachikiza ngwetu lwola lwosena Kalunga apwa wakulizanga kukafwa vangamba jenyi vaze vapwa vakushishika kuli ikiye. (Samu 79:13) Oloze achishinganyekenu havyuma vyavivulu mwakatulingila Kalunga kulutwe. Yesu apwa Mwangana waWangana waKalunga, kaha mwakafumisako ulyanyi, luyanjisa, navilinga vyavipi vyosena hano hamavu. Kufumaho jino Kalunga mwakahana vatu vakulyononona vosena kuunda navyuma vyosena vize vasaka mangana vakalivwise kuwaha kuyoya. (Samu 72:7, 12-14, 16) Kushinganyeka hajishiko joseneji nachitulingisa tuzange Kalunga ketu namuchima wetu wosena, namwono wetu wosena, nangolo jetu josena, navishinganyeka vyetu vyosena.—Luka 10:27.

14. Kutokwa muka atuhana Kalunga?

¹⁴ Yehova atuhana kutokwa chakupwa Vinjiho jenyi. (Isa. 43:10-12) Twazanga Kalunga mwomwo atuhana mulimo wakukundwiza Wangana wenyi nakulweza vatu vali nakuyanda muno mukaye vyuma twatalilila kulutwe. Kaha nawa twatwama nalufwelelo luze lweji kutukafwanga twambulile vatu mujimbu  wamwaza. Mwomwo ika? Mwomwo mujimbu tweji kwambululanga weji kufumanga muMazu aKalunga, Mbimbiliya, kaha nawa jishiko jaKalunga jeji kutesangamo lwola lwosena. (Tangenu Yoshuwa 21:45; 23:14.) Kuli vyuma vyavivulu vize vyatela kutulingisa tuzange Yehova. Oloze tunahase kusolola ngachilihi nge twamuzanga?

15. Uno kutanganga Mazu aKalunga nakuwazachisa cheji kutukafwanga ngachilihi?

¹⁵ Tutangenunga Mazu aKalunga lwola lwosena nakuwazachisanga. Nge natulinga ngocho, kaha natusolola nge twazanga Yehova kaha nawa twasaka Mazu enyi atutwaminyinenga. (Samu 119:105) Omu natumona ukalu, twatela kutanga mazu akuvendejeka amuMbimbiliya aze amba ngwawo: “Ove Kalunga, muchima wakuhokoka wakuchikika kaweshi kuulumbilisako.” “Ove Yehova, likoji lyove lyapwile nakungukwachisako. Mukuvula chavishinganyeka vyami mumuchima wami, kuvendejeka chove cheji kwivwisanga mwono wami chipepa.” (Samu 51:17; 94:18, 19) Yehova naYesu veji kwivwilanga keke vatu vosena vaze veji kuyandanga. (Isa. 49:13; Mateu 15:32) Omu natutanganga Mbimbiliya, tunahase kutachikiza omu Yehova eji kutuzanganga. Kaha echi cheji kutukafwanga tumuzange chikuma.

16. Kulombanga lwola lwosena chinahase kutukafwa ngachilihi tuzange chikuma Kalunga?

¹⁶ Tulombenunga kuli Kalunga lwola lwosena. Tweji kuzanga chikuma Kalunga hakulomba kuli ikiye nakumona omu mwakumbulula kulomba chetu. (Samu 65:2) Chakutalilaho, pamo twamwene omu Kalunga ahonene kutwechelela vatweseke kuhambakana oho hakumina ngolo jetu. (Koli. 1, 10:13) Nge natulomba kuli Yehova atukafwe mwomwo yakulizakamina, kaha “kuunda chaKalunga” nachipwa hali etu. (Fwili. 4:6, 7) Shimbu jimwe tunahase kulomba muuholela ngana muze alingile Nehemiya, nakutachikiza ngwetu Yehova nakumbulula kulomba chetu. (Nehe. 2:1-6) Natuzanga chikuma Yehova nge natulombanga lwola lwosena, nakumona omu ali nakukumbulula kulomba chetu. Kaha nawa natufwelela chikupu ngwetu Yehova mwatukafwanga tumike nge tuli muvyeseko.—Loma 12:12.

17. Nge twazanga Kalunga, kaha twatela kumona ngachilihi kukunguluka?

¹⁷ Lwola lwosena twatela kupwanga kukukunguluka chachikungulwilo, nechi chachihanda, nechi chalikumbi  limwe, nachangalila. (Hepe. 10:24, 25) VaIsalele valikungulwilenga hamwe vevwilile nakulinangula vyaYehova mangana vevwenga Yehova woma nakulamanga Jishimbi jenyi. (Lushi. 31:12) Nge twazanga Kalunga, kaha natuyanga lwola lwosena kukukunguluka. (Tangenu WaYowano 1, 5:3.) Ngachize, tuzatenu nangolo mangana tupwenganga kukukunguluka chosena. Katwatela kuseza zangi twapwile nayo hakavanga omu twalinangwile vyaYehovako.—Kuso. 2:4.

18. Kuzanga Kalunga cheji kutulingisanga tulinge ika?

¹⁸ Twambululenunga natwima “muchano wamujimbu wamwaza.” (Ngale. 2:5) Kuzanga Kalunga cheji kutulingisanga twambulile vakwetu vyaWangana waKalunga. Hajita yaAlamangetone, Mwangana Yesu mwakahakwila ngolo jaYehova jakuyula. (Samu 45:4; Kuso. 16:14, 16) Tweji kuwahililanga omu tweji kukafwanga vatu valinangule vyazangi yaYehova nakaye kakahya atushika.—Mateu 28:19, 20.

19. Mwomwo ika twatela kumona milimo veji kuzatanga vakulwane muchikungulwilo kupwa yayilemu?

¹⁹ Tusololenunga ngwetu twamona milimo veji kuzatanga vakulwane muchikungulwilo kupwa yayilemu. (Vili. 20:28) Yehova asaka lwola lwosena kutulingila vyuma vyamwaza, ngocho atuhana vakulwane vaka-Kulishitu mangana vatukafwe. Vakulwane vamuchikungulwilo vapwa nge “chiswamo chakuswama peho, kwakuswama nyamanganda, nge tulwiji vameya mulikundu, nge muvule walilolwa lyalinene mulifuchi lyakufwa lipwila.” (Isa. 32:1, 2) Achishinganyekenu omu natupwa vakukingiwa nge tuli muchihela chakuswama peho yanyamanganda, chipwe mwakuswama vula yayinene chipwe nge tuli mumuvule hakuchina musana. Omu mukiko vapwa navakulwane muchikungulwilo. Veji kutukafwanga nakutukolezeza mangana tutwaleho lika kuzachila Yehova numba tuhu natumona ukalu mukuyoya. Mwomwo ika twatela kwononokela vakulwane? Mwomwo twamona awa “mawana amalunga” kupwa amalemu, kaha nawa twazanga Kalunga naKulishitu uze apwa Mutwe wachikungulwilo.—Efwe. 4:8; 5:23; Hepe. 13:17.

20. Kuzanga Yehova nachitulingisa tulinge vyuma muka?

²⁰ Yehova atuhana “jishimbi jakukupuka mwosena” jize jeji kutulwezanga vyuma vyosena vize Kalunga asaka tulingenga. (Tangenu WaYakova 1:22-25.) Nge muli nakusaka kuzamisa usoko wenu naYehova, kaha mwatela kulinga vyuma vyavivulu keshi kwivwilila kaha vyuma mwamilwezako. (Samu 19:7-11) Oloze mwatela kuzachisa vyuma vize namulinangula. Chakutalilaho, kuzanga Kalunga nachimilingisa muzate nangolo nakwambulilako vakwenu vyaYehova nakukumbululanga nge munayi kukukunguluka.

21. Kulomba chetu tunahase kuchifwanyisa kuvyuma muka?

²¹ Tweji kulombanga kuli Yehova Kalunga lwola lwosena mwomwo twamuzanga. Mumakumbi avaIsalele, tupilishitu vochelenga vize vyalivumba lyamwaza kuli Yehova makumbi osena. Mwangana Ndavichi esekesele kulomba chenyi kuvize vyalivumba lyamwaza omu embile ngwenyi: “Kulomba chami vachitumbike nge vyalivumba lyamwaza kumeso ove [Yehova], ami hakwolola mavoko ami chipwenga nge wana wahachingoloshi.” (Samu 141:2; Kulo. 30:7, 8) Yehova evwililile kulomba chaNdavichi. Nge natulomba kuli Yehova mujila yakulinyisa, nakulembelela, nakumusakwilila nakumwalisa, kaha kulomba chetu nachipwa nge vyalivumba lyamwaza kaha Yehova mwetavila kulomba chetu.—Kuso. 5:8.

22. Vyuma muka natulinangula muchihande chinakavangizaho?

²² Yesu ambile ngwenyi twatela kuzanga Kalunga navakwetu vatu. (Mateu 22:37-39) Nge natuzanga Yehova najishimbi jenyi, kaha nachitukafwa tuzangenga vakwetu vatu. Muchihande chinakavangizaho, natulinangula omu tunahase kusolola nge twazanga vakwetu vatu.