1. Omokonda yatyi ohole ankho ikahi pokati ka Jesus na Tate yae yeliyawisila?

 JESUS Kristu wapopile oupanga ankho ena na Tate yae etyi ati: “Ame ndyihole Tate,” iya “Tate uhole Omona.” (João 5:20; 14:31) Etyi Jesus nkhele eheneye pano pohi, waundapele omanima omanyingi na Tate yae. (Pro. 8:30) Mokueenda kuomanima oo, Jesus welilongesile unene konthele yovituwa via Tate yae, iya ohole ankho vena kese umwe namukuavo ailiyawisa.

2. (a) Okukala nohole tyilekesa tyi? (b) Omapulo patyi matukumbulula?

² Tyina uhole omunthu umwe, umusoka unene. David omuhoneki wono salmu waimbile okuti: “Ndyina ohole nove, Ove Jeova, ononkhono mbange.” (Sal. 18:1) Tuesukisa okulitehela ngotyo konthele ya Huku. Inkha tutavela ku Jeova, makala nohole nonthue. (Tanga Deuteronômio 7:12, 13.) Mahi onthue katupondola okumona Huku, oñgeni matukala nohole nae? Okukala nohole na Jeova tyihangununa tyi? Omokonda yatyi tuesukisila okukala nohole nae? Iya oñgeni tupondola okulekesa okuti tuhole Huku?

3, 4. Omokonda yatyi tyitavela okukala nohole onene na Jeova?

³ Katupondola okumona Huku mokonda “Huku Ospilitu.” (João 4:24) Nongotyo, tyitavela okukala nohole na Jeova. Tyotyili, Ombimbiliya itutuma tukale nohole nae. Mongeleka, Moisesi wapopilile ova Isilayeli okuti: “Una yokukala nohole na Jeova Huku yove, nomutima wove auho, nomuenyo wove auho no nonkhono mbove ambuho.”​—Deut. 6:5.

⁴ Omokonda yatyi tyitavela okukala nohole onene na Huku? Omokonda wetutunga nesuko liokumufenda, iya tupu wetuavela ounongo wokulekesa ohole. Tyina tunoñgonoka Jeova, ohole yetu nae iliyawisa, iya otyo tyitukalesa nehambu. Jesus wati: “Vena ehambu ovovana vaimbuka okuti vesukisa okulongeswa na Huku, mokonda Ouhamba wo keulu owavo.” (Mat. 5:3) Abraham C. Morrison, wapopia momukanda wae Man Does Not Stand Alone (Omulume Kekahi Aike) okuti tyihuvisa okunoñgonoka okuti ovanthu apeho vaovola Huku iya vahanda okutavela kwe. Tupu, ovanyingi vaimbuka okuti ovanthu vatyitwa nehando liokunoñgonoka Huku.

5. Oñgeni tutyii okuti tupondola okuvasa Huku?

⁵ Okuti tupondola okuvasa Huku? Enga, Huku uhanda tukale noupanga nae. Apostolu Paulu wetyiyandyulula nawa etyi apopile novanthu vamwe ankho veliongiya mo Atena yokohale. Ovanyingi puvo ankho vasoka okuti vesukisa okuenda mo templu okukafenda huku yomukai ankho utiwa o Atena. Mahi Paulu evepopila okuti vapondola okuvasa Huku yotyotyili “wokuatunga ouye novipuka aviho vilimo,” iya ahangununa okuti Huku “kakala monondyuo mbatungwa nomaoko ovanthu.” Apostolu Paulu ayawisako okuti “nomunthu wike vala Huku walinga omalongo aeho ovanthu, opo vakale kombanda yohi aiho, nokuanaka omivo naapa paoyela otyilongo ovanthu vena okukala. Opo vaovole Huku, inkha tyili vahanda okumuvasa, namphila Huku ehekahi kokule na kese umwe puonthue.” (Atos 17:24-27) Tyotyili, ovanthu vapondola okuvasa Huku. Onombangi mba Jeova valamba ponomiliau epanduvali nomeya, vemuvasa iya tyotyili vena ohole nae.

6. Otyipi “otyitumino tyotete, iya otyinene vali”?

⁶ Okuti ohole yetu na Jeova yapama umwe? Etyi omu Faliseu umwe apulile Jesus okuti: “Mulongesi, otyitumino otyinene Povitumino otyipi?” Jesus wakumbulula okuti: “‘Una okukala nohole na Jeova Huku yove nomutima wove auho, nomuenyo wove auho nonondunge mbove ambuho.’ Etyi, otyo otyitumino tyotete, notyinene vali.”​—Mat. 22:34-38.

7. Oityi tyihangununa okukala nohole na Huku (a) ‘nomutima wetu auho’? (b) ‘nomuenyo wetu auho’? (c) ‘nonondunge mbetu ambuho’?

⁷ Oityi Jesus ahandele okupopia etyi ati una okukala nohole na Huku “nomutima wove auho,” “nomuenyo wove auho,” “nonondunge mbove ambuho”? ‘Omutima wetu auho’ tyilekesa omalusoke, nomahando etu. ‘Omuenyo wetu auho’, tyilekesa etyi tuatuwa novipuka aviho tulinga momuenyo wetu. Iya ‘onondunge mbetu ambuho’ tyilekesa onkhalelo tusoka, netyi tusoka. Ngotyo, Jesus ankho ukahi nokulekesa okuti tuna okukala nohole na Jeova movipuka aviho.

8. Oñgeni matulekesa ku Huku okuti tumuhole?

⁸ Tulekesa okuti tuhole Huku nomutima wetu auho, nomuenyo wetu auho, nonondunge mbetu ambuho tyina tutanga apeho Ombimbiliya, nokulinga etyi etuita, nokuivisa nombili onondaka onongwa  Mbouhamba. (Mat. 24:14; Rom. 12:1, 2) Inkha tulinga ovipuka ovio, oupanga wetu nae maupame vali. (Tia. 4:8) Kamatutyivili okupopia ovipuka aviho vilekesa omokonda yatyi tuesukisila okukala nohole na Huku. Mahi, matupopipo vimwe.

9. Tuna okukala nohole na Jeova mokonda yatyi?

⁹ Jeova Omutungi wetu Nomuavi. Paulu wati: “Tuna omuenyo, tuendaenda nokukahiko mokonda yae.” (Atos 17:28) Jeova wetuavela ohi ei ongwa opo tukalemo. (Sal. 115:16) Tupu utuavela okulia, novipuka ovikuavo opo tutualeko nomuenyo. Otyo Paulu apopilile ovanthu mo Listra okuti kavesukisile okufenda ovilolo mahi vena okufenda Jeova, “Huku una omuenyo.” Paulu wapopile konthele ya Huku okuti: “Oe ulinga ovipuka oviwa, okumuavela ombila yokeulu nomivo viovikuna, okuyulisa nawa omitima vienyi nokulia nehambu.” (Atos 14:15-17) Jeova utuavela noluembia atyiho tuesukisa. Olio ehunga ewa liokukala nohole Nomutungi wetu Omunene.​—Ecl. 12:1.

10. Ofeto yeyovo itukalesa ñgeni?

¹⁰ Huku makamanako onkhali nononkhia tuapiñgana ku Andau. (Rom. 5:12) Ombimbiliya yati: “Huku wetulekesa oluembia lwae ena nonthue, puetyi Kristu ankhia mokonda yetu, etyi ankho onthue nkhele tuvakuankhali.” (Rom. 5:8) Inkha tyilityili tulivela, nokukala nekolelo motyilikutila tyofeto yeyovo, Huku metuevela ononkhali mbetu. Tupandula unene Jeova mokonda wakala noluembia olunene onthue mokutuma Omona wae opo ankhie mokonda yetu.​—João 3:16.

11, 12. Omononkhalelo patyi Jeova etuavela ekevelelo?

¹¹ Jeova wetuavela ekevelo liokukakalako apeho. (Rom. 15:13) Ekevelelo olio litukuatesako okukoleleya tyina ekolelo lietu lilolwa. Ovalembulwa vekolelo vena ekevelo liokukakala apeho keulu. (Rev. 2:10) Ovanthu ovakuavo vekolelo vena ekevelelo liokukakala apeho Momphangu Yombembwa pano pohi. (Luc. 23:43) Ekevelelo olio litukalesa ñgeni? Litukalesa nehambu, nombembwa, nohole na Huku utuavela “kese otyiawa otyiwa notyali tyafuapo.”​—Tia. 1:17.

¹² Huku utuavela ekevelelo lietutilo. (Atos 24:15) Tyitunumanesa unene tyina omunthu umwe tuhole amankhi. Mahi katulili ngetyi tyilila vana “vehena ekevelelo,” mokonda Jeova wetulaa okuti makatutilisa vokuankhia. (1 Tes. 4:13) Jeova Huku ukevelela vali nehambu omuvo oo tyipona onthue. Tyotyili, uhanda okututilisa ovanthu ovanyingi-nyingi, haunene vokuna ekolelo, ngomuviuki Job. (Jó 14:15) Soka ehambu matukakala nalio tyina vokuatutiliswa vamakondoka okukala nomuenyo pano pohi. Tuahambukwa unene na Tate yetu woluembia keulu, wetuavela ekevelelo ewa lietutilo!

13. Oñgeni tutyii okuti Huku tyilityili wasuka nonthue?

¹³ Jeova tyilityili wesuka nonthue. (Tanga Salmo 34:6, 18, 19; 1 Pedro 5:6, 7.) Alo umwe hono, tupondola okulitehela okuti tuapama mokonda tutyii okuti Huku apeho wafuapo pala okukuatesako vana vena ekolelo mwe. (Sal. 79:13) Mahi soka kovipuka oviwa Huku meketulingila komutwe. Ohamba Youhamba wa Huku o Jesus Kristu, iya makamanako oungangala, nonya, novivi pano pohi. Iya Huku makaavela ombembwa ovanthu aveho ovataveli, novipuka aviho vesukisa opo vakale nehambu. (Sal. 72:7, 12-14, 16) Tyina tusokolola komilao ovio, tyitulunda okukala nohole na Huku yetu nomutima wetu auho, nomuenyo wetu auho, nononkhono mbetu ambuho, nonondunge mbetu ambuho.​—Luc. 10:27.

14. Huku wetuavela elao patyi?

¹⁴ Jeova wetuavela elao enene liokukala  Onombangi mbae. (Isa. 43:10-12) Tuna ohole na Huku mokonda wetuavela omphitilo yokuvatela ouhamba wae wavilapo, nokupopila aveho vamona ononkhumbi ekevelelo lietu. Tuna ekolelo nonthumbi yesukisa opo tuave oumbangi konthele yonondaka onongwa. Omokonda yatyi? Omokonda etyi tupopia tyikahi Mondaka ya Huku, Ombimbiliya, iya omilao viae apeho vifuisuapo. (Tanga Josué 21:45; 23:14.) Pena omahunga omanyingi okukala nohole na Jeova. Mahi oñgeni tupondola okulekesa okuti tumuhole?

15. Oñgeni okutanga Ondaka ya Huku nokuendelamo tyipondola okutukuatesako?

¹⁵ Lilongesa apeho Ondaka ya Huku nokuendelamo. Okulinga ngotyo, tyilekesa okuti tuhole Jeova iya tyotyili tuhanda Ondaka yae ituhongolele. (Sal. 119:105) Tyina tumona ononkhumbi, tupondola okupamekwa nonondaka onongwa ngombu: “Ove Huku, ove kumatombo omutima wateka-teka nokuamiangulwa.” “Ove Jeova, oluembia luove lutualako nokumphameka. Tyina omalusoke ange asukalalesa alinga omanyingi momutima wange, eungumaneso liove liahimbika okunkhalesa nawa.” (Sal. 51:17; 94:18, 19) Jeova una okankhenda navana vamona ononkhumbi, tupu Jesus ankho una okankhenda novanthu. (Isa. 49:13; Mat. 15:32) Tyina tutanga Ombimbiliya, tupondola okulilongesa konthele yoluembia Jeova ena nonthue. Iya otyo tyitukuatesako okuyawisa ohole tuna nae.

16. Omokonda yatyi okulikuambela apeho tyipondola okutukuatesako okuyawisa ohole tuna na Huku?

¹⁶ Likuambela apeho ku Huku. Tyina tulikuambela ku Huku atumono okuti wakumbulula omalikuambelo etu, ohole yetu mwe iliyawisa. (Sal. 65:2) Mongeleka, hamwe tuanoñgonoka okuti Huku kayekele tuyondyue alo tuhevili vali okukoleleya. (1 Cor. 10:13) Inkha tukala notyiho iya atulikuambela ku Jeova nomutima auho, tupondola okukala “nombembwa ya Huku.” Ombembwa oyo, o Jeova vala upondola okutuavelayo. (Fil. 4:6, 7) Pamwe, tupondola okulinga elikuambelo momutima ngetyi tyalingile Neemia, iya atuimbuka okuti Jeova wetukumbulula. (Nee. 2:1-6) Inkha tutualako nokulikuambela  iya atumono okuti Jeova ukahi nokukumbulula omalikuambelo etu, ohole yetu mwe iliyawisa. Tyina ekolelo lietu lilolwa, matukala nonthumbi yokuti Jeova metukuatesako okukoleleya.​—Rom. 12:12.

17. Inkha tuhole Huku, oñgeni matutale omaliongiyo?

¹⁷ Enda apeho komaliongiyo, no kovionge. (Heb. 10:24, 25) Ova Isilayeli ankho veliongiya opo vatehelele nokulilongesa konthele ya Jeova opo vetyivile okumufenda nonthilo onene, nokutavela Ovitumino viae. (Deu. 31:12) Inkha tyilityili tuhole Huku, matuende apeho komaliongiyo. (Tanga 1 João 5:3.) Tulingei atyiho tuvila opo tuende komaliongiyo aeho. Tyotyili, tuhayekei natyike tyitupole ohole ankho tuna na Jeova etyi tuahimbika okulilongesa konthele yae.​—Rev. 2:4.

18. Ohole tuna na Huku itulunda okulinga tyi?

¹⁸ Kala nombili mokupopila vakuenyi “otyili tyonondaka onongwa.” (Gál. 2:5) Ohole yetu mu Huku itulunda okupopila vakuetu konthele Youhamba wa Huku. Mo Armagedom, Ohamba ya Huku, Jesus, makaamena onkhalelo ya Jeova yokutumina. (Sal. 45:4; Rev. 16:14, 16) Tyituhambukiswa unene okukuatesako ovanthu okulilongesa konthele yoluembia lwa Huku, nomulao wae wouye omupe!​—Mat. 28:19, 20.

19. Omokonda yatyi tuesukisila okupanda ovakulu vewaneno?

¹⁹ Lekesa okuti upanda ovakulu vewaneno. (Atos 20:28) Jeova apeho uhanda ouwa wetu, otyo etuavelela ovakulu vewaneno. Ovakulu vewaneno vekahi “ngomphangu yokuholama omphepo, nomphangu yokuholama ombila, ngonondongi mbomeva momaluhandya, ngokafi konkhanda onene mokati komutenya.” (Isa. 32:1, 2) Soka kehambu tukala nalio tyina kuya omphepo onene ine ombila iya atuvasi omphangu yokuholama ine tyina omutenya watokota unene iya atuvasi okafi! Tupu, ovakulu vewaneno vetukuatesako nokutuavela ondundo yesukisa opo tutualeko okuumbila Jeova namphila tuna ovitateka. Omokonda yatyi tutavelela kovakulu vewaneno? Omokonda tupanda ‘ovakulu ovo vewaneno,’ nokuna ohole na Huku na Kristu, Omutwe weuaneno.​—Efé. 4:8; 5:23; Heb. 13:17.

20. Inkha uhole Huku, oityi molingi?

²⁰ Inkha tukala noupanga omuwa na Jeova, kamatukala ‘vala ovateheleli vondaka, mahi matuifuisapo.’ (Tanga Tiago 1:22-25.) “Omufuisipo wondaka ya Huku,” ukala nekolelo limulunda okuundapa nombili movilinga viokuivisa, nokuava omakumbululo momaliongiyo. Mokonda tyilityili una ohole na Huku, metavela “ovitumino viafuapo” via Jeova, mavimukuatesako okulinga atyiho Jeova ahanda kwe.​—Sal. 19:7-11.

21. Omalikuambelo etu tulinga nomutima auho tupondola okueeleka natyi?

²¹ Tulikuambela apeho ku Jeova Huku mokonda tuna ohole nae. Mo Isilayeli, ovanakwa ankho vayoka oisesu pala Jeova ononthiki ambuho. Ohamba David waelekele omalikuambelo ae noisesu etyi aimba okuti: “Elikuambelo liange likale liapongiyua ngo isesu kolupala luove [Jeova]. Okukatula omaoko ange, tyikale ngotyiawa tyovilia tyo kokangulohi.” (Sal. 141:2; Êx. 30:7, 8) Jeova watehelelele omalikuambelo a David. Inkha tulikuambela nomutima auho, nokueliola omutima, nokupandula, omalikuambelo etu tupu maakala ngatyina oisesu iya maahambukiswa Huku.​—Rev. 5:8.

22. Oityi matulilongesa monthele ilandulako?

²² Jesus wapopia okuti tuna okukala nohole na Huku, mahi tupu wapopia okuti tuna okukala nohole navakuetu. (Mat. 22:37-39) Okukala nohole na Jeova, novitumino viae, matyitukuatesako okukala nohole navakuetu. Monthele mailandulako, matulilongesa oityi otyo tyilekesa.